Sondzela KuNkulunkulu

“Simakadze, . . . Uyangati”

“AWUKHO umtfwalo lowesindzako longetfwalwa ngumuntfu kwendlula kwati kutsi kute lokukhatsalelako.”a Ungawasho yini nawe lamavi? Wake wativa yini shengatsi kute lokukhatsalelako nobe losicondzako simo lokuso, lonendzaba nendlela lotiva ngayo? Nangabe kunjalo, kungakudvudvuta loku: Jehova utikhatsalela kakhulu tinceku takhe kangangekutsi uyakunaka konkhe lokwentekako kuto emalangeni onkhe ekuphila kwato. Emavi aDavide lakuTihlabelelo 139 asiniketa sicinisekiso saloku.

Aciniseka ngekutsi Nkulunkulu uyamkhatsalela, Davide watsi: “Simakadze ungihlolisisile, uyangati.” (Livesi 1) Kulamavi akhe Davide wasebentisa umfanekiso. Sento sesiHebheru lesitsi ‘hlolisisa’ singasho kumba lidvwala lelinensimbi (Jobe 28:3), kuhlola live (Tikhulu 18:2), nobe kuhlolisisa emaciniso mayelana nelicala lelitsite (Dutheronomi 13:14). Jehova usati kahle kakhulu kangangekutsi kufanana nekutsi uphenyisisa tonkhe tintfo lesitentako njengobe siphila. Davide usifundzisa kutsi Nkulunkulu uyatikhatsalela tinceku takhe. Uyatihlolisisa kute atati kahle.

Davide usiniketa imininingwane mayelana nendlela Nkulunkulu lasihlolisisa ngayo: “Uyakwati kuhlala kwami nekuvuka kwami, imicabango yami uyati ingakaveli.” (Livesi 2) Kuliciniso kutsi Jehova uhlala khashane, ezulwini. Nanobe kunjalo, uyakwati kuhlala kwetfu phansi ekushoneni kwelilanga ngalinye kanye nekuvuka kwetfu ngelilanga lelilandzelako kute sente imisebenti yekuphila. Wati nemicabango yetfu, tifiso tetfu, kanye netinhloso tetinhlitiyo tetfu. Davide abetiva angakaphephi yini ngesizatfu sekutsi Nkulunkulu abemhlolisisa kangaka? Cha, esikhundleni saloko bekumjabulisa kuhlolisiswa nguNkulunkulu. (Emavesi 23, 24) Kungani?

Davide bekati kutsi Jehova usuke afuna lokuhle kulabo labamkhontako nakabahlolisisa. Loko wakuveta ngalamavi: “Uhlolisisa kuhamba kwami nekulala kwami, uyatati tonkhe tindlela tami.” (Livesi 3) Jehova utibona onkhe malanga ‘tindlela tetfu’—emaphutsa etfu kanye nalokuhle lesikwentako. Unaka emaphutsa yini nobe unaka lokuhle? Ligama lesiHebheru lelihunyushwe ngekutsi ‘hlolisisa’ lingasho “kusefa” nobe “kwela,” ngendlela umlimi lenta ngayo nakela tilimo letitinhlavu kute akhiphe emakhoba kusale loko lakufunako. Ligama lelitsi ‘yati’ lihumusha ligama lesiHebheru lelingase lisho ‘kutsandza.’ Nakahlolisisa tintfo letentiwa nobe letishiwo tikhonti takhe lilanga ngelilanga, Jehova unaka loko lokuhle. Kungani? Ujabula kakhulu ngemetamo letiyentako yekumjabulisa.

Tihlabelelo 139 tisifundzisa kutsi Jehova utikhatsalela kakhulu tikhonti takhe. Uyatihlolisisa aphindze atinakisise malanga onkhe kuloko letikwentako. Ngekwenta njalo, ubese uyatati tinkinga tato, futsi ukwati kahle kucindzeteleka kanye nebuhlungu betinhlitiyo tato. Uyafisa yini wena kukhonta loNkulunkulu lokhatsalelana kangaka? Nangabe ufisa, ungaciniseka ngalamavi: “Angeke ayikhohlwe imisebenti yenu nelutsandvo lenilukhombise ekusiteni labangcwele.”—Hebheru 6:10.

[Umbhalo longentansi]