Hlonipha Umshado Njengalosipho Lesivela KuNkulunkulu

“Ngako-ke indvodza iyawushiya uyise nenina inamatsele kumfati wayo, bese baba nyamanye.”—GEN. 2:24.

1. Kungani Jehova akufanelekela kuhlonishwa?

NKULUNKULU JEHOVA, longuMsunguli wemshado, uyakufanelekela kuhlonishwa. Ngesizatfu sekutsi unguMdali, uMbusi, kanye naBabe wetfu wasezulwini, uchazwa kahle ngekutsi unguMuphi wato “tonkhe tipho letinhle naletiphelele.” (Jak. 1:17; Semb. 4:11) Loku kukuvetwa kwelutsandvo lwakhe lolukhulu. (1 Joh. 4:8) Tonkhe tintfo lasifundzise tona, lasiyale kutsi sitente, kanye naleto lasinikete tona tizuzisa tsine.—Isa. 48:17.

2. Ngutiphi ticondziso Jehova latiniketa bo-Adamu na-Eva?

² LiBhayibheli litsi umshado ungulesinye setipho “letinhle” letivela kuNkulunkulu. (Rut. 1:9; 2:12) Ngesikhatsi Jehova ashadisa bantfu bekucala, bo-Adamu na-Eva, wabaniketa ticondziso tendlela yekuphumelela. (Fundza Matewu 19:4-6.) Kube basilandzela sicondziso saNkulunkulu, bebatawutfola injabulo lengapheli. Ngebulima, badzelela umyalo waNkulunkulu, futsi ngesizatfu saloko batfola imiphumela lebuhlungu.—Gen. 3:6-13, 16-19, 23.

3, 4. (a) Bantfu labanyenti lamuhla abawuhloniphi ngayiphi indlela umshado kanye naNkulunkulu Jehova? (b) Ngutiphi tibonelo lesitawucoca ngato kulesihloko?

³ Njengabo-Adamu na-Eva, bantfu labanyenti lamuhla batsatsa tincumo emshadweni ngaphandle kwekufuna sicondziso lesivela kuJehova. Labanye abasasiboni sidzingo sekushada, kantsi labanye sebanembono lowehlukile ngaloko lokushiwo ngumshado, kute bawente uvumelane netifiso tabo. (Rom. 1:24-32; 2 Thim. 3:1-5) Abalinaki liciniso lekutsi umshado usipho lesivela kuNkulunkulu, futsi ngekungasihloniphi kwabo, basuke bangamhloniphi neMuphi waso, Nkulunkulu Jehova.

⁴ Ngaletinye tikhatsi, ngisho nebantfu baNkulunkulu balahlekelwa ngumbono locacile wendlela Jehova lawutsatsa ngayo umshado. Lamanye emaKhristu lashadile akhetsa kuhlala ngekwehlukana nobe kudivosa ngaphandle kwetizatfu letingekwemBhalo. Singakubalekela njani loku? Sicondziso saNkulunkulu lesiku Genesisi 2:24 singawasita njani emaKhristu lashadile kutsi acinise imishado yawo? Labo labacabangela kushada bangatilungiselela njani? Asesihlole imishado lemitsatfu yangetikhatsi teliBhayibheli leyaphumelela, leveta indlela kuhlonipha Jehova lokubaluleke ngayo kute umshado uhlale njalo.

Yetsembeka

5, 6. Ngusiphi simo lesavivinya boZakhariya na-Elizabethe, futsi kwetsembeka kwabo kwabusiswa njani?

⁵ Zakhariya kanye na-Elizabethe bebenta tonkhe tintfo letilungile. Njengobe bebashadile, bobabili bebatikhonti taJehova letetsembekile. Zakhariya abewenta ngekwetsembeka umsebenti wakhe wekuba ngumphristi, futsi bobabili bebawugcina uMtsetfo waNkulunkulu. Tinyenti tintfo lebetingabenta babonge. Nanobe kunjalo, kube bekungenteka ubavakashele emtini wabo kaJuda, bewungasheshe ubone kutsi kukhona intfo lengekho. Bebete bantfwana. Elizabethe abengatali, futsi bobabili besebakhulile.—Luk. 1:5-7.

