Kujabula Ngelitsemba Letfu
“[Kunelitsemba] lekuphila lokuphakadze, lekwatsi umhlaba ungakasekelwa kwetsenjiswa nguNkulunkulu longawacali emanga.”—THIT. 1:2.
ASESIBUKETE
․․․․․
Sati njani kutsi kuba nenjabulo ezulwini nangabe munye logcotjiwe alondvolota bucotfo bakhe kuphila kwakhe konkhe?
․․․․․
Kugcwaliseka kwelitsemba laletinye timvu, kuhlobene njani nelitsemba lalabagcotjiwe?
․․․․․
Kute sibone litsemba letfu ligcwaliseka, ngukuphi ‘kuphila ngekumesaba Nkulunkulu’ kanye ‘nemisebenti lemihle lemdvumisako’ lokufanele siyibonakalise?
1. Litsemba Jehova lasinikete lona lingasisita njani kute sibeketele?
UMPHOSTOLI PAWULA watsi Jehova ‘unguNkulunkulu, longumtfombo welitsemba.’ Wachubeka watsi: ‘Usigcwalisa ngako konkhe kujabula nekuthula ekukholweni, kuze siphuphume etsembeni ngemandla emoya longcwele.’ (Rom. 15:13) Nangabe litsemba letfu lilikhulu, sitawukwati kubeketelela timo letingahle tisivelele, tinhlitiyo tetfu titawugcwala injabulo nekuthula. NjengakumaKhristu lagcotjwe ngemoya, litsemba lelinjalo litawuba ‘njengesisimiso semkhumbi, nanjengesiphephelo lesicinile’ nakulamanye emaKhristu. (Heb. 6:18, 19) Litsemba letfu liyintfo lesingabambelela kuyo etikhatsini leticindzetelako futsi liyintfo lengasisita kute singahlehleli emuva nobe siphelelwe kukholwa.—Fundza Hebheru 2:1; 6:11.
2. Ngumaphi ematsemba lamabili latawutfolwa ngemaKhristu lamuhla, futsi kungani ‘letinye timvu’ tinesitsakatelo etsembeni lelitfolwa ngulabagcotjiwe?
2 EmaKhristu laphila kulesikhatsi sekuphela anaka kakhulu ematsemba lamabili. Emalunga ‘emhlambi lomncane’ langemaKhristu lagcotjiwe lasesemhlabeni, anelitsemba lekuvuselwa ezulwini njengemakhosi nebaphristi kanye naKhristu eMbusweni wakhe. (Luk. 12:32; Semb. 5:9, 10) “Sicumbi lesikhulu” ‘saletinye timvu’ sinelitsemba lekuphila phakadze epharadisi emhlabeni njengetikhonti teMbuso waMesiya. (Semb. 7:9, 10; Joh. 10:16) Letinye timvu kufanele tikhumbule kutsi kusindziswa kwato kusime ekusekeleni ‘bomnakabo’ Khristu labaselapha emhlabeni. (Mat. 25:34-40) Labagcotjiwe batawutfola umvuzo wabo, kodvwa litsemba letinye timvu letinalo litawugcwaliseka. (Fundza Hebheru 11:39, 40.) Kwekucala, ase sicoce ngelitsemba lalabagcotjiwe.
‘LITSEMBA LELIPHILAKO’ LEMAKHRISTU LAGCOTJIWE
3, 4. EmaKhristu lagcotjiwe ‘atalwa njani kabusha etsembeni leliphilako,’ futsi liyini lelotsemba?
3 Umphostoli Phetro wabhalela emaKhristu lagcotjiwe tincwadzi letimbili, lapho awabita khona ngekutsi ‘ngulabakhetsiwe.’ (1 Phet. 1:1) Wabhala imininingwane letsite ngelitsemba lelihle leliniketwe bemhlambi lomncane. Encwadzini yakhe yekucala, Phetro wabhala watsi: “Akabongwe Nkulunkulu, longuYise weNkhosi yetfu Jesu Khristu, lowasitala kabusha ngemusa wakhe lomkhulu, kuze sibe nelitsemba leliphilako ngekuvuswa kwaJesu Khristu kulabafile. Ngalo lelitsemba sinelifa lelingapheli, lelingenasici, nalelingaphuphi, lenilondvolotelwe lona ezulwini. Nkulunkulu uyawunigcina ngemandla akhe, njengobe nimetsemba, kube kusindziswa lokutakwembulwa ngesikhatsi sekugcina. Ngaloko-ke niyajabula.”—1 Phet. 1:3-6.
