Indlela Yekufundzisa Bantfwana NgaNkulunkulu—Ngutiphi Tindlela Letiphumelelako?

“Lemiyalo lengininika yona lamuhla kufanele ibesetinhlitiyweni tenu. Niyakuyinamatsisela etingcondvweni tebantfwabenu, nikhulume ngayo nanihleti emakhaya, nome nihamba endleleni, nome nilala nome nivuka.”—DUTHERONOMI 6:6, 7.

NGALETINYE tikhatsi, batali bangabona shengatsi umtfwalo wekucecesha bantfwana babo mkhulu kakhulu kutsi bangawutfwala. Nabatsi bafuna seluleko, bangase badidwe tintfo letinyenti labatjelwa kutsi batente. Tihlobo kanye nebangani bavame kuveta imibono yabo ngekushesha. Tincwadzi, tihloko tabomagazini, kanye nemakheli e-Internet achubeka aniketa batali teluleko letivame kuphikisana.

Ngakulokunye, liBhayibheli aligcini ngekuniketa batali seluleko labangasetsemba mayelana naloko lokufanele bakufundzise bantfwana babo, kodvwa libaniketa nesicondziso lesilusito sendlela yekubafundzisa. Njengobe lamavesi lacashunwe ngenhla aveta, batali kufanele betame kutfola indlela yekucoca nebantfwana babo ngaNkulunkulu malanga onkhe. Lapha ngentansi kucocwa ngetindlela letine letisekelwe eBhayibhelini letisite batali labanyenti kutsi bafundzise bantfwana babo ngaNkulunkulu.

1. Bafundzise tifundvo letitfolakala endalweni. Umphostoli Pawula wabhala: “Kusukela ekudalweni kwemhlaba nemkhatsi emandla [aNkulunkulu] laphakadze nebuNkulunkulu bakhe bebufihlekile emehlweni ebantfu; noko bebukhona etingcondvweni kutsi bubonakale etintfweni latentile.” (Roma 1:20) Kunyenti lokungentiwa batali kute basite bantfwana babo kutsi batsatse Nkulunkulu njengeMuntfu lokhona mbamba ngekutsi babente banake indalo yakhe futsi babasite bakwati kubona kutsi ngutiphi timfanelo taNkulunkulu letivetwa yintfo letsite ledaliwe.

Jesu wayisebentisa lendlela nakafundzisa bafundzi bakhe. Sibonelo saloku kutsi watsi: “Bukani tinyoni temoya kutsi atihlanyeli, ativuni, atibeki lutfo etilulwini, kodvwa uYihlo losezulwini uyatondla. Anincono kakhulu yini nine kunato?” (Matewu 6:26) Ngalamavi, Jesu abegcizelela lutsandvo kanye neluvelo lwaJehova. Kodvwa wenta lokungetulu kwaloko. Wasita bafundzi bakhe kutsi bacabangisise ngendlela Nkulunkulu lativeta ngayo letimfanelo kubantfwana bakhe.

Solomoni, inkhosi lehlakaniphile, wakhuluma ngekuhlakanipha kwemvelo Nkulunkulu lakuniketa tintfutfwane, futsi wasebentisa letilwanyana kute agcizelele sifundvo lesibalulekile. Wabhala: “Hamba ufundze entfutfwaneni, wena vila-ndzini, kutsi iphila njani, khona utawuhlakanipha. Lite tintfutfwane tite sikhulu nome indvuna nome umbusi, kodvwa kudla kwato tikubutsa ehlobo tikulondvolote ngesikhatsi sekuvuna.” (Taga 6:6-8) Lena yindlela lephumelela kakhulu yekufundzisa bantfwana kubaluleka kwekubeka imigomo lezuzisako kanye nekusebentisa emandla lavela kuNkulunkulu kute bayifinyelele.

Batali bangalingisa lendlela yekufundzisa lephumelelako yaJesu kanye naSolomoni ngekwenta naku lokulandzelako: (1) Babute bantfwana babo kutsi ngutiphi tihlahla kanye netilwane labatitsandzako. (2) Bafundze lokwengetiwe ngaleto tihlahla netilwane. (3) Bacoce ngetifundvo leyo ndalo letifundzisako ngaNkulunkulu.

