Uyasifaka Yini Sandla Ekwenteni Kutsi Imihlangano YebuKhristu Yakhe?
“Nanibutsanele kukhonta, . . . kwenteleni kutsi kwakheke libandla.”—1 KHOR. 14:26.
1. Ngekusho kwencwadzi ya-1 Khorinte sehluko 14, ngumuphi umgomo lobalulekile wemihlangano yebuKhristu?
‘LOMHLANGANO bewakha sibili!’ Uke wawasho yini lamavi lafanana nalawa ngemuva kwekuya emhlanganweni eHholweni leMbuso? Kusebaleni kutsi uke wawasho. Kuliciniso kutsi imihlangano yelibandla ingumtfombo wesikhutsato, futsi loko akusimangalisi. Kuyafanana nangesikhatsi semaKhristu akucala, umgomo lobalulekile wemihlangano yebuKhristu lamuhla, kucinisa ngakamoya bonkhe labakhona kuyo. Naka kutsi umphostoli Pawula wawugcizelela njani umgomo loyinhloko wemihlangano yebuKhristu encwadzini yakhe yekucala layibhalela baseKhorinte. Kuso sonkhe sehluko 14 washo kanyenti kutsi incenye ngayinye leyetfulwako emihlanganweni kufanele ibe nemgomo lofanako—‘kwakha libandla.’—Fundza 1 Khor. 14:3, 12, 26.a
2. (a) Ingumphumela wani imihlangano leyakhako? (b) Sitawucoca ngamuphi umbuto?
2 Siyacaphela kutsi imihlangano leyakhako, ingumphumela wekusebenta kwemoya waNkulunkulu. Kungako-ke umhlangano welibandla siwuvula ngemthandazo losuka enhlitiyweni loya kuJehova. Ngaleso sikhatsi, sisuke sicela Babe wetfu wasezulwini kutsi asibusise njengobe sibutsene, ngelusito lwemoya wakhe longcwele. Siyati kutsi sonkhe ebandleni singasifaka sandla kute sente luhlelo lwemhlangano lusakhe. Ngako-ke, ngutiphi tinyatselo ngamunye wetfu lokufanele atitsatse kute aciniseke kutsi imihlangano lesibanayo liviki ngalinye eHholweni letfu leMbuso iba ngumtfombo wekucabuleka ngakamoya kanye nesikhutsato?
3. Ibaluleke kangakanani imihlangano yebuKhristu?
3 Kute siphendvule lombuto, sitawucoca ngetintfo letitsite letimayelana nemihlangano yetfu lokufanele tinakwe ngulabo labayichubako. Sitawuphindze sicoce ngekutsi libandla lingasifaka njani sandla kute lente lemihlangano ijabulise kubo bonkhe labete kuyo. Lesifundvo sibaluleke kakhulu ngobe imihlangano yetfu ingimibutsano lengcwele. Ecinisweni, kubakhona emihlanganweni siphindze sifake sandla kuyo, ngulenye indlela lesisuke sikhombisa ngayo kubaluleka kwekukhonta Jehova.—Hla. 26:12; 111:1; Isa. 66:22, 23.
Umhlangano Lolungiselelwe Kufundza LiBhayibheli
4, 5. Uyini umgomo loyinhloko weSifundvo se-Sicongosekulindza?
4 Sonkhe sifuna kuzuza ngalokugcwele eSifundvweni samaviki onkhe se-Sicongosekulindza. Ngako-ke, kute siwucondze ngalokucacile umgomo loyinhloko walomhlangano, asesibukete tizatfu letenta kutsi sibe neSifundvo se-Sicongosekulindza. Sitawuphindze sicoce ngetizatfu letibangele kutsi kube nelushintjo etihlokweni letifundvwako te-Sicongosekulindza.
5 Sizatfu lesibangela kutsi sibe neSifundvo se-Sicongosekulindza, kufundza liBhayibheli ngelusito lwalomagazini. Kuliciniso kutsi esifundvweni samaviki onkhe, Sicongosekulindza ‘silicacisa kahle’ liVi laNkulunkulu. Njengasetikhatsini taNehemiya wasendvulo, ‘sisichazela loko lokushiwo yimiBhalo.’—Neh. 8:8; Isa. 54:13.
6. (a) Kwentiwe luphi lushintjo eSifundvweni se-Sicongosekulindza? (b) Yini lokufanele ibe setingcondvweni tetfu mayelana nemibhalo lebhalwe kutsi “fundza”?
