“Nginani”
“Labanyenti bayawukwehla benyuka [futsi lwati lweliciniso lutawuba lunyenti].”—DAN. 12:4.
UNGAPHENDVULA NJANI?
Etikhatsini talamuhla, lutfolakale njani lwati lweliciniso?
Babe banyenti njani labo labemukele liciniso?
Lwati lolunembile lube lunyenti ngatiphi tindlela?
1, 2. (a) Sati njani kutsi Jesu ukanye netikhonti takhe lamuhla nekutsi utawuba nato esikhatsini lesitako? (b) Ngekusho kwaDanyela 12:4, yini lebeyitawuba ngumphumela wekutadisha ngekucophelela imiBhalo?
TICABANGE use Pharadisi. Onkhe malanga uvuka ekuseni, utiva uphumule kahle futsi ukulangatelela kucalisa lelo langa. Kute buhlungu lonabo. Kugula loke waba nako sekuphelile. Yonkhe imiva yakho isebenta kahle—kubona, kuva, kuhogela, kutsintsa kanye nekunambitsa. Unemandla lamanyenti, umsebenti wakho uyakujabulisa, unebangani labanyenti futsi sekute lokukukhatsatako. Nguleto tibusiso lotatitfola nakubusa uMbuso waNkulunkulu. Khristu Jesu loyiNkhosi lebekiwe, utawubusisa tonkhe tikhonti takhe aphindze atifundzise ngelwati lwaJehova.
2 Jehova utawuba kanye netinceku takhe letetsembekile njengobe tenta loyo msebenti wekufundzisa wemhlaba wonkhe. Nkulunkulu neNdvodzana yakhe bebasolo bakanye nalabetsembekile kulamakhulu eminyaka. Ngembikwekutsi abuyele ezulwini, Jesu wacinisekisa bafundzi bakhe labetsembekile kutsi utawuba nabo. (Fundza Matewu 28:19, 20.) Kute sicinise kukholwa kwetfu kulesetsembiso, ase sihlole umusho munye wesiphrofetho lesiphefumulelwe lesabhalelwa eBhabhulona lasendvulo eminyakeni lengetulu kwa-2 500 leyendlulile. Mayelana ‘nesikhatsi sekugcina’ lesiphila kuso lamuhla, umphrofethi Danyela wabhala: “Labanyenti bayawukwehla benyuka [futsi lwati lweliciniso lutawuba lunyenti].” (Dan. 12:4) Ngemcondvo longumfanekiso futsi ngekuhambisana naloko lokwenteka esikhatsini setfu, lesento sesiHebheru lesihunyushwe ngekutsi ‘kwehla wenyuka’ sinemcondvo wekuhlolisisa ngekucophelela. Lokwehla wenyuka bekutawuba netibusiso letinhle kakhulu. Labo labatadisha imiBhalo ngekucophelela bebatawubusiswa ngelwati lweliciniso nobe lolunembile loluseVini lwaNkulunkulu. Lesiphrofetho siphindze sichaze kutsi labanyenti bebatawulemukela lwati lweliciniso. Ngetulu kwaloko, lolwati belutawuba lunyenti, lutfolakale kalula futsi lusakatwe etindzaweni letinyenti. Njengobe sihlola kutsi lesiphrofetho sigcwaliseke njani, sitawubona kutsi Jesu unebafundzi bakhe lamuhla nekutsi Jehova uyakwati kukwenta konkhe lakwetsembisile.
LWATI LWELICINISO LUYATFOLAKALA
3. Kwentekani ngelwati lweliciniso ngemuva kwekufa kwebaphostoli?
3 Ngemuva kwekufa kwebaphostoli, kuhlubuka lobekubiketelwe kwacala kubonakala kumaKhristu eliciniso futsi kwandza njengemlilo. (Imis. 20:28-30; 2 Thes. 2:1-3) Emakhulwini eminyaka lalandzela, lwati lweliciniso beseluluncane kakhulu kulabo labebangalati liBhayibheli, nakulabo labebatsi bangemaKhristu. Ngisho nobe bebatsi bayakholelwa emiBhalweni, baholi beTinkholo Letitsi TebuKhristu bebafundzisa emanga enkholo—‘timfundziso temadimoni’ letingamhloniphi Nkulunkulu. (1 Thim. 4:1) Bantfu bagcine bangamati Nkulunkulu. Timfundziso tetihlubuki betifaka ekhatsi imfundziso yemanga letsi Nkulunkulu unguMtsatfu Amunye, kutsi umphefumulo awufi nekutsi leminye imiphefumulo ihlushwa phakadze esihogweni semlilo.