4 EmaKhristu lambalwa lakhetfwe nguJehova kutsi abuse naKhristu eMbusweni wakhe wasezulwini, kufanele ‘atalwe kabusha’ njengemadvodzana aNkulunkulu akamoya. Agcotjwa ngemoya longcwele kute abe ngemakhosi nebaphristi naKhristu. (Semb. 20:6) Phetro utsi ‘lokutalwa kabusha’ kuwavulela ‘litsemba leliphilako’ latsi ‘alipheli, alinasici futsi aliphuphi’ leligcinelwe wona “ezulwini.” Asingabati kutsi labagcotjiwe ‘bayajabula’ ngelitsemba labo. Nobe kunjalo, kugcwaliseka kwelitsemba lawo kusime ekwetsembekeni kwawo.
5, 6. Kungani emaKhristu lagcotjiwe kufanele ente konkhe lokusemandleni kute acinisekise lubito lwawo lwasezulwini?
5 Encwadzini yakhe yesibili, Phetro watjela emaKhristu lagcotjiwe kutsi ‘akhutsalele kakhulu kukhombisa kutsi elubito futsi akhetsiwe.’ (2 Phet. 1:10) Kufanele atinikele kute akhulise timfanelo tebuKhristu letifaka ekhatsi kukholwa, kwesaba Nkulunkulu, kutsandza bazalwane kanye nalabanye. Phetro watsi: “Nangabe letintfo tikini, tivama, titawunenta nikhutsale, nitsele titselo.”—Fundza 2 Phetro 1:5-8.
6 Emlayetweni lawubhalela labadzala labagcotjwe ngemoya basebandleni laseFiladelfiya, e-Asia Minor ngelikhulu lekucala leminyaka, Khristu lovusiwe watsi: “Njengobe uligcinile livi lami lekucinisela ngekubeketela, ngitakugcina ngesikhatsi sekulingwa lesitawufika emhlabeni wonkhe, sitewulinga bonkhe labo labahlala emhlabeni. Ngiyeta masinyane, bambisisa loko lonako, kuze kubete umuntfu lokwemuka umchele wakho.” (Semb. 3:10, 11) Nangabe umKhristu logcotjiwe angetsembeki, angeke ‘awemukele umchele webukhosi longagugi’ lowetsenjiswe labakhetsiwe labahlala betsembekile badzimate bafe.—1 Phet. 5:4; Semb. 2:10.
KUNGENA EMBUSWENI
7. Nguliphi litsemba lelijabulisako Juda lakhuluma ngalo encwadzini yakhe?
7 Cishe ngemnyaka wanga-65 C.E., bhuti waJesu Juda wabhalela emaKhristu lagcotjiwe incwadzi lawabita kuyo ngekutsi ‘ngulababitiwe.’ (Juda 1; catsanisa naHebheru 3:1.) Abehlose kuwabhalela incwadzi lekhuluma ngelitsemba lekusindza emaKhristu layawubusa eMbusweni waNkulunkulu wasezulwini “lahlanganyela kulo.” (Juda 3) Nanobe kwakunaletinye tindzaba letibalulekile lobekufanele akhulume ngato, ekwephetseni kwencwadzi yakhe lemfisha, wakhuluma ngelitsemba lelijatjulelwa ngemaKhristu lagcotjiwe. Wabhala: “Kuye lonemandla ekunigcina, ningete nakhubeka, kuze aniletse ebukhosini bakhe, nite licala, nitfokota kakhulu, yebo, kuNkulunkulu lokunguye yedvwa, uMsindzisi wetfu ngaJesu Khristu iNkhosi yetfu, akube ludvumo, nebukhosi, nemandla, neligunya, ngaphambi kwetikhatsi, manje, naphakadze.”—Juda 24, 25.
8. Ngekusho kwaJuda 24, yini lekhombisa kutsi kuba nenjabulo ezulwini nangabe munye walaba labagcotjiwe akhombise kwetsembeka kwakhe?
8 Kuliciniso kutsi emaKhristu lagcotjiwe latsembekile afuna kuvikeleka etintfweni letingaba lugibe kuwo. Litsemba lawo lelisekelwe eBhayibhelini likutsi Jesu Khristu utawavusa ekufeni, awavumele kutsi avele embikwaNkulunkulu anemtimba lote sono futsi ajabulile. Ngalesikhatsi logcotjiwe afa etsembekile, usuke anelitsemba lekutsi ‘utawuvuswa anemtimba wemoya’ futsi ‘longenakubola . . . , ngenkhatimulo.’ (1 Khor. 15:42-44) Nangabe ‘kunekutfokota lokukhulu ezulwini ngesoni sinye lesiphendvukako’ cabanga kutsi iba ngakanani injabulo ezulwini nangabe munye wabomnakabo Khristu logcotjiwe afa emhlabeni etsembekile. (Luk. 15:7) Jehova kanye netidalwa temoya letetsembekile, batawujabula kanye nalogcotjiwe nakatfola umvuzo wakhe ‘ngekutfokota lokukhulu.’—Fundza 1 Johane 3:2.
