Kucatsanisa Lokubaluke Kakhulu Longase Ukwente

UNGUMKHRISTU yini? Nangabe unguye, ungulomunye webantfu labangetulu kwetigidzigidzi letimbili emhlabeni wonkhe. Loku kusho kutsi cishe munye kubantfu labatsatfu utibita ngekutsi ungumlandzeli waKhristu. Lamuhla kunetinkhulungwane temasontfo latsi ebuKhristu kodvwa abe ehlukaniswe timfundziso letingafani kanye nemibono leyehlukahlukene. Mhlawumbe loko lokukholelwako kwehluke kakhulu kuloko lokukholelwa ngulamanye emaKhristu. Kunendzaba yini kutsi yini loyikholelwako? Yebo, nangabe ufuna kukholelwa loko lokufundziswa liBhayibheli.

Balandzeli baJesu Khristu bekucala bebabitwa ngekutsi ‘ngemaKhristu.’ (Imisebenti 11:26) Bekute sidzingo sekubabita ngalamanye emagama ngobe beyiyinye kuphela inkholo yebuKhristu. Onkhe emaKhristu abelandzela timfundziso neticondziso taJesu Khristu longuMsunguli webuKhristu. Kutsiwani ngelisontfo lakho? Uyaciniseka yini kutsi lifundzisa loko Khristu labekufundzisa, nekutsi likholelwa loko balandzeli bakhe bekucala lebebakukholelwa? Ungabona ngani nangabe liyakwenta loko? Yinye kuphela indlela yekubona loko, kutsi usebentise liBhayibheli kute ucatsanise.

Cabanga ngaloku: Jesu Khristu abeyihlonipha kakhulu imiBhalo futsi ayitsatsa njengeliVi laNkulunkulu. Akazange ahambisane nebantfu labebakwenta lite lokufundziswa liBhayibheli ngekutsi bahambise emasiko abo embili. (Makho 7:9-13) Singasho kufanele kutsi balandzeli baJesu sibili kufanele bakholelwe lokusekelwe eBhayibhelini. Ngako wonkhe umuntfu longumKhristu wenta kahle ngekutibuta kutsi: ‘Lokufundziswa esontfweni lami kuyavumelana yini nalokufundziswa liBhayibheli?’ Kute ukhone kuphendvula lombuto kufanele ucatsanise timfundziso tasesontfweni lakho naloko lokushiwo liBhayibheli.

Jesu watsi indlela lesikhonta ngayo Nkulunkulu kufanele isekelwe eBhayibhelini ngobe liliciniso. (Johane 4:24; 17:17) Umphostoli Pawula naye watsi kusindziswa kwetfu kutawuya ngekutsi sinalo yini “lwati lolungulonalona lweliciniso.” (1 Thimothi 2:4) Ngako kubalukile kutsi tintfo lesitikholelwako tisekelwe eBhayibhelini. Loku kubaluleke kakhulu ngobe kuphila kwetfu kungaba sengotini.

SINGAKUCATSANISA NJANI LOKO LESIKUKHOLELWAKO NALOKUSHIWO LIBHAYIBHELI?

Sicela ufundze nayi imibuto lesitfupha lekulesihloko bese uyanaka kutsi liBhayibheli liyiphendvula njani. Fundza lemibhalo futsi ucabangisise ngaletimphendvulo letikhona. Kufanele bese uyatibuta kutsi: ‘Lokufundziswa esontfweni lami kuyahambisana yini naloko lokushiwo liBhayibheli?’

Loku kucatsanisa lokubaluleke kakhulu longase ukwente. Ungatsandza yini kubona kutsi lokufundziswa esontfweni lakho kuyahambisana nalokushiwo liBhayibheli? BoFakazi BaJehova bangatsandza kukusita kutsi uhlolisise liciniso leliseBhayibhelini. Ungacela lomunye waBoFakazi BaJehova kutsi akuvakashele kute afundze nawe liBhayibheli. Ungangena naku-jw.org/ss.

1 UMBUTO: Ungubani Nkulunkulu?

IMPHENDVULO: Jehova nguBabe waJesu, uphila phakadze naphakadze futsi unguMdali lophakeme wato tonkhe tintfo.

