Kwetsembela KuJehova Kusiletsele Tibusiso

BABE namake bahlangana nga-1919 emhlanganweni wesigodzi weBafundzi beliBhayibheli beMhlaba Wonkhe, e-Cedar Point, e-Ohio, eMelika. Bashada ngasekupheleni kwalowo mnyaka. Ngatalwa nga-1922, umnaketfu Paul watalwa ngemuva kweminyaka lemibili. Grace umkami, watalwa nga-1930. Batali bakhe boRoy naRuth Howell, bakhula baBafundzi beliBhayibheli, futsi batali bakhe nabo bebaBafundzi beliBhayibheli futsi babangani beMzalwane Charles Taze Russell.

Ngahlangana naGrace nga-1947, sashada nga-July 16, 1949. Nasisengakashadi, sacoca kabanti ngelikusasa letfu. Senta sincumo sekutsi sitawenta umsebenti wasikhatsi sonkhe futsi singabi nebantfwana. Nga-October 1, 1950, sacala kuba ngemahlahlandlela sobabili. Nga-1952, sacela kutsi sente umsebenti wekujikeleta.

KUJIKELETA NEKUCECESHWA KWASEGILEYADI

Sobabili sabona kutsi sidzinga lusito lolukhulu kute sikhone kufeza lesabelo setfu lesisha. Njengobe ngangifundza kubazalwane labanalokuhlangenwe nako, ngafunela naGrace lusito. Ngakhuluma na-Marvin Holien lobekangumngani wasekhaya, futsi angumbonisi wesifundza lonalokuhlangenwe nako, ngatsi: “Grace usemncane futsi ute lokuhlangenwe nako. Ukhona yini longangitfolela yena kutsi asebente naye kwesikhashane kute amceceshe?” Waphendvula watsi: “Yebo ukhona. Longamsita kakhulu ngu-Edna Winkle lohle aba lihlahlandlela.” Ngekuhamba kwesikhatsi nakakhuluma nga-Edna, Grace watsi: “Ungente ngakhululeka nangishumayela ngisemnyango. Bekayati indlela yekuhlangabetana nesimo nangabe kukhona lophikisako futsi wangifundzisa kumlalela umuntfu lengicoca naye kute ngimphendvule ngendlela lefanele. Bekanguloku lebengikudzinga.”

Mine naGrace sahambela tifundza letimbili e-Iowa lokufaka ekhatsi netincenye letitsite e-Minnesota nase-South Dakota. Ngemuva kwaloko sabelwa eSifundzeni 1 saseNew York, lesihlanganisa emadolobhana iBrooklyn neQueens. Ngeke size sikhohlwe kutsi besiva shengatsi akusifaneli kwenta lesabelo. Sifundza lesihlanganisa libandla laseBrooklyn Heights lebelihlanganyela eHholweni leMbuso laseBethel futsi belinemalunga lamanyenti emndeni waseBethel lanalokuhlangenwe nako. Nangicedza kwetfula inkhulumo yekucala kulelobandla, uMzalwane Nathan Knorr weta kimi watsi: “Malcolm, usinikete siyalo lokufanele sisebentele kuso. Wente kahle, besisidzinga. Ungakhohlwa kutsi nawungeke usisite ngekusiniketa siyalo ngemusa, utawube awusilo lusito enhlanganweni. Chubeka nalomsebenti lomuhle.” Nakuphuma sifundvo, ngacocela Grace ngaloko. Ngekuhamba kwesikhatsi sakhuphuka titebhisi saya ekamelweni letfu lebesilungiselelwe lona eBethel kuleloviki. Besidziniwe ngenca yekucindzeteleka futsi sakhala.

Ngemuva kwetinyanga letimbalwa satfola incwadzi lebeyisitjela ngekutsi simenyelwe kuyewungenela likilasi lesi-24 eSikolweni saseGileyadi lebesitawuphotfula kuso nga-February 1955. Ngaphambi kwekuya kulesikolwa satjelwa kutsi kuceceshwa lebesitakutfola bekungasiko kwekusilungiselela kutsi sibe titfunywa telivangeli kodvwa bekutasisita kute sitfutfukise emakhono etfu emsebentini wekujikeleta. Bekumnandzi kungenela lesikolwa kodvwa kwasifundzisa kutfobeka.

