Labadzala LabangemaKhristu—‘Babambisene Natsi Ekujabuleni Kwetfu’

1. Yini leyenta Pawula wajabula ngemaKhristu aseKhorinte?

BEKUNGUMNYAKA wa-55 C.E. Umphostoli Pawula abesesikhumulweni semikhumbi edolobheni laseThrowasi, kodvwa abecabanga ngeKhorinte. Ekucaleni kwalowo mnyaka, waphatseka kabi nakeva kutsi bazalwane bakulelo bandla bayacabana. Ngesizatfu sekutsi abekhatsatekile, wawabhalela incwadzi kute alungise leso simo. (1 Khor. 1:11; 4:15) Waphindze watfumela nesisebenti lesikanye naye lesinguThithusi kutsi siye kubo, wasicela nekutsi simphatsele umbiko eThrowasi waloko lokwentekako. Njengobe Pawula abelindze Thithusi eThrowasi, abetimisele kuva kutsi simo sesinjani eKhorinte. Kodvwa-ke wakhatsateka kakhulu nakabona kutsi Thithusi akefiki. Abetawenta njani Pawula? Wagibela umkhumbi loya eMasedoniya, futsi wajabula kakhulu nabahlangana lapho. Thithusi wabikela Pawula kutsi bazalwane baseKhorinte basemukele kahle seluleko lababhalela sona kulencwadzi futsi bakubuke ngalabovu kutsi abavakashele. Nakeva lombiko lomuhle, Pawula ‘wajabula kakhulu.’—2 Khor. 2:12, 13; 7:5-9.

2. (a) Yini Pawula layibhalela baseKhorinte mayelana nekukholwa nekujabula? (b) Ngumiphi imibuto lesitawucoca ngayo?

² Ngekushesha ngemuva kwaloko, Pawula wabhalela baseKhorinte incwadzi yesibili. Watsi kubo: “Asisho kutsi tsine sitikhulu etikwekukholwa kwenu, kodvwa sibambisene nani ekusebenteleni kujabula kwenu, ngobe nisimile ekukholweni.” (2 Khor. 1:24) Pawula abesho kutsini ngalamavi? Lamavi kufanele abatsintse njani labadzala belibandla labangemaKhristu lamuhla?

KUKHOLWA KWETFU NEKUJABULA KWETFU

3. (a) Pawula abesho kutsini nakabhala atsi: ‘Ekukholweni kwenu, nisimile’? (b) Labadzala belibandla basilingisa njani sibonelo saPawula lamuhla?

³ Pawula wakhuluma ngetintfo letimbili letibalulekile ekukhonteni kwetfu—kukholwa nenjabulo. Khumbula kutsi mayelana nekukholwa wabhala: “Asisho kutsi tsine sitikhulu etikwekukholwa kwenu, . . . ngobe nisimile ekukholweni.” Ngalamavi, Pawula abebonga bazalwane baseKhorinte ngekutsi beme bacina, hhayi ngelusito lwakhe nobe lwalomunye umuntfu, kodvwa ngekukholwa kwabo kuNkulunkulu. Ngaleso sizatfu, Pawula akazange asibone sidzingo sekulawula kukholwa kwalabazalwane labakanye naye futsi abete sifiso sekwenta njalo. Abeciniseka ngekutsi bangemaKhristu letsembekile lafuna kwenta lokuhle. (2 Khor. 2:3) Lamuhla, labadzala belibandla balingisa sibonelo saPawula ngekwetsemba kukholwa kwebazalwane labakanye nabo netisusa tabo tekukhonta Nkulunkulu. (2 Thes. 3:4) Kunekutsi babeke imitsetfo lecinile ebandleni, labadzala betsembela etimisweni temiBhalo nasesicondzisweni lesivela enhlanganweni yaJehova. Labadzala belibandla abatenti emakhosi ekukholweni kwebazalwane labakanye nabo.—1 Phet. 5:2, 3.

4. (a) Pawula abesho kutsini nakabhala atsi: “Sibambisene nani ekusebenteleni kujabula kwenu”? (b) Labadzala belibandla basilingisa njani lamuhla simo sengcondvo saPawula?

