Batinikela Ngekutitsandzela—EMexico

KUJABULISA kakhulu kubona kutsi kunelinani lelandzako laboFakazi labasebasha labakhetsa kuphila imphilo lemelula kute batfutfukise umsebenti wabo wekushumayela. (Mat. 6:22) Nguluphi lushintjo labalwentako? Ngutiphi titsiyo labahlangabetana nato? Kute sitfole timphendvulo talemibuto, ase sicoce ngalabo labatfutsele eMexico.

‘KWADZINGEKA KUTSI SENTE LUSHINTJO’

Dustin naJassa basuka eMelika futsi bashada ngaJanuary 2007. Ngekushesha ngemuva kwaloko, bakhona kujabulela loko labebafisa kuba nako—kuba nesikebhe labatawuhlala kuso umnyaka munye. Lesikebhe sabo basimisa edvute nase-Astoria, e-Oregon, eMelika, lidolobha lelihle kakhulu lelinemagcuma lagcwele tihlahla kanye netintsaba letinelichwa, edvute nePacific Ocean. Dustin utsi: “Yonkhe indzawo lobewuyibuka beyivele ikumangalise!” Labantfu labashadene bebacabanga kutsi baphila imphilo lemelula futsi betsembele kuJehova. Bebatsi: ‘Simane nje sihlala esikebheni lesingemamitha lasiphohlongo, sisebenta emalanga lambalwa kuphela, siya ebandleni lelikhuluma lolunye lulwimi futsi ngaletinye tikhatsi siba ngemahlahlandlela lasitako.’ Kodvwa ngekuhamba kwesikhatsi, babona kutsi bayatiyenga. Dustin utsi: “Kunekutsi sisekele libandla lebesikulo, sikhatsi setfu lesinyenti besisicitsa silungisa sikebhe setfu. Besati kutsi nangabe sifuna mbamba kubeka Jehova kucala ekuphileni kwetfu, bekutawudzingeka sente lushintjo.”

Jassa uchubeka atsi: “Ngisengakashadi, bengihlala eMexico, futsi ngisebandleni lesiNgisi. Bengikujabulela kuba kulelo bandla futsi benginesifiso lesikhulu sekubuyela khona.” Kute bacinise sifiso sabo sekutfutsela eveni lelinesidzingo lesikhulu, boDustin naJassa bebafundza imilandvo yekuphila ekukhonteni kwabo kwemndeni lemayelana nebazalwane nabodzadze labatfutsela kulamanye emave lanemasimu lasalungele kuvunwa. (Joh. 4:35) Dustin utsi: “Natsi besifuna kuba nenjabulo lefanana naleyo.” Ngesikhatsi bangani babo labaseMexico babatjela kutsi kunelicembu lelisha lelidzinga lusito, boDustin naJassa benta sincumo. Bayekela imisebenti yabo yekutiphilisa, batsengisa sikebhe sabo base batfutsela eMexico.

‘INTFO LENHLE KAKHULU LENGAKAZE YENTEKE KITSI’

BoDustin naJassa befike bahlala edolobheni laseTecománʹ—nalo belidvutane nePacific Ocean kodvwa likhashane ngemakhilomitha langu-4 300 eningizimu ye-Astoria. Dustin utsi: “Kunekutsi sijabulele kuhhusha kwemoya lopholile nekubuka tintsaba letinhle, kuhlale kushisa kulendzawo futsi sibona tihlahla temalamula nje kuphela.” Ekucaleni bebangawutfoli umsebenti. Ngesizatfu sekutsi bebete imali, njalo ngeliviki bebadla lilayisi nemabhontjisi, futsi loko bebakudla kabili ngelilanga. Jassa utsi: “Ngesikhatsi sesingasakujabuleli lokudla lebesikudla, tifundvo tetfu teliBhayibheli tacala kusipha bomangoza, bobhanana, emaphopho kanye nemasaka lagcwele emalamula.” Ngekuhamba kwesikhatsi, batfola umsebenti wekufundzisa lulwimi eTaiwan basebentisa i-Internet. Nyalo imali labayitfolako kulomsebenti iyabasita kutsi banakekele tidzingo tabo tamalanga onkhe.

BoDustin naJassa bativa njani ngalemphilo yabo lensha? Batsi: “Lokutfutsa kube yintfo lenhle kakhulu lengakaze yenteke kitsi. Buhlobo lesinabo naJehova nebetfu sobabili bucine kakhulu ngendlela lebesingayicabangi. Onkhe emalanga senta tintfo letinyenti sindzawonye—siya ensimini, sicoca ngekutsi singatisita njani tifundvo tetfu teliBhayibheli siphindze silungiselele nemihlangano. Nyalo sesikhululekile ekucindzetelekeni lebesinako ekucaleni.” Bachubeka batsi: “Sesijabulela loko lebesingakucondzi ekucaleni—kuba liciniso kwesetsembiso lesikuTihlabelelo 34:8, lesitsi: ‘Ase ninambitse nibone kutsi Simakadze muhle.’”

TISEBENTI LETINYENTI TEKUTITSANDZELA—YINI LETIKHUTSATAKO?