Nasicedza kulesikolwa, ngabelwa kutsi ngibe ngumbonisi wesigodzi. Tigodzi lebesitihambela betifaka ekhatsi sifundza lesibitwa ngekutsi yi-Indiana, Michigan, ne-Ohio. Samangala nga-December 1955 nasitfola incwadzi lebesiyibhalelwe ngumMzalwane Knorr lebeyitsi: “Ngicela ningitjele liciniso futsi netsembeke. Nanitsi nifuna kuta eBethel nihlale khona sikhatsi lesidze . . . nome naninesifiso sekuyofeza sabelo kulelinye live ngemuva kwekuba seBethel sikhashana, ngicela ningitjele. Nangabe nibona kutsi kukahle kuchubeka nijikeleta esigodzini nasesifundzeni, ngicela ningitjele.” Samphendvula satsi singakujabulela kwenta nome ngusiphi sabelo lesiniketwe sona. Ngekushesha ngemuva kwaloko, sabitwa eBethel.

IMINYAKA LEJABULISAKO EBETHEL

Iminyaka lengayicitsa emsebentini waseBethel ngijabulile beyifaka ekhatsi kubeka tinkhulumo nekufundzisa cishe kulo lonkhe laseMelika. Ngaba nencenye ekucecesheni nasekufundziseni emadvodza lamanyenti lasemasha lokwatsi ngekuhamba kwesikhatsi enta imisebenti lebalulekile enhlanganweni yaJehova. Ngekuhamba kwesikhatsi ngaba ngumabhalane ehhovisini leMzalwane Knorr lebelihlela umsebenti wekushumayela emhlabeni wonkhe.

Ngitfole kutsi iminyaka lengayicitsa ehhovisini lokutsiwa yi-Service Department, ngayijabulela kakhulu. Lapho bengisebenta na-T. J. (Bud) Sullivan. Besekusikhatsi lesidze angumbonisi walelihhovisi. Kodvwa bebakhona labanye lengafundza lokunyenti kubo. Fred Rusk, lowabelwa kutsi angiceceshe bekangulomunye wabo. Ngikhumbula ngimbuta kutsi: “Fred, wentiwa yini kutsi uhlale wenta lushintjo lolunyenti kuletinye tincwadzi lengitibhalako?” Wahleka wase ukhuluma nakha emavi langenta ngacabanga, watsi: “Malcolm, nawusho intfo letsite ngemlomo ingachazwa ngemagama lamanyenti kodvwa nawuyibhala phansi, ikakhulukati nayisuka kulelihhovisi, kufanele ibe nengcodvo futsi inembe.” Ngemusa wase utsi: “Bani nesibindzi, wenta kahle kakhulu futsi ngekuhamba kwesikhatsi utawetayela.”

Kuleminyaka lebengiseBethel ngayo, Grace watfola tabelo letehlukahlukene letifaka ekhatsi umsebenti wekuhlanta tindlu tekuhlala nekutinakekela. Bekawujabulela loyo msebenti. Kuze kube ngulamuhla ngaletinye tikhatsi nasibona labanye bebazalwane labebasebancane eBethel ngaleyo minyaka, ngekumomotseka batjela Grace kutsi: “Wangifundzisa kugceba umbhedze futsi make wami wakujabulela loko lowakwenta.” Grace waphindze wajabulela kusebenta ehhovisini laMagazini, Lekubhala Nekutfumela Tincwadzi neleKutsebula. Kwenta letabelo letehlukahlukene kwamsita kutsi akujabulele kwenta nome ngusiphi sabelo nome ngabe ngukuphi enhlanganweni yaJehova, kusibusiso. Kuze kube ngulamuhla, solo utiva ngaleyo ndlela.

LUSHINTJO LESILWENTILE

Emkhatsini wabo-1970 sacala kubona kutsi batali betfu lasebakhulile badzinga kunakekelwa. Bekufanele sitsatse sincumo lesimatima. Besingafuni kuphuma eBethel nekushiya tinceku lesikanye nato ekukhonteni Jehova lebesititsandza kakhulu. Nome kunjalo, ngabona kutsi kungumtfwalo wami kunakekela batali betfu. Ngako-ke, ngekuhamba kwesikhatsi sahamba eBethel kodvwa besinelitsemba lekutsi singase sibuye nasesishintjile simo.

Kute sitisekele ngetimali, ngasebenta kulenye inkampani yemshuwalensi. Ngeke ngikukhohlwe loko lomunye menenja langitjela kona ngalesikhatsi angicecesha. Watsi: “Kulomsebenti kuyiwa kubantfu kusihlwa. Ungakhona kubona bantfu ngaleso sikhatsi. Kute lokubaluleke kakhulu kwendlula kuya kubo njalo kusihlwa ngetindzaba temsebenti.” Ngamphendvula ngatsi: “Ngiyati kutsi ukhuluma ngentfo losewunesikhatsi uyenta futsi ngiyakuhlonipha loko kodvwa nginemtfwalo lotsintsa buhlobo bami naNkulunkulu lengingakase ngiyekele kuwenta futsi angifuni kucala nyalo. Ngitawuya kubantfu kusihlwa kodvwa ngaLesibili nangaLesine kusihlwa kufanele ngiye emihlanganweni lebalulekile.” Jehova wangibusisa kakhulu ngekutsi ngingaphutselwa yimihlangano ngenca yemsebenti wekutiphilisa.

