Fundza EVini LaNkulunkulu
LiBhayibheli Liyakhuluma Yini Ngelikusasa?
Lesihloko simayelana nemibuto lokungenteka kutsi uke watibuta yona futsi sikhombisa lapho ungatfola khona timphendvulo eBhayibhelini lakho. BoFakazi BaJehova bangakujabulela kucoca nawe ngaletimphendvulo.
1. Tiphrofetho teliBhayibheli tiyagcwaliseka yini?
NguNkulunkulu Somandla kuphela lowatiko kutsi likusasa liphetseni. (Amose 3:7) Sibonelo saloko kutsi kusukela kadzeni washo kutsi kutawufika umuntfu lotsite lotawuba nguMesiya nobe Khristu. Mesiya bekatawuvela esitukulwaneni sendvodza leyetsembekile Abrahama. Abetawuba ngumbusi lotawenta kutsi bantfu labalalelako babusiswe ngekuphila sebetesono bangasaguli. (Genesisi 22:18; Isaya 53:4, 5) LoMesiya Lowetsenjiswa abetawuvela eBetlehema.—Fundza Mikha 5:2.
Jesu bekanguye loMesiya. Kusasele iminyaka lengetulu kwalengu-700, liBhayibheli latsi Mesiya abetawutalwa yintfombi ntfo futsi edzelelwe bantfu. Abetawufela tono tebantfu aphindze angcwatjwe netinjinga. (Isaya 7:14; 53:3, 9, 12) LiBhayibheli laphindze lasho kusasele iminyaka lengutulu kwalengu-500 kutsi Jesu abetawungena eJerusalema agibele imbongolo futsi atsengiswe ngetinhlavu tesiliva letingu-30. Konkhe loko kwenteka njengobe liBhayibheli belishito.—Fundza Zakhariya 9:9; 11:12.
2. Nkulunkulu uyasisho yini sikhatsi sekugcwaliseka kwesiphrofetho ?
Kusasele iminyaka lengetulu kwalengu-500, liBhayibheli lagagula umnyaka Mesiya labekatawuvela ngawo. Lesikhatsi labekatawuvela ngaso besibalwa ngemaviki, lokusho kutsi liviki lilinye belimelela iminyaka lesikhombisa. Bekutawuba ngemaviki lasikhombisa nemaviki langu-62 lokwenta emaviki langu-69 lagucuka abe yiminyaka. Lamaviki langu-69 agucuka abe yiminyaka lengu-483. Yacala nini leminyaka? Ngekusho kweliBhayibheli, yacala ngalesikhatsi inceku yaNkulunkulu Nehemiya icala kwakha iJerusalema kabusha. Umlandvo wasePheresiya uveta kutsi yacala nga-455 B.C.E. (Nehemiya 2:1-5) Jesu wabhajatiswa ngemuva kweminyaka lengu-483 ngemnyaka wa-29 C.E., ngaso lesikhatsi lesashiwo liBhayibheli.—Fundza Danyela 9:25.
3. Tiphrofetho tiyagcwaliseka yini nyalo?
Jesu waphrofetha ngetentakalo letibalulekile letenteka nyalo. Siphrofetho sakhe sakhuluma ngetindzaba letimnandzi letimayelana neMbuso waNkulunkulu lotawuletsela bantfu labatsandza Nkulunkulu kuphila lokuncono emhlabeni wonkhe. LoMbuso utawubhubhisa lelive lelibi lesiphila kulo.—Fundza Matewu 24:14, 21, 22.
Tiphrofetho teliBhayibheli tichaza tintfo letikhombisa kutsi lelive lelibi selitawuphela. LiBhayibheli laveta kutsi kulesikhatsi lokulindzelwe ngaso intfutfuko emhlabeni, bantfu batawuba babhubhisi bemhlaba. Kucindzeteleka lokubangelwa timphi, indlala, kutamatama kwemhlaba netifo, kutawandza. (Lukha 21:11; Sembulo 11:18) Bantfu batawuphelelwa similo. Kuletikhatsi letimatima, balandzeli baJesu bashumayela tindzaba letimnandzi letimayelana neMbuso waNkulunkulu emhlabeni wonkhe.—Fundza Matewu 24:3, 7, 8; 2 Thimothi 3:1-5.
4. Likusasa libaphatseleni bantfu?
Nkulunkulu Somandla ubagcinele tintfo letinhle bantfu labetsembekile. Jesu Khristu longuMesiya nalabakhetsiwe, batawubusa emhlabeni basezulwini. Bakha hulumende lotawubusa iminyaka leyinkhulungwane. Labafile batawuvuswa futsi batawehlulelwa kute kubonakale kutsi kubafanele yini kutfola kuphila lokuphakadze. Ngetulu kwaloko, loMbuso utawelapha bonkhe labatawube baphila ngalesosikhatsi. Kugula nekufa kuyawuphela.—Fundza Sembulo 5:10; 20:6, 12; 21:4, 5.
Kute utfole kwatiswa lokubanti, fundza emakhasi 23-25, nemakhasi 197-201 alencwadzi Lifundzisani Mbambambamba LiBhayibheli? levetwe kulelikhasi.