Ticondziso Temhlangano Wekuphila KwemaKhristu Nemsebenti Wawo

Luhla Lwalokusekhatsi

• Setfulo 2

• Umcebo LoseVini LaNkulunkulu 3-5

  • Inkhulumo 3

  • Kufunisisa Umcebo EVini LaNkulunkulu 4

  • Kufundvwa KweliBhayibheli 5

• Timisele Emsebentini Wekushumayela 6-14

  • Kucalisa Incociswano 7

  • Kubuyela Kulesicoce Naye 8

  • Kwenta Bafundzi 9

  • Chaza Loko Lokukholelwako 10

  • Inkhulumo 11

  • Longakwenta 12

  • Tindlela Longashumayela Ngato 13

  • Kusetjentiswa Kwema-video Netincwadzi 14

• Kuphila KwemaKhristu 15-16

  • Sifundvo SeliBhayibheli Selibandla 16

• Siphetfo 17

• Kuncoma Neseluleko 18

• Sikhatsi 19

• Kuhambela Kwembonisi Wesigodzi 20

• Liviki Lemhlangano Wesigodzi Nobe Wesifundza 21

• Liviki LeSikhumbuto 22

• Umbonisi Wemhlangano Wekuphila KwemaKhristu Nemsebenti 23

• Sihlalo Wemhlangano Wekuphila KwemaKhristu Nemsebenti 24

• Umeluleki Longumsiti 25

• Emakilasi Laseceleni 26

• Ema-video 27

1. Leticondziso titawusita bonkhe labanetincenye emhlanganweni Wekuphila KwemaKhristu Nemsebenti Wawo. Labo labanetincenye kufanele bacale bafundze leticondziso kanye naleto letikulencwajana letsi Kuphila KwemaKhristu Nemsebenti Wawo bangakacali kulungiselela tincenye tabo. Bonkhe bamemeteli kufanele bakhutsatwe kutsi bahlale bakulungele kubeka tinkhulumo tebafundzi. Labanye labahlala bakhona emhlanganweni welibandla bangatibeka tinkhulumo nangabe bavumelana netimfundziso teliBhayibheli futsi baphila ngendlela levumelana netimiso tebuKhristu. Umbonisi Wekuphila KwemaKhristu kufanele acoce nanoma ngubani lonesifiso sekubeka tinkhulumo tebafundzi, amchazele ngaloko lokufunekako kuze abe ngumfundzi, bese uyamtjela nekutsi uyafaneleka yini. Loku kufanele kwentiwe abe akhona loyo lomfundzela liBhayibheli (nobe umtali wakhe longumKhristu). Lolokufunekako kuyafanana naloko lokudzingekako kuze umuntfu abe ngummemeteli longakabhajatiswa.—od-ZU sehl. 8 sig. 8.

SETFULO

2. Umzuzu munye. Maviki onkhe, ngemuva kwesetfulo nemthantazo, sihlalo weMhlangano Wekuphila KwemaKhristu kufanele ente bantfu balilangatelele loluhlelo lolutawuchubeka. Sihlalo kufanele anake kakhulu emaphuzu latawuzuzisa libandla.

UMCEBO LOSEVINI LANKULUNKULU

3. Inkhulumo: Imizuzu lengu-10. Sihloko kanye neluhlaka lwemaphuzu lamabili nobe lamatsatfu avetiwe kulencwajana letsi Kuphila KwemaKhristu Nemsebenti Wawo. Lenkhulumo itakwabelwa lomdzala nobe inceku lesebentako lefanelekako. Nangabe kucalwa incwadzi lensha yeliBhayibheli kulelo viki, kutawudlalwa i-video leyetfula leyo ncwadzi. Sikhulumi singakhulumela emaphuzu lakule-video lahambelana nesihloko senkhulumo. Nobe kunjalo, kufanele siciniseke kutsi siyawahlanganisa emaphuzu lavetwe kulencwajana yekubhalela. Nasivuma sikhatsi, kufanele asebentise titfombe letikhona, letentelwe kuphelelisa indzaba lokucocwa ngayo. Angakusho lokunye kwatiswa lokukuletinye tikhombo nangabe nje kugcizelela emaphuzu lavetiwe.

