Kufanele Yini Kutsi Bantfwana Bafundziswe NgaNkulunkulu?

“Tinkholo lesinato tisenta kutsi sitondzane esikhundleni sekutsi sitsandzane.”—JONATHAN SWIFT, UMBHALI LOLINGISI.

SWIFT washo lamavi ngelikhulu lesi-18 leminyaka, kodvwa bantfu labanyenti lamuhla bangavumelana naye. Kulamanye emave, kunebantfu labakholelwa kutsi batali akukafaneli bavunyelwe kutsi bafundzise bantfwana babo ngaNkulunkulu. Bacabanga kutsi bantfwana labakhulele emndenini wemakholwa kungenteka bangaphumeleli.

Wena ucabangani ngalendzaba? Kulemisho lelandzelako, ngukuphi lokukahle?

● Batali akukafaneli bavunyelwe kutsi bafundzise bantfwana babo ngaNkulunkulu.

● Batali kufanele balindze bate bantfwana babo bakhule kube ngukhona bakhuluma nabo ngetenkholo.

● Batali kufanele bafundzise bantfwana babo loko labakukholelwako ngaNkulunkulu kusukela basesebancane. Nasebakhulile, kufanele babakhutsate kutsi bacabangisise ngalendzaba bese batentela sincumo.

● Bantfwana kufanele batsatse lokukholelwa batali babo ngaNkulunkulu bangabe bafuna kwati kutsi kuliciniso yini nobe cha.

Inkholo Iyingoti Yini Kubantfwana?

Kute umtali lonelutsandvo longalimata bantfwana bakhe. Kodvwa-ke emaciniso ayakusekela yini loko lokushiwo ngulabo labalela bantfwana babo kutsi bafundze ngaNkulunkulu? Sekungemashumi eminyaka bacwaningi bahlolisisa imiphumela tinkholelo tebatali letingaba nayo kubantfwana. Yini labayitfolile?

Bacwaningi batfole kutsi esikhundleni sekutsi inkholo ibe yingoti kubantfwana, ingabasita kutsi bakhule kahle. Nga-2008, umbiko lowawushicilelwe kumagazini i-“Social Science Research”a watsi: “Inkholo ikhulisa lutsandvo emkhatsini webantfwana nebatali.” Lombiko waphindze watsi: “Inkholo nekutakhela buhlobo naNkulunkulu kubonakala kuyintfo lebaluleke kakhulu emphilweni yebantfwana labanyenti kanye nasemindenini.” Asewunake indlela loko lokutfolwe bacwaningi lokufanana ngayo naloko lokwashiwo nguJesu Khristu: “Babusisiwe labamphofu emoyeni, ngobe umbuso welizulu wabo.”—Matewu 5:3.

Kutsiwani ngembono lovamile wekutsi bantfwana kufanele bakhule kucala kube ngukhona bafundziswa ngaNkulunkulu nenkholo? Lowo mbono awuvumelani neliciniso lekutsi ingcondvo yemntfwana ifanana nelibhakede lelingenalutfo lelifanele kugcwaliswa ngalokutsite. Ecinisweni, batali kufanele bakhetse emkhatsini wekutigcwalisela ‘lelibhakede’ ekhaya labo ngekutifundzisela bantfwana babo imitsetfo yekutiphatsa kanye netinkholelo labacabanga kutsi tikahle nobe kuvumela labanye bantfu kutsi bafake nobe yini etingcondvweni nasetinhlitiyweni tebantfwana babo.

Ilelephi Imfihlo?

Umlandvo uveta kutsi inkholo ngiyo lebangela kutsi bantfu babandlululane futsi batondzane. Ngako-ke batali bangawubalekela njani umphumela lowashiwo nguJonathan Swift? Batali bangabafundzisa njani bantfwana babo tinkholelo letitawubasita kutsi batsandze labanye bantfu?

Imfihlo isetimphendvulweni tanayi imibuto lemitsatfu: (1) Yini lokufanele ifundvwe bantfwana? (2) Ngubani lokufanele abafundzise? (3) Ngutiphi tindlela letikahle kakhulu tekubafundzisa?

[Umbhalo longentansi]