⁴ Pawula waphindze watsi: “Sibambisene nani ekusebenteleni kujabula kwenu.” Ngalamavi, abekhuluma ngaye nangalabo lasondzelene nabo. Yini lesenta sisho njalo? Kungobe kulencwadzi yakhe, Pawula wakhumbuta baseKhorinte ngalabanye bantfu lababili labesondzelene nabo ngesikhatsi abhala atsi: “INdvodzana yaNkulunkulu lenguKhristu Jesu leyashunyayelwa ngitsi kini, mine nginaboSilasi, naThimothi.” (2 Khor. 1:19) Ngetulu kwaloko, nobe nini lapho Pawula asebentisa lamavi latsi ‘sibambisene nani ekusebenteni’ etincwadzini takhe, uhlale akhuluma ngebantfu lasondzelene nabo, lokufaka ekhatsi Apolosi, Akhwila, Phrisila, Thimothi, Thithusi nalabanye. (Rom. 16:3, 21; 1 Khor. 3:6-9; 2 Khor. 8:23) Ngako-ke, ngekutsi atsi: “Sibambisene nani ekusebenteleni kujabula kwenu,” Pawula abecinisekisa baseKhorinte kutsi yena nebangani bakhe bebafuna kwenta konkhe lokusemandleni abo kute bente onkhe emalunga elibandla ajabule. Nalamuhla, labadzala labangemaKhristu banesifiso lesifananako. Bafuna kwenta konkhe lokusemandleni abo kute basite bazalwane labakanye nabo kutsi ‘bakhonte Simakadze ngentfokoto!’—Hla. 100:2; Fil. 1:25.

5. Sitawucoca ngemphendvulo yamuphi umbuto, futsi yini lokufanele siyihlole?

⁵ Muva nje, licembu lebazalwane kanye nabodzadze labanenshisekelo labahlala etincenyeni letehlukehlukene temhlaba, bacelwe kutsi baphendvule lombuto lotsi: “Nguwaphi emavi nobe tento talomdzala welibandla lakwente wajabula kakhulu?” Njengobe nyalo sitawuhlola timphendvulo talabazalwane, catsanisa timphendvulo tabo nendlela wena lobewutawuphendvula ngayo. Ngetulu kwaloko, sonkhe ase sihlole kutsi singalenta njani libandla lakitsi lijabule.a

“NIHAMBISE NAPHESISI LOTSANDZEKAKO”

6, 7. (a) Nguyiphi indlela labadzala belibandla labangalingisa ngayo Jesu, Pawula kanye naletinye tinceku taNkulunkulu? (b) Yini leyenta bazalwane betfu bajabule kakhulu nasiwakhumbula emabito abo?

⁶ Bazalwane nabodzadzewetfu labanyenti batsi injabulo yabo iyakhula nababona kutsi labadzala belibandla banendzaba nabo. Lenye indlela labadzala labakukhombisa ngayo loko kulingisa sibonelo saDavide, sa-Elihu nesaJesu. (Fundza 2 Samuweli 9:6; Jobe 33:1; Lukha 19:5.) Ngamunye waletinceku taJehova wakhombisa kuba nendzaba nalabanye bantfu ngekutsi asebentise emabito abo. NaPawula wakubona kubaluleka kwekukhumbula nekusebentisa emabito emakholwa lakanye nawo. Waphetsa lenye yetincwadzi takhe ngekutsi abingelele bazalwane nabodzadze labangetulu kwa-25 futsi wababita ngemabito abo, lokufaka ekhatsi Phesisi, longudzadze longumKhristu Pawula latsi ngaye: “Nihambise naPhesisi lotsandzekako.”—Rom. 16:3-15.

⁷ Labanye labadzala bakutfola kumatima kukhumbula emabito ebantfu. Nobe kunjalo, nabenta imetamo lemikhulu yekutsi bawakhumbule, kuba shengatsi batjela emakholwa labakanye nawo kutsi: ‘Ubalulekile kimi.’ (Eks. 33:17) Labadzala batawenta bazalwane bajabule kakhulu ngekutsi bababite ngemabito abo nabaphendvula eSifundvweni se-Sicongosekulindza nobe kuleminye imihlangano.—Catsanisa naJohane 10:3.