⁶ Ka-Israyeli wasendvulo, kutfola bantfwana bekuyintfo lebaluleke kakhulu, futsi imindeni beyivame kuba mikhulu. (1 Sam. 1:2, 6, 10; Hla. 128:3, 4) Ngaleto tikhatsi, ngekungetsembeki indvodza yaka-Israyeli, beyingase idivose umfati wayo nangabe angatali. Nanobe kunjalo, Zakhariya wetsembeka ku-Elizabethe. Akazange afune indlela yekuphuma emshadweni, futsi nemfati wakhe wenta lokufananako. Nanobe kubabete bantfwana bekubavisa buhlungu, bachubeka bakhonta Jehova ndzawonye ngekwetsembeka. Ngekuhamba kwesikhatsi, Jehova wababusisa ngalokusimangaliso ngekutsi batfole indvodzana sebagugile.—Luk. 1:8-14.

7. Elizabethe waveta njani kutsi wetsembekile endvodzeni yakhe?

⁷ Elizabethe wachubeka etsembekile nangalenye indlela. Ngesikhatsi abeleka indvodzana yakhe Johane, Zakhariya abengakhoni kukhuluma ngobe akazange akwetsembe loko ingilosi yaNkulunkulu beyimtjela kona. Kungenteka kutsi Zakhariya wetama kukhuluma nemfati wakhe ngekutsi ingilosi yaJehova beyimtjele kutsi etse lomntfwana libito atsi “nguJohane.” Bomakhelwane kanye netihlobo bebafuna kwetsa lomntfwana libito lababe wakhe. Ngekwetsembeka, Elizabethe walalela loko lokwakushiwo yindvodza yakhe. Watsi: “Cha! Libito lakhe kutakuba nguJohane.”—Luk. 1:59-63.

8, 9. (a) Kwetsembeka kuwucinisa njani umshado? (b) Indvodza nemfati bangakuveta ngatiphi tindlela kwetsembeka?

⁸ NjengaZakhariya na-Elizabethe, bantfu labashadile lamuhla bahlangabetana netintfo letibadvumatako kanye netinsayeya letitsite. Umshado lote kwetsembeka angeke uphumelele. Kudlala ngelutsandvo, kubuka titfombe letingcolile, kuphinga, kanye naletinye tintfo letingafaka umshado engotini, tingacedza kwetsembana kwebantfu labashadile futsi kungaphindze kube khona. Nangabe kwetsembana kungekho emshadweni, nelutsandvo luyaphela. Kwetsembeka kufanana nelutsango loluvikela umuti etivakashini letingakemukeleki kanye nasetingotini, futsi luvikela nalabo labasendlini. Ngako-ke, nangabe indvodza nemfati betsembekile, bangahlala ngekulondzeka, bavulelane sifuba futsi bakhulise nelutsandvo lwabo. Kwetsembeka kubalulekile.

⁹ Jehova watjela Adamu: “Ngako-ke indvodza iyawushiya uyise nenina inamatsele kumfati wayo.” (Gen. 2:24) Kusho kutsini loku? Buhlobo umuntfu labenabo nebangani kanye netihlobo takhe, kufanele bushintje. Ngamunye wabo kufanele anike loyo lashade naye sikhatsi sakhe lesinyenti futsi amnake. Akukafaneli babeke bangani nobe tihlobo tabo kucala, bese abasawunaki umndeni wabo lomusha, futsi labantfu labasandza kushada akukafaneli bavumele batali babo babe nencenye ngaphandle kwesidzingo etincumeni labatitsatsako nobe nakuvela kungevani emkhatsini wabo. Sekufanele banamatsele kulomunye nalomunye. Lesi sicondziso lesivela kuNkulunkulu.

10. Yini lengasita bantfu labashadile kutsi betsembeke?

¹⁰ Ngisho nasemndenini lowehlukene ngekwenkholo, kwetsembeka kuba nemivuzo. Lomunye dzadze lonendvodza lengakholwa utsi: “Ngiyambonga Jehova ngekungifundzisa kutsi ngititfobe endvodzeni yami futsi ngibe nenhlonipho lejulile ngayo. Kuhlala kwami ngetsembekile kuholele elutsandvweni nasekuhloniphaneni lokungapheli lesekuneminyaka lengu-47.” (1 Khor. 7:10, 11; 1 Phet. 3:1, 2) Ngako-ke, sebenta kamatima kute wente umuntfu loshade naye ative alondzekile. Ngemavi nangetento, funa tindlela tekucinisekisa umuntfu loshade naye kutsi ubaluleke kubendlula bonkhe emhlabeni. Yenta konkhe lokusemandleni akho kutsi ungavumeli bantfu nanobe ngabe yini kutsi ibe semkhatsini wenu. (Fundza Taga 5:15-20.) Ron kanye naJeannette, labaneminyaka lengetulu kwa-35 bashadile futsi bajabula, batsi: “Ngesizatfu sekutsi senta loko Nkulunkulu lafuna sikwente ngekwetsembeka, sinemshado lojabulako nalophumelelako.”