LOKUSHIWO LIBHAYIBHELI:

“Nasinithantazela, sihlale simbonga Nkulunkulu longuYise weNkhosi yetfu Jesu Khristu.”—Kholose 1:3.

“Kukufanele Jehova Nkulunkulu wetfu kwemukela inkhatimulo, ludvumo, nemandla, ngobe wadala tonkhe tintfo, nangentsandvo yakho taba khona futsi tadalwa.”—Sembulo 4:11.

Fundza naRoma 10:13; 1 Thimothi 1:17.

2 UMBUTO: Ungubani Jesu Khristu?

IMPHENDVULO: Jesu uyiNdvodzana yaNkulunkulu. Nguye lowadalwa kucala, ngako yena unaso sicalo. Jesu ungephansi kwaNkulunkulu futsi uyatitfoba kuye.

LOKUSHIWO LIBHAYIBHELI:

“Babe mkhulu kunami.”—Johane 14:28.

‘[Jesu] ungumfanekiso waNkulunkulu longabonakali, litibulo layo yonkhe indalo.’—Kholose 1:15.

Fundza naMatewu 26:39; 1 Khorinte 15:28.

3 UMBUTO: Uyini umoya longcwele?

IMPHENDVULO: Umoya longcwele ungemandla Nkulunkulu lawasebentisako kuze afeze injongo yakhe. Awusiwo umuntfu. Umoya waNkulunkulu ungasebenta kubantfu futsi ubanike emandla.

LOKUSHIWO LIBHAYIBHELI:

“Ngesikhatsi Elizabethe eva Mariya ambingelela, lomntfwana lobekasesiswini sakhe wagcuma, futsi Elizabethe wagcwala umoya longcwele.”—Lukha 1:41.

“Nitawutfola emandla nawufika kini umoya longcwele.”—Imisebenti 1:8.

Fundza naGenesisi 1:2; Imisebenti 2:1-4; 10:38.

4 UMBUTO: Uyini UMbuso waNkulunkulu?

IMPHENDVULO: UMbuso waNkulunkulul nguhulumende wasezulwini. INkhosi yawo nguJesu. Madvutane loMbuso waNkulunkulu utawubangela kutsi intsandvo yakhe yentiwe emhlabeni wonkhe.

LOKUSHIWO LIBHAYIBHELI:

“Ingilosi yesikhombisa nayo yashaya licilongo layo. Kwevakala emavi lamakhulu ezulwini atsi: ‘Umbuso wemhlaba sewunguMbuso weNkhosi yetfu newaKhristu wayo, yona itawubusa njengenkhosi phakadze naphakadze.’”—Sembulo 11:15.

Fundza naDanyela 2:44; Matewu 6:9, 10.

5 UMBUTO: Bonkhe bantfu labalungile baya ezulwini yini?

IMPHENDVULO: Cha. Kunelicembu lelincane lebantfu labakhetfwe nguNkulunkulu kutsi baye ezulwini. Lelicembu libitwa ngekutsi “ngumhlambi lomncane.” Batawuba ngemakhosi futsi batawubusa lomhlaba bakanye naJesu.

LOKUSHIWO LIBHAYIBHELI:

“Ningesabi mhlambi lomncane, ngobe uYihlo uncume kuninika uMbuso.”—Lukha 12:32.

“Batawuba baphristi baNkulunkulu nebaKhristu, babuse njengemakhosi kanye naye.”—Sembulo 20:6.

Fundza neSembulo 14:1, 3.

6 UMBUTO: Iyini injongo yaNkulunkulu ngalomhlaba nangebantfu?

IMPHENDVULO:Nasekubusa uMbuso waNkulunkulu, umhlaba utawuba lipharadesi, bantfu labalungile babe nemphilo lenhle, nekuthula lokuhlala njalo, futsi batfole kuphila lokuphakadze.

LOKUSHIWO LIBHAYIBHELI:

“Labamnene bayawulidla lifa lemhlaba, bahlale kahle, batijabulise ngekuthula lokukhulu.”—Tihlabelelo 37:10, 11.

“Utawesula tonkhe tinyembeti emehlweni abo, kufa ngeke kusaba khona, nekulila, nekukhala kanye nebuhlungu, ngeke kusaba khona. Tintfo letindzala setendlulile.”—Sembulo 21:3, 4.

Fundza neTihlabelelo 37:29; 2 Phetro 3:13.