‘WASEBENTA KAKHULU ENKHOSINI’

8. Ngusiphi sibonelo saJehova nesaJesu lesibalulekile lesalingiswa nguPawula?

⁸ Pawula waveta kutsi unendzaba nalabanye ngekubabonga ngalokusuka enhlitiyweni, lokungulenye indlela leyenta emakholwa lesikanye nawo ajabule kakhulu. Kuyo leyo ncwadzi Pawula labhala kuyo kutsi sifiso sakhe kusebentela injabulo yebazalwane bakhe, watsi: “Nginesibindzi lesikhulu kini.” (2 Khor. 7:4) Lamavi ekubonga kungenteka abajabulisa bazalwane baseKhorinte. Pawula washo emavi lafananako nakulamanye emabandla. (Rom. 1:8; Fil. 1:3-5; 1 Thes. 1:8) Ngemuva kwekukhuluma ngaPhesisi encwadzini yakhe layibhalela libandla laseRoma, Pawula wachubeka watsi: ‘Wasebenta kakhulu eNkhosini.’ (Rom. 16:12) Kungenteka kutsi lawo mavi amjabulisa kakhulu lodzadze lotsembekile! Pawula walingisa sibonelo saJehova nesaJesu nakabonga labanye.—Fundza Makho 1:9-11; Johane 1:47; Semb. 2:2, 13, 19.

9. Kubonga nobe kubongwa kulenta njani libandla lijabule kakhulu?

⁹ Labadzala belibandla nabo bayakubona kubaluleka kwekubonga bazalwane labakanye nabo. (Taga 3:27; 15:23) Nobe nini lapho lomdzala enta njalo, usuke atsi: ‘Ngikunakile loko lokwentile, futsi nginendzaba nawe.’ EmaKhristu ayafuna kuweva lamagama lacinisekisako lashiwo ngulomdzala welibandla. Lomunye dzadze loseminyakeni yabo-50 budzala, wakhulumela bantfu labanyenti nakatsi: “Emsebentini abakavami kungibonga. Kute lutsandvo futsi kunemoya wekuncintisana. Ngako-ke, nangabe lomdzala angibonga ngalokutsite lengikwentile ebandleni, ngiyajabula futsi ngitive nginemandla. Kungenta ngitive ngitsandvwa nguBabe wami wasezulwini.” Umzalwane lokhulisa bantfwana bakhe lababili ayedvwa, naye wativa ngendlela lefananako. Lomdzala welibandla wambonga kakhulu. Kwamtsintsa njani loko lomzalwane? Utsi: “Emavi alona lomdzala welibandla angenta ngaba nemandla.” Kuliciniso kutsi nangabe lomdzala welibandla abonga emakholwa lakanye nawo, wenta kutsi ative abalulekile futsi ajabule kakhulu. Loko kwenta emaKhristu abe nemandla lawadzingako kute achubeke ahamba endleleni yekuphila ‘angaphelelwa ngemandla.’—Isa. 40:31.

‘YELUSANI LIBANDLA LANKULUNKULU’

10, 11. (a) Labadzala bangasilingisa njani sibonelo saNehemiya? (b) Yini lengasita lomdzala kutsi acetulele labanye sipho semoya nakenta umsebenti wekwelusa?

¹⁰ Nguyiphi indlela lebalulekile labadzala labangakhombisa ngayo kutsi banendzaba nalabanye bazalwane nekutsi bafuna libandla lijabule? Ngekutsatsa sinyatselo sekutisondzeta kulabo labadzinga kukhutsatwa. (Fundza Imisebenti 20:28.) Nangabe labadzala benta njalo, basuke balingisa sibonelo sebelusi baNkulunkulu bakadzeni. Ase unake loko lokwentiwa ngumbonisi lowetsembekile Nehemiya, nakabona kutsi labanye bazalwane labangemaJuda bebacala kuphelelwa buhlobo babo naNkulunkulu. Lokulandzisa kuveta kutsi watsatsa sinyatselo ngekushesha kute abakhutsate. (Neh. 4:14) Nalamuhla, labadzala bafuna kwenta lokufananako. Batsatsa sinyatselo ngekushesha kute basite emakholwa labakanye nawo acine ekukholweni. Kute babakhutsate ngalendlela, bavakashela bazalwane nabodzadze emitini yabo nangabe timo tivuma. Njengobe benta lokuvakashela kwekwelusa, bafuna ‘kubacetulela sipho semoya kuze batewucina.’ (Rom. 1:11) Yini lengasita labadzala kutsi bente njalo?