4. Kufunisisa Umcebo EVini LaNkulunkulu: Imizuzu lengu-10. Lena yincenye yemibuto netimphendvulo lete setfulo nesiphetfo. Kufanele yabelwe lomdzala nobe inceku lesebentako lefanelekako. Lowenta lesabelo kufanele abute labalalele yonkhe lemibuto. Lokunye futsi, angatikhetsela kutsi lemibhalo lekhonjiwe iyafundvwa yini nome cha. Imphendvulo yalabo labakhonjiwe kufanele itsatse imizuzwana lengu-30 nobe ngephansi.

5. Kufundvwa KweliBhayibheli: Imizuzu lemine. Lesabelo kufanele sentiwe ngumfundzi lomdvuna. Umfundzi kufanele afundze incenye layabelwe, ngaphandle kwekutsi ente singeniso nobe siphetfo. Sihlalo wemhlangano utawusita bafundzi kutsi bafundze emagama njengoba anjalo, bafundze ngekushelela, bagcizelele umcondvo ngendlela lefanele, bashintjashintje kuphakama nekwehla kwelivi, bahlabe likhefu ngendlela lefanele, nekutsi bakhulume ngendlela labavame kukhuluma ngayo. Ngenca yekutsi tabelo tekufundvwa kweliBhayibheli tihle tiba tindze letinye tibe timfishane, ngako umbonisi weKuphila KwemaKhristu kufanele awanake emakhono ebafundzi nakabela bafundzi letabelo.

TIMISELE EMSEBENTINI WEKUSHUMAYELA

6. Imizuzu lengu-15. Lencenye yemhlangano ihlelelwe kutsi inikete nobe ngubani litfuba lekuphrakthiza loko langakwenta emsebentini wekushumayela futsi loko kutamsita atfutfukise likhono lekucoca, kanye nelekushumayela nekufundzisa. Nakudzingekile, labadzala bangase batitfole tabelo tebafundzi. Umfundzi ngamunye kufanele asebentele ephuzwini lelivame kuba kubakaki eceleni kwesabelo sakhe lesikulencwajana letsi Kuphila KwemaKhristu Nemsebenti Wawo. Leliphuzu lingatsatselwa kulencwajana letsi Timisele nobe letsi Tsandza Bantfu. Ngaletinye tikhatsi, kutawuba nencenye letawudzinga kutsi kucocwe nelibandla. Lencenye lena itakwabelwa lomdzala nobe inceku lesebentako lefanelekako.—Fundza sigaba 15 kuze ubone indlela letentiwa ngayo tincenye letidzinga kutsi kucocwe nelibandla.

7. Kucalisa Incociswano: Lesabelo kufanele sentiwe ngumfundzi lomdvuna nobe lomsikati. Umsiti kufanele abe webulili lobufananako nemfundzi nobe kube lilunga lemndeni. Umfundzi kanye nemsiti wakhe bangakhetsa kuma nobe bahlale phansi nabenta sabelo sabo.—Kuze utfole lokunyenti ngaloko longakwenta kanye nendlela longashumayela ngayo nawenta lesabelo, fundza tigaba 12 na-13.

8. Kubuyela Kulesicoce Naye: Lesabelo kufanele sentiwe ngumfundzi lomdvuna nobe lomsikati. Umsiti kufanele abe webulili lobufananako. (km-ZU 5/97 likh. 3) Umfundzi kanye nemsiti wakhe bangakhetsa kuma nobe bahlale phansi nabenta sabelo sabo. Umfundzi kufanele akhombise loko lokufanele kwentiwe nakubuyelwa kumuntfu lowakhombisa kutsi uyatsandza kufundza.—Kuze utfole lokunyenti ngaloko longakwenta kanye nendlela longashumayela ngayo nawenta lesabelo, fundza tigaba 12 na-13.

