Likhona Yini Litsemba Ngalabafile?

Batawuphindze baphile yini bantfu labafile?

LIBHAYIBHELI LITSI: “Sikhatsi siyeta lapho bonkhe labasemathuneni batawuliva livi [laJesu] futsi baphume.”​—Johane 5:28, 29.

Jesu watsi nasekubusa uMbuso wakhe, bantfu labafile batawuvuswa. Fernando lesikhulume ngaye kulesihloko lesendlulelile watsi: “Ngamangala kakhulu ngesikhatsi ngicala ngca kufundza Johane 5:28, 29. Lombhalo wanginika litsemba ngelikusasa.”

Ngesikhatsi Jobe asaphila besekavele ati kutsi Nkulunkulu utamvusa nakangafa. Jobe wabuta watsi: “Nangabe umuntfu afa, uyawuphindze aphile yini?” Ngemuva kwaloko wase utsi: “Kuwo onkhe emalanga ekusebenta kwami kamatima ngiyakuma kuze kufike kuvuseleleka kwami. Uyawungibita, mine ngikuphendvule.”​—Jobe 14:14, 15.

Mata dzadzewabo Lazaro bekangacali kuyiva lendzaba yekuvuswa kwebantfu labafile. Ngemuva kwekufa kwaLazaro, Jesu watsi kuMata: “Umnakenu utawuvuka.” Mata wamphendvula watsi: “Ngiyati kutsi utawuvuka ngelilanga lekugcina nasekuvuswa labafile.” Jesu wase utsi kuye: “Mine ngikuvuka nekuphila. Loyo lokholwa ngimi, ngisho nobe angafa, utawubuye avuke.” (Johane 11:23-25) Ngekushesha nje Jesu wamvusa Lazaro. Lendzaba lemnandzi yekuvuswa kwaLazaro isiniketa sitfombe saloko lokutawenteka esikhatsini lesitako. Asewucabange nje sekuvuswa bantfu emhlabeni wonkhe.

Bakhona yini bantfu labatawuvuselwa ezulwini?

LIBHAYIBHELI LITSI: LiVi laNkulunkulu likhombisa kutsi kuvuswa kwaJesu bekwehlukile kunekwalabantfu labangu-8 labavuswa. Labantfu labangu-8 labavuswa baphindze baphila lamhlabeni. Kodvwa liBhayibheli nalikhuluma ngekuvuswa kwaJesu litsi: “Jesu Khristu ungesekudla saNkulunkulu ngobe waya ezulwini.” (1 Phetro 3:21, 22) NguJesu kuphela yini lobekatawuvuselwa ezulwini? Ngaphambi kwekutsi Jesu afe watjela baphostoli bakhe watsi: “Nasengihambile ngiyonilungisela indzawo, ngitawuphindze ngite futsi nginemukele, kuze lapho ngikhona khona nani nibe khona.”​—Johane 14:3.

Nakafika ezulwini Khristu walungiselela kufika kwebafundzi bakhe. Sebabonkhe labatawuvuselwa ezulwini bangu-144 000. (Sembulo 14:1, 3) Labalandzeli baJesu bayokwentani ezulwini?

Batawube banemsebenti lomnyenti. LiBhayibheli litsi: “Bayajabula futsi bangcwele bonkhe labahlanganyela eluvukweni lwekucala; kufa kwesibili kute ligunya kubo, kodvwa batawuba baphristi baNkulunkulu nebaKhristu, babuse njengemakhosi kanye naye iminyaka leyinkhulungwane.” (Sembulo 20:6) Labo labatawuvuselwa ezulwini batawubusa umhlaba bakanye naJesu, njengemakhosi nebaphristi.

Bobani labanye labatawuvuswa?

LIBHAYIBHELI LITSI: Umphostoli Pawula waphefumelelwa kutsi abhale emavi latsi: “Nginelitsemba kuNkulunkulu, lokulitsemba nalabantfu labanalo, lekutsi kutawuba neluvuko lwalabalungile nalabangakalungi.”​—Imisebenti 24:15.

Bobani laba “labalungile” umphostoli Pawula lakhuluma ngabo? Cabanga nganati tibonelo letilandzelako: Nasekatawukufa, Danyela watjelwa emavi latsi: “Uyawuphumula, kuyawutsi ekupheleni kwemalanga, uvuke.” (Danyela 12:13) Ngemuva kwekuvuswa, Danyela utawuphila kuphi? Bantfu ‘labalungile bayawudla lifa lemhlaba, bahlale kuwo kuze kube phakadze.’ (Tihlabelelo 37:29) NaJesu washo kutsi: “Bayajabula labo labatfobekile, ngobe batawudla lifa lemhlaba.” (Matewu 5:5) Danyela nawo onkhe emadvodza nebafati labetsembekile batawuvuswa baphile lapha emhlabeni futsi ngeke baphindze bafe.

Bobani laba “labangakalungi” Pawula lakhuluma ngabo? Ngibo bonkhe labafa bangakalitfoli litfuba lekutsi bafundze liBhayibheli futsi bente loko lelikushoko. Nasebavusiwe batawutfola litfuba lekwati ngaJesu naJehovaa futsi babonge ngetintfo labasentela tona. (Johane 17:3) Bonkhe labo labatawukhetsa kukhonta Nkulunkulu batawuchubeka baphila yingci nje Jehova nakasaphila.

Kutawube kunjani kuphila emhlabeni ngemuva kwekuvuswa kwebantfu labafile?

LIBHAYIBHELI LITSI: Nkulunkulu “uyakwesula tonkhe tinyembeti emehlweni abo, sekuyawubate kufa, nekulila, nekukhala, nebuhlungu.” (Sembulo 21:4) “Bantfu bayakwakha tindlu, bahlale kuto, bayawuhlanyela tivini, badle titselo tato.”​—Isaya 65:21.

Asewucabange kutsi kuphila kutawuba mnandzi kanjani nasekuvuswe netinhlobo takho lebetifile. Kodvwa sati ngani kutsi kuvuswa kwebantfu labafile kutawenteka mbamba?