¹¹ Ngembikwekutsi ente kuvakashela kwekwelusa, lomdzala kudzingeka atinike sikhatsi sekucabanga ngalomuntfu latamvakashela. Ngutiphi tinkinga lomuntfu labukene nato? Ngumaphi emavi latamkhutsata? Ngumuphi umbhalo nobe lokuhlangenwe nako kwalotsite lokukhulunywa ngaye eBhayibhelini lokungasebenta etimeni takhe? Kucabanga lokunjalo kungasita lomdzala kutsi acoce ngetintfo letisebentako, hhayi letingakabaluleki. Njengobe lomdzala enta umsebenti wekwelusa, uyabavumela bazalwane nabodzadze kutsi bavete indlela labativa ngayo njengobe alalelisisa. (Jak. 1:19) Lomunye dzadze watsi: “Kudvudvuta kakhulu kubona lomdzala alalelisisa ngalokusuka enhlitiyweni yakhe.”—Luk. 8:18.

12. Bobani ebandleni labadzinga kukhutsatwa, futsi yini lebangela loko?

¹² Ngubani lotawuzuza ngekuvakashelwa kwekwelusa? Pawula wakhutsata labadzala labangemaKhristu labakanye naye kutsi ‘bacaphele. . . wonkhe umhlambi.’ Kuliciniso kutsi onkhe emalunga elibandla adzinga kukhutsatwa, lokufaka ekhatsi bamemeteli nemahlahlandlela lesekuphele iminyaka enta umsebenti wawo ngekwetsembeka. Yini leyenta badzinge kuvakashelwa kwekwelusa? Kungobe ngaletinye tikhatsi bantfu labanjalo labanebuhlobo lobuhle naNkulunkulu, nabo tiyabacindzetela tinkinga talelive lelibi. Kute sifananise kutsi yini leyenta tinceku taNkulunkulu letikhutsele tidzinge lusito lwemngani ngaletinye tikhatsi, ase sihlole loko lokwenteka ekuphileni kweNkhosi Davide.

“ABISHAYI . . . WELEKELELA DAVIDE”

13. (a) Yini Ishbi Benobi layibona kuDavide? (b) Abishayi wamsindzisa njani Davide?

¹³ Ngekushesha ngemuva kwekutsi Davide agcotjwe kutsi abe yinkhosi, walwa nesichwaga lesinguGoliyathi, sesitukulwane saRefa. Ngesibindzi, Davide wasibulala lesichwaga. (1 Sam. 17:4, 48-51; 1 Khr. 20:5, 8) Ngemuva kweminyaka letsite, ngesikhatsi kuliwa nemaFilisti, Davide waphindze wabukana nalesinye sichwaga. Libito laso kwakungu-Ishbi Benobi, naso sasingumRefa. (2 Sam. 21:16) Kodvwa nyalo, lesichwaga sacishe sambulala Davide. Yini leyabangela loko? Akusiko kutsi Davide abete sibindzi, kodvwa kungobe abephelelwe ngemandla. Kulandzisa kutsi: “Davide wase uyadzinwa.” Ngekushesha lapho Ishbi Benobi abona kutsi Davide sewute emandla, ‘wacabanga kutsi utambulala Davide.’ Kodvwa ngembikwekutsi lesichwaga sihlabe Davide ngesikhali saso, “Abishayi, umsa waSeruya, welekelela Davide, wagadla lesichwaga wasibulala.” (2 Sam. 21:15-17) Davide wasindza ngekulambisa. Kungenteka kutsi wajabula kakhulu ngekutsi Abishayi wambona kutsi abesaphelelwa ngemandla futsi ngekushesha weta watewusindzisa kuphila kwakhe lokwakusengotini. Ngutiphi tifundvo lesititfola kulokulandzisa?

