Tifundvo Lesititfola Embonweni Wahezekeli Lomayelana Nelithempeli

Kukhonta Lokuhlantekile Kuyaphakanyiswa Futsi Kuyavikelwa

Lelithempeli lelisembonweni liphakanyiselwa “etikwentsaba lendze kakhulu” (1). Sesikuphakamisile yini kukhonta lokuhlantekile, sakwenta kweta kucala ekuphileni kwetfu?

Lubondza lolutungeletako (2), lebelitungeleta lithempeli lebelisemkhatsini wendzawo lenkhulu (3), lisikhumbuta kutsi akukafaneli sivumele nobe yini ingcolise kukhonta kwetfu Jehova. Nangabe tintfo ‘letingasingcwele’ kufanele tilahlelwe khashane nekukhonta lokuhlantekile, loko kusho kutsi umkhulekeli waJehova lamuhla kufanele atimisele kakhulu kushiya kutiphatsa lokubi nobe lokungakahlanteki!—Hez. 42:20.

Tibusiso Taphakadze

Umfula logeleta usuka endzaweni lengcwele yelithempeli uyachubeka ukhula uba ngumfula lomkhulu loletsa kuphila, futsi wenta nelive linotse (4). Letibusiso kutawucocwa ngato eSehlukweni 19 salencwadzi.

Timiso Letifanako Kubo Bonkhe

Emagede langephandle laphakeme (5) nemagede langekhatsi (9) asikhumbuta kutsi Jehova unetimiso letiphakeme tekutiphatsa lalindzele kutsi tilandzelwe ngibo bonkhe labanencenye ekukhonteni lokuhlantekile. Naka kutsi lamagede angaphandle newangekhatsi ayafana kuto tonkhe tinhlangotsi. Loku kuyafaneleka ngobe timiso taJehova letilungile tiyafana kuto tonkhe tinceku takhe, ngisho nobe tenta muphi umsebenti nobe tinamaphi emalungelo.

Kudla Lokusetafuleni LaJehova

Emakamelo ekudlela (8) asikhumbuta kutsi etikhatsini tasendvulo, bantfu bebayidla leminye imihlatjelo lebebayiletsa ethempelini, ngemcondvo lotsite, bekufana nekutsi badla naJehova. Loko kwehlukile kuloko lokwenteka ethempelini laNkulunkulu lelikhulu, lelo emaKhristu lakhonta kulo lamuhla, ngobe “umhlatjelo munye” sewuvele unikelwe. (Heb. 10:12) Kodvwa siyachubeka sinikela umnikelo wekudvumisa.—Heb. 13:15.

Sicinisekiso Lesivela KuNkulunkulu

Kungenteka tonkhe letintfo letikalwe kulelithempeli tiyakumangalisa. Kodvwa tisifundzisa sifundvo lesibalulekile: Tisicinisekisa ngekutsi injongo yaJehova yekubuyisela kukhonta lokuhlantekile itawufezeka nakanjani futsi angeke ishintje njengobe nje naletilinganiso talokukaliwe tingashintji. Nanobe Hezekeli angaboni muntfu kulombono, kodvwa ubhala umyalo waJehova loshubile loya kubaphristi, baholi kanye nakubantfu. Tonkhe tinceku taNkulunkulu kufanele tibambelele etimisweni takhe letilungile.