2. Lingisa simo sengcondvo Jesu labenaso ngalabo labebafundzisa. Kubo bonkhe bantfu labake baphila, Jesu abenetintfo letibaluleke kakhulu lebekufanele atisho. Nanobe kunjalo, wasebentisa sikhatsi sakhe lesinyenti abuta imibuto. Abefuna kuyati imicabango kanye nemiva yalabo labebafundzisa. (Matewu 17:24, 25; Makho 8:27-29) Ngendlela lefananako, batali banetifundvo letinyenti letibalulekile lokufanele batifundzise bantfwana babo. Kodvwa kute baphumelele, kufanele balingise Jesu futsi bakhutsate bantfwana babo kutsi bayisho ngekukhululeka indlela labativa ngayo.

Kutsiwani nangabe bantfwana banesimo sengcondvo lesibi nobe batsatsa sikhatsi kufundza letinye tifundvo letibalulekile? Cabanga ngendlela Jesu lasebentelana ngayo nebaphostoli bakhe. Ngaletinye tikhatsi bebaphikisana bodvwana futsi abazange basheshe batifundze tinzuzo tekutfobeka. Nanobe kunjalo, Jesu wachubeka ababeketelela futsi abehlale abakhumbuta ngesidzingo sekutfobeka. (Makho 9:33, 34; Lukha 9:46-48; 22:24, 25) Batali labalingisa Jesu batawubayala ngesineke bantfwana babo, futsi nangabe kudzingeka, batawuchubeka babakhumbuta ngentfo yinye kute kube ngulapho sebakucondza kahle kubaluleka kwayo.a

3. Fundzisa ngesibonelo. Batali benta kahle ngekulalela seluleko umphostoli Pawula lasiniketa emaKhristu labehlala eRoma. Naku lawabhalela kona: “Pho, njengobe ufundzisa labanye, wena awutifundzisi ngani? Wena ushumayela kutsi kungebiwa, pho, wena ubelani?”—Roma 2:21.

Leseluleko siyasebenta ngobe loko batali labakwentako kuba nemandla kakhulu kubantfwana kunaloko labakushoko. Ecinisweni, batali labaphila ngaloko labakufundzisako basetfubeni lelihle lekuba nebantfwana labatilalelako timfundziso tabo.

4. Cala kufundzisa umntfwana wakho asesemncane. Thimothi, lobekahamba nemphostoli Pawula emsebentini wetitfunywa telivangeli, bekatiwa kahle endzaweni yakubo. (Imisebenti 16:1, 2) Loko kwabangelwa kutsi “kusukela ebuntfwaneni” nobe aseluswane abefundziswe “imiBhalo lengcwele.” Make waThimothi kanye nagogo wakhe abazange bagcine ngekumfundzela imiBhalo kuphela, kodvwa bamsita nekutsi acabangisise ngalamaciniso labewafundza.—2 Thimothi 1:5; 3:14, 15.

Ungalutfolaphi lusito?

BoFakazi BaJehova bashicilela tincwadzi letinyenti letentelwe kusita batali kutsi bafundzise bantfwana babo liciniso ngaNkulunkulu. Letinye tentelwe kusita bantfwana labasebancane. Letinye tingasita batali kanye nebantfwana babo labaseminyakeni yekutfomba kutsi bachubeke babhobokelana.b

Kodvwa-ke ngembikwekutsi batali bafundzise bantfwana babo ngaNkulunkulu, kufanele batati timphendvulo taleminye imibuto lematima bantfwana labangayibuta. Nasi sibonelo: Ungayiphendvula njani lemibuto lelandzelako: Kungani Nkulunkulu avumela kuhlupheka? Iyini injongo yaNkulunkulu ngemhlaba? Bakuphi bantfu labafile? BoFakazi BaJehova bangakujabulela kukusita kutsi utfole timphendvulo talemibuto kanye naleminye kute wena nemndeni wakho nisondzelane naNkulunkulu.—Jakobe 4:8.

[Imibhalo lengentansi]