Jehova Wanika Samsoni Emandla

Ema-Israyeli lamanyenti abesabuyele ekukhonteni titfombe, ngako Jehova wavumela emaFilisti kutsi abuse live lawo. Kodvwa akhona ema-Israyeli labetsandza Jehova. Lomunye wawo bekunguManowa. Yena nemkakhe bebete bantfwana. Ngalelinye lilanga Jehova watfuma ingilosi kutsi iye kumfati waManowa. Lengilosi yatsi kuye: ‘Utawuba nendvodzana. Itawusindzisa ema-Israyeli kumaFilisti. Itawuba ngumNaziri.’ Uyati kutsi bekubobani emaNaziri? Bekutinceku taJehova letikhetsekile. EmaNaziri abengakavumeleki kutsi ahhule tinwele.

Ngekuhamba kwesikhatsi, Manowa waba nendvodzana futsi wayetsa watsi nguSamsoni. Nakakhula Samsoni, Jehova wamnika emandla lamakhulu. Wabulala libhubesi ngetandla takhe. Ngalelinye lilanga Samsoni wabulala emaFilisti langu-30. EmaFilisti abemnyanya futsi afuna tindlela tekumbulala. Ngalobunye busuku Samsoni aseGaza alele, emaFilisti ambhacela egedeni kuze atombulala ekuseni. Kodvwa ekhatsi nebusuku Samsoni wavuka, waya egedeni wafike walikhipha. Waletfwala wahamba nalo waya etulu entsabeni lengaseHebroni.

Ngekuhamba kwesikhatsi emaFilisti aya kuDelila lobekayintfombi yaSamsoni, afike atsi: ‘Sitakubhadala ngetinhlavu telisiliva letitinkhulungwane nawungatfola kutsi yini leyenta Samsoni abe nemandla. Sifuna kumbamba futsi simfake ejele.’ Delila abefuna lemali ngako wavuma. Samsoni wacale wala kumtjela kutsi uwatsatsaphi lamandla lanawo. Kodvwa Delila wamncenga waze wamtjela imfihlo yakhe. Watsi: ‘Angikaze ngihhule enhloko ngobe ngingumNaziri. Nangingahhulwa, emandla ami atawuhamba kimi.’ Samsoni wenta liphutsa lelikhulu yini ngekutsi amtjele?

Delila watsi kulamaFilisti: ‘Sewungitjelile imfihlo yakhe.’ Walalisa Samsoni ematsangeni akhe wase umhhula tinwele takhe. Delila wamemeta watsi: ‘Samsoni, nankha emaFilisti sekakhona!’ Samsoni wavuka futsi besekete emandla. EmaFilisti ambamba amkhipha emehlo ase amfaka ejele.

Ngalelinye lilanga emaFilisti lamanyenti abehlangene ndzawonye ethempelini lankulunkulu wawo longuDagoni, abememeta atsi: ‘Nkulunkulu wetfu usinike Samsoni! Bitani Samsoni sitohlekisa ngaye.’ Bammisa emkhatsini wetinsika letimbili futsi bahlekisa ngaye. Samsoni wamemeta watsi: ‘Jehova, ngicela ungicinise kwekugcina nje.’ Ngaleso sikhatsi tinwele taSamsoni besetiphindze titindze. Wafuca letinsika telithempeli ngemandla akhe onkhe. Lesakhiwo sabhidlika sabulala bonkhe bantfu lebebasekhatsi kuso kuhlanganise naSamsoni.