Yini Lokufanele Ifundvwe Bantfwana?
“Yonkhe imiBhalo iphefumulelwe nguNkulunkulu; ilungele kufundzisa, nekusola, nekucondzisa, nekuyala ngekulunga.”—2 THIMOTHI 3:16.
BANTFWANA badzinga kufundziswa liciniso ngaNkulunkulu. Bangalifundza kuphi leliciniso? Encwadzini yenkholo lehlonishwa kakhulu emhlabeni, lokuliBhayibheli.
LiBhayibheli lifanana nencwadzi lesiyibhalelwe nguNkulunkulu. Kulencwadzi, Nkulunkulu wembula buntfu bakhe kubo bonkhe bantfwana bakhe, labancane nalabadzala, aphindze abanikete neticondziso tendlela yekutiphatsa. Asewunake letinye tetimfundziso letiseBhayibhelini kanye naloko lokungafundvwa ngisho nabantfwana labancane kuto.
Yini Nkulunkulu lafuna siyati ngaye?
◼ Lokufundziswa liBhayibheli: “Nguwe wedvwa lolibito lakhe [linguJehova, NW], nguwe Losetikwako Konkhe, lophakeme abuse umhlaba wonkhe.”—Tihlabelelo 83:18.
Lesikufundzako: Nkulunkulu ukhona futsi unelibito lelikhetsekile.
◼ Lokufundziswa liBhayibheli: “Simakadze uhlolisisa tonkhe tinhlitiyo acondzisise tonkhe tinjongo temicabango. Nawumfuna, utamtfola.”—1 Tikhronike 28:9.
Lesikufundzako: Nkulunkulu Jehova usikhatsalela sonkhe ngisho nebantfwana labancane. (Tihlabelelo 10:14; 146:9) Ufuna kutsi sifundze ngaye.
◼ Lokufundziswa liBhayibheli: ‘Ningayiphatsi dlephu . . . intsandzane. Naniyihlupha, bese ikhala kimi, mine ngiyawukuva kukhala kwayo.’—Eksodusi 22:22-24.
Lesikufundzako: Jehova ulalela ngisho nemithandazo yebantfwana labancane. Singakhuluma njalo naNkulunkulu futsi simtfululele tifuba tetfu.
◼ Lokufundziswa liBhayibheli: “Balinga Nkulunkulu njalonjalo, bacansula Longcwele waka-Israyeli.”—Tihlabelelo 78:41.
Lesikufundzako: Lesikukhulumako nalesikwentako kuyamtsintsa Jehova. Ngako-ke kufanele sicabange ngembikwekutsi sikhulume nobe sente lokutsite.
Kufanele sibaphatse njani bantfu labangafanani natsi?
◼ Lokufundziswa liBhayibheli: “Nkulunkulu akakhetsi libala lemuntfu, kodvwa lowo lomesabako ente lokulungile uyemukeleka kuye, nome angewasiphi sive.”—Imisebenti 10:34, 35.
Lesikufundzako: Nangabe Nkulunkulu emukela bantfu bato tonkhe tive, akukafaneli sibabandlulule labanye nangabe libala labo lesikhumba nobe indlela lababukeka ngayo ingafanani neyetfu.
◼ Lokufundziswa liBhayibheli: “Nihlale nilungele kubaphendvula bonkhe labanibuta ngelitsemba lelikini. Loku nikwente ngebumnene nangekuhlonipha.”—1 Phetro 3:15, 16.
Lesikufundzako: Nangabe sicoca ngenkholo, kufanele sikhulume ngekuciniseka kodvwa singakhahlameti. Kufanele nekutsi sibahloniphe labo labanetinkholelo letingafanani netetfu.
Kufanele siwaphatse njani emalunga emindeni yetfu?
◼ Lokufundziswa liBhayibheli: “Bantfwana, lalelani batali benu etintfweni tonkhe, ngobe nguloko lokutsandvwa yiNkhosi.”—Kholose 3:20.
Lesikufundzako: Bantfwana labalalelako abakhombisi kutsandza batali babo kuphela kodvwa bajabulisa naNkulunkulu.
◼ Lokufundziswa liBhayibheli: “Nibeketelelane, nitsetselelane, nangabe umuntfu akhube lomunye; ngobe phela neNkhosi yanitsetselela, nani-ke yentani njalo.”—Kholose 3:13.
Lesikufundzako: Ngaletinye tikhatsi, labanye bantfu, lokufaka ekhatsi emalunga emindeni yetfu, batawusidvumata. Kodvwa-ke nangabe sifuna kutsi Nkulunkulu asitsetselele, kufanele natsi sifundze kutsetselela labanye.—Matewu 6:14, 15.
Kungani kufanele setsembeke futsi sibe nemusa?
◼ Lokufundziswa liBhayibheli: “Lahlani emanga, akube ngulowo nalowo akhulume liciniso” kumakhelwane wakhe.—Efesu 4:25.
Lesikufundzako: Nangabe sikhuluma liciniso, sisuke silingisa Nkulunkulu futsi simjabulisa. Nangabe sesingenwa ngumkhuba wekucala emanga, siba njengesitsa saNkulunkulu, Develi, ‘longuyise wawo onkhe emanga.’—Johane 8:44; Thithusi 1:2.
◼ Lokufundziswa liBhayibheli: “Ngako-ke konkhe lenifisa kutsi bantfu bakwente kini, kwenteni nani kubo.”—Matewu 7:12.
Lesikufundzako: Kufanele siwacabangele emalunga emindeni yetfu nebantfu basemmangweni lesihlala kuwo. Nangabe ‘sibahawukela’ labanye, nabo bangasiphatsa ngemusa.—1 Phetro 3:8; Lukha 6:38.
Njengobe sesibonile kuletibonelo, tifundvo letiseBhayibhelini tingasita bantfwana kutsi babe bantfu labakhulile lababongako nabentelwe lokutsite, bahloniphe futsi babe neluvelo. Kodvwa-ke ngubani lokufanele abafundzise letifundvo?