Lilunga Lelisha LeSigungu Lesibusako

NgaLesitsatfu ekuseni ngaSeptember 5, 2012, kwakhishwa simemetelo emndenini waseBethel yaseMelika naseCanada lesitsi sekunelilunga lelisha eSigungwini Lesibusako saboFakazi BaJehova. Kusukela ngaSeptember 1, 2012, Mark Sanderson ubekwe kutsi abe lilunga leSigungu Lesibusako.

Umzalwane Sanderson wakhuliswa batali bakhe labangemaKhristu eSan Diego, California, U.S.A., futsi wabhajatiswa ngaFebruary 9, 1975. NgaSeptember 1, 1983, wacala kuba lihlahlandlela eSaskatchewan, eCanada. NgaDecember 1990, wetfweswa ticu ekilasini lesikhombisa leSikolwa Sekuceceshelwa Imisebenti YebuKhristu (nyalo lesesibitwa ngekutsi Sikolwa Lesisekelwe EBhayibhelini Sebazalwane Labangakashadi) eMelika. Umzalwane Sanderson wabekwa kutsi abe lihlahlandlela lelikhetsekile esichingini saseNewfoundland, eCanada, nga-April 1991. Ngemuva kwekukhonta njengembambeli wembonisi wesifundza, wabitwa kutsi atewuba lilunga lemndeni waseBethel yaseCanada ngaFebruary 1997. NgaNovember 2000, watfunyelwa egatjeni laseMelika, wefika wasebenta eHhovisi Lelinakekela Tindzaba Tetibhedlela kamuva wasebenta eHhovisini Lemsebenti.

NgaSeptember 2008, Umzalwane Sanderson waya eSikolweni Semalunga Ekomidi Yeligatja, ngemuva kwaloko wabekwa kutsi abe lilunga leKomidi Yeligatja lasePhilippines. NgaSeptember 2010, wacelwa kutsi aphindze abuyele eMelika, lapho asebenta njengemsiti weKomidi Yemsebenti Yesigungu Lesibusako.