6 Ngesizatfu sekutsi liBhayibheli liyincwadzi leyinhloko lesiyisebentisako, kwentiwe lushintjo lolutsite eSifundvweni se-Sicongosekulindza. ImiBhalo leminyenti lekhonjiwe etihlokweni letifundvwako, ibhalwe kutsi “fundza.” Sonkhe sikhutsatwa kutsi ngalesikhatsi ifundvwa lemibhalo, sivule etfu emaBhayibheli sihambisane naloyo loyifundzako. (Imis. 17:11) Kungani senta njalo? Nangabe sibona seluleko saNkulunkulu emaBhayibhelini etfu, singena sijule kitsi. (Heb. 4:12) Ngako-ke, ngembikwekuba leyo mibhalo ifundvwe, loyo lochuba lomhlangano kufanele atinike sikhatsi lesenele tonkhe tilaleli kute tiyitfole tiphindze tihambisane naloyo loyifundzako.
Sinyenti Sikhatsi Lesinaso Sekubonisa Kukholwa Kwetfu
7. Sinaliphi litfuba eSifundvweni se-Sicongosekulindza?
7 Lolunye lushintjo lolwentiwe etihlokweni letifundvwako te-Sicongosekulindza, lumayelana nebudze bato. Kuleminyaka yamuva nje, tentiwe taba timfisha tihloko letifundvwako. Nakuchutjwa Sifundvo se-Sicongosekulindza, sesincane sikhatsi lesicitfwa kufundvwa tigaba. Sikhatsi lesinyenti sesiba sekuphendvula. Labanyenti ebandleni sebanelitfuba lelinyenti lekuveta kukholwa kwabo ngekutsi baphendvule imibuto lesesigabeni, bachaze imibhalo, baphindze basho lokuhlangenwe nako lokukhombisa kuhlakanipha kwekulandzela timiso teliBhayibheli. Lesinye sikhatsi singase sisetjentiselwe kucoca ngetitfombe.—Fundza Tihlabelelo 22:22; 35:18; 40:9.
8, 9. Nguyiphi indzima yemchubi weSifundvo se-Sicongosekulindza?
8 Ngako-ke, lesikhatsi lesengetiwe sekuniketa timphendvulo letehlukahlukene, sitawubakhona nangabe labo labaphendvulako baniketa timphendvulo letimfushane futsi naloyo lochuba leSifundvo se-Sicongosekulindza, angakhulumi kakhulu. Yini lengasita umchubi walesifundvo kutsi alinganisele nakasho emavi akhe ngalendzaba kanye naloko lokushiwo ngulabo labaphendvulako kute umhlangano ubakhe bonkhe?
9 Kute siphendvule lombuto, ase sicabange nganangu umfanekiso. Sifundvo se-Sicongosekulindza lesichutjwe kahle, sifanana nesitfungo setimbali lokujabulisako kusibuka. Njengobe sitfungo setimbali sakhiwa ngetinhlobo letehlukene tetimbali, neSifundvo se-Sicongosekulindza naso siphumeleliswa timphendvulo letehlukahlukene. Lesitfungo setimbali siba netimbali letehlukile ngembala nangebukhulu, netimphendvulo lesitiniketako emihlanganweni tiyehluka ngebudze nangendlela lesitiniketa ngayo. Iyini indzima yemchubi walesifundvo? Emavi akhe lamafishane afanana nemacenjana laluhlata lafakwa kulesitfungo setimbali. Lamacenjana awabi manyenti, kodvwa umsebenti wawo kulawula indlela lesitfungo lokufanele sime ngayo kute sibumbane. Nangendlela lefananako, umchubi weSifundvo se-Sicongosekulindza kufanele ahlale akhumbula kutsi akukafaneli akhulume kakhulu kodvwa kufanele abonge timphendvulo letiniketwa libandla. Kuliciniso kutsi ngalesikhatsi timphendvulo letehlukahlukene tiniketwa libandla futsi nemchubi ngekuhlakanipha asho emavi lambalwa kute ayihlanganise lendzaba, loko kwakha sitfungo lesihle semagama latawujabulisa bonkhe labakhona ebandleni.