9. Kwenta Bafundzi: Lesabelo kufanele sentiwe ngumfundzi lomdvuna nobe lomsikati. Umsiti kufanele abe webulili lobufananako. (km-ZU 5/97 likh. 3) Umfundzi kanye nemsiti wakhe bangakhetsa kuma nobe bahlale phansi nabenta sabelo sabo. Lencenye kufanele ikhombise lokufanele kwentiwe nakuchutjwa sifundvo seliBhayibheli lesesivele sichubeka. Akudzingeki setfulo nome siphetfo ngaphandle kwalapho umfundzi asebentela kulelinye lalamaphuzu. Akudzingeki kutsi yonkhe indzaba leyabelwe, ifundvwe ngalokuvakalako, nanobe kute lokubi ngekukwenta.

10. Chaza Loko Lokukholelwako: Nakuyinkhulumo, lencenye kufanele yentiwe ngumfundzi lomdvuna. Nakungumboniso, lencenye ingentiwa ngumfundzi lomdvuna nobe lomsikati. Umsiti kufanele abe webulili lobufananako nobe kube lilunga lemndeni. Umfundzi kufanele aphendvule umbuto losihloko ngendlela lecacile nalenenhlonipho asebentisa sikhombo laniketwe sona. Nakasachubeka nencenye yakhe, umfundzi angancuma kutsi uyasisho sikhombo lesabelo sakhe lesitsatselwe kuso nobe cha.

11. Inkhulumo: Lesabelo kufanele sentiwe ngumfundzi lomdvuna futsi kufanele kube yinkhulumo layibekela libandla. Nangabe inkhulumo isekelwe ephuzwini lelikusandzisanchazo A lencwajana letsi Tsandza Bantfu, umfundzi kufanele avete indlela livesi nobe lamavesi langasetjentiswa ngayo emsebentini wekushumayela. Sibonelo nje, angachaza kutsi lelivesi lisho kutsini, lingasetjentiswa nini, nendlela langalisebentisa ngayo kuze abonisane nalotsite. Nangabe inkhulumo isekelwe ephuzwini lelisesifundvweni lesitsite sencwajana letsi Tsandza Bantfu, umfundzi kufanele akhombise kutsi leliphuzu lingasetjentiswa njani emsebentini wekushumayela. Angakhetsa kukhuluma ngesibonelo lesisephuzwini 1 salesifundvo nobe asebentise lamanye emavesi lakulesifundvo, nangabe kutawusita.

12. Longakwenta: Lolokukulesigaba nakulesi lesilandzelako kusebenta kuphela kulencenye letsi “Kucalisa Incociswano” naletsi “Kubuyela Kulesicoce Naye.” Nangabe kute letinye ticondziso, umgomo wemfundzi kucocela lotsite liciniso leliseBhayibhelini lelivumelana nesimo sakhe futsi amshiye analokutsite langacabanga ngako, lokuyintfo labangacoca ngayo esikhatsini lesitako. Umfundzi angakhetsa sihloko lesisematseni futsi lesitawukhanga bantfu labasensimini lakuyo. Angatikhetsela kutsi uyayisebentisa yini incwadzi nobe i-video lesemaThulusini etfu eKufundzisa. Kunekutsi bente umboniso labawubambe ngenhloko, bafundzi kufanele basikhombise indlela yekucoca nalotsite etimeni letehlukahlukene, njengekuvumela incociswano kutsi ichubeka ngendlela levamile kanye nekukhombisa kutsi uyamkhatsalela lomuntfu.

13. Tindlela Longashumayela Ngato: Kunobe nguyiphi indlela umfundzi labelwe kutsi ashumayele ngayo, kufanele ayente ihambisane nesimo sendzawo. Sibonelo nje:

1. (1) Emtini Ngemuti: Lendlela yekushumayela ifaka ekhatsi kushumayela emtini ngemuti. Kungaba kuya khona matfupha, kushaya lucingo, nobe kubhala incwadzi. Ingaphindze ifake ekhatsi kubuyela kumuntfu lesacoca naye nasishumayela emtini ngemuti.

2. (2) Kushumayela Ungakahleli: Lendlela yekushumayela yenteka ngalesikhatsi ucoca nemuntfu, bese nakuvela litfuba uyamshumayela. Lendlela ingafaka ekhatsi kucocela umuntfu lohlangana naye noma ngukuphi ngalokutsite lokuseBhayibhelini, kungaba semsebentini, esikolweni, endzaweni yangakini, nobe nawugibele kwekuhamba kwemphakatsi.