9. Kungena eMbusweni ‘kulilungelo leliphelele’ ngayiphi indlela kumaKhristu lagcotjiwe, futsi lelitsemba libatsintsa njani labagcotjiwe labasesemhlabeni?
9 Ngalokufananako, Phetro wabhalela emaKhristu lagcotjiwe kutsi nangabe enta lubito lwawo luciniseke ngekwetsembeka kwawo, ‘ayawunikwa lilungelo leliphelele lekungena embusweni waphakadze weNkhosi neMsindzisi wetfu Jesu Khristu.’ (2 Phet. 1:10, 11) Kungena kwawo emvuzweni wasezulwini kutawuba “lilungelo leliphelele” leliveta timfanelo tawo tebuKhristu nenjabulo lanayo. Kuba ‘nelilungelo leliphelele’ kuphindze kukhonjiswe tibusiso letitawujatjulelwa ngulabo labatawutfola kuphila. Bangase bacabange ngemphilo labayiphile ngekwetsembeka ngetinhlitiyo letigcwele injabulo nekubonga. Akungabateki kutsi kucabanga ngaloku kuniketa emaKhristu lagcotjiwe lasesemhlabeni emandla ‘ekubopha tinkhalo tengcondvo yawo.’—1 Phet. 1:13.
‘LITSEMBA’ LALETINYE TIMVU
10, 11. (a) Letinye timvu tinaliphi litsemba? (b) Kugcwaliseka kwelitsemba lasemhlabeni kuhlobene njani naKhristu kanye ‘nekwembulwa kwemadvodzana aNkulunkulu’?
10 Umphostoli Pawula wabhala ngelitsemba ‘lemadvodzana aNkulunkulu’ lagcotjwe ngemoya njengalawo ‘latindlalifa’ kanye naKhristu. Ngemuva kwaloko wakhuluma ngelitsemba lelimangalisako lelo Jehova laletsembise sicumbi lesikhulu saletinye timvu: “Indalo yonkhe [lebantfu] ilindzele ngekulangatelela lokukhulu kutsi Nkulunkulu embule emadvodzana akhe [lagcotjiwe]. Ngobe indalo ibekwe esimeni sebute, hhayi ngekutsandza kwayo, kodvwa ngentsandvo yalowo lowayibeka etsembeni lekutsi nendalo ngalelinye lilanga iyawukhululwa kulobugcili bekubola, ibe nesabelo kulenkhululeko nebukhosi bebantfwana baNkulunkulu.”—Rom. 8:14-21.
11 ‘Litsemba’ lebantfu laniketwa nguJehova ngalesikhatsi etsembisa kubakhulula ‘enyokeni yasemandvulo,’ lenguSathane Develi, asebentisa ‘intalo’ letsenjisiwe. (Semb. 12:9; Gen. 3:15) ‘Lentalo’ ngalokuyinhloko yayinguJesu Khristu. (Gal. 3:16) Ngekufa nekuvuswa kwakhe, wenta kutsi bantfu babe nesisekelo selitsemba lekutsi batawukhululwa ekugcilatweni sono nekufa. Kugcwaliseka kwalesitsembiso kuhlobene ‘nekwembulwa kwemadvodzana aNkulunkulu.’ Emakhristu lagcotjiwe lakhatinyulisiwe ayincenye yesibili ‘yalentalo.’ ‘Atawembulwa’ ngalesikhatsi ahlanganyela naKhristu ekubhubhiseni live lelibuswa nguSathane. (Semb. 2:26, 27) Loko kutatiletsela insindziso letinye timvu letitawube tiphuma ekuhluphekeni lokukhulu.—Semb. 7:9, 10, 14.
12. Kwembulwa kwalabagcotjiwe kutawuba natiphi tibusiso letijabulisako kubantfu?
12 Eminyakeni leyiNkhulungwane yekuBusa kwaKhristu, bantfu batawukhululwa. Ngaleso sikhatsi, ‘emadvodzana aNkulunkulu’ lakhatinyulisiwe atawuphindze ‘embulwe’ nawasebenta njengebaphristi kanye naKhristu, akhombisa tibusiso temhlatjelo wesihlengo saJesu kubantfu. Njengetikhonti teMbuso wasezulwini, bantfu batawukhululwa esonweni nasekufeni. Kancane kancane bantfu labalungile ‘bayawukhululwa kulobugcili bekubola.’ Nabachubeka betsembekile kuJehova idzimate iphele iminyaka leyiNkhulungwane nasekuhluphekeni kwekugcina lokuyawufika ngemuva kwayo, emabito abo atawubhalwa futsi angacishwa ‘encwadzini yekuphila.’ Batawungena ‘enkhululekweni yebukhosi bebantfwana baNkulunkulu.’ (Semb. 20:7, 8, 11, 12) Leli litsemba lelijabulisako sibili!
