Bakutsintsa Njani Bagibeli Bemahhashi Labane?

Kwevakala umsindvo lomkhulu, kwase kuchamuka emahhashi agabadvula. Emahhashi lamane lanemandla nebagibeli bawo asenta sikubone kahle loko lokukhulunywa ngako eBhayibhelini. Lihhashi lekucala limhlophe futsi umgibeli walo yinkhosi lensha lekhatimulako lenikwe umchele. Emvakwakhe kuchamuka lihhashi lelibovu njengemlilo, lobekaligibele abetosusa kuthula emhlabeni wonkhe. Kwase kulandzela lihhashi lesitsatfu, lona belimnyama tsu! Umgibeli walo abephetse sikali njengoba kumenyetelwa umlayeto lomayelana nekweswelakala kwekudla. Lihhashi lesine limphofu futsi limelela tifo kanye naletinye tintfo letibangela kufa. Umgibeli walo Kufa lucobo lwako futsi liThuna belimlandzela edvute njengobe limita bantfu labanyenti.​—Sembulo 6:1-8.

“Ngetfuka kakhulu nangicala kufundza ngalabagibeli bemahhashi labane. Bengicabanga kutsi Lilanga Lekwehlulela bese lisondzele futsi bengingeke ngisindze njengobe bengingakalilungeli.”​—Crystal.

“Ngajabula kakhulu nangifundza ngemahhashi lamane lanemibala lehlukahlukene kanye nebagibeli bawo. Nasengikucondza kahle lokushiwo ngulombono ngabona kutsi kunengcondvo.”​—Ed.

Utiva ngendlela Crystal labetiva ngayo yini mayelana nebagibeli bemahhashi labane eMbhubhiso? Noma utiva ngendlela Ed lativa ngayo? Lendzaba yebagibeli bemahhashi labane ingulenye yetindzaba letatiwa kakhulu embhalweni weSembulo, lokuyincwadzi yekugcina yeliBhayibheli. Bewati yini kutsi ungasitakala ngekuwucondza kahle lombono? Ungasitakala njani? Nkulunkulu wetsembisa kutsi ungatfola injabulo sibili nawufundza lencwadzi yetiphrofetho futsi uphila ngaloko lokufundzako.​—Sembulo 1:1-3.

Ngisho nome labanye ubetfusa lombono webagibeli bemahhashi labane, lombono awukentelwa kutsi ukwetfuse. Ecinisweni tigidzi tebantfu titfole kutsi lombono uyakucinisa kukholwa kwato uphindze utisite kutsi tinake likusasa lelihle letetsenjiswe lona. Kungenteka lokufanako nakuwe. Ngako sicela kutsi uwufundze.