3. (3) Kushumayela Etindzaweni Tawonkhe Wonkhe: Lendlela ingafaka ekhatsi kushumayela ngencola, kushumayela bantfu labasetindzaweni temabhizinisi, kushumayela etitaladini, emaphakhi, lakupaka khona timoto, nanobe ngukuphi lakunebantfu khona.

14. Kusetjentiswa Kwema-video Netincwadzi: Umfundzi angakhetsa kusebentisa i-video nobe incwadzi, kuye ngetimo. Nangabe sabelo semfundzi sihambisana ne-video nobe akhetsa kuyisebentisa, kufanele ayetfule aphindze acoce ngayo, kodvwa angayidlali.

KUPHILA KWEMAKHRISTU

15. Ngemuva kwengoma, imizuzu lengu-15 yalencenye itawukuba nencenye yinye nobe letimbili letakhelwe kusita labalalele kutsi basebentise liVi laNkulunkulu. Letincenye titakwabelwa labadzala belibandla nome tinceku letisebentako, ngaphandle nangabe kuniketwe sicondziso lesitsite, nobe kutidzingo telibandla lokufanele tentiwe ngulomdzala welibandla. Nangabe lencenye idzinga kutsi umzalwane lowabelwe acoce nelibandla, sikhulumi kufanele sibute imibuto kusukela ekucaleni kwalencenye, kuhlanganise naleyo laniketwe yona kutsi ayibute. Kufanele aciniseke kutsi setfulo sakhe siba sifisha kuze kutawuba nesikhatsi lesenele sekucoca ngawo onkhe emaphuzu labalulekile, kuphindze kube nesikhatsi lesenele sekuphendvula. Nangabe kutawuba nencociswano, kungaba ncono kutsi lona lokutawucocwa naye abe sesiteji nakabutwa imibuto.

16. Sifundvo SeliBhayibheli Selibandla: 30 imizuzu. Lencenye kufanele yabelwe lomdzala welibandla lofanelekako. (Emabandla lanalabadzala labambalwa angasebentisa tinceku letisebentako kuye ngesidzingo.) Sigungu salabadzala kufanele sincume kutsi bobani labafanelekako kutsi bachube Sifundvo SeliBhayibheli Selibandla. Labo labakhetfwe kutsi bachube lesifundvo kufanele basichube ngendlela lezuzisako kuze bakhone nekugcina sikhatsi, bagcizelele imiBhalo leyinhloko, basite bonkhe babone indlela lamaphuzu lasebenta ngayo. Labo labakhetfwe kutsi bachube lesifundvo bangasitakala nabangafundza ticondziso letikhona mayelana nendlela yekuchuba tincenye letinemibuto netimphendvulo (w23.04 likh. 24, libhokisi). Nangabe sekuphelile loko bekufanele kucocwe ngako kuleloviki, kute sidzingo sekuselula leso sifundvo. Nakungenteka, liviki neliviki kufanele kusetjentiswe bazalwane labehlukahlukene labachuba lesifundvo kanye nalabo labafundza tigaba. Nangabe sihlalo weMhlangano Wekuphila KwemaKhristu Nemsebenti aniketa sicondziso sekutsi lesifundvo kufanele sifishaniswe, umchubi utatincumela kutsi utakwenta kanjani loko. Angase akhetse kutsi letinye tigaba tifundvwe letinye tingafundvwa.

