SIHLOKO LESINGUMGOGODLA | TINDLELA TEKUTFOLA LOKUNYENTI NAWUFUNDZA LIBHAYIBHELI

Yini Lengenta Kufundza LiBhayibheli Kujabulise?

Kutakujabulisa yini kufundza liBhayibheli noma kutakudzina? Ngalokuvamile kuya ngendlela loyisebentisako nawulifundza. Manje asesicoce ngaloko longakwenta kute kufundza kwakho liBhayibheli kujabulise futsi kube mnandzi kakhulu.

Funa lihumusho leliBhayibheli leletsembekile futsi lwelulwimi lolwetayelekile. Nawufundza indzaba lenemagama akadzeni kakhulu nalangevakali, vele ngeke ukujabulele loko lokufundzako. Ngako khetsa liBhayibheli lelibhalwe ngelulwimi loluva kahle, lelitawutsintsa inhlitiyo yakho. Kantsi futsi kufanele kube lihumusho lelibekeke ngendlela lenembile.a

Lifundze usebentisa tintfo tebuchwepheshe. Lamuhla liBhayibheli alitfolakali nje kuphela lingumbhukudvu wencwadzi leshicilelwe, kodvwa liphindze litfolakale nasetintfweni tebuchwepheshe. Ungakhona kufundza lamanye emaBhayibheli ku-internet noma utitsatsele wona kule-internet kute uyotifundzela wona ku-computer, ku-tablet noma elucingweni lwakho. Letinye taletintfo tebuchwepheshe tinemathuluzi ekubuka lamanye emavesi eliBhayibheli lakhuluma ngalesihloko losifundzako. Aphindze abe lusito ekucatsaniseni loko lokushiwo ngemahumusho lehlukahlukene. Nangabe wena utsandza kulalela tintfo letitsetjuliwe kunekutifundza, liBhayibheli liphindze litfolakale njengencwadzi letsetjuliwe. Bantfu labanyenti bayakujabulela kulalela tintfo letitsetjuliwe nabahamba, nabenta imisebenti yasekhaya noma nabenta noma ngumuphi umsebenti lobavumela kutsi balalele lokutsite. Sikukhutsata kutsi ulifundze usebentisa indlela letakulungela.

Lifundze usebentisa emathuluzi ekudadisha liBhayibheli. Emathuluzi ekudadisha liBhayibheli angakusita kutsi uzuze kakhulu kuloko lokufundzako. Kunemabalave etindzawo lokukhulunywa ngato eBhayibhelini langakusita kutsi ukhone kubona tindzawo lofundza ngato bese utihlanganisa naloko lobekwenteka kuleto tindzawo. Tihloko letifanana naleti letikulomagazini noma letisencenyeni letsi “Bible Teachings” ku-website letsi jw.org tingakusita ukhone kucondza tintfo letinyenti lokukhulunywa ngato eBhayibhelini.

Sebentisa tindlela letehlukahlukene nawulifundza. Nangabe kumatima kufundza liBhayibheli kusukela kuGenesisi kuya kuSembulo, kungaba njani ucale kulifundza ngetincenye lotitsandza kakhulu? Nangabe kukhona lofuna kukwati ngebantfu labadvumile lokukhulunywa ngabo eBhayibhelini, ungafundza ngalabo bantfu, kube yindlela yakho yekufundza liBhayibheli. Ebhokisini lelitsi “Fundzisisa LiBhayibheli Kute Ubati Kahle Bantfu Lelikhuluma Ngabo,” kunetibonelo tebantfu longafundza ngabo eBhayibhelini. Ungaphindze ulifundze ngetihloko noma ulifundze ngendlela tintfo letenteka ngayo ngekulandzelana kwato. Sikukhutsata kutsi wetame yinye yaletindlela.

a Labanyenti batfole kutsi i-New World Translation of the Holy Scriptures inembile, itsembekile futsi ifundzeka melula. LeliBhayibheli lelishicilelwe BoFakazi BaJehova litfolakala ngetilwimi letingetulu kwa-130. Ungatitsatsela ikhophi yalo kule-website letsi-jw.org noma utitsatsele i-JW Library application. Kantsi nangabe utsandza, BoFakazi BaJehova bangakuletsela ikhophi leshicilelwe ekhaya lakho.

FUNDZISISA LIBHAYIBHELI KUTE UBATI KAHLE BANTFU LELIKHULUMA NGABO

**Labanye besifazane labebatsembekile**
Abigayili	1 Samuweli sehluko 25
Esta	Esta tehluko 2 kuya ku-5, na-7 kuya ku-9
Hana	1 Samuweli tehluko 1 na-2
Mariya	(Make waJesu) Matewu tehluko 1 na-2; Lukha tehluko 1 na-2; fundza naJohane 2:1-12; Imisebenti 1:12-14; 2:1-4
Rahabi	Joshuwa tehluko 2 na-6; fundza na-Hebheru 11:30, 31; Jakobe 2:24-26
Rebheka	Genesisi tehluko 24 kuya ku-27
Sara	Genesisi tehluko 17 na-18, 20 kuya ku-21, na-23; fundza na-Hebheru 11:11; 1 Phetro 3:1-6

**Lamanye emadvodza latibonelo letinhle**
Abrahama	Genesisi tehluko 11 kuya ku-24; fundza na-25:1-11
Davide	1 Samuweli tehluko 16 kuya ku-30; 2 Samuweli tehluko 1 kuya ku-24; 1 Emakhosi tehluko 1 na-2
Jesu	LiVangeli laMatewu, laMakho, laLukha, nelaJohane
Mose	Eksodusi tehluko 2 kuya ku-20, 24, na-32 kuya ku-34; Numeri tehluko 11 kuya ku-17, 20 na-21, 27, na-31; Dutheronomi sehluko 34
Nowa	Genesisi tehluko 5 kuya ku-9
Pawula	Imisebenti tehluko 7 kuya ku-9, na-13 kuya ku-28
Phetro	Matewu tehluko 4, 10, 14, 16 kuya ku-17, na-26; Imisebenti tehluko1 kuya ku-5, 8 kuya ku-12

EMATHULUZI EKUDADISHA LIBHAYIBHELI LENTIWE BOFAKAZI BAJEHOVA

I-website letsi JW.ORG—Le-website inemathuluzi lamanyenti ekudadisha, lafaka ekhatsi incenye letsi “Bible Questions Answered.” Iphindze ibe neticondziso tekutsi ungatitsatsela njani i-JW Library application
“Bona Izwe Elihle”—Lencwajana inemabalave kanye netitfombe tetindzawo lokukhulunywa ngato eBhayibhelini
“Insight on the Scriptures”—Lena yincwadzi lenemiculu lemibili, lechaza bantfu, tindzawo kanye nemagama laseBhayibhelini
“Yonke ImiBhalo Iphefumulelwe UNkulunkulu Futhi Inenzuzo”—Lena yincwadzi lemayelana netincwadzi teliBhayibheli, ichaza kutsi tabhalwa nini, kuphi kanye nesizatfu lesenta kutsi tibhalwe. Iphindze ichaze kafishane kutsi leyo ncwadzi ikhuluma ngani
“IBhayibheli—Izwi LikaNkulunkulu Noma Elomuntu?”—Lencwadzi lencane lecwaningwe ngekucophelela ichaza bufakazi bekutsi liBhayibheli liliVi laNkulunkulu leliphefumulelwe
LiBhayibheli—Ngumuphi Umlayeto Leliwucuketse?—Yincwajana lenemakhasi langu-32 lechaza kutsi liBhayibheli selilonkhe likhuluma ngani