Lungaba Khona Yini Lutsandvo Lolungapheli?

1, 2. Bobani labangasitakala ngekuhlolisisa incwadzi Yengoma Yetingoma, futsi ngani? (Buka sitfombe lesisekucaleni kwalesihloko.)

‘BOMAKOTI nemkhwenyane babukana kamnandzi futsi babambene tandla! Wonkhe umuntfu uyatibonela nje kutsi batsandzana mbamba!’ Lena yimicabango lefika engcondvweni yalomdzala welibandla losandza kubashadisa. Njengobe laba labasandza kushada bajayiva kamnandzi edzilini lemshado, lolomdzala uyatibuta: ‘Umshado wabo utawuchubeka ucinile yini? Njengobe iminyaka ihamba, lutsandvo lwabo lutawukhula yini nobe lutawuvele luphele?’ Kujabulisa kakhulu nangabe lutsandvo emkhatsini walomdvuna nalomsikati lungashintjashintji futsi lungapheli. Kodvwa njengobe imishado leminyenti ibhidlika, kunengcondvo kutibuta kutsi lutsandvo lolungapheli lungaba khona mbamba yini.

² Lutsandvo lweliciniso beseluyindlala ngisho nangesikhatsi seNkhosi Solomoni yaka-Israyeli. Nakakhuluma ngekutiphatsa kwebantfu ngesikhatsi sakhe, Solomoni wabhala watsi: “Ngatfola indvodza yinye lecondzile kulayinkhulungwane, kodvwa kwabate ngisho namunye umfati locondzile kubo bonkhe. Naku kuphela lengikutfolile: kutsi Nkulunkulu wadala umuntfu, wamenta waba ngulocondzile, kodvwa bantfu besuka bayawufuna emachinga abo lamanyenti.” (Shu. 7:26-29) Ngesizatfu sekuyengwa bafati baletinye tive lebebakhonta Bhali, timiso tekutiphatsa tebantfu bangesikhatsi saSolomoni besetehle kakhulu kangangekutsi bekumatima kutfola indvodza nobe umfati lotiphetse kahle.a Nanobe kunjalo, inkhondlo layibhala eminyakeni lengu-20 ngaphambi kwaloko, lebitwa ngekutsi Yingoma Yetingoma, iveta kutsi lutsandvo lolungapheli lungaba khona emkhatsini walomdvuna nalomsikati. Iphindze ivete kahle kutsi lunjani lolotsandvo nekutsi lungakhonjiswa njani. Ngekuhlolisisa lencwadzi leseBhayibhelini, tikhonti taJehova letishadile naletingakashadi tingafundza lokunyenti ngelutsandvo lolungapheli.

LUNGABA KHONA LUTSANDVO LWELICINISO!

3. Sisho ngani kutsi lutsandvo lweliciniso lungaba khona emkhatsini walomdvuna nalomsikati?

³ Fundza Ingoma Yetingoma 8:6. Emavi latsi ‘lilangabi lelinemandla [laJehova]’ lachaza lutsandvo, asitjela lokunyenti. Lutsandvo lweliciniso ‘lulilangabi lelinemandla [laJehova]’ ngobe luvela kuye. Wadala umuntfu ngemfanekiso wakhe, wamenta kutsi akhone kutsandza. (Gen. 1:26, 27) Ngesikhatsi Nkulunkulu amikisa Eva umfati wekucala ku-Adamu indvodza yekucala, Adamu wajabula kakhulu waze washo emavi lasankhondlo. Akungabateki kutsi Eva wativa asondzelene kakhulu na-Adamu, ngobe ‘watsatfwa’ kuye. (Gen. 2:21-23) Njengobe Jehova ente kutsi bantfu babe nelikhono lekutsandza, lutsandvo lweliciniso nalolungapheli lungaba khona emkhatsini walomdvuna nalomsikati.

4, 5. Landzisa kafishane indzaba lesencwadzini Yengoma Yetingoma.

⁴ Lutsandvo lolubakhona emkhatsini webantfu bebulili lobehlukene lusho lokungetulu kwelutsandvo loluhlala lukhona futsi lolungashintji. Loku kuvetwe kahle encwadzini Yengoma Yetingoma. Lencwadzi isitjela ngelutsandvo lobelukhona emkhatsini wentfombi yaseShunemu nobe eShulemu, kanye nemelusi lebeyitsandzana naye. Solomoni bekamise emathende edvute netivini lebetinakekelwa ngulentfombi. Ngesizatfu sekutsi wakhangwa buhle bayo, watsi ayimikiswe enkambu yakhe. Kodvwa kusukela ekucaleni, kuvele kucace kutsi lentfombi itsandza lomelusi. Njengobe Solomoni beketama kuyenta imtsandze, yasho ngalokucacile kutsi ifuna kuba nemelusi wayo lemtsandzako. (Ngo. 1:4-14) Lomelusi waya kulenkambu futsi nababonana nalentfombi, bakhombisana lutsandvo ngekusho emavi lamnandzi kulomunye nalomunye.​—Ngo. 1:15-17.