“Asimbonge Njalo Nkulunkulu, Simdvumise”
10. EmaKhristu akucala abeyitsatsa njani imihlangano yelibandla?
10 Inchazelo yaPawula yemihlangano yebuKhristu letfolakala ku-1 Khorinte 14:26-33, isitjela lokunyenti ngendlela lemihlangano leyayichutjwa ngayo ekhululwini lekucala leminyaka. Naku lokwashiwo ngulesinye sifundziswa seliBhayibheli nasikhuluma ngalamavesi, sabhala: “Intfo lecaphelekako ngendlela Lisontfo langelikhulu lekucala lelalichutjwa ngayo, kutsi cishe wonkhe umuntfu abetiva anelilungelo kanye nesibopho sekufaka sandla kuleyo nkonzo. Umuntfu abengayi anemcondvo wekutsi utawuba silaleli nje kuphela; futsi abengayeli kuyewutfola lokutsite kodvwa kuyonikela ngalokutsite.” Nembala, emaKhristu akucala abetsatsa imihlangano yelibandla njengelitfuba lekubonisa kukholwa kwawo.—Rom. 10:10.
11. (a) Yini leba nendzima lenkhulu ekwenteni imihlangano ibe nguleyakhako, futsi kungani kunjalo? (b) Singenta njani kute sitfutfukise indlela lesiphendvula ngayo emihlanganweni? (Fundza umbhalo longentasi.)
11 Kubonakalisa kukholwa kwetfu emihlanganweni kunendzima lenkhulu ‘ekwakheni libandla.’ Nakanjani utawuvuma kutsi nanobe sineminyaka lemingaki sibakhona emihlanganweni, kuyasijabulisa kulalela timphendvulo tebazalwane nabodzadzewetfu. Siyajabula nalapho siva imphendvulo lesuka enhlitiyweni yemuntfu lokhulile nalowetsembekile lesikhonta naye. Kuyasikhutsata nekuva liphuzu lalomdzala welibandla lokhatsalelako; futsi sivele simoyitele nakuphendvula umntfwana lomcane lokhombisa lutsandvo lwakhe lolucotfo ngaJehova. Kuyacaca kutsi ngekuphendvula, sonkhe sifaka sandla ekwenteni imihlangano yebuKhristu ibe nguleyakhako.b
12. (a) Yini lesingayifundza esibonelweni saMosi naJeremiya? (b) Umthandazo usisita njani nasifuna kuphendvula?
12 Labo labanemahloni bangakutfola kumatima kuphendvula. Nangabe nawe unenkinga lefananako, kungakusita kakhulu kukhumbula kutsi nalabanye banayo. Ecinisweni, ngisho netinceku taNkulunkulu letetsembekile njengaMosi naJeremiya, bebesaba kukhuluma embikwebantfu labanyenti. (Eks. 4:10; Jer. 1:6) Nobe kunjalo, njengobe Jehova atisita letinceku takhe tasendvulo kutsi tikwati kumdvumisa embikwebantfu labanyenti, nawe angakusita kutsi ukwati kumnika umhlatjelo wekumdvumisa. (Fundza Hebheru 13:15.) Ungalutfola njani lusito lwaJehova kute ukwati kulwisana nekwesaba kuphendvula? Kwekucala, yilungiselele kahle imihlangano. Ngembikwekuba uye eHholweni leMbuso, thandaza kuJehova umcele kutsi akuphe sibindzi sekuphendvula. (Fil. 4:6) Ciniseka kutsi Jehova utawuphendvula umthandazo wakho ngobe ucela lokutsite “ngekwentsandvo yakhe.”—1 Joh. 5:14; Taga 15:29.
Imihlangano Ihloselwe ‘Kwakha, Kukhutsata Nekudvudvuta’
13. (a) Imihlangano yetfu kufanele ibe nayiphi indzima kulabo labakhona kuyo? (b) Ngumuphi umbuto lobaluleke kakhulu labadzala belibandla lokufanele batibute wona?
13 Pawula utsi injongo lebaluleke kakhulu yemhlangano welibandla ‘kwakha, kukhutsata nekudvudvuta’ labo labakhona.c (1 Khor. 14:3) Labadzala belibandla labangemaKhristu lamuhla bangaciniseka njani kutsi tincenye tabo emhlanganweni tiyabakhutsata bazalwane nabodzadze futsi tibashiye badvudvutekile ngakamoya? Kute siphendvule lombuto, ase sicabange ngemhlangano lowachutjwa nguJesu ngemuva nje kwekuvuswa kwakhe.
14. (a) Ngutiphi tintfo letenteka usengakacali umhlangano lowawuhlelwe nguJesu? (b) Kungani baphostoli bajabula ngalesikhatsi ‘Jesu asondzela kubo futsi akhuluma nabo’?
