UMLANDVO WEKUPHILA
Ngatfola Lokuncono Kakhulu Kuneludvumo
Nga-1984, ngaba ngumuntfu lodvumile. Ngaba ngunobuhle wase-Hong Kong. Ngaphuma ekhasini lekucala lemaphephadzaba nakubo magazini. Bengihlabela, ngijayiva, ngikhutsata bantfu, nginetinhlelo kuma-TV, ngigcoka kahle, futsi besengihamba netitatanyiswa, ngalelinye lilanga nje ngaze ngahamba nesikhulu sembuso sase-Hong Kong.
Ngemnyaka lolandzelako ngaba ngumdlali wemafilimu futsi etikhatsini letinyenti bengivame kuba ngumdlali lohamba embili. Babhali bemaphephandzaba bebangifuna langingakhona, tintsatseli betingishutha, futsi bantfu labanyenti bebangicela kutsi ngibe khona nakuvulwa takhiwo, emabhizinisi futsi bebangimema nasemicimbini. Bekubukwa mine nje.
Sitfombe lesikhombisa ngalesikhatsi asefilimini lebudlova
Ngekuhamba kwesikhatsi ngabona kutsi lemphilo lebengiyiphila ayisimnandzi. Bengivamise kuba semafilimini ebudlova layingoti. Badlali bemafilimu e-Hong Kong bekufanele bakwente mbamba loko lebekuhambisana nendzima yabo, ngalesinye sikhatsi bekudzingeka kutsi ngigibele sidududu ngisizubise sece imoto. E-Hollywood bekuncono ngobe tintfo letinjengaleti betentiwa ngulabanye bantfu hhayi badlali balamafilimu. Emafilimu lamanyenti labengingumdlali lohamba embili khona, bekagcwele budlova nekutiphatsa lokubi. Kantsi lamanye bekanebudimoni.
Nga-1995 ngashada nemuntfu lobekacondzisa kwakhiwa kwemafilimu. Kute lebengikweswele, benginemali, nginendvodza lekahle, ngidvumile, kodvwa bengitiva ngicindzetelekile ngingajabuli. Ngiko ngabona kutsi kuncono ngiyekele kuba ngumdlali emafilimini.
NGAKHUMBULA INDLELA LEBENGIMTSANDZA NGAYO NKULUNKULU
Ngesikhatsi ngisemncane bengimtsandza Nkulunkulu. Njalo ngeMgcibelo mine nasisi wami besivamise kuvakasha kulelinye likhaya laBoFakazi. Umnumzane walelikhaya Joe McGrath bekasifundzela liBhayibheli ndzawonye nemadzodzakati akhe lamatsatfu. Kulelikhaya bebatsandzana, Joe McGrath bekabahlonipha futsi abaphatsa kahle bantfwana bakhe nemkakhe. Bengikutsandza kakhulu kuhamba nabo nabaya esifundvweni. Ngalesinye sikhatsi besiya emihlanganweni lemikhulu. Bekumnandzi mbamba kuphila. Bengikhululeka nanginaBoFakazi.
Ekhaya kitsi belungafakwa, tinyenti tintfo letimbi lebetenteka kimi. Indlela babe lebekaphila ngayo yabangela make kutsi ahlale alusizi. Ngalesikhatsi ngineminyaka lengu-10 make wayekela kutihlanganisa naBoFakazi BaJehova. Ngachubeka ngiya esifundvweni, ngesikhatsi ngineminyaka lengu-17 ngabhajatiswa. Kwatsi kungakapheli malanga mangaki, ngacala kwenta tintfo lebetiphambene nalokushiwo liBhayibheli futsi ngatehlukanisa nelibandla.
NGAKHETSA KUPHINDZE NGIKHONTE NKULUNKULU
Ngalesikhatsi ngisandza kushada, ngavakashelwa bazalwane lababili labebasuka ebandleni lakuleyo ndzawo. Bangitjela kutsi yini lengingayenta kute ngibuyele kuJehova futsi bahlela kutsi ngivakashelwe nguCindy lobekasitfunywa selivangeli kute angisite. Ngaleso sikhatsi besengifana nemuntfu longalati sanhlobo nje liBhayibheli, ngako ngacela Cindy kutsi angichazele kutsi wati ngani kutsi liBhayibheli liliVi laNkulunkulu. Wangikhombisa tiphrofetho letiseBhayibhelini lebesetivele tigcwalisekile. Sacala kuba bangani futsi wacela kungifundzisa timfundziso teliBhayibheli letisisekelo. Ngavuma. Bekungatsi kwekucala ngati ngaJehova nekutsi unguNkulunkulu lonelutsandvo nalofuna kutsi ngihlale ngijabulile.
Kuphindze ngibe naBoFakazi BaJehova bekungijabulisa kakhulu kunekuba nebantfu lebengisebenta nabo nasenta ema-movie. Bumatima lengabutfola ngalesikhatsi ngisengumntfwana bangibangela kutsi ngingetsembi muntfu nekutsi ngitibukele phansi. Lomunye lebesinaye ebandleni wangisita asebentisa liBhayibheli, wangikhombisa indlela lencono yekulwisana nemiva yekudvumateka. Ngaphindze ngafundza kwakha bangani sibili.
