Kungani Kufanele Sibe Ngcwele?

1. Incwadzi yaLevithikhusi ingasisita njani?

ENCWADZINI yaLevithikhusi, kukhulunywa ngekuba ngcwele tikhatsi letinyenti kwendlula nobe nguyiphi lenye incwadzi yeliBhayibheli. Njengobe kuba ngcwele kubalulekile kuto tonkhe tikhonti taJehova leticotfo, kucondza incwadzi yaLevithikhusi nekuyitsatsa njengalebalulekile kutasisita kutsi sibe ngcwele.

2. Ngutiphi letinye tintfo letisencwadzini yaLevithikhusi?

² Incwadzi yaLevithikhusi leyabhalwa ngumphrofethi Mosi, iyincenye yayo “yonkhe imiBhalo” lelusito ekufundziseni. (2 Thim. 3:16) Libito laJehova livela tikhatsi leticishe tibe lishumi esehlukweni ngasinye salencwadzi. Kucondza incwadzi yaLevithikhusi kutasicinisa kute sikhone kubalekela kwenta nome yini lengahlambalata libito laNkulunkulu. (Lev. 22:32) Kusetjentiswa kanyenti kwemavi latsi “nginguSimakadze [Jehova]” kulencwadzi, kufanele kusikhumbute kutsi silalele Nkulunkulu. Kulesihloko nakuleso lesilandzelako, sitawutfola tifundvo letibalulekile letisencwadzini yaLevithikhusi, lesipho lesivela kuNkulunkulu lesisisita kutsi sibe ngcwele nasimkhonta.

KUFANELE SIBE NGCWELE

3, 4. Kugeza kwa-Aroni nemadvodzana akhe bekumelelani? (Buka sitfombe lesisekucaleni kwalesihloko.)

³ Fundza Levithikhusi 8:5, 6. Jehova wakhetsa Aroni kutsi abe ngumphristi lophakeme ka-Israyeli, futsi emadvodzana akhe abetawuba baphristi balesive. Aroni umelela Jesu Khristu, kantsi emadvodzana akhe amelela balandzeli baJesu labagcotjiwe. Ngako-ke, kugeza kwa-Aroni kumelela kuhlanjululwa kwaJesu yini? Cha, ngobe Jesu ute sono futsi ‘ute sici,’ ngako akadzingi kuhlanjululwa. (Heb. 7:26; 9:14) Nobe kunjalo, kuhlanteka kwa-Aroni kumelela kuhlanteka kwaJesu nekulunga kwakhe. Pho-ke, kwakumelelani kugeza kwemadvodzana a-Aroni?

⁴ Kugeza kwemadvodzana a-Aroni kwakumelela kuhlanjululwa kwalabo labakhetfwe kutsi babe baphristi ezulwini. Kubhajatiswa kwalabagcotjiwe bekuhlobene yini nekuhlanjululwa kwemadvodzana a-Aroni? Cha, kubhajatiswa akutisusi tono; esikhundleni saloko kuluphawu lwekutsi umuntfu utinikele kuJehova Nkulunkulu ngekungatigodli. Labagcotjiwe bagezwa ‘kusetjentiswa livi,’ futsi loku kusho kutsi kufanele basebentise timfundziso taKhristu ekuphileni kwabo ngenhlitiyo yonkhe. (Ef. 5:25-27) Ngaleyondlela bayangcweliswa futsi bahlanjululwe. Kutsiwani-ke ‘ngaletinye timvu’?​—Joh. 10:16.