Bunye Buyawucinisa Umshado

11, 12. Bo-Akhwila naPhrisila babambisana njani (a) ekhaya, (b) emsebentini wekutiphilisa, kanye (c) nasemsebentini webuKhristu?

¹¹ Nakakhuluma ngebangani bakhe labasedvute, bo-Akhwila kanye naPhrisila, umphostoli Pawula abehlale ababala bobabili. Bunye babo busibonelo lesihle saloko Nkulunkulu labekusho nakatsi indvodza nemfati kufanele babe “nyamanye.” (Gen. 2:24) Ngaso sonkhe sikhatsi, bebasebenta ndzawonye endlini yabo, emsebentini wekutiphilisa kanye nasemsebentini webuKhristu. Nasi sibonelo: Ngesikhatsi Pawula afika kwekucala eKhorinte, bo-Akhwila naPhrisila bamcela kutsi ahlale nabo emtini wabo, futsi ngekuhamba kwesikhatsi wenta nemisebenti letsite endlini yabo. Ngesikhatsi sebase-Efesu, basebentisa indlu yabo kute kuchutjelwe khona imihlangano yelibandla, futsi basebenta ndzawonye kute basite labo labasandza kutfola emaciniso, njenga-Apolosi, kutsi bakhule ngekwakamoya. (Imis. 18:2, 18-26) Ngesizatfu sekutsi bebanenshisekelo, baya eRoma, futsi nabefika khona baphindze basebentisa indlu yabo kute kuchutjelwe khona imihlangano yelibandla. Ngekuhamba kwesikhatsi, babuyela e-Efesu kute bayewucinisa bazalwane.—Rom. 16:3-5.

¹² Kwendlula sikhatsi lesitsite bo-Akhwila naPhrisila basebenta kanye naPawula emsebentini wekutfunga emathende. Nalapha futsi, laba lababili bebasebenta kanyekanye, ngekubambisana nangaphandle kwekuncintisana nobe kucabana. (Imis. 18:3) Nanobe kunjalo, kwenta imisebenti yebuKhristu ndzawonye ngiko lokwabasita kutsi bagcine umsebenti waJehova ubalulekile emshadweni wabo. Ngesikhatsi baseKhorinte, e-Efesu naseRoma, bebatiwa ngekutsi ‘tisebenti letikanye naKhristu.’ (Rom. 16:3) Basebenta ngekubambisana ekutfutfukiseni umsebenti wekushumayela ngeMbuso nobe ngukuphi lapho bebakhonta khona.

13, 14. (a) Ngutiphi tintfo letingaphatamisa bunye emshadweni? (b) Ngutiphi letinye tetintfo letingentiwa ngulabo labashadile kute bacinise buhlobo babo njengobe ‘banyamanye’?

¹³ Kuyabonakala-ke kutsi kuba nemigomo lefananako kanye nekusebenta ngebunye kuyawucinisa umshado. (Shu. 4:9, 10) Ngelishwa, bantfu labanyenti labashadile lamuhla bacitsa sikhatsi lesincane bandzawonye. Basebenta ema-awa lamanyenti emisebentini yabo leyehlukehlukene. Labanye bahamba emabanga lamadze nabaya emisebentini kantsi labanye bahamba bodvwa bayawusebenta kulamanye emave kute batfumele imali ekhaya. Ngisho nasekhaya, labanye bantfu labashadile batikhandza babodvwana ngesizatfu sesikhatsi labasicitsa ku-TV, ekuphumuleni, kutemidlalo, emidlalweni yema-video, nobe ku-Internet. Kuyenteka yini loku emndenini wakho? Nangabe kunjalo, ningatihlela yini timo tenu kute nicitse sikhatsi ndzawonye? Kungani ningayenti ndzawonye imisebenti yasekhaya, njengekupheka, kugeza titja, nobe kuhlanta libala? Kungani ningasebenti ndzawonye lapho ninakekela bantfwana nobe nisita batali benu lasebakhulile?

