Imibuto YeliBhayibheli Iyaphendvulwa
Bobani labatawuya ezulwini, futsi bayokwentani?
Tigidzi tebantfu tilangatelela kuyewuphila ezulwini. Jesu watsi baphostoli bakhe labetsembekile bebatawuphila khona. Ngaphambi kwekutsi afe, wabetsembisa kubalungiselela indzawo lebebatawuhlala kuyo naBabe wakhe wasezulwini.—Fundza Johane 14:2.
Kungani bantfu basemhlabeni batawuvuselwa kuyewuphila ezulwini? Yini labatawuyenta lapho? Jesu watjela baphostoli bakhe kutsi batawuba ngemakhosi. Batawubusa umhlaba.—Fundza Lukha 22:28-30; Sembulo 5:10.
Bonkhe bantfu labalungile batawuya ezulwini yini?
Emaveni lamanyenti, bambalwa bantfu lababusako. Njengobe Jesu avusa bantfu kutsi bayophila ezulwini kuze babuse umhlaba, singalindzela kutsi labo labakhetsiwe bambalwa. (Lukha 12:32) LiBhayibheli lisho ngalokucondzile kutsi bangakhi labatawubusa naJesu.—Fundza Sembulo 14:1.
Jesu ubalungiselele indzawo ezulwini labanye kubalandzeli bakhe. Uyati kutsi yini labatawuyenta khona?
Labo labaya ezulwini akusibo bodvwa labatawutfola tibusiso. Bantfu labetsembekile lababuswa nguMbuso waJesu, batawutfola kuphila lokuphakadze epharadisi lasemhlabeni lelibuyiselwe. (Johane 3:16) Labanye kubo batawungena ePharadisi ngemuva kwekusindza ekubhujisweni kwalelive lelibi. Labanye bona batawungena kulo ngemuva kwekuvuswa ekufeni.—Fundza Tihlabelelo 37:29; Johane 5:28, 29.