Bujabulele Ngalokugcwele Bunguye BaJehova

1. (a) Ngubuphi bunguye baJehova umKhristu langacabanga ngabo? (b) Singazuza njani ngekuhlola bunguye baNkulunkulu?

NAWUCABANGA ngebunguye baJehova, yini lefika engcondvweni yakho? Linyenti letfu licabanga ngelutsandvo, kulunga, kuhlakanipha nemandla. Nobe kunjalo, siyacaphela kutsi Jehova ukhombisa bunguye bakhe ngetindlela letinyenti. Ecinisweni, bunguye baJehova bungavela ngetindlela letehlukene letingetulu kwa-40, ngayinye yato lechaziwe etincwadzini tetfu. Cabanga nje kutsi ungakanani umcebo wemaciniso lajabulisako ngebunguye baJehova lesingawutfola esifundvweni lesitichubela sona nobe esifundvweni semndeni. Singazuza ngatiphi tindlela esifundvweni lesinjalo? Singakhulisa kumjabulela kwetfu Babe wetfu wasezulwini. Nasikhulisa kujabulela kwetfu Jehova, sifiso setfu sekusondzela kuye futsi simlingise sitawucina.—Josh. 23:8; Hla. 73:28.

2. (a) Ase ufanekise kutsi singakukhulisa njani kujabulela kwetfu bunguye baJehova? (b) Yini lesitayihlola kulesihloko?

² Kusho kutsini “kujabulela” intfo letsite? Njengobe sitawulisebentisa leligama kulesifundvo, lisho kucaphela bumcoka bentfo letsite. Kujabulela intfo letsite kungase kukhule kancane kancane. Ase sifanekise: Kujabulela kwetfu kudla lesingakake sakudla kuyakhula nasihogela liphunga lako lelimnandzi, bese sinambitsisisa incenyana ngayinye yako, ekugcineni bese sitiphekela matfupha loko kudla. Ngendlela lefanako, sikhulisa kujabulela bunguye baJehova ngekubati kahle, sicabangisise ngabo futsi sibulingise ekuphileni kwetfu. (Ef. 5:1) Umgomo loyinhloko walesifundvo naleti letimbili letitawulandzela, ukutsi sikhulise kujabulela kwetfu bunguye baNkulunkulu lesingahle sicabange kutsi abusho lutfo kunalobo lobuhamba phambili. Kulobunguye baNkulunkulu, sitawuhlola loku lokulandzelako: Busho kutsini? Jehova ubukhombisa njani? Tsine singamlingisa njani Jehova ekubukhombiseni?

JEHOVA UYANGENEKA

3, 4. (a) Ungamchaza njani umuntfu longenekako? (b) Jehova usicinisekisa njani kutsi uyangeneka?

³ Kwekucala, ase sicoce ngekungeneka. Ungamchaza njani umuntfu longenekako? Ungase utsi: ‘Ngumuntfu lonemusa, lohlale akulungele kusita futsi lokumelula kukhuluma naye.’ Ungaphindze ubone kutsi umuntfu uyangeneka nobe cha ngekulalela loko lakushoko ubuke nesimo sakhe—indlela lenta ngayo tintfo, kubukeka kwakhe emehlweni kanye naletinye tintfo.

⁴ Jehova ukhombisa njani kutsi uyangeneka? Nanobe anguMdali lomkhulu wendzawo yonkhe, Jehova uyasicinisekisa kutsi unesifiso sekulalela imithantazo yetfu futsi ayiphendvule. (Fundza Tihlabelelo 145:18; Isaya 30:18, 19.) Singakhuluma naNkulunkulu sikhatsi lesidze nganobe ngusiphi sikhatsi sikunobe nguyiphi indzawo. Singakhuluma naye sikhululekile, sati kutsi angeke kumphatse kabi nasenta njalo. (Hla. 65:2; Jak. 1:5) LiVi laNkulunkulu lichaza Jehova njengemuntfu kute livete kutsi ufuna site kuye. Nasi sibonelo: Umhlabeli Davide wabhala watsi “emehlo aSimakadze akesuki” kitsi nekutsi ‘sandla sakhe sekudla siyasisimisa.’ (Hla. 34:15; 63:8) Umphrofethi Isaya wafanisa Jehova nemelusi nakatsi: “Ugona emazinyane akhe ngemikhono yakhe, awasondzete edvutane nenhlitiyo yakhe.” (Isa. 40:11) Cabanga nje ngaloko! Jehova ufuna sisondzele kuye njengobe umelusi lonelutsandvo enta nakaphetse lizinyane lakhe lelilele esifubeni. UYise wetfu uyangeneka. Singamlingisa njani Jehova kuloko?