SIPHETFO

17. Imizuzu lemitsatfu. Sihlalo weMhlangano Wekuphila KwemaKhristu Nemsebenti utawubuketa emaphuzu lalusito lafundvwe kulomhlangano. Kufanele aphindze asho lokutawucocwa ngako evikini lelitako. Angase asho emagama alabatawube babeka tikhulumo tebafundzi ngeliviki lelitako nangabe sikhatsi sivuma. Nangabe kunetimemetelo kufanele tifundvwe kanye netincwadzi, futsi sihlalo wemhlangano kufanele ente konkhe loku ngesikhatsi sekasho emavi ekwephetsa. Imininingwane lemayelana netintfo letentiwa njalo, njengemalungiselelo ensimu kanye neluhlelo lwekuhlanta liHholwa LeMbuso, akukafaneli imenyetelwe endzaweni yesikhulumi kodvwa kufanele ibekwe ebhodini lekwatiswa. Nangabe sihlalo abona kutsi angeke akhone kwenta timemetelo nobe kufundza tincwadzi ngalesikhatsi lesibekelwe emavi ekwephetsa, kufanele acele bazalwane labanetinkhulumo kulencenye letsi Kuphila KwemaKhristu kutsi banciphise tinkhulumo tabo ngemizuzu ledzingekako. (Fundza tigaba 16 na-19.) Umhlangano utawuphetsa ngengoma nemthantazo.

KUNCOMA NESELULEKO

18. Sihlalo weMhlangano Wekuphila KwemaKhristu Nemsebenti unemzuzu munye ngemuva kwenkhulumo ngayinye kuleti tebafundzi, lokusikhatsi sekutsi ancome aphindze anikete seluleko lesisekelwe ephuzwini umfundzi labelwe lona. Sihlalo naketfula umfundzi angeke amemetele liphuzu lasebentela kulo. Umfundzi nasekasentile sabelo sakhe, sihlalo angabese uyamncoma, bese ngemuva kwaloko usho leliphuzu lebekasebentela kulo avete kutsi kungani umfundzi alente kahle, nobe ngemusa achaze kutsi kungani umfundzi leliphuzu kufanele alinake ngalokuchubekako nekutsi angakwenta njani loko. Sihlalo angahle asho letinye tincenye talomboniso nangabe eva shengatsi loko kungamzuzisa umfundzi nobe labo labalalele. Seluleko lesengetiwe lesakhako lesisekelwe encwajaneni letsi Tsandza Bantfu, nobe letsi Timisele nobe encwadzini letsi Sikolwa Semsebenti singaniketwa ngasense ngemuva kwemhlangano nobe ngalesinye sikhatsi, kungaba ngaleliphuzu lenkhulumo lebekasebentela kulo nobe ngalelinye liphuzu.—Kuze utfole lokunyenti ngemsebenti wembonisi weMhlangano Wekuphila KwemaKhristu Nemsebenti Wawo kanye nemsebenti wemeluleki longumsiti, fundza tigaba 19, 24 na-25.

SIKHATSI

19. Kute incenye lokufanele yengce sikhatsi sayo, ngisho nekukhulumela lokwentiwa ngusihlalo weMhlangano Wekuphila KwemaKhristu Nemsebenti. Nanobe incwajana letsi Kuphila KwemaKhristu Nemsebenti Wawo inesikhatsi lesibekiwe sencenye ngayinye, kute sidzingo sekutsi ulwele kucedza sonkhe sikhatsi sencenye lowabelwe yona nangabe iphele sisengakapheli sikhatsi sayo. Nangabe tinkhulumo tengca sikhatsi, sihlalo weMhlangano Wekuphila KwemaKhristu Nemsebenti nobe umeluleki longumsiti kufanele anikete seluleko ngasense. (Fundza tigaba 24 na-25.) Umhlangano sewuwonkhe, kuhlanganise tingoma nemithantazo, kufanele ube li-awa linye nemizuzu lengu-45.

KUHAMBELA KWEMBONISI WESIGODZI

20. Libandla nalivakashelwe ngumbonisi wesigodzi, luhlelo kufanele luchubeke ngendlela levamile, ngaphandle kwanaku lokulandzelako: Esikhundleni seSifundvo SeliBhayibheli Selibandla lesingephansi kwencenye letsi Kuphila KwemaKhristu, kutawuba nenkhulumo yembonisi wesigodzi lemizuzu lengu-30. Ngaphambi kwekutsi kucale inkhulumo yembonisi wesigodzi, sihlalo weMhlangano Wekuphila KwemaKhristu Nemsebenti utawubuketa luhlelo lwemhlangano lwangalelo langa, asho lokutawucocwa ngako evikini lelitako, afundze timemetelo netincwadzi, ngemuva kwaloko bese wetfula umbonisi wesigodzi. Nakacedza kubeka inkhulumo yemsebenti, umbonisi wesigodzi utawephetsa umhlangano ngengoma latikhetsele yona. Angahle acele lomunye umzalwane kutsi aphetse ngemthantazo. Akukafaneli kube nelikilasi leliseceleni ngeliviki lekuhambela kwembonisi wesigodzi. Licembu lelulwimi lolungakhulunywa libandla, lingachubeka nemihlangano yalo ngisho nangeliviki lembonisi wesigodzi. Nanobe kunjalo, lelicembu kufanele libuye litohlanganyela nelibandla ngesikhatsi senkhulumo yemsebenti yembonisi wesigodzi.