5. Kungani singase sitsi letinye timvu tihlanjululwa ngeliVi laNkulunkulu?

⁵ Emadvodzana a-Aroni abengameleli “sicumbi lesikhulu” saletinye timvu taJesu. (Semb. 7:9) Ngako-ke, labo lababhajatisiwe nabo bayangcweliswa yini futsi bahlanjululwe ngeliVi laNkulunkulu? Yebo! Ngesikhatsi labo labanelitsemba lekuphila emhlabeni bafundza loko liBhayibheli lelikushoko ngekubaluleka kwengati yaJesu leyacitseka kanye netinzuzo tayo, baba nekukholwa kuloko labakufundzako futsi bente “umsebenti longcwele busuku nemini.” (Semb. 7:13-15) Umphumela wekuhlanjululwa lokuchubekako kwalabagcotjiwe naletinye timvu ubonakala endleleni ‘labagcina ngayo kutiphatsa lokuhle.’ (1 Phet. 2:12) Asingabati kutsi Jehova ujabula kakhulu nakabona kuhlanteka kanye nebunye balabo labagcotjiwe naletinye timvu, labalalela Jesu uMelusi wabo futsi bamlandzele ngekwetsembeka.

6. Ngukuphi kutihlola lokungasizuzisa?

⁶ Umyalo wekutsi baphristi baka-Israyeli bahlale bahlantekile emtimbeni, ubaluleke kakhulu kubantfu baJehova lamuhla. Labo lesibafundzela liBhayibheli bavame kunaka kutsi tindzawo tetfu tekukhonta Nkulunkulu tihlantekile kanye nendlela natsi lesihlanteke ngayo nalesigcoka kahle ngayo. Nobe kunjalo, kuhlanteka kwebaphristi kusisita sibone kutsi nobe ngubani lowenyukela entsabeni yekukhonta Jehova kufanele ‘abenenhlitiyo lengenacala.’ (Fundza Tihlabelelo 24:3, 4; Isa. 2:2, 3.) Umsebenti longcwele lesiwentela Nkulunkulu kufanele siwente ngetingcondvo netinhlitiyo letihlantekile, futsi sihlanteke nasemtimbeni. Loku kudzinga kutsi sihlale sitihlola, futsi ngemuva kwaloko labanye kungadzingeka bente lushintjo lolukhulu kute babe ngcwele. (2 Khor. 13:5) Nasi sibonelo, umuntfu lobhajatisiwe lotibukela ngemabomu titfombe letikhombisa kungcola kufanele atibute: ‘Ngiyakhombisa yini kutsi ngingcwele?’ Ngemuva kwaloko kudzingeka afune lusito kute ayekele lomkhuba lomubi.​—Jak. 5:14.

KHOMBISA KUTSI UNGCWELE NGEKUTSI ULALELE

7. Ngekuvumelana naLevithikhusi 8:22-24, ngusiphi sibonelo Jesu lasibeka?

⁷ Ngesikhatsi kucaliswa buphristi baka-Israyeli, ingati yesihhanca yabhocwa endlebeni yangasekudla, esitfupheni nakubhozo wa-Aroni umPhristi Lophakeme kanye nemadvodzana akhe. (Fundza Levithikhusi 8:22-24.) Lokusetjentiswa kwengati bekusho kutsi labaphristi bebatawulalela futsi bente konkhe lokusemandleni abo kute bente imisebenti labaphatsiswe yona. Ngendlela lefanako, Jesu umPhristi Lophakeme wababekela sibonelo lesihle labagcotjiwe naletinye timvu. Tindlebe takhe betihlale tilalela sicondziso saNkulunkulu. Tandla takhe bekatisebentisela kwenta intsandvo yaJehova, netinyawo takhe betingaphambuki endleleni yekuphila lengcwele.​—Joh. 4:31-34.

8. Yini lokufanele tonkhe tikhonti taJehova tiyente?

⁸ EmaKhristu lagcotjiwe naletinye timvu taJesu kufanele balingise umPhristi wabo Lophakeme lowagcina bucotfo. Tonkhe tikhonti taJehova kufanele tilalele ticondziso letiseVini lakhe, ngaleyondlela tibalekele kudzabukisa umoya wakhe. (Ef. 4:30) Kufanele ‘ticondzise tindlela tetinyawo tato.’​—Heb. 12:13.

