Usakhumbula Yini?

Ubafundze kahle yini bomagazini bakamuva be-Sicongosekulindza? Nangabe kunjalo, asewubone kutsi ungakwati yini kuphendvula lemibuto lelandzelako:

Solomoni angaba sibonelo lesisecwayiso kitsi ngamuphi umcondvo?

Nkulunkulu wabusisa iNkhosi Solomoni waphindze wayisebentisa. Ngesikhatsi abusa njengenkhosi, Solomoni wayekela kulandzela teluleko taJehova. Washada nendvodzakati yaFaro lelicaba, wateka bafati labanyenti futsi wabavumela kutsi bamente akhonte bonkulunkulu bemanga. Natsi kufanele sikubalekele kutiphatsa lokubi kanye nemikhuba lengemukeleki. (Dut. 7:1-4; 17:17; 1 Khos. 11:4-8)—12/15, emakhasi 10-12.

Kungani kufanele uphile ngetimiso teliBhayibheli?

Labo labaphila ngetimiso teliBhayibheli bananembeza lohlobile futsi bajabulela buhlobo lobucinile nemindeni yabo. (Hla. 19:8, 11) Labo labangatinaki timiso teliBhayibheli bavame kuva buhlungu emivelweni yabo.—1/1, emakhasini 8, 9.

Kungani emaKhristu abhajatiswa, futsi umuntfu ulufanelekela njani lubhabhatiso?

Lubhabhatiso lusicelo lesentiwa ngumKhristu kute abe nebuhlobo lobuhle naNkulunkulu. (1 Phet. 3:21) Ngemthandazo lesiwenta sisodvwa, sitinikela kuJehova futsi senta sifungo sekutsi sitawenta intsandvo yakhe kuphila kwetfu konkhe. Ngemuva kwekuthandaza sisodvwa, sikhombisa kutinikela kwetfu ngekutsi sibhajatiswe.—4/1, emakhasini 16, 17.

Yini lekhombisa kutsi kusukela ekhulwini lekucala leminyaka kuchubeke bewasolo akhona emaKhristu lagcotjiwe letsembekile?

Emfanekisweni waJesu ‘wemabele’ kanye ‘newelukhula,’ “inhlanyelo lenhle” imelela “bantfwana bembuso.” (Mat. 13:24-30, 38) Lukhula belutawukhula ndzawonye nemabele kute kube sikhatsi sekuvuna. Nanobe singeke sisho kutsi emabele amelela bobani, kodvwa bewasolo akhona kute kube ngulamuhla.—1/15, likhasi 7.

Ngubani lowatfumela “inkhanyeti” kutsi ihole letati?

Nguloyo lobekafuna lomntfwana longuJesu kutsi abulawe—Sathane Develi. Sathane ugcugcutela emanga, budlova kanye nekuhlambalata. Kungaleso sizatfu Jesu ambita ngekutsi ‘ngumcambimanga neyise wawo onkhe emanga,’ loyo ‘lobekangumbulali webantfu kusukela ekucaleni.’ (Joh. 8:44)—4/1, likhasi 29.

Singawuncoba njani umkhuba wekuba nemona?

Letindlela letilandzelako tingasisita: Kulwela kuba nelutsandvo kanye nekutsandza bazalwane, kutihlanganisa nebantfu labakhonta Nkulunkulu, kutimisela kwenta lokuhle ‘nekujabula nalabajabulako.’ (Rom. 12:15)—2/15, emakhasi 16-17.

Bekungubani lo-Anasi lokukhulunywa ngaye emaVangelini lalandzisa ngekutekwa kwelicala laJesu?

Ngesikhatsi Jesu atekiswa licala, Anasi kutsiwa ‘bekangumphristi lomkhulu.’ (Luk. 3:2) Abekhonta njengengemphristi lomkhulu cishe nga-6 nobe nga-7 C.E., kwacishe kwaba ngumnyaka wa-15 C.E., lokungumnyaka layekeliswa ngawo kuba ngumbusi kodvwa nanobe kunjalo, wachubeka aneligunya ka-Israyeli.—4/1, likhasi 9.

Nasiniketa seluleko ngutiphi timiso lokufanele sitikhumbule?

Kufanele sitfolisise yonkhe indzaba. Sigweme kuphendvula singakacabangisisi. Ngekutfobeka sisebentise liVi laNkulunkulu. Nakungenteka, sisebentise imitapo lesilungiselelwe yona. Sikubalekele kwentela labanye tincumo.—3/15, emakhasi 7-9.

Bekasho kutsini Jesu etilalelini takhe nakatsi tihambe emakhilomitha lamabili? (Mat. 5:41)

Ngaleso sikhatsi ka-Israyeli, bacashi labangemaRoma bebacindzetela emadvodza kutsi asebente. Ngekukhutsata tilaleli takhe kutsi tihambe emakhilomitha lamabili, Jesu bekasho kutsi bekufanele tente imisebenti labo labasemagunyeni labatsi abayente.—4/1, likhasi 9.