4. Licembu lemaKhristu lacala njani kufuna lwati lweliciniso ngabo-1870?
4 Nobe kunjalo, ngabo-1870—eminyakeni lengaba ngu-40 ngembikwekucala ‘kwemalanga ekugcina’—licembu lelincane lemaKhristu lacotfo ePennsylvania, eMelika, lahlangana ndzawonye kute litadishe liBhayibheli ngekucophelela futsi lifune lwati lweliciniso. (2 Thim. 3:1) Bebatibita ngekutsi Bafundzi beliBhayibheli. Bebangesibo ‘labahlakaniphile nalabanekucondza,’ labo Jesu latsi lwati belutawufihlwa kubo. (Mat. 11:25) Bekubantfu labatfobekile labebafuna ngebucotfo kwenta intsandvo yaNkulunkulu. Ngekucophelela nangemthantazo, bebafundza, bacoce futsi bazindle ngemiBhalo. Bebacatsanisa tincenye teliBhayibheli baphindze bahlolisise loko lokwabhalwa ngulabanye labebente lucwaningo lolufanako. Kancane kancane, laBafundzi beliBhayibheli bacala kuwabona emaciniso labekafihlekile emakhulu eminyaka.
5. Bewuyini umgomo wemapheshana labebitwa ngekutsi yi-The Old Theology?
5 Nanobe Bafundzi beliBhayibheli bekubajabulisa loko bebakufundza, abazange bavumele lwati lwabo lolusha lubente bakhukhumale. Bebangafuni nekubongwa ngekutsi batfole lokutsite lokusha. (1 Khor. 8:1) Esikhundleni saloko, bashicilela emapheshana lamanyenti labebitwa ngekutsi yi-The Old Theology. Umgomo waloku bekukusita bafundzi betayelane nemaciniso emiBhalo labekabhalwe eBhayibhelini. Lelinye lalamapheshana ekucala beliniketa “kwatiswa lokwengetiwe kwekusita ekutadisheni liBhayibheli, linemgomo wekususa tonkhe timfundziso temanga tebantfu, nekubuyiselwa kwetimfundziso takucala letimayelana neNkhosi yetfu nebaphostoli.”—I-The Old Theology, No. 1, yanga-April 1889, likh. 32.
6, 7. (a) Ngumaphi emaciniso lesisitwe kutsi siwacondze kusukela ngabo-1870? (b) Ngumaphi emaciniso wena lojabulele kuwafundza?
6 Kusukela kuleso sicalo lesincane eminyakeni lengu-100 leyendlulile, manyenti emaciniso lasatfolakele!a Lamaciniso awasiwo langasebentiseki nobe langasho lutfo, lokungaphikiswana ngawo netati tenkholo. Ngemaciniso lajabulisako, lasikhululako futsi lenta kuphila kwetfu kube nenjongo kugcwale injabulo nelitsemba. Asisita kutsi simati Jehova—sati buntfu bakhe lobuhle netinjongo takhe. Aphindze acacise indzima yaJesu, achaze kutsi kungani aphila futsi wafa nekutsi yini layentako nyalo. Lamaciniso laligugu ayasembulela kutsi kungani Nkulunkulu avumela bubi, kungani sifa, kufanele sithantaze njani nekutsi singayitfola njani injabulo.