LOKUNCONO KAKHULU KUNELUDVUMO
Nga-1997 mine nendvodza yami satfutsela eMelika. Ngaba nematfuba lamanyenti ekutsi ngicocele labanye ngaNkulunkulu. Kufundzisa labanye ngeliBhayibheli kwangenta ngajabula kakhulu kunangalesikhatsi ngisengumdlali logcamile kuma-movie. Ngikhumbula lokwenteka nga-2002, ngahlangana nemngani wami wase-Hong Kong. Kuphila kwami nekwakhe bekufana ngetindlela letinyenti. Naye wake waba ngunobuhle wase-Hong Kong. Ngesikhatsi ngiba ngunobuhle wase-Hong Kong, nguye lowangifaka umchele ngobe bengilandzela yena. Ngekuhamba kwesikhatsi naye waba ngumdlali kuma-movie waphindze wacondzisa kwakhiwa kwawo analabanye lebebadvumile. Naye besekahlala e-Hollywood.
Ngeva buhlungu kakhulu ngesikhatsi angicocela ngekushona kwesingani sakhe. Inkholo yakhe yebuBhuda yehluleka kumdvudvuta. Njengami naye bekakadvumile, aphila imphilo lentofontofo lefiswa ngibo bonkhe bantfu, kepha bekangakajabuli futsi angetsembi muntfu. Ngamcocela tintfo lebengitifundze eBhayibhelini kodvwa bekulukhuni kutsi akucondze ngenca yekutsi bekangumBhuda.
Umngani wami Cheri usefilimini
Nga-2003 ngesikhatsi Cheri aseCanada ayokwenta lifilimu, wangishayela lucingo. Ajabule kakhulu wangicocela kutsi watsi nje asatihambela abuka indzawo yaseCanada wathantaza watsi: “Ngitjele ngubani Nkulunkulu weliciniso? Ngubani ligama lakhe?” Ngaleso sikhatsi wabona liHholwa LeMbuso laBoFakazi lineligama lelitsi Jehova. Loko wakutsatsa njengemphendvulo levela kuNkulunkulu futsi waba nesifiso sekucoca naBoFakazi BaJehova ngekushesha. Ngahlela kutsi aye ebandleni lesiShayina eVancouver.
Cheri wangitjela ngendlela lebebamphetse ngayo nekutsi bekakhona ngisho nekubatfululela sifuba sakhe. Kwangijabulisa kuva loko ngobe ngesikhatsi akha ema-movie bekete bangani. Kusukela ngaleso sikhatsi Cheri akazange akuyekele kuya esifundvweni. Nga-2005 wasayina sivumelwane sekwakha ema-movie lamabili eShayina, ngako kwadzingeka kutsi abuyele e-Hong Kong. Nga-2006 Cheri wabhajatiswa emhlanganweni waBoFakazi lobewuse-Hong Kong. Bekanesifiso sekwentela Jehova lokunyenti kodvwa bekangakhoni ngenca yemsebenti lebekawenta wekwakha emafilimu, loko bekumkhatsata kakhulu.
KUSITA LABANYE BANTFU KWANGIJABULISA
Nga-2009 Cheri washintja kuphila kwakhe. Wayekela kwakha ema-movie ngoba abefuna kwentela Jehova lokunyenti. Waba nebangani labanyenti ebandleni. Bekakutsandza kutjela labanye ngaNkulunkulu ngako wasebentisa sikhatsi sakhe lesinyenti ashumayela.—Matewu 24:14.
Ngemuva kwaloko Cheri wase ufundza siNepal kute akhone kushumayela bantfu lebebasikhuluma e-Hong Kong. Bantfu labanyenti labakhuluma siNepal eHong Kong abanakwa futsi bayachwenswa ngenca yekutsi abasati kahle siNgisi nobe siShayina. Baphindze bachwenswe nangekutsi emasiko abo nendlela yekuphila yehlukile. Cheri wangicocela kutsi bekumnandzi kufundzisa bantfu baseNepal liBhayibheli. Ngalelinye lilanga bekashumayela emtini ngemuti, wahlangana nemfati lobekangumNepal lobekanelwati loluncane ngaJesu futsi angati lutfo ngaNkulunkulu. Cheri wasebentisa liBhayibheli kute akhombise lomfati kutsi naJesu wathantaza kuBabe wakhe losezulwini. Ngalesikhatsi lomfati abona kutsi bekangakhona kuthantaza kuNkulunkulu weliciniso Jehova, wavele wavuma ngaleso sikhatsi kutsi afundzelwe liBhayibheli. Ngekushesha indvodza yakhe nendvodzakati yakhe nabo bacala kufundza liBhayibheli.—Tihlabelelo 83:18; Lukha 22:41, 42.
Cheri sekanguFakazi
Ngalesikhatsi ngibona Cheri asebentisa kuphila kwakhe ashumayela, ngatibuta: “Yini lengivimba kutsi ngingakhoni kwenta loko lakwentako?” Nami besengibuyele e-Hong Kong. Ngaphila ngendlela lebeyitangenta kutsi ngibe nesikhatsi lesinyenti ngifundzisa bantfu ngaNkulunkulu. Ngibonile kutsi kusita labanye bantfu bati Nkulunkulu kungenta ngijabule sibili.
Ngibonile kutsi kusita labanye bantfu bati Nkulunkulu kungenta ngijabule sibili
Ngafundza nalomunye umfati waseVietnam lobekahlala alusizi. Manje sewuyakujabulela kuphila nekuba naBoFakazi BaJehova.
Mine naCheri sitfole lokungetulu kweludvumo. Kwakha ema-movie kwasenta saba bantfu labatiwako, kodvwa kufundzisa bantfu ngaJehova kusijabulise kakhulu ngobe kudvumisa ligama lakhe. Sikubonile kugcwaliseka kwemavi lashiwo nguJesu latsi: “Kunenjabulo lenyenti ekupheni kunasekwemukeleni.”—Imisebenti 20:35.