Fundzisa Bantfwana Bakho

Jeremiya Akayekelanga Kukhonta Jehova

UKE utive yini udvumele kangangekutsi uze ufise kuyekela kukhonta Jehova?—a Labanyenti bayayekela. Jeremiya losemusha naye wake wativa ngaleyo ndlela. Nobe kunjalo, akakuvumelanga loko lokwakushiwo naloko lobekwentiwa ngulabanye kutsi kumente ayekele kukhonta Jehova. Ase sicoce ngekutsi kwenteka njani kutsi Jeremiya abe ngumuntfu lobalulekile kuJehova nakuba ake waba nemuva wekuyekela kumkhonta.

Ngembikwekuba Jeremiya atalwe, Nkulunkulu weliciniso, Jehova, wamkhetsa kutsi abe ngumphrofethi wakhe kute ecwayise bantfu labebangamlaleli Nkulunkulu. Uyati kutsi eminyakeni lembalwa kamuva Jeremiya wamtjelani Jehova?— “Mine angikwati kukhuluma; ngisengumntfwana.”

Ucabanga kutsi Jehova wamphendvula njani Jeremiya?— Ngendlela lenemusa kodvwa lecinile, Jehova watsi: ‘Ungasho kutsi, “ngisengumntfwana.” Kufanele uhambe uye kubo bonkhe bantfu lengikutfuma kubo, ufike usho loko lengikutfuma kona. Ungesabi, ngobe mine nginawe, futsi ngiyawukuphephisa.’—Jeremiya 1:4-8.

Kodvwa, njengobe sishito ekucaleni, Jeremiya kamuva wadvumateka. Loku kwabangelwa kutsi bantfu bebahlekisa ngaye ngesizatfu sekutsi abekhonta Nkulunkulu. Watsi: “Nyalo sengiyinhlekisa kubantfu lonkhe lilanga, bonkhe bantfu bayangiphukuta.” Ngako wakhetsa kuyekela kukhuluma ngaye, waze watsi: “Ngingeke ngisambita [Jehova], futsi ngeke ngisakhuluma egameni lakhe.” Kodvwa wayekela yini?

Jeremiya watsi: ‘Livi lakhe enhlitiyweni yami lishisa njengemlilo lovalelwe ematsanjeni ami. Sengidziniwe kulibandzetela ngekhatsi kimi.’ (Jeremiya 20:7-9) Nobe nje Jeremiya ngalesinye sikhatsi abesaba, kodvwa lutsandvo lwakhe ngaJehova lwamenta wangayekeli kumkhonta. Ase sibone kutsi Jeremiya wavikelwa njani njengobe achubeka nekukhonta Jehova.

Jehova watjela Jeremiya kutsi ecwayise bantfu kutsi liJerusalema litawubhujiswa nangabe bangatiyekeli tindlela tabo letimbi. Jeremiya wabecwayisa labantfu, kodvwa batfukutsela batsi: “Lomuntfu kufanele agwetjwe intsambo.” Kodvwa Jeremiya wachubeka abancenga kutsi ‘balalele Jehova.’ Wase utsi: ‘Kufanele nati kutsi nangabe ningibulala, nibulala umuntfu longenacala, ngobe nguNkulunkulu longitfume kini kutawukhuluma onkhe lamavi.’ Uyati kutsi yini leyenteka ngemuva kwaloko?—

Libhayibheli litsi: “Ngako letiphatsimandla nabo bonkhe bantfu bakhuluma kubaphristi nakubaphrofethi batsi: ‘Lomuntfu akukafaneli kutsi agwetjelwe intsambo! Ukhulume kitsi egameni laSimakadze [Jehova] Nkulunkulu wetfu.’” Ngako ngalesikhatsi Jeremiya angavumeli kutsi kwesaba kumente ayekele kukhuluma ngaJehova, Jehova wamvikela. Nyalo, ase sibuke kutsi yini leyenteka ku-Uriya, lomunye umphrofethi waJehova lowenta ngendlela lehlukile.

LiBhayibheli litsi: ‘Uriya waphrofetha ngeJerusalema asebentisa emavi lafananako nalawo lasetjentiswa nguJeremiya.’ Kodvwa ngalesikhatsi iNkhosi Jehoyakimu imtfukutselela Uriya, uyati kutsi wentani?— Wesaba, wayekela kwenta intsandvo yaNkulunkulu futsi wabalekela eGibhithe. Ngako inkhosi yatfumela emadvodza kutsi amlandze abuye naye. Ngalesikhatsi abuya naye, uyati kutsi lenkhosi lembi yentani?— Yambulala Uriya ngenkemba!—Jeremiya 26:8-24.

Kungani ungatsi Jeremiya wavikelwa nguJehova kodvwa Uriya wangamvikeli?— Kungenteka Jeremiya abesaba, njengobe abenjalo na-Uriya, kodvwa Jeremiya akazange aphelelwe ngemandla ekukhonta Jehova aze abaleke. Akayekelelanga kukhonta Jehova. Ngusiphi sifundvo longatsi siyasitfola kulesibonelo saJeremiya?— Ngalesinye sikhatsi singakutfola kumatima kwenta loko Nkulunkulu latsi asikwente, kodvwa ngaso sonkhe sikhatsi kufanele simetsembe futsi simlalele.

[Umbhalo longentasi]

Imibuto:

○ Ngumuphi umsebenti Jehova lawuniketa Jeremiya?

○ Kungani Jeremiya afikelwa ngumuva wekuyekela kukhonta Jehova?

○ Kungani Jeremiya avikelwa futsi kungani Uriya angazange avikelwe?

○ Yini loyifundzile esibonelweni saJeremiya?