¹⁴ Lokubaluleke kakhulu kutsi nicitse sikhatsi ndzawonye emisebentini lehlobene nekukhonta Jehova. Kucoca ngembhalo welusuku ndzawonye kanye nekuhlanganyela ekukhonteni kwemndeni kuniniketa ematfuba lamahle ekwenta umndeni wenu ucabange futsi ube nemigomo lefananako. Shumayelani ndzawonye. Nakungenteka, yetamani kuba ngemahlahlandlela ndzawonye, ngisho nobe timo tenu tinivumela kutsi nikwente inyanga nobe umnyaka lowodvwa. (Fundza 1 Khorinte 15:58.) Lomunye dzadze lowaba lihlahlandlela kanye nendvodza yakhe utsi: “Umsebenti wekushumayela wawungulenye indlela leyayisivulela litfuba lekuba ndzawonye futsi bewusenta sikhulume ngekukhululeka. Ngesizatfu sekutsi sobabili sasinemgomo wekusita labo lesihlangana nabo ensimini, ngeva kutsi sasimunye. Ngativa ngisondzelene naye, hhayi njengendvodza yami kuphela, kodvwa njengemngani lotsandzekako.” Njengobe nenta tintfo letizuzisako ndzawonye, kancane kancane tintfo lenititsandzako, tintfo letita kucala kini, kanye nemikhuba yenu kuyawufanana kute kube ngulapho senicabanga, nitiva, futsi nenta tintfo ‘ninyamanye’ njenga-Akhwila naPhrisila.

Condziswani NguNkulunkulu

15. Yini lebalulekile kute umshado uphumelele? Chaza.

¹⁵ Jesu abekwati kubaluleka kwekubeka Nkulunkulu kucala emshadweni. Abembonile Jehova ngesikhatsi ashadisa bantfu bekucala. Wayibona indlela bo-Adamu na-Eva labebajabule ngayo ngesikhatsi balalela sicondziso saNkulunkulu, futsi watibonela ngewakhe inhlupheko leyaba ngumphumela wekungalaleli. Ngako-ke, lapho afundzisa labanye, Jesu waphindza emavi lashiwo nguBabe wakhe kuGenesisi 2:24. Waphindze washo naku: “Loko lakuhlanganisile Nkulunkulu, akungabe kusehlukaniswa ngumuntfu.” (Mat. 19:6) Ngako-ke, inhlonipho lejulile ngaJehova isabalulekile kute kube nenjabulo kanye nemphumelelo emshadweni. Batali baJesu basemhlabeni, Josefa naMariya, basibekela sibonelo lesihamba embili kulendzaba.

16. BoJosefa naMariya bakhombisa njani kutsi bebacondziswa nguJehova emndenini wabo?

¹⁶ Josefa abemphatsa ngemusa futsi amhlonipha Mariya. Mhlazana eva kutsi Mariya ukhulelwe, Josefa wamphatsa ngemusa, ngisho nangembikwekufika kwengilosi yaNkulunkulu leyamchazela loko lokwakwentekile kuMariya. (Mat. 1:18-20) Bawulalela umtsetfo waKhesari, baphindze bawulandzela neMtsetfo waMosi. (Luk. 2:1-5, 21, 22) Nanobe kwakungemadvodza kuphela lokwakufanele abe khona kulemikhosi lebalulekile lebeyiba seJerusalema, boJosefa naMariya, kanye nemalunga emndeni wabo bebabakhona minyaka yonkhe. (Dut. 16:16; Luk. 2:41) Ngekwenta kanjalo, balwela kujabulisa Jehova futsi bakhombisa inhlonipho lejulile ngetintfo takamoya. Akumangalisi-ke kutsi kungani Jehova abakhetsa kutsi banakekele iNdvodzana yakhe encenyeni yekucala yekuphila kwayo kwasemhlabeni.

17, 18. (a) Bantfu labashadile bangambeka njani Nkulunkulu kucala emndenini wabo? (b) Loku kutawubazuzisa njani?