LIVIKI LEMHLANGANO WESIGODZI NOBE WESIFUNDZA

21. Ngeliviki lemhlangano wesigodzi nobe wesifundza kute umhlangano welibandla lokufanele uchubeke. Libandla kufanele likhunjutwe kutsi lebekufanele kufundvwe kuleloviki bangatifundzela bona emakhaya.

LIVIKI LESIKHUMBUTO

22. Nangabe Sikhumbuto sitawuba sekhatsi neliviki, kutawuba bete umhlangano Wekuphila KwemaKhristu Nemsebenti Wawo.

UMBONISI WEMHLANGANO WEKUPHILA KWEMAKHRISTU NEMSEBENTI

23. Lomdzala lokhetfwe sigungu salabadzala utawuba ngumbonisi weMhlangano Wekuphila Nemsebenti. Kutawuba ngumtfwalo wakhe kucinisekisa kutsi lomhlangano uhlelwa kahle futsi uchubeka njengoba leticondziso tisho. Kufanele ahlale achumana nemeluleki longumsiti. Ngekushesha nasekufike incwajana letsi Kuphila KwemaKhristu Nemsebenti yenyanga letsite, umbonisi weMhlangano Wekuphila kwemaKhristu Nemsebenti kufanele atabe tonkhe tincenye temhlangano wasekhatsi neliviki tetinyanga letimbili. Loku kufaka ekhatsi tinkhulumo letingasito tebafundzi, bosihlalo labagunyatwe sigungu salabadzala kanye netinkhulumo tebafundzi. (Fundza tigaba 3-16 na-24.) Nakabela bafundzi tinkhulumo, kufanele acabange kutsi umfundzi unemnyaka lemingaki, unesikhatsi lesingakanani abeka tinkhulumo nekutsi ukhululeke kangakanani kukhuluma ngaleyo ndzaba. Kufanele ente lokufanako nakaba naleletinye tinkhulumo. Nguleso naleso sabelo senkhulumo yebafundzi, kuhlanganise neliphuzu leseluleko latawusebentela kulo, kufanele baniketwe lokungenani kusasele emaviki lamatsatfu kube naleso sabelo. Kufanele kusetjentiswe lifomu lelitsi Sabelo Semhlangano Wekuphila KwemaKhristu Nemsebenti Wawo (S-89) etinkhulumeni tebafundzi. Umbonisi weMhlangano Wekuphila KwemaKhristu Nemsebenti Wawo kufanele aciniseke kutsi letabelo taloluhlelo lwalomhlangano wonkhe utinameka ebhodini lekwatiswa. Sigungu salabadzala singabela lomunye lomdzala welibandla nobe inceku lesebentako kuze imsite. Nobe kunjalo, ngulabadzala belibandla kuphela lokufanele basetjentiswe kuze babe tabelo letingasito tebafundzi.

