Inkinga Lekhungetse Umhlaba Wonkhe, Indlela Yekuyicatulula

KUHLUPHEKA kugcwele yonkhe indzawo, futsi bantfu labanyenti bayabasita labo labahluphekile. Sibonelo saloku kutsi labo labasebenta etibhedlela, ngalesinye sikhatsi basebenta sikhatsi lesengetiwe kute basite labo labagulako nalabalimele. Beticimamlilo, emaphoyisa, bemtsetfo kanye nebelusito loluphutfumako, betama kamatima kutsi bavikele nobe bente simo sekuhlupheka sibe ncono kubantfu. Imetamo lenjalo yenta lokutsite kute kusitakale bantfu labahluphekile, kodvwa kute ngisho namunye umuntfu nobe inhlangano lengakucedza nya kuhlupheka emhlabeni. Ngalokwehlukile kuloku, Nkulunkulu angakucedza kuhlupheka, futsi utayicatulula lenkinga lekhungetse umhlaba wonkhe.

Lesicinisekiso sisitfola encwadzini yekugcina yeliBhayibheli, letsi: “[Nkulunkulu] uyakwesula tonkhe tinyembeti emehlweni abo, sekuyawubate kufa, nekulila, nekukhala, nebuhlungu, ngobe kwakucala sekwendlulile.” (Sembulo 21:4) Cabanga nje kutsi lesetsembiso siyotsitsa bantfu labanganani. Simane sisicinisekise ngekutsi Nkulunkulu utawukucedza konkhe kuhlupheka. Utawukwenta loko ngekutsi acedze timphi, indlala, kugula, kungalungi kanye nabo bonkhe bantfu lababi. Kute ngisho namunye umuntfu longenta loku.

Loko Umbuso WaNkulunkulu Loyokwenta

Nkulunkulu utawugcwalisa lesetsembiso sakhe ngemuntfu wesibili lophakeme emlandvweni—Jesu Khristu lovusiwe. Siyeta sikhatsi lapho Jesu atawubusa njengeNkhosi wonkhe umhlaba ngaphandle kwekuphatanyiswa. Bantfu angeke basabuswa ngemakhosi labantfu, bomengameli nobe emacembu etembangalive. Kunaloko, batawubuswa yiNkhosi yinye nanguhulumende munye—uMbuso waNkulunkulu.

Loyo Mbuso utawucedza bonkhe bohulumende bebantfu. Esikhatsini lesendlulile liBhayibheli labiketela: “Nkulunkulu welizulu uyawumisa umbuso longasoze wabhujiswa lutfo, futsi ngeke unikwe labanye bantfu. Uyawupitjita yonkhe leminye imibuso uyicedze, kodvwa wona uyawukuma kuze kube phakadze.” (Danyela 2:44) Bantfu emhlabeni wonkhe bayawuhlala ngekuthula ngephasi kwahulumende munye lolungile—uMbuso waNkulunkulu.

Ngalesikhatsi alapha emhlabeni, tikhatsi letinyenti Jesu abekhuluma ngawo loMbuso. Wakhuluma ngawo emthandazweni wakhe losibonelo, ayala bafundzi bakhe kutsi bathandaze ngalendlela: “Umbuso wakho awute. Intsandvo yakho ayentiwe emhlabeni, njengobe yentiwa ezulwini.” (Matewu 6:10) Naka kutsi Jesu waveta kutsi uMbuso uhlobene edvute nekwentiwa kwentsandvo yaNkulunkulu emhlabeni, futsi kuyintsandvo yaNkulunkulu kutsi kuhlupheka kuphele emhlabeni wonkhe.

Hulumende waNkulunkulu wekulunga, utawuletsa tibusiso letingeke setiletfwe ngunobe ngumuphi hulumende webantfu. Khumbula kutsi Jehova wanikela ngeNdvodzana yakhe kutsi ibe sihlengo kute bantfu batfole kuphila lokuphakadze. Nasekubusa loMbuso lonekulunga, kancane kancane bantfu batawuba ngulabaphelele. Uyoba yini uphumela ngemuva kwaloko? Jehova ‘utawumita kufa phakadze naphakadze. Somandla longuSimakadze [Jehova] uyawukwesula tinyembeti kubo bonkhe buso.’—Isaya 25:8.

