SIHLOKO LESINGUMGOGODLA | UNGASONDZELANA NANKULUNKULU
Uyalati Yini Libito LaNkulunkulu Futsi Uyalisebentisa Yini Vele?
Unaye yini umngani lomkhulu kodvwa longalati libito lakhe? Kufanele kutsi ute. Lomunye make waseBulgaria lokutsiwa ngu-Irina washo kufanele nakatsi: “Ngeke kwenteke kutsi usondzelane naNkulunkulu kodvwa ube ungalati libito lakhe.” Kuyajabulisa kwati kutsi Nkulunkulu ufuna usondzele kuye, njengobe kushiwo esihlokweni lesisuka kuso. Ngako-ke, asebentisa liBhayibheli, Nkulunkulu utetfulile kuwe, watsi: “NginguJehova. Lelo libito lami.”—Isaya 42:8, NW.
Asebentisa liBhayibheli, Nkulunkulu utetfulile kuwe, watsi: “NginguJehova. Lelo libito lami.”—Isaya 42:8, NW.
Unendzaba yini vele Jehova nekutsi uyalati futsi uyalisebentisa yini libito lakhe? Ase ucabange nganaku: EmiBhalweni yekucala yesiHebheru, libito laNkulunkulu livela tikhatsi letingaba ngu-7 000, libhalwe ngetinhlavu letine tesiHebheru letatiwa ngekutsi yi-Tetragrammaton. Lelibito livela tikhatsi letinyenti kakhulu kunanome nguliphi lelinye libito lokukhulunywa ngalo eBhayibhelini. Kuyacaca-ke kutsi lobu bufakazi bekutsi Jehova ufuna silati libito lakhe futsi silisebentise.a
Ngalokuvamile bungani bucala ngekutsi bantfu lababili batane emagama abo. Uyalati yini libito laNkulunkulu?
Kodvwa-ke labanye bangase bacabange kutsi njengobe Nkulunkulu angcwele futsi anguSomandla, kutawube kukungamhloniphi kusebentisa libito lakhe. Kuliciniso kutsi kubi kusebentisa libito laNkulunkulu ngendlela lengakafaneli, njengobe nje ungeke ulisebentise kabi libito lemngani wakho lomkhulu. Kodvwa-ke, kuyintsandvo yaJehova kutsi labo labamtsandzako balihloniphe libito lakhe futsi balente latiwe. (Tihlabelelo 69:30, 31; 96:2, 8) Khumbula kutsi Jesu wafundzisa balandzeli bakhe kutsi bathantaze batsi: “Babe wetfu losezulwini, alingcweliswe libito lakho.” Natsi singaba nesandla ekungcwelisweni kwelibito laNkulunkulu, ngekutsi silente latiwe. Kwenta kanjalo kusenta sisondzele kuye.—Matewu 6:9.
LiBhayibheli liveta kutsi Nkulunkulu ubanaka kakhulu “labo labacabanga ngelibito lakhe” nobe labalitsandzako. (Malakhi 3:16, NW) Mayelana nemuntfu lonjalo, naku Jehova lakutsembisako: “Ngitamephula ngimbeke endzaweni lephakeme, ngimvikele ngobe alati libito lami. Uyawungibita ngiphendvule ngibe naye ekuhluphekeni.” (Tihlabelelo 91:14, 15) Kwati libito laJehova futsi silisebentise kubalulekile nangabe sifuna kusondzelana naye.
a Kuyadzabukisa kutsi emahumusho lamanyenti eliBhayibheli ete libito laNkulunkulu, ngisho nome livela tikhatsi letinyenti kangaka emiBhalweni YesiHebheru leyatiwa kakhulu ngekutsi LiThestamente Lelidzala. Kunaloko, afake ticu, letinjengaletitsi “Nkhosi” nobe “Nkulunkulu.” Kute utfole kwatiswa lokubanti ngalendzaba, fundza emakhasi 195-197 encwadzi letsi Lifundzisani Mbambambamba LiBhayibheli? leshicilelwa BoFakazi BaJehova.