Bazalwane nabodzadze labangetulu kwa-2 900—labashadile nalabangakashadi, labanyenti kubo labaseminyakeni yabo-20 kuya ku-30 budzala—batfutsele etindzaweni taseMexico lapho kunesidzingo lesikhulu sebashumayeli beMbuso. Yini leyente laboFakazi bakhetsa lomsebenti lonetinsayeya kangaka? Ngesikhatsi licembu labo libutwa lombuto, lasho tizatfu letintsatfu letiyinhloko. Ngutiphi leto tizatfu?

Kukhombisa lutsandvo lwabo ngaJehova nangalabanye bantfu. Leticia wabhajatiswa aneminyaka lengu-18 budzala. Utsi: “Ngesikhatsi ngitinikela kuJehova, bengati kutsi loku kusho kutsi ngitamkhonta ngenhlitiyo nangemphefumulo wami wonkhe. Kute ngikhombise lutsandvo lwami ngaJehova, bengifuna kusebentisa sikhatsi sami nemandla ami lamanyenti emsebentini wakhe.” (Mak. 12:30) Hermilo, nyalo losashade naLeticia, abeseminyakeni yabo-20 budzala ngesikhatsi atfutsela endzaweni lenesidzingo lesikhulu sebashumayeli beMbuso. Utsi: “Ngabona kutsi kusita bantfu bati Nkulunkulu bekutawuba yindlela lenhle kakhulu yekukhombisa lutsandvo lwami ngabomakhelwane.” (Mak. 12:31) Ngako wasuka edolobheni lakubo eMonterrey, lebelime kahle kakhulu ngetemnotfo, washiya umsebenti wakhe wasebhange, nemphilo lentofontofo labeyiphila, wase utfutsela edolobheni lelincane.

Kute banambitse injabulo sibili nalengapheli. Ngekushesha ngemuva kwekubhajatiswa kwakhe, Leticia wahamba nalomunye dzadze lolihlahlandlela futsi lonalokuhlangenwe nako baya edolobheni lelikhashane, futsi bebatawushumayela lapho inyanga yinye. Leticia uyakhumbula: “Ngamangala kakhulu futsi kwangijabulisa kubona indlela bantfu labatsintseka ngayo nabeva umlayeto weMbuso lebesibacocela wona. Ekupheleni kwaleyo nyanga, ngatsi: ‘Loku ngiko kanye lengifuna kukwenta ngekuphila kwami.’” Ngendlela lefananako, Essly, longudzadze longakashadi loseminyakeni yabo-20 budzala, utsi naye lenjabulo layibona yamenta wawutsandza lomsebenti wekushumayela emaveni lanesidzingo lesikhulu. Ngesikhatsi asafundza sikolwa, abebona boFakazi labanyenti labatfutsele lapho kunesidzingo lesikhulu khona. Utsi: “Kubona injabulo labazalwane nabodzadze labanayo kwangenta ngafuna kuphila imphilo lefanana neyabo.” Banyenti kakhulu bodzadze labativa njenga-Essly. Ecinisweni, eMexico kunabodzadze labangakashadi labangetulu kwa-680 labasetindzaweni letinesidzingo lesikhulu. Bababekela sibonelo lesihle bantfu labasebasha nabontsanga yabo.

Kute baphile imphilo lenenjongo nalenetisako. Essly watsi nakacedza sikolwa, wanikwa umfundzate wasenyuvesi. Bontsanga yakhe bamkhutsata kutsi awutsatse kute atewuphila imphilo lencono—atfole ticu te-degree, umsebenti, imoto futsi abe nesikhatsi sekuvakashela letinye tindzawo. Nobe kunjalo, akazange atisebentise teluleko tabo. Essly utsi: “Bangani bami labanyenti labangemaKhristu batilandzela letintfo, futsi ngiyabona kutsi imigomo lehlobene nekukhonta Nkulunkulu ayiseti kucala ekuphileni kwabo. Ngabona nekutsi bagcine sebakhatsatekile ngetinkinga labahlangabetana nato njengobe bachubeka bangena etindzabeni talelive. Mine bengifuna kusebentisa busha bami ngikhonta Jehova ngalokuphelele.”

Essly wenta tifundvo letamsita kutsi atfole umsebenti kute atinakekele njengobe alihlahlandlela, ngemuva kwaloko watfutsela endzaweni lebeyinesidzingo lesikhulu sebamemeteli beMbuso. Waze wafundza nelulwimi lolukhulunywa sive sema-Otomi nalelo lelikhulunywa ngemaTlapaneco. Nyalo njengobe abuka emuva eminyakeni lemitsatfu labeshumayela ngayo kuleto tindzawo, utsi: “Kushumayela lapho kunesidzingo lesikhulu khona kungente ngajabula kakhulu futsi ngaba nenjongo ekuphileni kwami. Ngetulu kwaloko, kucinise buhlobo bami naJehova.” Phillip naRacquel, bantfu labashadene labaseminyakeni yabo-30 budzala labasuka eMelika, batsi: “Lelive lishintja ngekushesha futsi loko kwente bantfu labanyenti babona kutsi kuphila kwabo kungashintja nobe nini. Kodvwa kushumayela endzaweni lapho kunebantfu labanyenti labalalela umlayeto weliBhayibheli kusente saba nenjongo ekuphileni kwetfu. Loko kujabulisa kakhulu.”

