Usakhumbula Yini?

Ubafundze kahle yini bomagazini bakamuva be-Sicongosekulindza? Nangabe kunjalo, asewubone kutsi ungakwati yini kuphendvula lemibuto lelandzelako:

• Ngutiphi tici letintsatfu letingasisita sikwati kumelana nemkhuba wekungetsembeki?

Ngunati: (1) Kwesaba kudvumata Nkulunkulu. (1 Phet. 3:12) (2) Kuba nanembeza loceceshwe liBhayibheli. (3) Kusebenta kamatima kute wenetiseke.—4/15, emakhasi 6-7, ngesiZulu.

• Sati njani kutsi kutsatsa kukhonta Nkulunkulu njengalokubalulekile akusho kutsi kufanele singabi naso sikhatsi sekuphumula kanye nesekutijabulisa?

Singacabanga ngesibonelo saJesu. Wajabulela kudla nalabanye bantfu. Siyati kutsi akazange abe ngulocinisa sandla. Labanye bantfu, ngisho nebantfwana imbala, bebadvonseleka kuye futsi bativa bakhululekile nabanaye.—4/1, likhasi 14.

• Yini lengentiwa bantfu labashadile nangabe buhlobo babo sebucala kuhhohloka ngemuva kwekutfola bantfwana?

Kufanele baphindze bacinise lutsandvo lwabo. Indvodza ingase yetame kusita umkayo kutsi angabi nemiva yekungalondzeki lokungenteka kutsi unayo. Bobabili kufanele balwele kukhulumisana kahle mayelana nendlela labativa ngayo kanye nangetidzingo tabo.—5/1, emakhasi 12-13, ngesiZulu.

• Besifanekiselani sihlahla semncumo lesikuRoma sehluko 11?

Sihlahla semncumo sifanekisela incenye yesibili yentalo ya-Abrahama, lokungema-Israyeli akamoya. Jehova ufanana netimphandze talesihlahla semncumo kantsi Jesu ufanana nesicu saso. Ngesikhatsi emaJuda emdzabu lamanyenti amala Jesu, bantfu beTive lababa ngemakholwa bebangahlunyeleliswa, ngaleyo ndlela, bavete linani leliphelele lencenye yesibili yentalo ya-Abrahama.—5/1, emakhasi 25-28.

• Ngutiphi tindzaba letimnandzi lesingatitjela bantfu labaphuyile?

Tindzaba letimnandzi kutsi: Nkulunkulu ubeke Jesu kutsi abe yiNkhosi. UnguMbusi lofanele lotawucedza buphuya. Kungani kunjalo? Kungobe utawubusa bonkhe bantfu futsi unemandla ekubucedza buphuya; uyabahawukela bantfu labaphuyile; futsi angakususa loko lokubangele buphuya, lokusifiso setfu sebugovu lesisitfole njengelifa.—7/1, likhasi 7.

• Bekasho kutsini Jesu ngesikhatsi atsi kuKhayafase: ‘Wena ngekwakho ushito’?—Mat. 26:63, 64.

Kusebaleni kutsi inkhulumo letsi ‘wena ngekwakho ushito’ beyiyindlela levamile yekukhuluma lebeyisho kutsi lokusandza kushiwo kuliciniso. Khayafase, umPhristi Lomkhulu, wabuta Jesu kutsi abenguKhristu, iNdvodzana yaNkulunkulu yini. Kuphendvula kwaJesu ngekutsi: ‘Wena ngekwakho ushito’ bekuveta kuvumelana kwakhe naloko lobekukhulunyiwe.—6/1, likhasi 18, ngesiZulu.

• Kube Jesu lobekete sono waba nebantfwana, intalo yakhe beyingaba yini yincenye yesihlengo?

Cha. Nanobe Jesu abengaba ngumtfombo wetigidzigidzi tebantfu letite sono, leyontalo beyingeke ibe yincenye yesihlengo. Kuphila kwaJesu lokute sono kuphela lobekuhambelana kahle nekwa-Adamu. (1 Thim. 2:6)—6/1, likhasi 21.

• EmaKhristu angakuveta njani kutsi ayasilalela secwayiso lesimayelana nebafundzisi bemanga, lesitfolakala encwadzini yeMisebenti 20:29, 30?

Awabemukeli bafundzisi bemanga emitini yabo futsi awababingeleli. (Rom. 16:17; 2 Joh. 9-11) EmaKhristu aphindze angatifundzi tincwadzi tetihlubuki, futsi awatibukeli tinhlelo tato letiku-TV nobe avakashele emaKheli e-Internet lakhuluma ngetimfundziso tato.—7/1, emakhasi 15-16.

• Ngubani lokufanele afundzise bantfwana ngaNkulunkulu?

Babe kanye namake kufanele babambisane ekwenteni loku, ngekuvumelana neseluleko lesiseBhayibhelini. (Taga 1:8; Ef. 6:4) Lucwaningo luveta kutsi lapho batali babambisene ekufundziseni bantfwana, umphumela uba muhle.—8/1, emakhasi 6-7, ngesiZulu.