7 Nyalo sesiyakhona kwati inchazelo yetiphrofetho ‘lebetisavalelwe’ iminyaka leminyenti, letigcwalisekako kulesikhatsi sekugcina. (Dan. 12:9) Leti tifaka ekhatsi leto letitfolakala emiBhalweni, ikakhulukati kumaVangeli nasencwadzini yeSembulo. Jehova uphindze wasisita sacondza tentakalo lesingatiboni ngemehlo—kubekwa kwaJesu esihlalweni sebukhosi, imphi yasezulwini nekulahlelwa kwaSathane emhlabeni. (Semb. 12:7-12) Nkulunkulu usinikete nekucondza inchazelo yaloko lesikubonako—timphi, kutamatama kwemhlaba, tifo letingelapheki, indlala nebantfu labangamhloniphi Nkulunkulu labenta kutsi leti kube ‘tikhatsi letimatima.’—2 Thim. 3:1-5; Luk. 21:10, 11.
8. Ngubani lesimdvumisako ngetintfo lesikhonile kutibona nekutiva?
8 Kumelula ngatsi kutsi sicondze loko Jesu lakutjela bafundzi bakhe nakatsi: “Maye, abusisiwe emehlo labona lenikubonako! Ngiyanitjela ngitsi: Baphrofethi nemakhosi lamanyenti abefisa kukubona loku lenikubonako, kodvwa abakubonanga, bebafuna nekuva loku lenikuvako, kodvwa abazange bakuve.” (Luk. 10:23, 24) Sidvumisa Nkulunkulu Jehova ngekusisita kutsi sitibone siphindze sitive letintfo. Siwubonga kakhulu “umeluleki,” longumoya longcwele waNkulunkulu, lowatfunyelwa kute ucondzise balandzeli baJesu “kulo lonkhe liciniso.” (Fundza Johane 16:7, 13.) Shengatsi singahlala sikhombisa kubonga ngelwati lweliciniso siphindze silitjele labanye.
“LABANYENTI” BATALEMUKELA LWATI LWELICINISO
9. Ngusiphi sicelo lesakhishwa kumagazini wanga-April 1881?
9 Nga-April 1881, eminyakeni lengaphansi kwalemibili kushicilelwe magazini wekucala we-Sicongosekulindza, lomagazini wakhipha sicelo sebashumayeli labangu-1 000. Lesihloko besitsi: “Kulabo labangakhona kunikela ngencenye yesikhatsi sabo nobe ngetulu ekwenteni umsebenti weNkhosi, sincoma nalu luhlelo . . . , lolutsi: Niphume niye emadolobheni lamancane nalamakhulu, kuye ngemakhono enu, nibe ngemaColporteur nobe baVangeli, nifune kutfola kuto tonkhe tindzawo emaKhristu lacotfo, labanyenti babo lenitawubatfola banenshisekelo ngaNkulunkulu kodvwa bete lwati; kulabanjalo, basiteni bati ngemcebo wemusa waBabe Wetfu nangebuhle belivi laKhe.”
10. Benta njani bantfu ngalesikhatsi kucelwa bashumayeli basikhatsi sonkhe?
10 Leso sicelo sakhombisa kutsi Bafundzi beliBhayibheli bebacaphela kutsi umsebenti lobalulekile wemaKhristu eliciniso, ukushumayela tindzaba letimnandzi. Nanobe bekuba nemakhulu lambalwa ebantfu emihlanganweni yeBafundzi beliBhayibheli, lesimemo sebashumayeli labangu-1 000 saba nemiphumela lemihle. Ngemuva kwekufundza lipheshana nobe magazini, bantfu labanyenti bayibona inhlasi yeliciniso futsi basemukela masinyane lesimemo. Sibonelo saloku kutsi ngemuva kwekufundza magazini we-Sicongosekulindza nencwajana leyashicilelwa Bafundzi beliBhayibheli, lomunye umfundzi waseLondon, eNgilandi, wabhala loku nga-1882: “Ngicela ningifundzise kutsi kufanele ngishumayele njani futsi ngishumayele ngani kute ngente umsebenti lobusisiwe lofunwa nguNkulunkulu.”
11, 12. (a) Ngumuphi umgomo lesinawo lofanana newemacolporteur? (b) Emacolporteur abewakha njani “emakilasi” nobe emabandla?