⁵ Solomoni wabuyela eJerusalema futsi wahamba nalentfombi, kodvwa lomelusi wayilandzela. (Ngo. 4:1-5, 8, 9) Yonkhe imetamo yaSolomoni yekufuna kutsandvwa ngulentfombi yaba lite. (Ngo. 6:4-7; 7:1-10) Ekugcineni, Solomoni wayivumela kutsi ibuyele ekhaya. Ekwephetseni kwalengoma, lentfombi yaveta sifiso sayo sekutsi umelusi wayo lemtsandzako ‘abe njengemgankla,’ futsi ete kuyo masinyane.​—Ngo. 8:14.

6. Kungani kumatima kubona kutsi ngubani lokhulumako kulengoma?

⁶ Nanobe lencwadzi yaSolomoni ‘yengoma yetingoma’ ibalulekile futsi ibhalwe kamnandzi, kumatima kubona kutsi bobani labakhulumako kuyo. (Ngo. 1:1) I-“The New Interpreter’s Dictionary of the Bible” itsi: “Tintfo letifaka ekhatsi sakhiwondzaba, ingcikitsi, kukhula kwendzaba nebadlali bayo atikabaluleki kangako.” Ngako kungenteka kutsi emabito ebantfu lebebakhuluma kulendzaba akazange ashiwo kuze kungaphatamiseki bumnandzi balengoma lesankhondlo. Nobe kunjalo, emavi lakhulunywako ayasisita sibone kutsi ngubani lokhulumako futsi ukhuluma nabani.b

“LUTSANDVO LWAKHO LUMNANDZI KWENDLULA LIWAYINI”

7, 8. Ngumaphi emavi elutsandvo lebekasetjentiswa ngumelusi nentfombi yakhe? Niketa tibonelo.

⁷ Ingoma Yetingoma igcwele emavi labonisa “lutsandvo” labeshiwo ngulentfombi nalomelusi. Nanobe lamavi abevamile eMphumalanga ye-Asia eminyakeni lengaba ngu-3 000 leyengcile, angase abonakale angaketayeleki esikhatsini setfu kodvwa anenchazelo lebanti futsi imiva layivetako yetayelekile lamuhla. Nasi sibonelo: Lomelusi udvumisa emehlo lamahle alentfombi, awafanise ‘newematuba.’ (Ngo. 1:15) Lentfombi ayisho nje kutsi emehlo alomelusi afana nemehlo ematuba, kodvwa itsi angematuba lucobo lwawo. (Fundza Ingoma Yetingoma 5:12.) Kulentfombi, umbala wemehlo alomelusi bewumuhle kakhulu, ufana nematuba lageza elubisini.

⁸ Emavi ekubonisa lutsandvo lasetjentiswe kulengoma awakhulumi ngebuhle nje kuphela. Cabanga ngaloko lomelusi lakusho ngendlela lentfombi lekhuluma ngayo. (Fundza Ingoma Yetingoma 4:7, 11, NW.) Watsi tindzebe tayo ‘tintfontsa luju lwemakhekheba etinyosi.’ Kungani kunjalo? Kungobe luju lwemakhekheba lumnandzi kakhulu. “Lubisi neluju kungaphansi kwelulwimi [lwayo],” lokusho kutsi indlela lekhuluma ngayo imnandzi futsi iyatsandzeka njengeluju nelubisi. Kuyacaca-ke kutsi lomelusi abengacabangi ngebuhle balentfombi nje kuphela ngesikhatsi atsi: “Umuhle wonkhe, . . . kute nalesincane sici kuwe.”

9. (a) Lutsandvo lolusemkhatsini webantfu labashadene lufaka ekhatsi ini? (b) Kungani kubalulekile kutsi bantfu labashadene basho emavi elutsandvo kulomunye nalomunye?

