Umlayeto WaJesu Khristu—Wabatsintsa Njani Bantfu?
“Kuliciniso kutsi kunebufakazi lobunemandla bekutsi kunemuntfu lohlakaniphile lowavela eKhaphanawume, futsi ngisho nanyalo usebambe tinhlitiyo netingcondvo tebantfu ngendlela yakhe yekufundzisa lemnene.”a—UMLOBI GREGG EASTERBROOK.
EMAVI anemandla. Emavi lanekuhlakanipha lakhetfwe kahle, angatsintsa tinhlitiyo, anikete litsemba futsi agucule kuphila. Kute lomunye umuntfu lowake waba nemavi lanemandla kwendlula Jesu Khristu. Lomunye umuntfu lotsite loweva Jesu etfula lenye yetinkhulumo takhe letidvumile, wabhala: “Kwatsi Jesu nacedza lenkhulumo yakhe, ticumbi tebantfu tase timangele ngalemfundziso yakhe.”—Matewu 7:28.
Lamuhla, lokunyenti lokwashiwo nguJesu bantfu labanyenti emhlabeni wonkhe bayakwati. Ase ucabange ngaletinye tibonelo talokutsite lokwashiwo nguJesu futsi lokunenchazelo lejulile.
“Ungeke ukhonte Nkulunkulu nemcebo.”—Matewu 6:24.
“Ngako-ke konkhe lenifisa kutsi bantfu bakwente kini, kwenteni nani kubo.”—Matewu 7:12.
“Nikani Khesari lokukwaKhesari; ninike Nkulunkulu lokukwaNkulunkulu.”—Matewu 22:21.
“Kubusisiwe kupha kunekwemukela.”—Imisebenti 20:35.
Kodvwa Jesu wenta lokungetulu kwekumane akhulume lokutsite bantfu labebatawukukhumbula. Umlayeto abeshumayela ngawo wawunemandla ngobe wawuphetse liciniso ngaNkulunkulu, ufundzisa bantfu indlela yekutfola injongo lokungiyo sibili ngekuphila futsi wacacisa nalokukuphela kwelikhambi letinkinga tebantfu—uMbuso waNkulunkulu. Njengobe sitawube sihlola lomlayeto kulamakhasi lalandzelako, sitawubona kutsi kungani Jesu nanyalo achubeka abambe tigidzi “tetinhlitiyo netingcondvo tebantfu ngendlela yakhe lemnene yekufundzisa.”
[Umbhalo longentasi]