11 Nga-1885, besekuneBafundzi beliBhayibheli labangu-300 labebenta umsebenti wemacolporteur. Leto tikhonti tasikhatsi sonkhe betinemgomo lofananako nalesinawo lamuhla—kwenta bafundzi baJesu Khristu. Nobe kunjalo, tindlela labebatisebentisa betingafani netetfu. Lamuhla, sifundza liBhayibheli nemuntfu munye ngesikhatsi, simcondzise ayedvwana. Sibese siyammema loyo mfundzi weliBhayibheli kutsi atihlanganise nelibandla. Esikhatsini sakadzeni, emacolporteur abehambisa tincwadzi bese abahlanganisa ndzawonye labo labanenshisekelo kute batadishe imiBhalo njengelicembu. Kunekutsi bafundze nemuntfu ngamunye, bebenta “emakilasi,” nobe emabandla.
12 Nasi sibonelo: Nga-1907, lelinye licembu lemacolporteur lenta umkhankaso edolobheni lelitsite kute litfole labo labebanawo emakhophi encwadzi letsi Millennial Dawn (lebeyibitwa nangekutsi yi-Studies in the Scriptures). Sicongosekulindza sabika: “Laba [labanenshisekelo yekulalela] bahlanganiswa ndzawonye emhlanganweni lomncane emtini walomunye wabo. EmaColporteur akhuluma nabo kuleloSontfo mayelana nencwadzi letsi Divine Plan of the Ages, kwase kutsi ngeliSontfo lelilandzelako babakhutsata kutsi babe nemihlangano lechubekako.” Nga-1911, bazalwane bayilungisa lendlela lebeyisetjentiswa. Tikhonti letijikeletako letingu-58 tabeka tinkhulumo etindzaweni letinyenti taseMelika naseCanada. Labazalwane bebabhala emagama nemakheli ebantfu labebeta kuleto tinkhulumo bese bahlela kutsi bahlangane ndzawonye emtini lotsite kute bakhe “emakilasi.” Nga-1914, kwase kunemabandla langu-1 200 eBafundzi beliBhayibheli emhlabeni wonkhe.
13. Yini lekujabulisako ngelizinga lekwandza kwelwati lweliciniso lamuhla?
13 Lamuhla kunemabandla langaba ngu-109 400 emhlabeni wonkhe. Kunebazalwane nabodzadze labangaba ngu-895-800 labakhonta njengemahlahlandlela. Bantfu labacishe babe tigidzi letisiphohlongo lamuhla bayalemukela lwati lweliciniso futsi bayalusebentisa ekuphileni kwabo. (Fundza Isaya 60:22.)b Loku kujabulisa kakhulu ngobe Jesu watjela bafundzi bakhe kutsi ‘wonkhe umuntfu uyawubatondza’ ngenca yelibito lakhe. Waphindze watsi balandzeli bakhe bebatawuhlukunyetwa, baboshwe baze ngisho babulawe. (Luk. 21:12-17) Ngetulu kwekuphikiswa lokuvela kuSathane, nemadimoni akhe nakubantfu, bantfu baJehova bajabulela imphumelelo lenhle ngekwenta umsebenti labatfunywe wona wekwenta bafundzi. Lamuhla, bashumayela “emhlabeni wonkhe,” kusukela etindzaweni letishisa kakhulu, kuye kuletibandzako, etintsabeni, etingwadvule, emadolobheni nakuletinye tindzawo letikhashane. (Mat. 24:14) Loku bekungeke kuze kwenteke ngaphandle kwekusekelwa nguNkulunkulu.
LWATI LWELICINSO LUBA LUNYENTI
14. Lube lunyenti njani lwati lweliciniso ngetincwadzi letibhaliwe?
14 Lwati lweliciniso lube lunyenti luvela kulabo labamemetela tindzaba letimnandzi. Luphindze lwaba lunyenti ngetincwadzi letibhaliwe. NgaJuly 1879, Bafundzi beliBhayibheli bashicilela magazini wekucala lobewunesihloko lesitsi Zion’s Watch Tower and Herald of Christ’s Presence. Lowo magazini, lowashicilelwa yifemu letsite waphrintwa waba ngemakhophi langu-6 000 ngesiNgisi kuphela. Charles Taze Russell lobekaneminyaka lengu-27 budzala, wakhetfwa kutsi abe ngumhleli walomagazini akanye nalabanye Bafundzi beliBhayibheli labasihlanu labebamsita. Lamuhla, Sicongosekulindza sishicilelwa ngetilwimi letingu-195. Lomagazini usakatwa kakhulu emhlabeni wonkhe kunalabanye, njengobe kushicilelwa silinganiso semakhophi langu-42 182 000 samagazini ngamunye. Magazini lolandzela lona yi-“Phaphama!” loshicilelwa ngesilinganiso semakhophi langu-41 042 000 ngetilwimi letingu-84. Ngetulu kwaloko, ngemnyaka kushicilelwa tincwadzi nemaBhayibheli langaba tigidzi letingu-100.