¹⁷ Umndeni wakho ucondziswa nguNkulunkulu yini? Nasi sibonelo: Ngembikwekutsi utsatse tincumo letibalulekile, uyacwaninga yini ngetimiso teliBhayibheli, uthandaze ngalendzaba, futsi ufune seluleko kumaKhristu lavutsiwe? Awubese yini ufuna kucatulula tinkinga ngekucabangela imiva yakho, yetihlobo nobe yebangani bakho? Uyetama yini kusebentisa teluleko letinyenti letilusito letishicilelwa sisebenti lesetsembekile mayelana nemshado kanye nemndeni? Awutitfoli yini sewulandzela imikhuba yasendzaweni yakini nobe teluleko letivamile talelive? Nithandaza njalo futsi nitadishe ndzawonye yini, nitibekele imigomo yakamoya, futsi nikhulume ngetintfo letita kucala emndenini wenu?

¹⁸ Akhuluma ngeminyaka yabo lengu-50 yemshado lojabulisako, Ray utsi: “Kute inkinga leyavela lesehluleka kuyincoba, ngobe Jehova abehlale ayincenye ‘yentsambo yetfu lenemicu lemitsatfu.’” (Fundza Umshumayeli 4:12.) BoDanny naTrina bayavumelana naloku. Bona batsi: “Njengobe sikhonta Nkulunkulu ndzawonye, umshado wetfu uye wacina kakhulu.” Sebaneminyaka lengetulu kwa-34 bashadile futsi bajabula. Nawuhlale ubeka Jehova kucala emshadweni wakho, utawukusita kutsi uphumelele futsi akubusise kakhulu.—Hla. 127:1.

Chubeka Usihlonipha Lesipho SaNkulunkulu

19. Kungani Nkulunkulu aniketa bantfu sipho semshado?

¹⁹ Lamuhla, intfo lebaluleke kakhulu kubantfu labanyenti yinjabulo yabo kuphela. Nanobe kunjalo, sikhonti saJehova sona sinembono lowehlukile. Siyati kutsi Nkulunkulu wahlela kutsi umshado ube sipho lesitfutfukisa injongo yaKhe. (Gen. 1:26-28) Kube bo-Adamu na-Eva basihlonipha lesipho, wonkhe umhlaba bewutawuba lipharadisi leligcwele tikhonti taNkulunkulu letijabulako naletilungile.

20, 21. (a) Kungani kufanele sitsatse umshado njengentfo lengcwele? (b) Ngusiphi sipho lesitawucoca ngaso evikini lelitako?

²⁰ Lokubaluleke kakhulu kutsi tikhonti taNkulunkulu titsatsa umshado njengelitfuba lekumkhatimulisa. (Fundza 1 Khorinte 10:31.) Njengobe sibonile, kwetsembeka, bunye, kanye nekucondziswa nguNkulunkulu kuyamjabulisa Jehova futsi kucinisa umshado. Ngako-ke, ngisho nobe sisahlela kushada, sifuna kucinisa, nobe kusindzisa umshado wetfu, kufanele sicaphele kutsi umshado uluhlelo lolungcwele naloluvela kuNkulunkulu. Nasihlale sikukhumbula loku, sitawukwenta konkhe lokusemandleni etfu kute sitsatse tincumo temshado ngekuvumelana neliVi laNkulunkulu. Ngalendlela, sitawube sikhombisa inhlonipho, hhayi nje ngesipho semshado kuphela, kodvwa nangeMuphi waso, Nkulunkulu Jehova.

²¹ Umshado awusiso sipho lokukuphela kwaso Jehova lasiphe sona, futsi akusiwo lokuphela kwendlela yekutfola injabulo ekuphileni. Esihlokweni lesilandzelako, sitawuhlola lesinye sipho lesiligugu lesivela kuNkulunkulu—lokusipho sekungashadi.

Ungaphendvula Njani?

• Kwetsembeka kufanele kuwatsintse njani emaKhristu lashadile?

• Kungani kusebenta ndzawonye ngebunye kuwucinisa umshado?

• Ngutiphi letinye tindlela bantfu labashadile labangavumela ngato kucondziswa nguNkulunkulu?

• Singamhlonipha njani Jehova, longuMsunguli wemshado?

[Titfombe ekhasini 18]

Kusebenta ndzawonye kusita bantfu labashadile kutsi bahlale banebunye