“Kuphela” Kusho Kutsini?

Nawuva emavi latsi: “Kuphela sekusedvute!” yini lefika engcondvweni yakho? Awucabangi yini ngemfundisi lowehla enyuka epulupiti ashumayela ngemdlandla locakile, aphetse liBhayibheli? Nobe ucabanga indvodza lendzala lenesilevu ime lakuhlangana khona titaladi, igcoke ingubo lendze leboshwe ngelibhande elukhalo, iphetse libhodi lelinemlayeto wenhlekelele letako? Kucabanga ngetintfo letinjalo kungase kwente labanye bantfu bakhatsateke, labanye bangase bangabate nobe bachazeke.

LiBhayibheli liyasho kutsi: “Kuphela kutawufika.” (Matewu 24:14) Lokuphela kuphindze kubitwe ngekutsi ‘lilanga lelikhulu laNkulunkulu’ nangekutsi “yi-Amagedoni.” (Sembulo 16:14, 16) Kuliciniso kutsi kunekudideka lokunyenti enkholweni mayelana nalendzaba, futsi kuphindze kube nemibono leminyenti lemangalisako naleyetfusako. Nobe kunjalo, liBhayibheli liyibeka icace indzaba lemayelana nekuphela​—liyasembulela kutsi kusho kutsini nekutsi ngutiphi tintfo letingeke tisho kuphela. LiVi laNkulunkulu liphindze lisisite sibone ngalokucacile kutsi kuphela sekusondzele yini nobe cha. Lokuhle kakhulu kutsi, lisifundzisa indlela lesingasindza ngayo! Ase sicale ngekususa imibono leliphutsa bese siniketa inchazelo. Ngekusho kweliBhayibheli, kusho kutsini vele “kuphela”?

TINTFO LETINGEKE TISHO KUPHELA

1. KUPHELA AKUSHO KUBHUJISWA LOKUKHULU KWEMHLABA NGEMLILO.

   LiBhayibheli litsi: “[Nkulunkulu] wasimisa umhlaba etikwetisekelo tawo, kuze ungatanyatanyiswa, phakadze naphakadze.” (Tihlabelelo 104:5) Lombhalo kanye naleminye iyasicinisekisa kutsi Nkulunkulu ngeke aze awubhubhise umhlaba nobe avumele kutsi ubhujiswe!​—Umshumayeli 1:4; Isaya 45:18.

2. KUPHELA AKUSIYO INTFO LETAWUMANE YENTEKE NJE INGAKAHLELWA.

   LiBhayibheli lisembulela kutsi kuphela kuhleliwe​—Nkulunkulu ubeke sikhatsi sekufika kwako. Naku lesikufundzako: “Macondzana nalelo langa neli-awa, kute lowatiko, tingilosi ezulwini atati ngisho neNdvodzana ayati, kodvwa nguBabe kuphela lowatiko. Hlalani nicaphele futsi nihlale nilindzile, ngobe anati kutsi sinini sikhatsi lesibekiwe.” (Makho 13:32, 33) Kuyacaca kutsi Nkulunkulu (‘Babe’) uhlele “sikhatsi lesibekiwe” lapho atawuletsa khona kuphela.

3. KUPHELA AKUBANGELWA BANTFU NOBE TINTFO LETIYINGOTI LETINDIZA EMOYENI.

   Yini letawuletsa kuphela? Sembulo 19:11 sitsi: “Ngabona lizulu livulekile, futsi kunelihhashi lelimhlophe. Loyo loligibele ubitwa ngekutsi nguloWetsembekile naloLiciniso.” Livesi 19 lichubeka litsi: “Ngabona silo sasendle, emakhosi emhlaba nemabutfo awo, babutsene ndzawonye kute balwe naloyo logibele lihhashi kanye nelibutfo lakhe.” (Sembulo 19:11-21) Ngisho nobe lamavesi akhuluma ngetintfo letingumfanekiso, siyakhona kucondza kutsi Nkulunkulu utawutfumela libutfo letingilosi kute abhubhise titsa takhe.

KUPHELA KUSHO KUTSINI?