9. Yini leyashiwo bazalwane labatsatfu labasebenta nemalunga eSigungu Lesibusako, futsi emavi abo angakusita njani kutsi uchubeke ukhombisa kutsi ungcwele?

⁹ Cabanga ngemavi lasuka enhlitiyweni lashiwo bazalwane labatsatfu labanelitsemba lekuphila emhlabeni nalesekuphele emashumi eminyaka basebenta nemalunga eSigungu Lesibusako. Lomunye watsi: “Ngisho nobe leli kulilungelo lelingakavami, ngaletinye tikhatsi kusebenta nalabazalwane kuveta kutsi nanobe bagcotjwe ngemoya kodvwa banesono. Kepha umgomo lebengisolo ngitibekele wona kuyo yonkhe leminyaka kulalela labo labaholako.” Umzalwane wesibili watsi: “ImiBhalo lenjenga-2 Khorinte 10:5 lemayelana ‘nekulalela Khristu,’ ingisitile kutsi ngibalalele labo labaholako futsi ngibambisane nabo. Loku kusho kubalalela ngalokusuka enhlitiyweni.” Umzalwane wesitsatfu watsi: “Kutsandza loko Jehova lakutsandzako nekutondza loko lakutondzako kanye nekuhlale ufuna sicondziso sakhe futsi wente loko lokumjabulisako, kusho kulalela inhlangano yakhe nalabo labasebentisako ekuphumeleliseni injongo yakhe ngemhlaba.” Lomzalwane abevile kutsi Nathan Knorr, lowaba lilunga leSigungu Lesibusako, wawemukela kahle emaphuzu lebekasesihlokweni lesitsi “Kutalwa Kwesive” ku-Watch Tower ya-1925, nanobe labanye bebawangabata. Indlela Nathan Knorr lalalela ngayo yamtsintsa kakhulu lomzalwane. Kuzindla ngaloko lokwashiwo ngulabazalwane labatsatfu lesisandza kukhuluma ngabo, kungakusita ukhombise kutsi ungcwele ngekutsi ulalele.

KUKHOMBISA KUTSI UNGCWELE NGEKULALELA UMYALO WANKULUNKULU NGENGATI

10. Kubaluleke kangakanani kutsi silalele umyalo waNkulunkulu lomayelana nengati?

¹⁰ Fundza Levithikhusi 17:10. Jehova wayala ema-Israyeli kutsi angayidli “ingati.” EmaKhristu nawo alindzeleke kutsi ayibalekele ingati—kungaba yesilwane nobe yemuntfu. (Imis. 15:28, 29) Asifisi nakancane kutsi Nkulunkulu ‘amelane natsi’ futsi asicoshe ebandleni lakhe. Siyamtsandza futsi sifuna kumlalela. Ngisho nobe sibhekene nesimo lesibeka kuphila kwetfu engotini, sitimisele kutsi singancotjwa kulalela bantfu labangamati Jehova nalabangenandzaba nekumlalela. Siyati kutsi sitawuhlekwa bulima ngenca yekungayisebentisi ingati, kodvwa sikhetsa kulalela Nkulunkulu. (Juda 17, 18) Ngusiphi simo sengcondvo lesingasicinisa kute sihlale ‘sicaphele’ kutsi singayidli ingati nobe sivume kumpontjelwa yona?​—Dut. 12:23.