Labanye bangahle babute: ‘Yini leyabangela kutsi Jehova angatsatsi sinyatselo ekucaleni? Umeleni?’ Jehova ngabe kadze asitsatsa sinyatselo kute acedze nobe avimbele konkhe kuhlupheka. Esikhundleni sekwenta njalo, ukuvumele kutsi kuchubeke, hhayi noko ngetizatfu tebugovu, kodvwa ngesizatfu sekutsi kuzuze bantfwana bakhe phakadze emhlabeni. Batali labanelutsandvo bangavumela umntfwana wabo kutsi abhekane nebulukhuni lobutsite kuphela nje nangabe bati kutsi loko ekugcineni kutawumzuzisa sikhatsi lesidze. Ngendlela lefananako, kunetizatfu letinhle letibangele kutsi Jehova avumele bantfu bahlupheke sikhashana, futsi leto tizatfu tichazwa eBhayibhelini. Tifaka ekhatsi inkhululeko yekutikhetsela, sono kanye nendzaba lehlanganisa lilungelo laJehova lekubusa. LiBhayibheli liphindze likhombise kutsi kunesidalwa semoya lesivunyelwe kutsi sibuse umhlaba sikhashana.a

Nanobe singeke sikhone kuchaza tonkhe letizatfu kulamakhasi lambalwa, kunemaciniso lamabili langasinika litsemba nesikhutsato. Lekucala: Jehova utawusibusisa kwendlula konkhe kuhlupheka lesibhekene nako. Ngetulu kwaloko, Nkulunkulu uyacinisa: “Tintfo takadzeni tingeke tikhunjulwe, futsi tingeke tisabuya nasengcondvweni.” (Isaya 65:17) Nkulunkulu utawukucedza futsi bungaphindze bube khona bubi nekuhlupheka lobubangelwe kubuvumela kwakhe sikhashana.

Liciniso lesibili nguleli: Nkulunkulu ubeke sikhatsi lesingeke sishintje sekucedza kuhlupheka. Khumbula kutsi umphrofethi Habakhuki wabuta kutsi kuyawudzimate kube nini Jehova solo avumele budlova nekulwa emhlabeni. Jehova waphendvula watsi: “Ngobe lesembulo silindzele sikhatsi lesimisiwe . . . futsi ngeke sephute.” (Habakhuki 2:3) Njengobe sitawubona esihlokweni lesilandzelako, leso “sikhatsi lesimisiwe” sisedvute.

[Umbhalo longentasi]

[Libhokisi ekhasini 7]

Imibhalo Lekhuluma Ngelikusasa Lelijabulisako

ANGEKE TISABA KHONA TIMPHI:

“Wotani nitewubona imisebenti yaSimakadze [Jehova], emhlabeni wente tintfo letimangalisako. Uvimba acedze timphi kutsi tichubeke emhlabeni wonkhe jikelele.”—Tihlabelelo 46:8, 9.

LABATSANDZEKAKO BETFU BAYAWUVUKA:

“Bonkhe bantfu, labalungile nalabangakalungi, bayawuvuka ekufeni.”—Imisebenti 24:15.

KUDLA KUYAWUBA YINALA:

“Shangatsi kungaba nenala emasimini, lenala isibekele ticongo tetintsaba, kube tiphihli.”—Tihlabelelo 72:16.

KUGULA ANGEKE KUPHINDZE KUBE KHONA:

“Kute lohlala [khona] loyakutsi: ‘Ngiyagula.’”—Isaya 33:24.

BANTFU LABABI ANGEKE BASABA KHONA:

“Kodvwa lababi bayawususwa eveni, nalabanemacebo bayawusishulwa kulo.”—Taga 2:22.

KULUNGA KUYOGCWALA EMHLABENI WONKHE:

“Buka la, inkhosi iyawubusa ngekulunga, nebabusi bayawubusa ngekwemtsetfocotfo.” —Isaya 32:1.

[Titfombe ekhasini 7]

Konkhe kuhlupheka lesibhekana nako kuyawulungiswa nguMbuso waNkulunkulu