Lubondza LwaseJerusalema

Asesibuyele emuva kancane. Nehemiya inceku yenkhosi Athazeksesi abengum-Israyeli futsi ahlala edolobheni lasePheresiya eSusa. Bhuti waNehemiya wachamuka kaJuda aletse tindzaba letibuhlungu, watsi: ‘Bantfu lababuyele eJerusalema abakaphephi. Lolubondza kanye nemagede labhidlitwa bantfu baseBhabhulona aluzange lwakhiwe kabusha.’ Nehemiya weva buhlungu. Abefuna kuya eJerusalema ayobasita, ngako wathantaza wacela kutsi inkhosi imane imvumele ahambe.

Inkhosi yabona kutsi Nehemiya abengakajabuli. Yatsi: ‘Ngiyacala kukubona unje. Kwentekeni?’ Nehemiya watsi: ‘Ngingajabula njani nje lidolobha lami, iJerusalema, libhidlitiwe?’ Inkhosi yambuta yatsi: “Ufuna ngikwenteleni?” Ngekushesha Nehemiya wathantaza ngenhlitiyo. Wase utsi: ‘Ngicela kuya eJerusalema ngiyokwakha kabusha lolubondza.’ Inkhosi Athazeksesi yamvumela Nehemiya kutsi ahambe futsi yaciniseka kutsi utawuhamba kahle kuloluhambo lwakhe loludze. Wase wenta Nehemiya indvuna yakaJuda futsi wamniketa tingodvo tekwakha emagede alelidolobha.

Nakefika eJerusalema, Nehemiya wabuka lubondza lwalelidolobha. Wase ubita baphristi kanye nebabusi watsi kubo: ‘Lesimo simatima. Lolubondza lubhidlikile kufanele silwakhe kabusha.’ Bavuma base bacala kulwakha kabusha.

Kodvwa letinye titsa tema-Israyeli tahlekisa ngabo tatsi: ‘Ngisho nemphungushe ingaluwisa lolubondza lenilwakhako.’ Labantfu labakhako abazange babanake bachubeka nekwakha. Lolubondza balwakha lwaya etulu futsi lwacina.

Letitsa tancuma kutsi titawutungeleta iJerusalema futsi tiyihlasele bangakagadzi. Nakeva loku emaJuda acala kwesaba. Kodvwa Nehemiya watsi kuwo: ‘Ningesabi, Jehova unatsi.’ Watfumela bantfu labagadzako kutsi bayovikela tisebenti, ngako-ke letitsa tehluleka kubahlasela.

Ngemuva kwemalanga langu-52, besebacedzile kwakha lubondza nemagede. Nehemiya wabita onkhe emaLevi nakuniketelwa iJerusalema. Wawehlukanisa ekhatsi aba ngemacembu lamabili kuze atewuhlabela. Bakhuphuka ngetitebhisi telubondza lwelidolobha bahamba ngetindlela letehlukene baze bayewufika eGedeni Lemanti. Badlala emacilongo, bokhencekhence kanye nemahabhu futsi bahlabela badvumisa Jehova. Ezra naNehemiya bahamba nemacembu lamabili lahlukene baze bahlangana ethempelini. Bonkhe bantfu, lokufaka ekhatsi emadvodza, bafati nebantfwana benta iminikelo kuJehova. Umsindvo wabo wekujabula bewuvakala yonkhe indzawo.