BUNTFU LOBUTSANDVWAKO

5. Yini leyenta kubaluleke kutsi labadzala bangeneke?

⁵ Muva nje boFakazi labanenshisekelo labahlala emavekatini lehlukene babutwa: “Ngubuphi buntfu lenibutsandza kakhulu kulomdzala welibandla?” Labanyenti kubo baphendvula batsi: “Kungeneka.” Kuyacaca kutsi umKhristu ngamunye kufanele abukhombise ngalokugcwele buntfu lobunjalo, kodvwa kubaluleke kakhulu kutsi labadzala bangeneke. (Isa. 32:1, 2) Aphawula sizatfu sekutsi yini lementa abe nemuva wekutsi buntfu lobunjalo bubalulekile, lomunye dzadze watsi: “Nangabe lomdzala angeneka sitawukhona kuzuza kulobunye buntfu bakhe lobuhle lokungenteka unabo.” Uyakubona yini kuba nengcondvo kuloko lokwabonwa ngulodzadze? Kodvwa yini leyenta umuntfu angeneke?

6. Yini lebalulekile lokufanele uyente kute ungeneke?

⁶ Intfo lebalulekile kute ungeneke, kukhombisa lutsandvo ngalabanye. Nangabe lomdzala abakhatsalela labanye futsi anesifiso sekubasita, bazalwane nabodzadze lakanye nabo ngisho nalabasebasha, batakujabulela loko. (Mak. 10:13-16) Carlos loneminyaka lengu-12 budzala watsi: “Ngiyaye ngibabone labadzala ehholweni bamoyitela bakhombisa nemusa futsi loko kungenta ngibatsandze.” Ecinisweni, akukeneli ngalomdzala kumane nje atsi uyangeneka, kufanele akukhombise loko ngetento. (1 Joh. 3:18) Angakwenta njani loko?

7. Yini leyenta kutsi ngalokuvamile nawufake libheji lemhlangano kube melula kucalisa incociswano, futsi ngusiphi sifundvo lesingasitfola kuloko?

⁷ Ase ucabange nganasi sibonelo. Muva nje, lomunye umzalwane abefake libheji lemhlangano asendizeni lebuyela ekhaya ngemuva kwemhlangano lowawukulelinye live. Ngesikhatsi losebenta endizeni abona lelibheji lelibhalwe kutsi “UMbuso WaNkulunkulu Awufike,” watsi kulomzalwane: “Vele awufike—kufanele sikhulume lokunyenti ngalendzaba.” Ngemuva kwaloko, baba nencociswano, futsi lesisebenti sasendizeni sabemukela ngenjabulo bomagazini betfu. Labanyenti betfu babe nako lokuhlangenwe nako lokunjengaloku. Ngalokuvamile yini lebangela kutsi libheji lemhlangano livuse incociswano? Kungobe ngemcondvo lotsite litjela bantfu kutsi: “Tiveni nikhululekile kuta kimi. Ngibuteni kutsi ngiyaphi.” Libheji liluphawu lolubonakalako lelenta bantfu bati kutsi sinesifiso sekucoca nabo ngetinkholelo tetfu. Ngendlela lefanako, labadzala labangemaKhristu bafuna kukhombisa timphawu letibonakalako letitjela labakholwa nabo kutsi: “Tiveni nikhululekile kuta kimi.” Ngutiphi letinye taleto timphawu?

8. Labadzala belibandla bakhombisa njani kutsi bayabatsandza labanye, futsi kwenta njalo kungaba namuphi umtselela ebandleni?

⁸ Emasiko angase ehluke kuye ngekutsi sihlala kuliphi live, kodvwa ngalokuvamile, nasimamatseka nasihlangana nebazalwane betfu nabodzadze, sibachawule ngelutsandvo futsi sibabingelele singakajaki sisuke sikhombisa kutsi siyabatsandza. Ngubani lokufanele ahambe embili ekwenteni loko? Naka nasi sibonelo lesabekwa nguJesu. Matewu ubika kutsi emhlanganweni laba nawo nebafundzi bakhe, “Jesu wasondzela kubo” wakhuluma nabo. (Mat. 28:18) Ngendlela lefanako, labadzala lamuhla batsatsa sinyatselo sekuya kulabo labakholwa nabo futsi bakhulume nabo. Kwenta njalo kungaba namuphi umtselela ebandleni? Lomunye dzadze lolihlahlandlela loneminyaka lengu-88 budzala watsi: “Kumamatseka ngelutsandvo nemavi langikhutsatako lengiwatfola kulabadzala belibandla nangifika eHholweni leMbuso, kungenta ngibatsandze.” Lomunye dzadze lowetsembekile watsi: “Kungase kubonakale kuyintfo lengasho lutfo, kodvwa nangabe lomdzala angemukela amamatseka esifundvweni, kusho lokukhulu loko kimi.”