⁹ Umshado awusiso nje sivumelwane lesingentiwa bantfu labangatsandzani nalabangakhatsalelani. Ecinisweni, lutsandvo lubaluleke kakhulu emshadweni wemaKhristu. Kodvwa lutsandvo lolunjani lolo? Lutsandvo lolucondziswa timiso teliBhayibheli yini? (1 Joh. 4:8) Lufaka ekhatsi lutsandvo lwemvelo loluba khona emkhatsini wemalunga emndeni yini? Lufaka ekhatsi kusondzelana lokubakhona emkhatsini webangani labakhulu yini? (Joh. 11:3) Lutsandvo lwetitsandzani yini? (Taga 5:15-20) Ecinisweni, lutsandvo lolungapheli nalolucinile loluba semkhatsini webantfu labashadene lufaka ekhatsi tonkhe letinhlobo lesetibaliwe. Ngetintfo lotishoko nalotentako, ungacinisekisa loshade naye kutsi uyamtsandza futsi loko kunganenta nijabule emshadweni wenu. Kubaluleke kakhulu kutsi bantfu labashadile bangavumeli imisebenti yamalanga onkhe ibente bangasatjelani emavi elutsandvo. Emavi lanjalo angabenta bajabule kakhulu futsi bative bavikelekile. Kulamanye emasiko, imishado iyahlelwa futsi labo labetsembisene umshado basuke bangatani kahle ngaphambi kwelilanga lemshado, ngako kuhlale basho emavi elutsandvo kulomunye nalomunye kutawenta lutsandvo lwabo lucine nemshado wabo uphumelele.

10. Emavi elutsandvo angaba namuphi umphumela emshadweni?

¹⁰ Emavi elutsandvo bantfu labashadene labatjelana wona analomunye umphumela lomuhle. INkhosi Solomoni yetsembisa kwentela lentfombatana lengumShulami “emacici egolide lahlotjiswe ngesiliva.” Wayidvumisa lentfombi watsi ‘yinhle njengenyeti, ikhanya njengelilanga.’ (Ngo. 1:9-11; 6:10) Kodvwa lentfombi beyisolo yetsembekile kumelusi wayo lemtsandzako. Yini leyayicinisa futsi yayidvudvuta ngesikhatsi ikhashane nemelusi? (Fundza Ingoma Yetingoma 1:2, 3.) Yasitwa kukhumbula emavi ‘elutsandvo’ lebeyiwatjelwa ngulomelusi. Kulentfombi, lamavi ‘abemnandzi kwendlula liwayini’ lelenta inhlitiyo ijabule, futsi libito lalomelusi laliyitfokotisa ‘njengemakha latfululwa’ enhloko. (Hla. 23:5; 104:15) Kuyacaca kutsi kukhumbula emavi elutsandvo lashiwo ngumuntfu lomtsandzako kuyalucinisa lutsandvo lwenu. Kubaluleke kakhulu kutsi ngaso sonkhe sikhatsi bantfu labashadene batjelane emavi elutsandvo.

NINGALUVUSI LUTSANDVO “LUZE LUTIVUKELE LONA”

11. EmaKhristu langakashadi angafundzani endzabeni yentfombi lengumShulami leyafungisa labanye kutsi bangetami kuvusa lutsandvo kuyo?

¹¹ Incwadzi Yengoma Yetingoma iphindze ibe netifundvo letingasita emaKhristu langakashadi, ikakhulukati lawo lafuna umuntfu latawushada naye. Lentfombi lengumShulami beyingamtsandzi Solomoni. Ngako yafungisa emadvodzakati aseJerusalema yatsi: “Ningaluvusi lutsandvo [kimi], futsi ningalunyakatisi, luze lutivukele lona.” (Ngo. 2:7; 3:5) Kungani yasho njalo? Kungobe akusikahle kwakha imiva yelutsandvo nganome ngumuphi nje umuntfu lohlangana naye. Ngako kukuhlakanipha kutsi umKhristu lofuna kushada alindze kuze kube ngulapho atfola umuntfu latamtsandza mbamba.

12. Kungani lentfombi lengumShulami beyimtsandza lomelusi?

¹² Kungani lentfombi beyimtsandza lomelusi? Kuliciniso kutsi lomelusi abelikhwa, ‘anjengemphala’; tandla takhe ticine ‘njengemigcala yegolide’; netinyawo takhe titinhle futsi ticine ‘njengetinsika letibatwe ngelitje lelimhlophe.’ Kodvwa bekangagcini ngekubukeka kahle nekuba nemandla nje kuphela. “Emkhatsini wemajaha,” lomelusi ‘abenjengesihlahla semahhabhula emkhatsini wetihlahla telihlatsi.’ Kuze lentfombi leyetsembekile kuJehova itive ngalendlela, kufanele kutsi lomelusi abenebuhlobo lobuhle naJehova.​—Ngo. 2:3, 9; 5:14, 15.

