SIHLOKO LESINGUMGOGODLA | KHOMBISA KUBONGA NGESIPHO LESIKHULU LESIVELA KUNKULUNKULU
Sipho Lesitendlula Tonkhe
UMSHINI wekulota impenseli lonjengemkhumbi losesandleni saJordan ubonakala uyintfo lengakabaluleki. Kepha ungulenye yetintfo letiligugu kuye. Jordan uyachaza utsi: “Ngawuphiwa nguRussell ngesikhatsi ngisesemncane.” Ngemuva kwekufa kwaRussell, Jordan weva kutsi Russell bekadlale indzima lebalulekile yekucinisa mkhulu wakhe nebatali bakhe etikhatsini letimatima. Jordan utsi: “Njengoba sengati lokunyenti ngaRussell, lesipho lesincane langipha sona sesibaluleke kakhulu kimi.”
Lendzaba yaJordan ichaza kutsi sipho singete sasho lutfo kulabanye, kepha kumuntfu losemukela ngenjabulo singaba ligugu. LiBhayibheli lichaza sipho lesibaluleke kakhulu nganankha emavi latiwa bantfu labanyenti: “Ngobe Nkulunkulu walitsandza kakhulu live kangangekutsi waze wanikela ngeNdvodzana yakhe lekuphela kwayo, kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.”—Johane 3:16.
Wonkhe umuntfu lowemukela lesipho angatfola kuphila lokuphakadze! Singaba khona yini lesinye sipho lesibaluleke kakhulu kwendlula lesi? Labanye bangasibona singakabaluleki, kepha ‘siligugu’ kumaKhristu eliciniso. (Tihlabelelo 49:8; 1 Phetro 1:18, 19) Kungani Nkulunkulu anikela ngendvodzana yakhe yaba sipho sabo bonkhe bantfu?
Umphostoli Pawula usichazela sizatfu saloko nganankha emavi: “Ngako-ke ngemuntfu munye sono sangena eveni, nekufa kwangena ngesono, ngenca yaloko kufa kwasakatekela kubo bonkhe bantfu ngobe bonkhe bonile.” (Roma 5:12) Adamu indvodza yekucala, wona ngekungalaleli Nkulunkulu ngemabomu wase utfola sigwebo sekufa. Ngenca yesono sa-Adamu, bonkhe bantfu bayafa njengobe basitukulwane sakhe.
“Ngobe umvuzo wesono kufa, kodvwa sipho Nkulunkulu lasinika sona, kuphila lokuphakadze ngaKhristu Jesu iNkhosi yetfu.” (Roma 6:23) Kuze akhulule bantfu ekugcilatweni kufa, Nkulunkulu watfumela indvodzana yakhe Jesu Khristu kutsi ite emhlabeni itonikela ngekuphila kwayo lokute sono. Ngalomhlatjelo lowatiwa ngekutsi “yinhlawulo,” bonkhe labakholwa kuJesu batotfola kuphila lokuphakadze.—Roma 3:24.
Asebentisa Jesu Khristu, Nkulunkulu uniketa bantfu labamkhontako tibusiso. Mayelana nato tonkhe letibusiso, Pawula watsi: “Akabongwe Nkulunkulu ngalesipho sakhe lesingachazeki.” (2 Khorinte 9:15) Inhlawulo isipho lesimangalisa kakhulu kangangekutsi ngeke sikhone kuyichaza kahle. Kungani inhlawulo isipho lesikhulu kunato tonkhe tipho letinhle Nkulunkulu lasiphe tona? Yehluke ngani kuto tokhe tipho Nkulunkulu lasiphe tona?a Singakhombisa njani kutsi siyabonga ngayo? Sicela kutsi ufundze tihloko letimbili letilandzelako kute utfole timphendvulo letisekelwe eBhayibhelini talemibuto.
a Ngekutitsandzela, Jesu “wanikela ngemphefumulo wakhe ngenca yetfu.” (1 Johane 3:16) Noma kunjalo, lenhlawulo bekuyincenye yenjongo yaNkulunkulu, ngako letihloko letilandzelako tikhuluma ngendzima yaNkulunkulu njengoba kunguye losiphe inhlawulo.