14 Kwekucala, caphela tintfo letenteka usengakacali lomhlangano. Asengakabulwa Jesu, baphostoli bakhe “bamshiya” futsi njengobe kwakushiwo, ‘bonkhe basakateka babuyela emakhaya abo.’ (Mak. 14:50; Joh. 16:32) Kwatsi ngemuva kwekuvuswa kwakhe, Jesu wabamema labaphostoli bakhe labebeve buhlungu kutsi babe khona emhlanganweni lokhetsekile.d Naku labakwenta: “Bafundzi labali-11 baya kulentsaba yaseGalile, lapho Jesu abebatjele kutsi baye khona.” Batsi nabefika ‘Jesu wasondzela kubo wakhuluma nabo.’ (Mat. 28:10, 16, 18) Ase umane ucabange kutsi bajabula kangakanani baphostoli bakhe ngalesikhatsi Jesu asondzela kubo futsi akhuluma nabo. Wakhuluma ngani Jesu?
15. (a) Yini Jesu layisho kubaphostoli bakhe, futsi yini langazange ayisho? (b) Lomhlangano wabatsintsa njani baphostoli bakhe?
15 Jesu wacala ngekwenta lesimemetelo: “Ngiphiwe emandla onkhe ezulwini nasemhlabeni.” Ngemuva kwaloko wabatfuma: “Ngako-ke hambani, nente tive tonkhe tibe bafundzi bami.” Ekugcineni wabese uyabacinisekisa: “Mine nginani onkhe emalanga.” (Mat. 28:18-20) Kodvwa ubonile yini kutsi yini Jesu langazange ayente? Akabatsetsisanga baphostoli bakhe futsi akawusebentisanga lomhlangano njengelitfuba lekusola tisusa tabo nobe abente bative banelicala futsi akabakhumbutanga ngebutsakatsaka lababubonisa ekukholweni kwabo. Kunaloko, Jesu wabacinisekisa ngekutsi yena naBabe wakhe bayabatsandza, wabanika nemisebenti lengetiwe. Loko Jesu lakwenta kwabatsintsa njani baphostoli? Kwabakha kakhulu kwaphindze kwabakhutsata futsi kwabadvudvuta kangangekutsi esikhatsini lesitsite ngemuva kwalomhlangano, baphindze “bashumayela liVangeli.”—Imis. 5:42.
16. Labadzala belibandla lamuhla basilingisa njani sibonelo saJesu nabachuba imihlangano lengumtfombo wesikhutsato?
16 Labadzala belibandla lamuhla balingisa Jesu ngekwenta imihlangano ibe litfuba lekuvetela labo labakholwa nabo kutsi Jehova uyabatsandza bantfu bakhe. (Rom. 8:38, 39) Kungaleso sizatfu etinkhulumweni tabo labadzala belibandla bayaciniseka kutsi bacinisa bazalwane, futsi abanaki butsakatsaka babo. Abatisoli tisusa tebazalwane babo. Kunaloko, emavi abo embula kutsi batsatsa bazalwane babo njengalabatsandza Jehova nalabafuna kwenta lokulungile. (1 Thes. 4:1, 9-12) Kuliciniso kutsi ngaletinye tikhatsi labadzala belibandla bangadzinga kuniketa seluleko ebandleni lilonkhe, kodvwa nangabe bambalwa nje kuphela labadzinga seluleko, leso seluleko siniketwa ngansense. (Gal. 6:1; 2 Thim. 2:24-26) Nangabe labadzala belibandla bakhuluma nelibandla, umgomo wabo uba kuncoma nobe nini nakudzingeka. (Isa. 32:2) Balwela kukhuluma ngendlela leyenta kutsi ngemuva kwemhlangano, bonkhe labebakhona bative bakhutsatiwe futsi batfole emandla.—Mat. 11:28; Imis. 15:32.
Imihlangano Yetfu Iyindzawo Lesitfola Kuyo Indvudvuto
17. (a) Kungani kubaluleke kakhulu kunakucala kutsi imihlangano yetfu ibe ngumtfombo wesikhutsako? (b) Yini wena longayenta kute imihlangano ibe nguleyakhako? (Fundza libhokisi lelitsi “Tindlela Letilishumi Letingenta Imihlangano Ikwakhe, Wena Kanye Nalabanye.”)
17 Njengobe live laSathane lichubeka licindzetela kakhulu, sidzinga kuciniseka kutsi kuhlangana kwetfu njengemaKhristu kuba ngumtfombo wesikhutsato kubo bonkhe. (1 Thes. 5:11) Lomunye dzadze kanye nendvodza yakhe lababeketelela silingo lesikhulu kakhulu iminyaka leminyenti leyengcile, uyakhumbula: “Kuba seHholweni leMbuso bekufanana nekuba setandleni taJehova letifutfumele. Ema-awa lesiwacitsa sisemkhatsini webazalwane nabodzadzewetfu labangemaKhristu, kuwo sitiva shengatsi sibeka imitfwalo yetfu etikwaJehova futsi sitfola kuthula kwangekhatsi.” (Hla. 55:22) Shengatsi bonkhe lababa khona emihlanganweni yetfu bangativa ngendlela lefananako, bative bakhutsatiwe futsi badvudvutiwe. Kute siciniseke kutsi loko kuyenteka, shengatsi singachubeka sifaka sandla kute sente imihlangano yebuKhristu ibe nguleyakhako.