SIHLALO WEMHLANGANO WEKUPHILA KWEMAKHRISTU NEMSEBENTI

24. Liviki neliviki, lomdzala munye utawuba ngusihlalo wawo wonkhe uMhlangano Wekuphila KwemaKhristu Nemsebenti. (Nangabe labadzala bambalwa, tinceku letisebentako tinganikwa lesabelo, kuye ngesidzingo.) Kutawuba ngumtfwalo wakhe kulungiselela singeniso nesiphetfo. Tonkhe tincenye titawetfulwa nguye, angaphindze futsi ente letinye tincenye teluhlelo lwemhlangano, ikakhulukati letincenye letinema-video langadzingi kutsi kucocwe ngawo, kuye ngekutsi labadzala bangakanani. Kufanele angakhulumi kakhulu nakuphela incenye ngayinye. Sigungu salabadzala ngiso lesitawukhetsa kutsi bobani kulabadzala belibandla labangaba bosihlalo. Laba labadzala labafanelekako batawukwabelwa kutsi babe bosihlalo bashintjane. Umbonisi weMhlangano Wekuphila KwemaKhristu Nemsebenti angasetjentiswa emahlandla lamanyenti njengasihlalo kwendlula laba labanye labadzala labafanelekako, kuye ngetimo telibandla. Lomdzala lofanelekela kuchuba Sifundvo SeliBhayibheli Selibandla angaba ngusihlalo. Sicela nikhumbule kutsi, lomdzala longusihlalo kudzingeke kutsi ancome ngemusa, nakunesidzingo aphindze eluleke bafundzi labanetabelo. Sihlalo uphindze abe nemtfwalo wekucinisekisa kutsi umhlangano uphela ngesikhatsi. (Fundza tigaba 17 na-19.) Nangabe sihlalo atsandza futsi nendzawo ikhona, angaba nembhobho wakhe e-platform kuze etfule incenye ngayinye lelandzelako ngesikhatsi lapho umzalwane lotawukwenta lencenye eme endzaweni yakhe alungela kubeka inkhulumo yakhe. Ngalokufanako, sihlalo angase atsandze kuhlala etafuleni ngesikhatsi sesabelo semfundzi seKufundvwa kweliBhayibheli kanye nasencenyeni yemhlangano letsi Timisele Emsebentini Wekushumayela. Loku kungasonga sikhatsi.

UMELULEKI LONGUMSITI

25. Nakungenteka, kungaba kuhle kutsi lesabelo sinikwe umzalwane losanesikhatsi lesidze abeka tinkhulumo. Umtfwalo wemeluleki longumsiti kuniketa seluleko ngasese, nakudzingekile, kulabadzala netinceku letisebentako nganome ngutiphi tabelo tenkhulumo lokungenteka bebanato, lokufaka ekhatsi tincenye Emhlanganweni Wekuphila KwemaKhristu Nemsebenti, tinkhulumo telinyenti, kanye nekuchuba nobe kufundza ngesikhatsi sesifundvo se-Sicongosekulindza nobe Sifundvo SeliBhayibheli Selibandla. (Fundza sigaba 19.) Nangabe kunalabadzala labanyenti ebandleni labanelikhono lekubeka tinkhulumo nelekufundzisa, kungasetjentiswa labadzala labehlukahlukene kutsi babe beluleki njalo ngemnyaka. Akudzingeki kutsi umeluleki longumsiti anikete seluleko ngemuva kwenkhulumo ngayinye.

EMAKILASI LASECELENI

26. Emabandla angaba nemakilasi laseceleni etinkhulumo tebafundzi, kuye ngekutsi bangakhi bafundzi. Likilasi ngalinye leliseceleni kufanele libe nemeluleki lofanelekako, nakungenteka kube ngulomdzala. Inceku lesebentako lefanelekako ingabelwa nakudzingeka. Sigungu salabadzala ngiso lesincumako kutsi ngubani longanikwa lesabelo nobe kutsi bangashintjana yini. Lomeluleki kufanele alandzele ticondziso letikusigaba 18. Nangabe emakilasi laseceleni akhona, bafundzi kufanele bacelwe kutsi baye kuwo ngemuva kwenkhulumo letsi Kufunisisa Umcebo EVini LaNkulunkulu lengephansi kwencenye letsi Umcebo LoseVini LaNkulunkulu. Kufanele babuyele babe nelibandla lonkhe ngemuva kwenkhulumo yekugcina yebafundzi.

EMA-VIDEO

27. Ema-video lakhetsiwe atawusetjentiswa kulomhlangano. Ema-video emhlangano wasekhatsi neliviki atawutfolakala ku-JW Library^® futsi ungakhona kuwavula usebentisa tintfo letehlukahlukene tebuchwepheshe.

© 2023 Watch Tower Bible and Tract Society of Pennsylvania

S-38-SWI 11/23