Singamkhonta Njani Nkulunkulu Ngendlela Lemjabulisako?

Njengobe sifundzile esifundvweni lesendlulile, akusito tonkhe tinkholo letijabulisa Nkulunkulu. Nobe kunjalo, singamkhonta uMdali wetfu ngendlela lemjabulisako. “Kukhonta [nobe kukholwa]” lokunjani lokumjabulisako? (Jakobe 1:27; umbhalo longentansi) Cabanga ngaloko lokufundziswa liBhayibheli.

1. Kufanele kusekwelwe kuphi kukhonta kwetfu?

Kukhonta kwetfu kufanele kusekelwe eBhayibhelini. Jesu watsi kuNkulunkulu: “Livi lakho liliciniso.” (Johane 17:17) Letinye tinkholo atilinaki liciniso leliseVini laNkulunkulu leliphefumulelwe, liBhayibheli. Esikhundleni salo, tifundzisa kucabanga kwebantfu kanye nemasiko abo. Kodvwa Jehova akajabuli ngalabo ‘labalahla imitsetfo yakhe.’ (Fundza Makho 7:9.) Ngakulolunye luhlangotsi, Jehova uyajabula nasilalela loko lokushiwo liBhayibheli futsi silandzela seluleko salo.

2. Kufanele simkhonte njani Jehova?

Kufanele sikhonte Jehova kuphela ngobe unguMdali wetfu. (Sembulo 4:11) Loku kusho kutsi kufanele simtsandze futsi sikhonte yena kuphela, ngaphandle kwekusebentisa tithico.—Fundza Isaya 42:8.

Kukhonta kwetfu kufanele kube ‘ngcwele futsi kwemukeleke’ kuJehova. (KubaseRoma 12:1) Loku kusho kutsi kufanele silalele imitsetfo yakhe. Sibonelo nje, labo labatsandza Jehova bayayitsandza futsi bayayilalela imitsetfo yakhe lemayelana nemshado. Baphindze bayibalekele imikhuba lelimatako, lenjengekusebentisa ligwayi kanye nekusebentisa kabi tidzakamiva nobe tjwala.a

3. Kungani kufanele sikhonte Nkulunkulu sikanye nalabanye?

Imihlangano lesibanayo njalo ngeliviki, isiniketa litfuba ‘lekudvumisa Jehova . . . ebandleni.’ (Tihlabelelo 111:1, 2) Lenye indlela lesikwenta ngayo loku, kuhlabela tingoma tekudvumisa Nkulunkulu. (Fundza Tihlabelelo 104:33.) Jehova usicela kutsi siye emihlanganweni ngobe uyasitsandza, futsi uyati kutsi itasisita sijabulele kuphila kuze kube phakadze. Nasihlangene ndzawonye, siyakhutsatana.

CHUBEKA UFUNISISA

4. Akukafaneli sisebentise titfombe nasikhonta Nkulunkulu

I-VIDEO: Nkulunkulu Uyakwemukela Yini Kukhontwa Ngetithico? (3:26)

• Yini leyenteka lapho bantfu baNkulunkulu bangesikhatsi sekubhalwa kweliBhayibheli betama kumkhonta basebentisa sithico?

Labanye bantfu betama kusondzela kuNkulunkulu ngekutsi basebentise titfombe nabamkhonta. Kodvwa kwenta kanjalo kungamenta akhweshe yini kubo? Fundza Eksodusi 20:4-6 ne-Tihlabelelo 106:35, 36, bese nicoca ngalemibuto:

• Ngutiphi letinye tintfo nobe tithico loke wabona bantfu batisebentisa nabakhonta Nkulunkulu?

• Jehova utiva njani ngekusetjentiswa kwetithico?

• Wena utiva njani ngekusetjentiswa kwetithico?

5. Kukhonta Jehova kuphela kuyasikhulula etimfundzisweni letingemanga

I-VIDEO: Liciniso Langikhulula (5:16)

Fundza Tihlabelelo 91:14, bese nicoca ngalombuto:

• Yini Jehova letsembisa kusentela yona nasikhombisa kutsi siyamtsandza ngekukhonta yena yedvwa?

6. Sikhonta Nkulunkulu emihlanganweni yelibandla

Sidvumisa Jehova futsi sikhutsate nalabanye nasihlabela futsi siphendvula emihlanganweni yelibandla. Fundza Tihlabelelo 22:22, bese nicoca ngalemibuto:

• Ukujabulele yini kuva bantfu baphendvula emihlanganweni?

• Ungatsandza yini nawe kuphendvula?

7. Jehova uyajabula nasitjela labanye ngalesikufundzile

Tinyenti tindlela lesingatisebentisa kuze sitjele labanye emaciniso laseBhayibhelini. Fundza Tihlabelelo 9:1 na-34:1, bese nicoca ngalombuto:

• Yini loyifundze eBhayibhelini longatsandza kuyicocela lomunye umuntfu?

LOKO LESICOCE NGAKO

Sisuke sijabulisa uMdali wetfu nasikhonta yena kuphela, simdvumisa emihlanganweni yelibandla futsi sicocela labanye loko lesikufundzile.

Yini Loyifundzile?

• Singayitfola kuphi indlela yekukhonta leyemukelwa nguNkulunkulu?

• Kungani kufanele sikhonte Jehova kuphela?

• Kungani kufanele sikhonte Nkulunkulu sikanye nalabanye labafuna kumjabulisa?

LOKUNYE LONGAKUHLOLA

Endzabeni letsi “I No Longer Slave for Idols,“ fundza kutsi lomunye wesifazane wakhululeka njani ekukhonteni tithico.

“The Bible Changes Lives” (Sicongosekulindza saJuly 1, 2011, lesitfolakala ngesiNgisi)

Fundza kutsi yini lengakusita uphendvule emihlanganweni yelibandla.

“Dvumisa Jehova Nawusemihlanganweni YebuKhristu” (Sicongosekulindza saJanuary 2019)

Buka kutsi lelinye lijaha lasitakala njani ngekuya emihlanganweni yelibandla ngisho nobe bekumatima kuya.

Jehova Wanginakekela (3:07)

Bantfu labanyenti bakholelwa kutsi siphambano simelela buKhristu, kodvwa kufanele yini sisisebentise nasikhonta Nkulunkulu?

“Kungani BoFakazi BaJehova Bangasisebentisi Siphambano Nabakhonta Nkulunkulu?” (Sihloko lesiku-internet)