TINSAYEYA—INDLELA YEKUTIBEKETELELA

Kuliciniso kutsi kutfutsela lapho kunesidzingo lesikhulu khona sebamemeteli beMbuso kunetinsayeya. Lenye insayeya kutsi utatinakekela njani. Kute ukhone kwenta njalo, kudzingeka uhlale ukulungele kuvumelanisa kuphila kwakho nekwendzawo lohlala kuyo. Verónica, lolihlahlandlela lelinalokuhlangenwe nako, uyachaza: “Endzaweni lebengitfutsele kuyo, bengipheka ngiphindze ngitsengisa kudla lokungaduli. Kulenye indzawo, bengitsengisa timphahla ngiphindze ngihhule bantfu tinwele. Nyalo, ngisebenta kulenye indlu ngiphindze ngifundzise batali labanebantfwana labancane kutsi bakhulume nabo.”

Kwetayela emasiko nendlela yekuphila yakulenye indzawo kungaba yinsayeya nangabe uphila nalabo bantfu endzaweni yabo. Nguloko lokwenteka kuPhillip naRacquel ngesikhatsi basensimini yebantfu labakhuluma siNahuatl. Phillip utsi: “Emasiko akuleyo ndzawo abehluke kakhulu kunewetfu.” Yini leyabasita kute bativumelanise naleso simo? Racquel utsi: “Sanaka tintfo letinhle lebetentiwa bantfu labangemaNahuatl—kusondzelana kakhulu kwemindeni yabo, kwetsembeka kwabo nabanalabanye bantfu nekukhombisa kwabo umusa. Kunyenti lesakufundza ngekuhlala kulendzawo nangekusebenta nebazalwane nabodzadze basemmangweni.”

INDLELA YEKUKULUNGELA

Nangabe ungatsandza kuyoshumayela lapho kunesidzingo lesikhulu khona, yini longayenta nyalo kute ukulungele? Bazalwane nabodzadze labanalokuhlangenwe nako kulomsebenti batsi: Ngembikwekutsi utfutse, cale uphile imphilo lemelula futsi ufundze kwenetiseka. (Fil. 4:11, 12) Yini lenye longayenta? Leticia uyalandzisa: “Mine bengingayitsatsi imisebenti yekutiphilisa lebeyitawudzinga kutsi ngitinikele kuyo ngalokuphelele. Bengifuna kuba nenkhululeko yekuhamba nobe nini nganobe ngusiphi sikhatsi ngiye lapho kunesidzingo lesikhulu khona.” Hermilo utsi: “Ngafundza kupheka, kuwasha timphahla neku-ayina.” Verónica uyalandzisa: “Ngesikhatsi ngisahlala nebatali bami nebantfwana bakitsi, bengisita ekwenteni indlu ihlale ihlobile futsi ngafundza nekupheka kudla lokungaduli kodvwa lokunemphilo. Ngafundza nekonga.”

Levi na-Amelia, labesuka eMelika futsi lasebaneminyaka lesiphohlongo bashadile, batsi kusho ngalokucondzile nawuthantaza kutsi ufunani kwabasita balungela kuya eMexico. Levi utsi: “Sabala kutsi ingakanani imali lesitawuyidzinga kute sikhone kushumayela kulelinye live umnyaka munye, futsi sathantaza kuJehova samcela kutsi asisite sikhone kubeka lelo nani lemali.” Ngetinyanga nje letimbalwa, bakhona kubeka lemali labakhuluma ngayo emthantazweni wabo, futsi batfutsa ngaphandle kwekucitsa sikhatsi. Levi utsi: “Jehova wasiphendvula sicelo setfu lesicondzile, ngako nyalo besekusikhatsi setfu sekutsi sente loko besikufisa.” Amelia uchubeka atsi: “Besicabanga kutsi sitawuhlala umnyaka munye kuphela, kodvwa nyalo sekuphele iminyaka lesikhombisa silapha futsi asikucabangi kutfutsa. Kuphila kulendzawo kusenta sitibonele matfupha lusito lwaJehova. Onkhe emalanga, siyabubona bufakazi bekutsi muhle.”

Bo-Adam naJennifer, labashadene labesuka eMelika futsi labasensimini lekhuluma siNgisi eMexico, nabo bakubona kubaluleka kwekuthantaza. Batsi: “Ungalindzi kuze kube ngulapho sewubona kutsi timo setincono. Thantaza kuNkulunkulu umtjele ngesifiso sakho sekutfutsela kulelinye live, uphindze wente ngekuvumelana nemithantazo yakho. Phila imphilo lemelula, bhalela ligatja lakini ulatise ngendzawo lofuna kutfutsela kuyo, futsi ngemuva kwekubala tindleko takho, ungatfutsa.”a Nawungenta njalo, utawujabulela imphilo lencono kakhulu futsi ube nebuhlobo lobuhle naNkulunkulu.