11. Kungani singase sitsi Lilanga Lekubuyisana laminyaka yonkhe belingasiwo nje umsimeto longakabaluleki?

¹¹ Kusetjentiswa kwengati yesilwane lokwakwentiwa ngumphristi lophakeme ka-Israyeli wasendvulo ngeLilanga Lekubuyisana laminyaka yonkhe, kusisita kutsi siwucondze umbono waNkulunkulu ngengati. Ingati beyisetjentiselwa kwenta umsebenti lobalulekile. Beyisetjentiselwa kuletsa inhlawulo yetono talabo labafuna intsetselelo yaJehova. Ingati yenkunzi neyembuti bekufanele ifafatwe ngasesimbonyweni selibhokisi lesivumelwane nasembikwaso. (Lev. 16:14, 15, 19) Loku bekuvula indlela yekutsi Jehova atsetselele tono tema-Israyeli. Ngetulu kwaloko, Jehova watsi nangabe umuntfu abulala silwane kute asidle, bekufanele atfulule ingati yaso futsi ayigcibedzele ngemhlabatsi, ngobe “kuphila kwesilwane, nome ngusiphi, kusengatini yaso.” (Lev. 17:11-14) Konkhe loku bekumane kungumsimeto longakabaluleki yini? Cha. Kusetjentiswa kwengati ngeLilanga Lekubuyisana kanye nemyalo wekutfululela ingati emhlabatsini, kuvumelana nemyalo Jehova labewunike Nowa nesitukulwane sakhe mayelana nengati. (Gen. 9:3-6) Jehova Nkulunkulu akakuvumeli kutsi ingati isetjentiswe ngenjongo yekulondvolota kuphila. Loku kusho kutsini kumaKhristu?

12. Incwadzi Pawula layibhalela emaKhristu langemaHebheru iyihlobanisa njani ingati nekutsetselelwa kwetono?

¹² Ngesikhatsi umphostoli Pawula abhalela emaKhristu langemaHebheru mayelana nemandla ingati lenawo ekuhlambulula bantfu, wachaza watsi: “NgekweMtsetfo, cishe tonkhe tintfo tihlanjululwa ngengati, futsi nangabe ingakacitfwa ingati ayibi khona intsetselelo.” (Heb. 9:22) Pawula waphindze wachaza kutsi nanobe imihlatjelo yetilwane beyibaluleke ngelizinga lelitsite, beyimane ikhumbute ema-Israyeli kutsi atoni nekutsi adzinga lokunye lokungakhona kususa tono tawo ngalokuphelele. Ngako-ke, uMtsetfo ‘bewusitfunti setintfo letinhle lebetiseta, bewungasito letintfo lucobo lwato.’ (Heb. 10:1-4) Tono betingatsetselelwa njani?

13. Utiva njani ngekutsi Jesu wetfula linani lengati yakhe kuJehova?

¹³ Fundza Efesu 1:7. Kufa lokungumhlatjelo kwaJesu Khristu, ‘lowatinikela ngenca yetfu’ ngekutitsandzela, kubaluleke kakhulu kulabo labamtsandzako nalabatsandza uYise wakhe. (Gal. 2:20) Nobe kunjalo, loko Jesu lakwenta ngemuva kwekufa nekuvuswa kwakhe ngiko lokwasikhulula mbamba, kwabangela kutsi tono tetfu titsetselelwe. Jesu wagcwalisa loko lobekwentiwa ngeLilanga Lekubuyisana ngephansi kweMtsetfo waMosi. Ngalelo langa, umphristi lophakeme abetsatsa lenye ingati yetilwane latente umhlatjelo angene nayo eNgcwelengcwele yelithende lekuhlangana, ngemuva kwaloko aye nayo ethempelini laSolomoni, bese uyetfula embikwaNkulunkulu kube shengatsi uyambona. (Lev. 16:11-15) Ngendlela lefanako, Jesu wangena ezulwini lucobo nelinani lengati yakhe futsi waletfula kuJehova. (Heb. 9:6, 7, 11-14, 24-28) Sijabula kakhulu ngekutsi tono tetfu tiyatsetselelwa nangekutsi bonembeza betfu bahlanjululiwe ngenca yekutsi sinekukholwa engatini yaJesu.

14, 15. Kungani kubalulekile kucondza nekulalela umyalo waJehova lomayelana nengati?

