Jesu Ukhetsa Sawula

Sawula abengumRoma futsi abetalelwe eThasusi. BekangumFarisi aphindze anelwati ngemtsetfo wemaJuda futsi abewenyanya emaKhristu. Bekahamba afuna bonkhe labangemaKhristu aze abakhiphe ngisho nasetindlini kuze nje ababophe. Bekakhona nangalesikhatsi sicumbi sebantfu sigcoba Stefano ngematje waze wafa.

Sawula akuzange kumenetise kubopha emaKhristu lebekahlala eJerusalema kuphela. Wacela imvume kumphristi lophakeme yekuya nasedolobheni laseDamaseko kuze ayobopha emaKhristu lebekahlala khona. Njengobe Sawula bekasondzela kulelidolobha, kukhanya lokuvela ezulwini kwamanyata ndzawo tonkhe futsi wawa. Weva livi litsi: “Sawula, ungihluphelani?” Sawula wabuta watsi: “Ungubani wena?” Laphendvula latsi: ‘NginguJesu. Hamba uye eDamaseko futsi utawufike utjelwe kutsi kufanele wenteni.’ Ngaso leso sikhatsi, Sawula wavaleka emehlo futsi bambamba ngesandla bahamba naye.

EDamaseko, bekunemKhristu lowetsembekile lobekutsiwa ngu-Ananiyase. Jesu wakhuluma naye embonweni watsi: ‘Hamba uye endlini yaJudasi lesemgwacweni lobitwa ngekutsi nguMgwaco Locondzile, futsi ufune Sawula.’ Ananiyase watsi: ‘Nkhosi, tinyenti tintfo lengitivile ngalendvodza, futsi ifaka bafundzi bakho ejele.’ Kodvwa Jesu watsi kuye: ‘Hamba kuye. Ngimkhetsile kutsi ashumayele tindzaba letimnandzi emhlabeni wonkhe.’

Ngako Ananiyase waya lapho bekunaSawula khona, wafike watsi kuye: ‘Sawula, mnaketfu, Jesu ungitfumile kutsi ngitewuvula emehlo akho.’ Ngemuva kwaloko Sawula wase uyabona. Wafundza ngaJesu, wase uba ngumlandzeli wakhe. Wabhajatiswa futsi wase ucala kushumayela emasinagogeni akanye nalamanye emaKhristu. Ucabanga kutsi ativa njani emaJuda nawabona Sawula afundzisa bantfu ngaJesu? Atsi: ‘Lomuntfu akusuye yini lona lobekahlupha balandzeli baJesu kamatima?’

Kwaphela iminyaka lemitsatfu solo Sawula ashumayela eDamaseko. EmaJuda besekamenyanya Sawula futsi ase enta lisu lekumbulala. Kodvwa labanye bafundzi beva ngalelisu lemaJuda base bayamsita kutsi abaleke. Bamtsatsa bamehlisa ngelubondza ebusuku, bamfake kubhasikidi.

Ngesikhatsi Sawula sekaseJerusalema, wetama kutihlanganisa nalabanye bazalwane lapho, kodvwa bebamesaba. Lomunye umfundzi lobekalungile lokutsiwa nguBhanabasi wahamba naSawula baya kubaphostoli wafike wabachazela kutsi Sawula sewushintje mbamba. Sawula wachubeka ashumayela tindzaba letimnandzi ngenkhutsalo eJerusalema. Ngekuhamba kwesikhatsi wase ubitwa ngekutsi nguPawula.