[Imibhalo lengentansi]
a Kwavetwa kutsi letinye tetintfo letatenteka emihlanganweni yebuKhristu ngelikhulu lekucala leminyaka, tatiyawuhamba tiphele. Nasi sibonelo kulendzaba: Lamuhla asisakhulumi ‘ngetilimi’ nobe ‘siphrofethe.’ (1 Khor. 13:8; 14:5) Nobe kunjalo, ticondziso taPawula tisinika kucondza kute sati kutsi imihlangano yebuKhristu kufanele ichutjwe njani lamuhla.
b Kute utfole kutsi singenta njani kute sitfutfukise indlela lesiphendvula ngayo emihlanganweni, fundza Sicongosekulindza sa-September 1, 2003 emakhasi 19-22, lesitfolakala ngesiZulu.
c I-Vine’s Expository Dictionary of Old and New Testament Words, nayichaza umehluko emkhatsini ‘wekukhutsata’ ‘nekudvudvuta,’ itsi ligama lesiGriki lelihunyushwe ngekutsi ‘dvudvuta,’ lisho “kuba nemusa losezingeni lelisetulu kwendlula [kukhutsata].”—Catsanisa naJohane 11:19.
d Lesi bekungaba sentakalo Pawula laphindze wakhuluma ngaso ngalesikhatsi atsi Jesu “wabonwa ngasikhatsi sinye, bazalwane labendlula ema-500.”—1 Khor. 15:6.
Ungaphendvula Njani?
• Ibaluleke kangakanani imihlangano yebuKhristu?
• Kungani kuniketa timphendvulo emihlanganweni kufaka sandla ‘ekwakheni libandla’?
• Yini lesingayifundza emhlanganweni lowachutjwa nguJesu nebalandzeli bakhe?
[Libhokisi/Titfombe ekhasini 26 27]
TINDLELA LETILISHUMI LETINGENTA IMIHLANGANO IKWAKHE, WENA KANYE NALABANYE
Lungiselela kusenesikhatsi. Nawuyitadisha kusenesikhatsi lencwadzi lokutawucocwa ngayo eHholweni leMbuso, lomhlangano utakujabulisa kakhulu futsi ukushiye wenetiseke mbamba.
Bani khona njalo. Njengobe kuba khona njalo kulemihlangano kukhutsata, kuba khona kwakho kuyawenta umehluko.
Fika kusenesikhatsi. Nangabe sewuhleli phansi usengakacali umhlangano, utawubakhona engomeni nasemthandazweni wekuvula, lokuyincenye yekukhonta kwetfu Jehova.
Phatsa konkhe lokudzingekako. Phatsa liBhayibheli lakho kanye netincwadzi letitawusetjentiswa kulomhlangano, kute ukwati kuhambisana nalomhlangano futsi ukwati kukugcina engcondvweni loko lokufundvwako.
Ungavumeli lutfo lukuphatamise. Nasi sibonelo: fundza imilayeto yamahlala-ekhikhini wakho (cell phone) ngemuva kwemihlangano. Ngekwenta njalo, ugcina tindzaba takho tisendzaweni yato.
Bani nencenye kuyo. Ngalesikhatsi linyenti liniketa timphendvulo, loko kuyabakhutsata labanye kuphindze kubakhe.
Timphendvulo takho atibe timfishane. Loko kwenta labanyenti kutsi nabo baphendvule.
Yenta tabelo takho. Njengobe ungumfundzi eSikolweni Semsebenti WemaKhristu, futsi uba nencenye eMhlanganweni Wemsebenti, lungiselela kahle futsi wetame ngako konkhe lokusemandleni kutsi utente tabelo takho.
Ncoma bonkhe labanencenye. Batjele bonkhe labanetincenye emhlanganweni nalabo labaniketa timphendvulo kutsi imetamo yabo mihle kangakanani.
Coca nalabanye. Kuba khona emihlanganweni uphindze ubingelele labanye futsi ucoce nabo ngembikwekuba icale kanye nangemuva kwayo, kuyazuzisa futsi kuletse injabulo.