Umhlaba Lolipharadisi​—Utawuba Khona Mbamba Yini Noma Uliphupho?

Lipharadisi! Tincwajana letikhangako tetindzawo tekuvakasha tingasenta sifune kuvakasha etindzaweni letikhashane letibitwa ngekutsi “lipharadisi” kuze siyophumula futsi sikhohlwe ngetinkinga tetfu naloko lokusikhatsatako. Kodvwa sonkhe sati kahle kutsi nasibuyela ekhaya, timo tetfu tekuphila sititfola tinjengobe sitishiyile.

Noma kunjalo, sinesifiso lesikhulu sekwati ngelipharadisi. Siyatibuta kutsi: “‘Lipharadisi’ limane liliphupho lelihle yini? Nangabe kunjalo, kwentiwa yini kutsi sibe nesifiso sekwati ngalo? Lingaba khona mbamba yini?”

UMLANDVO WELIPHARADISI

Kulamakhulu eminyaka leyengcile, bantfu bebasolo bafuna kwati ngelipharadisi. Bantfu labanyenti bebafuna kwati ngalo ngenca yekutsi liBhayibheli likhuluma ‘ngensimi yase-Edeni lebeyingasemphumalanga.’ Yini leyenta lensimu yaba yinhle kangaka? Lelivesi litsi: “Nkulunkulu Simakadze wamilisa emhlabatsini tonkhe tihlahla letibukekako letimnandzi.” Lengadzi beyiyindzawo lenhle kakhulu. Lobekwenta kube kuhle kakhulu kutsi ‘ekhatsi nensimi bekunesihlahla sekuphila.’​—Genesisi 2:8, 9.

Ngetulu kwaloko, incwadzi yaGenesisi ikhuluma ngemifula lemine lebeyise-Edeni. Lemibili yalemifula, lokuyiThigrisi neYufrathe solo ikhona nalamuhla. (Genesisi 2:10-14) Lemifula lemibili igeleta iye elwandle lwasePheresiya leseyatiwa ngekutsi yi-Iraq lebeyiyincenye yePheresiya yasendvulo.

Ngako singasho kutsi lipharadisi beliyincenye yelive lasePheresiya. Ikhaphethi yasePheresiya yelikhulu lesi-16 lese-Philadelphia Museum of Art, ePennsylvania, e-U.S.A., inesitfombe sengadzi lebiyelwe lehlotjiswe ngetihlahla kanye netimbali. Elulwimini lwasePheresiya, ligama lelitsi “ingadzi lebiyelwe” liphindze lisho “lipharadisi” futsi lesitfombe lesikulekhaphethi sikhombisa loko lokuchazwa liBhayibheli mayelana nensimu yase-Edeni lenhle kakhulu.

Ecinisweni, tindzaba letimayelana nelipharadisi ticocwa ngetilwimi letinyenti nasetindzaweni letinemasiko lehlukahlukene emhlabeni wonkhe. Njengobe bantfu labanyenti baya etindzaweni letehlukahlukene emhlabeni, bebayati lendzaba yelipharadisi, lokwatsi ngemva kwesikhatsi bayibhica netinkholelo kanye netinganekwane tetindzawo labebakuto. Ngisho nalamuhla, bantfu labanyenti bavele bachaze tindzawo letinemvelo lenhle ngekutsi lipharadisi.

IMETAMO YEKUFUNA LIPHARADISI

Bantfu labavakashela tindzawo kute babone kutsi tinjani batsi balitfolile lipharadisi lelalahleka. Nasi sibonelo, ngesikhatsi Charles Gordon lobekangumholi welibutfo laseBrithani avakashela eSeychelles nga-1881, wajabula kakhulu nakabona buhle lobumangalisako bendzawo lokutsiwa yi-Vallée de Mai​—nyalo leseyibitwa ngekutsi yi-World Heritage site—​waze wayibita ngekutsi yinsimu yase-Edeni. Ngelikhulu lesi-15, umcondzisi wendiza wase-Italy longuChristopher Columbus wacabanga kutsi sewudvutane nekutfola ingadze yase-Edeni ngesikhatsi aya esichingini saseHispaniola, nyalo lesesibitwa ngekutsi Dominican Republic neHaiti.