14. (a) Sikhona njani kuncoba tinkinga letifanana naGoliyathi? (b) Labadzala bangabasita njani labanye kutsi baphindze babe nemandla nenjabulo? Niketa sibonelo.

¹⁴ Njengebantfu baJehova senta umsebenti wekushumayela emhlabeni wonkhe ngisho nobe Sathane nemasekela akhe basilinga ngaletinye tikhatsi. Labanye betfu bake babukana netinkinga letinkhulu, kodvwa ngekwetsembela kuJehova, siyakhona kuba nesibindzi sekumelana nato siphindze sitincobe. Nobe kunjalo, ngaletinye tikhatsi, kulwa nekucindzetelwa tinkinga talomhlaba kusicedza emandla kusishiye site litsemba. Njengobe sikuleso simo sekuphelelwa ngemandla, sisuke site emandla futsi sisengotini yekucindzetelwa tinkinga lebesingakhona kutincoba. Etikhatsini letinjalo, kusekelwa lesikutfola kulomdzala kungasisita siphindze sijabule sibe nemandla, njengobe lokuhlangenwe nako kwalabanye kukhombisa. Lihlahlandlela leliseminyakeni yabo-60 budzala, latsi: “Eminyakeni leminyenti leyendlulile, ngacala kungativa kahle futsi ngingasakhoni nekwenta umsebenti wekushumayela. Lomunye lomdzala welibandla wabona kutsi ngite emandla wase uta kimi. Wangikhutsata kakhulu asebentisa emavi lasekelwe eBhayibhelini. Ngakusebentisa loko langitjela kona, futsi ngazuza kakhulu.” Lichubeka litsi: “Lona lomdzala wakhombisa kutsi unelutsandvo ngekutsi anake simo lebengikuso aphindze angisite.” Kuliciniso kutsi kujabulisa kakhulu kwati kutsi sinalabadzala labahlale basinakile futsi labahlale bakulungele ‘kusilekelela,’ njenga-Abishayi.

“KUZE NATI KUTSI NGINITSANDZA KANGAKANANI”

15, 16. (a) Yini leyenta Pawula watsandvwa kakhulu bazalwane labebakanye naye? (b) Yini lesenta sitsandze labadzala betfu belibandla labakhatsalelako?

¹⁵ Kuba ngumelusi kufaka ekhatsi kwenta imisebenti lematima. Ngaletinye tikhatsi, labadzala bahlala busuku bonkhe bacabanga futsi bathantazela umhlambi waNkulunkulu nobe basita emakholwa labakanye nawo. (2 Khor. 11:27, 28) Nobe kunjalo, labadzala bayachubeka benta imisebenti yabo ngemphumelelo futsi bajabulile, njengobe kwenta naPawula. Naku lakubhalela baseKhorinte: “Ngiyawujabula kutsi nginikele ngako konkhe ngize nginikelwe nami lucobo, kuze kusitakale imiphefumulo yenu.” (2 Khor. 12:15) Ngesizatfu sekutsi abebatsandza bazalwane bakhe, Pawula wasebentisa kuphila kwakhe abacinisa. (Fundza 2 Khorinte 2:4; Fil. 2:17; 1 Thes. 2:8) Kungaleso sizatfu bazalwane bebamtsandza kakhulu Pawula!—Imis. 20:31-38.

¹⁶ Natsi lamuhla njengetinceku taNkulunkulu, siyabatsandza labadzala belibandla labangemaKhristu futsi sibonga Jehova emithantazweni yetfu ngekusipha bona. Basenta sijabule kakhulu ngekusinaka kwabo. Sitiva sibalulekile ngekusivakashela kwabo kwekwelusa. Ngetulu kwaloko, sijabula kakhulu ngekutsi bahlale bakulungele kusisita nangabe sitiva sicindzetelwa tinkinga talomhlaba. Kuliciniso kutsi laba labadzala labangemaKhristu labakhatsalelako ‘babambisene natsi ekujabuleni kwetfu.’