¹⁴ Nyalo sewuyacondza yini kutsi kungani Jehova asiyala kutsi singadli nobe nguluphi luhlobo ‘lwengati’? (Lev. 17:10) Uyabona yini kutsi kungani Nkulunkulu atsatsa ingati njengentfo lengcwele? Kuye, ingati iyafanana nekuphila. (Gen. 9:4) Uyavuma yini kutsi kufanele sibe nembono lofanana newaNkulunkulu ngengati futsi silalele umyalo wakhe wekutsi singayisebentisi? Lokukuphela kwendlela lesingakha ngayo kuthula naNkulunkulu kutsi sibe nekukholwa emhlatjelweni waJesu loyinhlawulo, futsi sikhumbule kutsi ingati ibaluleke kakhulu kuMdali wetfu.​—Khol. 1:19, 20.

¹⁵ Ngamunye wetfu angatitfola abhekene nesimo lesitsintsa ingati angakalindzeli. Kungenteka lilunga lemndeni nobe umngani wetfu losedvute atitfole asesimeni lesidzinga ancume kutsi utakwemukela yini kumpontjelwa ingati nobe cha. Esimeni lesinjalo, kuphindze kudzingeke kutsi kwentiwe tincumo mayelana nekusetjentiswa kwetincenyana tengati kanye netindlela tekwelashwa. Ngako-ke, kubaluleke kakhulu kucwaninga nekulungela simo lesiphutfumako lesingavela. Kwenta loku kanye nekuthantaza kutasisita kutsi sihlale sicinile futsi sibalekele kwephula timiso taNkulunkulu kulendzaba. Asifuni kujabhisa inhlitiyo yaJehova ngekutsi semukele tintfo letilahlwa liVi lakhe! Bantfu labanyenti betemphilo nalabo labakhutsata kumpontjelwa kwengati, batjela bantfu kutsi banikele ngengati kuze basindzise kuphila kwalabanye. Nobe kunjalo, bantfu baJehova labangcwele bayati kutsi uMdali nguye lonelilungelo lekusho kutsi ingati kufanele isetjentiswe njani. Kuye, “ingati” ingcwele. Kufanele sitimisele kulalela umyalo wakhe lomayelana nengati. Ngekutiphatsa kwetfu lokungcwele, sikhombisa kutsi sijabula kakhulu ngemandla ekusindzisa kuphila ingati yaJesu lenawo​—lokukuphela kwengati leyenta kutsi tono tetfu titsetselelwe futsi sitfole kuphila lokuphakadze.​—Joh. 3:16.

KUNGANI JEHOVA ALINDZELE KUTSI SIBE NGCWELE?

16. Kungani kufanele bantfu baJehova babe ngcwele?

¹⁶ Ngesikhatsi Nkulunkulu akhulula ema-Israyeli ebugcilini baseGibhithe, watsi kuwo: “NginguSimakadze [Jehova] lowanikhipha eGibhithe kutsi ngitewuba nguNkulunkulu wenu; ngako-ke banini ngcwele njengobe nami ngingcwele.” (Lev. 11:45) Ema-Israyeli bekulindzeleke kutsi abe ngcwele ngobe Jehova ungcwele. Njengobe siBoFakazi BaJehova, natsi kufanele sibe ngcwele. Incwadzi yaLevithikhusi ikuveta ngalokucacile loko.

17. Utiva njani nyalo ngencwadzi yaLevithikhusi?

¹⁷ Kuhlolisisa tincenye letitsite tencwadzi yaLevithikhusi kusizuzise kakhulu. Kungenteka kutsi loku kukwente wayitsandza kakhulu lencwadzi lephefumulelwe leseBhayibhelini. Akungabateki kutsi kuzindla ngekwatiswa lokuligugu lokutfolakala encwadzini yaLevithikhusi, kukwente waticondza kakhulu tizatfu letenta kutsi sibe ngcwele. Nobe kunjalo, ngutiphi letinye tifundvo letibalulekile lesitatitfola kulencwadzi leseVini laNkulunkulu leliphefumulelwe? Yini lenye lesingayifundza kuyo mayelana nekwentela Jehova umsebenti longcwele? Nguloko lesitawucoca ngako esihlokweni lesilandzelako.