13. Kungani lomelusi abeyitsandza lentfombi?

¹³ Beyinjani lentfombi lengumShulami? Nanobe buhle bayo bakhanga inkhosi ‘lebeyinemakhosikati langu-60, nemaphovela langu-80, netintfombi letingenakubalwa,’ kodvwa yona beyititsatsa ‘njengembali yaseSharoni’​—lokuyimbali levamile. Lentfombi beyitfobeke kakhulu futsi inemoya lophansi. Akumangalisi-ke kutsi kulomelusi, beyiyintfombi lekhetsekile, ‘injengemnduze emkhatsini wemanyeva’! Beyetsembekile kuJehova.​—Ngo. 2:1, 2; 6:8.

14. Lutsandvo lokukhulunywa ngalo encwadzini Yengoma Yetingoma luwafundzisani emaKhristu lafuna kushada?

¹⁴ ImiBhalo iwakhutsata kakhulu emaKhristu kutsi ashade ‘eNkhosini kuphela.’ (1 Khor. 7:39) Umuntfu lofuna kushada uyakubalekela kutsandzana nebantfu labangakholwa futsi ufuna umuntfu latawushada naye kubantfu labatikhonti taJehova letetsembekile kuphela. Ngetulu kwaloko, kuze labashadene babe nekuthula futsi bakhonte Nkulunkulu ndzawonye, kufanele babe nekukholwa baphindze batinikele kuNkulunkulu—lokubuntfu lobubalulekile lokufanele ububuke kumuntfu lotawushada naye. Nguloko umelusi nentfombi lengumShulami labakutfola kulomunye nalomunye.

MAKOTI WAMI “UTUNGELETWE NGELUTSANGO NJENGENGADZE”

15. Intfombi lengumShulami ibabekela siphi sibonelo bantfu labangakashadi labesaba Nkulunkulu?

¹⁵ Fundza Ingoma Yetingoma 4:12. Kungani lomelusi atsi lotsandzekako wakhe “utungeletwe ngelutsango njengengadze”? Kungobe akungeni nobe ngubani engadzeni lebiyiwe. Umuntfu angangena kuphela ngelisango lelikhiywako. Lentfombi lengumShulami beyifana nalengadze ngobe lutsandvo lwayo beyilukhombisa kuphela kulomelusi lebeyetsembisene naye umshado. Ngekutsi ingavumi kulingwa yinkhosi, yakhombisa kutsi ifana ‘nelubondza,’ hhayi ‘sivalo’ lokumelula kusivula. (Ngo. 8:8-10) Ngendlela lefanako, bantfu labangakashadi labesaba Nkulunkulu bagcina lutsandvo lwabo kute balukhombise umuntfu labatawushada naye kuphela.

16. Incwadzi Yengoma Yetingoma isifundzisani mayelana nesikhatsi sekuganana?

¹⁶ Ngesikhatsi lomelusi acela lentfombi lengumShulami kutsi ihambe naye kute belule tinyawo, banakabo abazange bayivumele. Esikhundleni saloko, bayitfuma kutsi iyonakekela tivini. Kungani bangazange bavume? Bebangametsembi yini dzadzewabo? Bebacabanga kutsi ufuna kutiphatsa kabi yini? Ecinisweni bebatsatsa tinyatselo tekuvikela dzadzewabo kute angaweli esilingweni. (Ngo. 1:6; 2:10-15) Nasi sifundvo emaKhristu langakashadi lasifundzako: Ngesikhatsi sekuganana, tsatsani tinyatselo letibalulekile kute nihlale nimsulwa. Kubalekeleni kuba setindzaweni letisemasitseleni. Nanobe kukuhle kubonisana lutsandvo ngetindlela letifanele, kubalekeleni kuba setimeni letinganenta niwele esilingweni.

17, 18. Uzuze njani ngekuhlolisisa incwadzi Yengoma Yetingoma?

¹⁷ Ngalokuvamile, bantfu nabashada basuke batsandzana kakhulu. Njengobe umshado ulilungiselelo laJehova lokufanele lihlale njalo, kubalulekile kutsi bantfu labashadene bente konkhe lokusemandleni abo kuze lutsandvo lwabo luhlale luvutsa futsi lucinile.​—Mak. 10:6-9.

¹⁸ Nawufuna umuntfu lotawushada naye, usuke ufuna kutfola umuntfu lotamtsandza mbamba bese wenta lutsandvo lwenu lucine futsi luhlale luvutsa, njengobe kuvetwe encwadzini Yengoma Yetingoma. Ngisho nobe ufuna umuntfu lotawushada naye nobe sewuvele ushadile, shengatsi ungalutfola lutsandvo lweliciniso, ‘lolulilangabi lelinemandla laJehova.’​—Ngo. 8:6.