1. KUPHELA KWABOHULUMENDE BEBANTFU LABEHLULEKILE KUBUSA.

   LiBhayibheli liyachaza: “Nkulunkulu welizulu uyawumisa umbuso longasoze wabhujiswa lutfo, futsi ngeke unikwe labanye bantfu. Uyawupitjita yonkhe leminye imibuso uyicedze, kodvwa wona uyawukuma kuze kube phakadze.” (Danyela 2:44) Njengobe kuvetiwe ngenhla ephuzwini 3, kutawubhujiswa “emakhosi emhlaba nemabutfo awo,” latawube ‘abutsene ndzawonye kute alwe naloyo logibele lihhashi kanye nelibutfo lakhe.’​—Sembulo 19:19.

2. KUPHELA KWETIMPHI, BUDLOVA KANYE NEKUNGALUNGI.

   “[Nkulunkulu] uvimba acedze timphi kutsi tichubeke emhlabeni wonkhe jikelele.” (Tihlabelelo 46:9) “Bantfu labacotfo labatawukwakha kulelive; ngulabetsembekile bodvwa labayawuhlala kulo. Kodvwa lababi bayawususwa eveni, nalabanemacebo bayawusishulwa kulo.” (Taga 2:21, 22) “Buka, ngenta tonkhe tintfo tibe tinsha.”​—Sembulo 21:4, 5.

3. KUPHELA KWETINKHOLO LETIJABHISE NKULUNKULU KANYE NEBANTFU.

   “Baphrofethi baphrofetha emanga, baphristi baphetse ngeligunya labo. . . . Kodvwa nitakwenta njani ekupheleni?” (Jeremiya 5:31) “Labanyenti bayawutsi kimi: ‘Nkhosi, Nkhosi, asiphrofethanga yini ngelibito lakho, sakhipha nemadimoni ngelibito lakho, saphindze senta netimangaliso letinyenti ngelibito lakho?’ Ngako ngitawutsi kubo: ‘Anginati! Sukani kimi, nine benti balokubi!’”​—Matewu 7:21-23.

4. KUPHELA KWEBANTFU LABASEKELA FUTSI BABHEBHETELE TIMO LETIKHONA EMHLABENI.

   Jesu Khristu watsi: “Nasi sisekelo sekwehlulela: Kutsi kukhanya sekufikile eveni, kodvwa bantfu batsandze bumnyama kunekukhanya, ngobe imisebenti yabo imibi.” (Johane 3:19) LiBhayibheli lichaza ngekubhujiswa lokwenteka emhlabeni wonkhe ngemalanga aNowa, indvodza leyetsembekile. “Live langaleso sikhatsi labhujiswa nalimbonywa ngemanti. Ngalona lelo livi, emazulu nemhlaba lokukhona nyalo kugcinelwe umlilo, futsi kutawugcinwa kudzimate kufike lilanga lekwehlulelwa nelekubhujiswa kwebantfu labangamesabi Nkulunkulu.”​—2 Phetro 3:5-7.

Naka kutsi “lilanga lekwehlulelwa nelekubhujiswa” lelitako licatsaniswa nekubhujiswa ‘kwelive’ langesikhatsi saNowa. Nguliphi lelive lelabhujiswa? Umhlaba wetfu awuzange ubhujiswe, kodvwa ‘kwabhujiswa bantfu labangamesabi Nkulunkulu,’ lebebatitsa takhe. ‘Kulelilanga lekwehlulelwa’ lelitako, labo labakhetsa kuba titsa taNkulunkulu nabo batawubhujiswa. Kodvwa bangani baNkulunkulu batawusindziswa, njengobe kwaba njalo ngaNowa nemndeni wakhe.​—Matewu 24:37-42.

Cabanga nje kutsi lomhlaba utawuba muhle kangakanani ngemuva kwekutsi Nkulunkulu asuse tonkhe tintfo letimbi! Kuyacaca kutsi loko liBhayibheli lelikushoko ngekuphela kutindzaba letimnandzi, akusito letimbi. Nobe kunjalo, usengatibuta kutsi: ‘LiBhayibheli liyasitjela yini kutsi kuphela kutawufika nini? Kungenteka yini kutsi sekusedvute? Ngingasindza njani kuko?’