15. Usekelwa njani ngetimali umsebenti wetfu wekushicilela?
15 Lomsebenti lomkhulu kangaka usekelwa ngeminikelo yekutitsandzela. (Fundza Matewu 10:8.) Loko nje kukodvwa kuyabamangalisa labasemabhizinisini ekushicilela ngobe bayati kutsi ibita kangakanani imishini yekushicilela, emaphepha, i-inki naletinye tintfo letidzingekako. Lomunye umzalwane loseluhlangotsini lwekutsenga lwemhlaba wonkhe, watsi: “Bosomabhizinisi labavakashela tindzawo tetfu tekushicilela bayamangala ngekutsi bucwepheshe lobusezingeni lelisetulu naletinye tintfo tekukhicita tingasekelwa ngeminikelo yekutitsandzela. Kuyabajabulisa nekubona kutsi tisebenti temndeni waseBethel tibantfu labasha futsi labajabulako.”
LWATI NGANKULUNKULU LUTAWUGCWALA EMHLABENI
16. Iyini injongo yekwenta kutsi latiwe lwati lweliciniso?
16 Kungenjongo lenhle kutsi lwati lweliciniso lube lunyenti. Intsandvo yaNkulunkulu ikutsi “bonkhe bantfu basindziswe bafinyelele ekulatini liciniso.” (1 Thim. 2:3, 4) Jehova ufuna bantfu balati liciniso kute batewumkhonta ngendlela layemukelako futsi batfole sibusiso sakhe. Ngekwenta kutsi latiwe lwati lweliciniso, Jehova ukhonile kubutsa insali leyetsembekile yemaKhristu lagcotjiwe. ‘Kubantfu labaphuma etiveni tonkhe, nasemindenini yonkhe, nasemaveni onkhe, nasetilimini tonkhe,’ ubutsa “sicumbi lesikhulu” lesinelitsemba lekuphila phakadze emhlabeni.—Semb. 7:9.
17. Kukhombisani kwandza kwekukhonta kweliciniso?
17 Kwandza kwekukhonta kweliciniso kuleminyaka lengu-130 leyendlulile, kukhombisa kutsi Nkulunkulu akanye neNkhosi yakhe lebekiwe lenguJesu Khristu, bebasolo bakanye netinceku taJehova emhlabeni—bacondzisa, bavikela, bahlela futsi bafundzisa. Lokwandza kuphindze kucinisekise kutsi tetsembiso taJehova telikusasa titawugcwaliseka. “Umhlaba uyawugcwala kwati Simakadze, njengobe nemanti agcwalisa lwandle.” (Isa. 11:9) Cabanga nje ngaleto tibusiso letitawujabulelwa bantfu!
[Imibhalo lengentansi]
a Utawuzuza kakhulu ngekubukela lama-DVD latsi Jehovah’s Witnesses—Faith in Action, Part 1: Out of Darkness naletsi Jehovah’s Witnesses—Faith in Action, Part 2: Let the Light Shine.
b Fundza incwadzi letsi “Isiprofetho Sika-Isaya—Ukukhanya Kuso Sonke Isintu II,” likhasi 320, ngesiZulu.
[Sitfombe ekhasini 6]
Bafundzi beliBhayibheli bekucala bebabantfu labatfobekile, labebafuna ngebucotfo kwenta intsandvo yaNkulunkulu
[Sitfombe ekhasini 7]
Jehova uyajabula ngemetamo loyentako kute kusakatwe lwati lweliciniso lwaNkulunkulu