NGENEKA UPHINDZE UBE NESIKHATSI

9, 10. (a) Ngusiphi sibonelo lesihle Jehova lasibekile? (b) Nguyiphi indlela labadzala labangenta ngayo kute babe nesikhatsi nalabanye?

⁹ Kuliciniso kutsi angeke singeneke nangabe site sikhatsi. Jehova usibekela sibonelo lesihle kulendzaba. “Akekho khashane ngisho nakumunye wetfu.” (Imis. 17:27) Lenye indlela labadzala labenta ngayo kute babe nesikhatsi nalabanye, kutsi babekele eceleni sikhatsi isengakacali imihlangano yebuKhristu nanaseyiphelile kute bacocisane nebazalwane nabodzadze—labadzala nalabancane. Lomunye umzalwane lolihlahlandlela watsi: “Nangabe lomdzala angibuta kutsi nginjani bese uyema kute alalele imphendvulo, ngitiva ngibalulekile.” Dzadze losakhonte Jehova cishe iminyaka lengu-50, watsi: “Labadzala labatinika sikhatsi bacoce nami ngemuva kwemihlangano, bangenta ngitive kutsi nami ngingumuntfu.”

¹⁰ Siyati kutsi belusi labangemaKhristu baphindze babe naleminye imisebenti lokufanele bayente. Nobe kunjalo, kufanele kube ngumgomo wabo kutsi emihlanganweni bacale ngekunaka timvu.

JEHOVA AKAKHETSI

11, 12. (a) Kuhlanganisani kungakhetsi? (b) Yini leyenta Jehova abe sibonelo setfu endzabeni yekungakhetsi?

¹¹ Kungakhetsi ngulenye indlela Jehova lakhombisa ngayo bunguye bakhe. Kusho kutsini kungakhetsi? Kuhlanganisa kuphatsa bantfu ngendlela lefanako, ungaboni lomunye ancono kunalomunye. Kungakhetsi kuhlanganisa timo letimbili: indlela lotiva ngayo netento. Yini leyenta loku kokubili kudzingeke? Kungobe nangabe umuntfu angakhetsi endleleni lativa ngayo utawukhona kuphatsa bonkhe bantfu ngekungakhetsi. EmiBhalweni YemaKhristu YesiGriki, inchazelo ‘yekungakhetsi’ isho “kungabuki buso bemuntfu,” lokusho kungatsatsi lomunye umuntfu njengaloncono kunalomunye. (Imis. 10:34; Kingdom Interlinear) Ngako-ke, umuntfu longakhetsi akanaki kakhulu indlela umuntfu labukeka ngayo ngaphandle, kodvwa unaka buntfu baloyo muntfu.

¹² Jehova usibonelo lesihamba embili semuntfu longakhetsi. LiVi lakhe litsi “akakhetsi” futsi “akaphatsi muntfu ngekukhetsa.” (Fundza Imisebenti 10:34, 35; Dutheronomi 10:17, NW.) Lokutsite lokwenteka ngesikhatsi saMosi kuyakufakazela loko.

13, 14. (a) Nguyiphi inkinga emadvodzakati lasihlanu aSelofehadi lahlangabetana nayo? (b) Jehova wakhombisa njani kutsi akakhetsi?

¹³ Ngaphambikwekutsi nje ema-Israyeli angene eVeni Lesetsembiso, tintfombi letisihlanu letitihlobo tengati tabhekana nenkinga lenkhulu. Yayiyini lenkinga? Betati kutsi umndeni wato, njengaleminye imindeni yaka-Israyeli, utawutfola indzawo lebeyabelwe uyise wato. (Num. 26:52-55) Nobe kunjalo, uyise wato, Selofehadi wesive sakaManase, abesashonile. Ngekusho kwelisiko, lobekufanele aniketwe lendzawo kwakuyindvodzana yaSelofehadi, kodvwa Selofehadi abenemadvodzakati nje kuphela. (Num. 26:33) Njengobe abete indvodzana letawuniketwa lendzawo, lendzawo yalomndeni besekufanele iniketwe tihlobo yini, bese emadvodzakati aSelofehadi asale ete lifa lemndeni?