Incwadzi yemlandvo lenesihloko lesitsi “Mapping Paradise” inemininingwane yemabalave akadzeni langetulu kwa-190, futsi lamanyenti awo akhombisa bo-Adamu na-Eva basensimini yase-Edeni. Kulencwadzi kunelibalave lelingakavami langelikhulu lesi-13 lelatfolakala kukhophi yembhalo wesandla waBeatus waseLiébana. Ngenhla kwalelibalave, kunelibhokisi lelinesitfombe selipharadisi emkhatsini walo. Kuphindze kube nemifula lemine legeleta emakoneni alo, “iThigrisi,” “Yufrathe,” “Indus,” kanye “neJordane,” futsi kungenteka imelela kwandza kwenkholo yebuKhristu emagumbini lamane emhlaba. Loku kukhombisa kutsi nanobe bantfu bangati kutsi liPharadisi likuphi, kodvwa solo bayalikhumbula.

John Milton, sonkhondlo wangelikhulu lesi-17, watiwa kakhulu ngenkhondlo yakhe lenesihloko lesitsi Paradise Lost, lebeyisekelwe endzabeni lekuGenesisi ngesikhatsi Adamu ona aphindze acoshwa ensimini yase-Edeni. Wagcamisa setsembiso sekubuyisela kuphila lokuphakadze emhlabeni watsi: “Umhlaba wonkhe utawuba lipharadisi.” Ngekuhamba kwesikhatsi, wabhala lenye inkhondlo lenesihloko lesitsi Paradise Regained.

KUYEKELA IMETAMO YEKUFUNA LIPHARADISI

Kuyacaca kutsi kulahleka kwelipharadisi kuyintfo bonkhe bantfu labayatiko. Kungani bantfu bangasayinaki indzaba yalo? Incwadzi yemlandvo i-“Mapping Paradise” itsi “tati tenkholo . .  setiyekele kufuna lipharadisi.”

Bantfu labanyenti labaya emasontfweni bafundziswe kutsi baya ezulwini, hhayi kuphila emhlabeni lolipharadisi. Kepha encwadzini yeTihlabelelo 37:29 liBhayibheli litsi: “Labalungile bayawudla lifa lemhlaba, bahlale kulo kuze kube phakadze.” Njengobe umhlaba ungasasilo lipharadisi lamuhla, nguliphi litsemba lesinalo lekutsi lesetsembiso sitawufezeka?a

LIPHARADISI LITAWUBA KHONA MBAMBA

Nkulunkulu Jehova, lowadala lipharadisi wetsembisa kulibuyisela. Kanjani? Khumbula kutsi Jesu wasifundzisa kutsi sithantaze sitsi: “UMbuso wakho awute. Intsandvo yakho ayentiwe emhlabeni njengasezulwini.” (Matewu 6:10) LoMbuso unguHulumende wemhlaba wonkhe lobuswa nguJesu Khristu, futsi utawubusa esikhundleni sabo bonkhe bohulumende bebantfu. (Danyela 2:44) Ngephasi kwekubusa kwaloMbuso, intsandvo yaNkulunkulu lemayelana nemhlaba lolipharadisi “itawenteka.”

Ekucaleni, umphrofethi Isaya waphefumulelwa kutsi achaze kutsi kuyoba njani kuphila epharadisi. Kutawuba bete konkhe kucabana kanye netinkinga letikhatsata bantfu lamuhla. (Isaya 11:6-9; 35:5-7; 65:21-23) Sicela kutsi utinike sikhashana ufundze lemibhalo eBhayibhelini lakho. Kwenta njalo kutakucinisekisa ngetintfo Nkulunkulu latawutentela bonkhe bantfu labamlalelako. Batawujabulela kuphila epharadisi futsi batfole umusa waNkulunkulu, lokutintfo letalahlekela bo-Adamu.​—Sembulo 21:3.

Kungani kufanele siciniseke kutsi litsemba lemhlaba lolipharadisi alisilo liphupho kodvwa liyintfo mbamba? Kungobe liBhayibheli lisitjela kutsi: “Emazulu ayindzawo yaSimakadze, yena yedvwa, kodvwa umhlaba wawuniketela kubantfu.” Litsemba lemhlaba lolipharadisi ngilo ‘Nkulunkulu longeke acale emanga lasinika lona kusukela endvulo.’ (Tihlabelelo 115:16; Thithusi 1:2) Maye lihle lelitsemba liBhayibheli lelisinika lona​—liPharadisi laphakadze!