Ingilosi YaJehova Yamvikela Hezekiya

UMbuso wase-Asiriya besewutincobile tive letilishumi taka-Israyeli. Senaheribi inkhosi yase-Asiriya besekafuna kuncoba tive letimbili takaJuda. Wacala kutihlasela ngekulandzelana kwato. Kodvwa sive lebekafuna kusincoba bekuyiJerusalema. Senaheribi abengati kutsi Jehova uyayivikela iJerusalema.

Hezekiya inkhosi yakaJuda waniketa Senaheribi imali lenyenti kuze angayihlaseli iJerusalema. Nobe kunjalo, Senaheribi wayitsatsa lemali kodvwa wachubeka watfumela libutfo lakhe lelinemandla kutsi lihlasele iJerusalema. Bantfu bakulelidolobha besaba kakhulu ngobe i-Asiriya beyisedvute. Ngako Hezekiya watsi kubo: ‘Ningesabi. Ema-Asiriya anemandla, kodvwa Jehova utasenta sibe nemandla lamakhulu kunawo.’

Senaheribi watfumela Rabushake kutsi ayohlekisa ngebantfu baseJerusalema. Rabushake wema ngaphandle kwalelidolobha wamemeta watsi: ‘Jehova ngeke anikhulule. Ningavumi kuyengwa nguHezekiya. Kute nkulunkulu longakhona kunisindzisa esandleni senkhosi yetfu.’

Hezekiya wabuta Jehova kutsi kufanele enteni. Jehova wamphendvula watsi: ‘Ungesabi ngenca yalamavi lowevile. IJerusalema ngeke inikelwe esandleni senkhosi yase-Asiriya.’ Ngemuva kwaloko Hezekiya watfola tincwadzi letibuya kuSenaheribi. Betitsi: ‘Tinikele. Jehova angeke akusindzise.’ Hezekiya wathantaza watsi: ‘Awu Jehova, ngicela usisindzise kuze yonkhe imibuso yemhlaba yati kutsi wena wedvwa unguNkulunkulu weliciniso.’ Jehova watsi kuye: ‘Inkhosi yase-Asiriya angeke ingene kulelidolobha. Ngitalivikela lelidolobha lami.’

Senaheribi abetitjela kutsi utayincoba iJerusalema. Kodvwa ngalelinye lilanga ebusuku, Jehova watfumela ingilosi lapho bekunemasotja khona. Lengilosi yabulala emasotja langu-185 000. Onkhe emasotja eNkhosi Senaheribi afa. Wabuyela emuva e-Asiriya sekancotjiwe. Jehova wamvikela Hezekiya kanye nebantfu baseJerusalema njengobe abetsembisile. Kube bewuseJerusalema, bewungametsemba yini Jehova?