¹⁴ Letintfombi letisihlanu taya kuMosi tamcela tatsi: “Kwentiwa yini libito lababe lingaveli elusendvweni ngobe abete indvodzana?” Tamncenga: “Sinikeni sabelo emkhatsini wetihlobo tababe.” Mosi washo yini kutsi: ‘Angeke size siwephule umtsetfo’? Cha, akashongo njalo, kodvwa “wayitsatsa lendzaba yawo wayimikisa kuSimakadze.” (Num. 27:2-5) Yatsini imphendvulo? Jehova watjela Mosi: “Kuliciniso loku lokushiwo ngemadvodzakati aSelofehadi. Kufanele uwanike sabelo sawo etihlotjeni teyise, aniketwe lifa leyise.” Jehova wenta lokwengetiwe. Wase ubeka umtsetfo, watsi kuMosi: “Nangabe indvodza ifa, ishiye kute indvodzana, imphahla nelifa layo alendluliselwe endvodzakatini yayo.” (Num. 27:6-8; Josh. 17:1-6) Kusukela ngaleso sikhatsi, bonkhe labasikati baka-Israyeli labebanenkinga lefanako bebatawuvikelwa.

15. (a) Jehova ubaphatsa njani bantfu bakhe, ikakhulukati labo labasesimeni lesibuhlungu? (b) Ngutiphi letinye tindzaba letitfolakala eBhayibhelini letikhombisa kutsi Jehova akakhetsi?

¹⁵ Leso kwakusincumo lesinemusa nalesingakhetsi. Jehova waphatsa letintfombi lebetisesimeni lesibuhlungu ngenhlonipho, njengobe enta nakuma-Israyeli labekasesimeni lesincono kunesato. (Hla. 68:5) Lesi ngulesinye setibonelo kuletinyenti letiseBhayibhelini letifakazela leliciniso lelitsi: Jehova uphatsa tonkhe tinceku takhe ngekungakhetsi.—1 Sam. 16:1-13; Imis. 10:30-35, 44-48.

SINGAMLINGISA JEHOVA

16. Singaba nako njani kungakhetsi futsi sikucinise?

¹⁶ Singakulingisa njani kungakhetsi kwaJehova? Khumbula kutsi kungakhetsi kunetincenye letimbili. Nangabe singakhetsi, sitawuphatsa labanye ngekungakhetsi. Kuliciniso kutsi sonkhe sitibona sibantfu labacabangelako nalabangakhetsi. Mhlawumbe ungavuma kutsi akusimelula kutichaza kutsi sibantfu labanjani. Ngako-ke, kufanele sentenjani nangabe sifuna kwati kutsi satiwa ngekungakhetsi? Ngesikhatsi Jesu afuna kwati kutsi bantfu batsini ngaye, wabuta bangani bakhe labetsembako: “Bantfu batsi iNdvodzana yeMuntfu ingubani?” (Mat. 16:13, 14) Kungaba njani ulingise Jesu kuloku? Ungabuta umngani lometsembako longakutjela liciniso kutsi watiwa ngekungakhetsi yini. Nangabe akutjela kutsi unetimphawu letichubekako tekukhetsa bantfu bebuve lobutsite nobe loko labanako, yini lokufanele uyente? Thantaza ngebucotfo kuJehova umchazele indlela lotiva ngayo, umncenge kutsi akusite ulungise simo sakho sengcondvo kute ukhombise kungakhetsi ngalokugcwele.—Mat. 7:7; Khol. 3:10, 11.

17. Ngutiphi tindlela lesingaphatsa ngato labanye ngekungakhetsi?

¹⁷ Ebandleni lebuKhristu, sikhombisa sifiso setfu sekulingisa kungakhetsi kwaJehova ngekuphatsa bazalwane nabodzadze ngenhlonipho nangemusa welutsandvo. Nasi sibonelo: Endzabeni yekukhombisa kwemukelana, sifuna kumema lonkhe luhlobo lwebazalwane, kuhlanganise nalabo timo tabo letingafani netetfu, kungaba ngulabo labaphuyile, labatintsandzane nobe bafelokati. (Fundza Galathiya 2:10; Jakobe 1:27.) Ngetulu kwaloko, emsebentini wekushumayela ngeMbuso, sicoca ngetindzaba letimnandzi ngekungakhetsi nalo lonkhe luhlobo lwebantfu, kuhlanganise nalabo lababuya kulamanye emave. Siyajabula ngekutsi sitfola tincwadzi letisekelwe eBhayibhelini ngetilwimi letingaba ngu-600. Lobu bufakazi bekungakhetsi.

18. Wena ungabonisa njani kutsi uyakutsandza kungeneka nekungakhetsi kwaJehova?

¹⁸ Kuliciniso kutsi nasitinika sikhatsi sekuzindla ngekungeneka nekungakhetsi kwaJehova, lutsandvo lwetfu ngaye luyajula. Loko kufanele kusente silingise bunguye baJehova ngalokugcwele, sibukhombise kulabo lesikholwa nabo nakulabo lesishumayela kubo.