Jesu Washumayela NgeMbuso WaNkulunkulu

Ngekushesha nje ngemuva kwekubhajatiswa kwakhe, Jesu wacala kushumayela watsi: ‘UMbuso waNkulunkulu sewusondzele.’ Bafundzi bakhe bebahamba naye njengobe ashumayela eGalile naseJudiya. Ngesikhatsi Jesu abuyela eNazaretha, waya esinagogeni wafike wavula umculu wa-Isaya futsi wawufundza ngalokuvakalako watsi: ‘Jehova unginike umoya longcwele kuze ngishumayele tindzaba letimnandzi.’ Bekusho kutsini loko? Bekusho kutsi Jehova abemnike umoya longcwele kuze ashumayele tindzaba letimnandzi ngisho nobe bantfu bebafuna kumbona enta timangaliso. Wase utsi: ‘Lamuhla lesiphrofetho sigcwalisekile.’

Jesu waya eLwandle lwaseGalile futsi watfola bantfu labadweba timfishi. Watsi kubo: “Ngilandzeleni, ngitawunenta badwebi bebantfu.” Labantfu bekuboPhetro, Andreya, Jakobe kanye naJohane. Ngekushesha bayekela kudweba timfishi bamlandzela. Bahamba naJesu kulo lonkhe laseGalile bashumayela ngeMbuso waNkulunkulu. Bashumayela emasinagogeni, etimakethe nasetitaladini. Bantfu labanyenti bebabalandzela nobe ngukuphi lapho baya khona. Bantfu bebakhuluma ngaJesu kuyo yonkhe indzawo ngisho naseSiriya.

Ngekuhamba kwesikhatsi, Jesu wanika labanye balandzeli bakhe emandla ekuphilisa bantfu kanye nekucosha emadimoni. Labanye bebamlandzela nobe ngukuphi lapho ashumayela khona. Bafati labanyenti lokufaka ekhatsi Mariya waseMagdala, Jwana, Susana kanye nalabanye bebanakekela Jesu nebafundzi bakhe.

Ngemuva kwekufundzisa bafundzi bakhe, Jesu wabatfuma kutsi bayoshumayela. Njengobe bebashumayela eGalile, bantfu labanyenti baba bafundzi futsi babhajatiswa. Bebasebanyenti bantfu lebebafuna kuba bafundzi futsi Jesu waze wabafanisa nensimu lelungele kuvunwa. Watsi: ‘Thantazani kuJehova nicele kutsi engete tisebenti letitawuvuna.’ Ngekuhamba kwesikhatsi wakhetsa bafundzi labangu-70 futsi wabatfuma kutsi bayoshumayela eJudiya. Bafundzisa bonkhe bantfu ngeMbuso waNkulunkulu. Nababuya bafike bacocela Jesu loko lebekwentekile. Sathane abengeke akhone kubayekelisa umsebenti wekushumayela.

Jesu wenta konkhe lokusemandleni akhe kuze bafundzi bakhe bachubeke bashumayela ngisho sekabuyele ezulwini. Watsi kubo: ‘Letindzaba letimnandzi kufanele nitishumayele emhlabeni wonkhe. Fundzisani bantfu liVi laNkulunkulu futsi nibabhabhatise.’