KUGCINA LITSEMBA LETFU LIPHILILE
13. Lisekelwe kuphi litsemba letfu, futsi utawembulwa nini Khristu?
13 Tincwadzi letimbili taPhetro letiphefumulelwe tinalokunyenti lokungasita emaKhristu lagcotjiwe kanye naletinye timvu kute bagcine ematsemba abo aphilile. Waveta kutsi litsemba alisekelwa yimisebenti yabo, kodvwa lisekelwe emseni waJehova. Wabhala: “Bophani tinkhalo tengcondvo yenu, nititsibe, netsembe ngalokuphelele umusa lenitakwabelwa wona ekwembulweni kwaJesu Khristu.” (1 Phet. 1:13) Khristu utawembulwa naketa atewuniketa balandzeli bakhe labetsembekile umvuzo futsi aletse sehlulelo saJehova kulabo labangamesabi.—Fundza 2 Thesalonika 1:6-10.
14, 15. (a) Kute sigcine litsemba letfu liphila, yini lokufanele siyinake? (b) Ngusiphi seluleko Phetro lasiniketa?
14 Kute sigcine litsemba letfu liphilile, tingcondvo tetfu kufanele tinake kufika ‘kwelilanga laJehova.’ Ngalelolanga kutawubhujiswa “emazulu” lakhona nyalo, nobe kubusa kwebantfu, kubhujiswe ‘nemhlaba’ lokusho bantfu labangalaleli kanye ‘nemisebenti lekuwo.’ Phetro wabhala: “Kufanele nibe bantfu labanjani? . . . nilindzele kufika kwelilanga laNkulunkulu, nisebentele kutsi lisheshe lifike. Lelo langa liyawuncibikilisa emazulu ngemlilo, netinkhanyeti tincibilikiswe kushisa.”—2 Phet. 3:10-12.
15 “Emazulu” “nemhlaba” lokukhona nyalo kutawutsatselwa sikhundla ‘ngemazulu lamasha [hulumende wembuso waKhristu] nemhlaba lomusha [bantfu labalungile.]’ (2 Phet. 3:13) Phetro waniketa seluleko lesicondzile, lesisekelwe ‘ekulindzeni’ nobe ekugcineni litsemba letfu liphila ngesetsembiso selive lelisha: “Ngako-ke, batsandzekako, njengobe nisalindzele leto tintfo, yentani konkhe lokusemandleni enu, kutsi anikhandze ninekuthula, ningenasici ningenabala.”—2 Phet. 3:14.
KUPHILA NGEKUVUMELANA NELITSEMBA LETFU
16, 17. (a) Ngukuphi ‘kuphila ngekumesaba Nkulunkulu’ kanye ‘nemisebenti lemihle lemdvumisako’ lokufanele siyibonakalise? (b) Litawugcwaliseka njani litsemba letfu?
16 Ngetulu kwekugcina litsemba letfu liphila, kufanele futsi siphile ngekuvumelana nalo. Kufanele sinake kakhulu buhlobo betfu naJehova. ‘Kuphila ngekumesaba’ kufaka ekhatsi ‘kuphila imphilo yekulunga emkhatsini webantfu’ ngendlela lesitiphatsa ngayo. (2 Phet. 3:11; 1 Phet. 2:12) Kufanele ‘sitsandzane.’ Loko kuhlanganisa kwenta konkhe lokusemandleni kute silondvolote bunye lesinabo nebazalwane betfu labasemhlabeni wonkhe ngisho nalabo lesisebandleni nabo. (Joh. 13:35) ‘Imisebenti lemihle ledvumisa Nkulunkulu’ itento letikhombisa buhlobo betfu lobusedvute naye. Tifaka ekhatsi indlela lesithandaza ngayo, kufundza liBhayibheli onkhe malanga, sifundvo lesitichubela sona, kukhonta kwemndeni kanye nekuhlanganyela ngalokugcwele ekushumayeleni ‘liVangeli ngembuso.’—Mat. 24:14.
17 Ngamunye wetfu ufuna kwemukelwa nguJehova futsi asindze nakubhujiswa lelive lelibuswa nguSathane. Sitakubona ngewetfu kugcwaliseka kwelitsemba lesinalo ‘lekuphila lokuphakadze, lekwatsi umhlaba ungakasekelwa latsenjiswa nguNkulunkulu longawacali emanga.’—Thit. 1:2.
[Sitfombe ekhasini 22]
EmaKhristu lagcotjiwe ‘atalwa kabusha etsembeni leliphilako’
[Sitfombe ekhasini 24]
Gcina lelitsemba liphila emndenini wakho