Besinamake ngalesikhatsi ashonela ekhaya lelinakekela lasebakhulile nga-July 1987. Nesi weta kuGrace watsi: “Allen, buyela ekhaya uyewuphumula. Wonkhe umuntfu uyati kutsi bewumnakekela maketala wakho ngaso sonkhe sikhatsi kulendzawo. Bani nekuthula kwengcondvo utihloniphe.”

Nga-December 1987, saphindze safaka ticelo taseBethel, indzawo lebesiyitsandza. Kodvwa emalangeni lambalwa ngemuva kwaloko, kwatfolakala kutsi Grace unemdlavuza ematfunjini. Ngemuva kwekuhlindvwa walulama, kwatsiwa sewute umdlavuza. Ngaleso sikhatsi satfola incwadzi levela eBethel lebeyincoma kutsi sichubeke nemsebenti wetfu ebandleni. Besitimisele kuchubeka nemsebenti wetfu weMbuso.

Ngekuhamba kwesikhatsi, ngatfola umsebenti eTexas. Sabona kutsi lendzawo ikahle ngobe ifutfumele, futsi iyasilungela. Lapha eTexas sekwendlule iminyaka lengu-25 sinebazalwane nabodzadze labasinakekelako futsi sesisondzelene kakhulu nabo.

TIFUNDVO LESITITFOLILE

Grace wake waba nemdlavuza wematfumbu newemphimbo futsi usandza kuba nemdlavuza wemabele. Nome kunjalo, akakaze akhonone ngemphilo yakhe lebutsakatsaka. Ngaso sonkhe sikhatsi ubambisana nami futsi uyangihlonipha njengobe ngiyinhloko yemndeni. Bantfu bavame kumbuta batsi: “Yini lenisitako kutsi niphumelele nendvodza yakho futsi nijabule?” Ubatjela tintfo letine, utsi: “Singematse nelulwimi. Sicoca onkhe emalanga. Siyatsandza kucitsa sikhatsi ndzawonye. Akwenteki silale sitfukutselelene.” Kuliciniso kutsi, ngaletinye tikhatsi sinyatselana emakhona kodvwa siyatsetselelana sikhohlwe, futsi loko kuyasisebentela.

Kuto tonkhe tilingo letike tasehlela, kunetifundvo letinyenti letinhle lesititfolile:

1.  Ngaso sonkhe sikhatsi yetsembela kuJehova futsi ukwemukele loko lavumela kutsi kwenteke. Ungeyami ekuhlakanipheni kwakho.—Taga 3:5, 6; Jer. 17:7.

2.  Yetsembela eVini laJehova kute utfole sicondziso nome ngabe ubhekene nani. Kuhlonipha Jehova nemitsetfo yakhe kubaluleke kakhulu. Ngeke ukwente kokubili sikhatsi sinye—kungaba kutsi uyalalela nome awulaleli.—Rom. 6:16; Heb. 4:12.

3.  Kunentfo lebaluleke kakhulu ekuphileni—kuba neligama lelihle naJehova. Loko Jehova lakufunako akute kucala ekuphileni kwakho, hhayi umcebo.—Taga 28:20; Shu. 7:1; Mat. 6:33, 34.

4.  Thantaza kute usebente ngekutimisela futsi uphumelele emsebentini waJehova. Yenta lokusemandleni akho, ungakwenti longeke ukukhone.—Mat. 22:37; 2 Thim. 4:2.

5.  Hlale wati kutsi kute lenye inhlangano letfola sibusiso futsi letsandvwa nguJehova.—Joh. 6:68.

Ngamunye wetfu ukhonte Jehova iminyaka lengetulu kwa-75 futsi ngemuva kwekushada simkhonte iminyaka lecishe ibe ngu-65. Sikujabulele kakhulu kukhonta Jehova sidzawonye kuyo yonkhe leminyaka. Siyafisa futsi sithantazela kutsi shengatsi bonkhe bazalwane nabodzadze wetfu bangatibonela kutsi kumnandzi kangakanani kuphila nawetsembela kuJehova.