SIHLOKO LESINGUMGOGODLA | TINGILOSI—TIKHONA MBAMBA YINI? KUNGANI KUBALULEKILE KUTSI SATI?
Liciniso Lelimayelana Netingilosi
Ungatsandza yini kwati liciniso lelimayelana netingilosi—kutsi tibobani, tadalwa ngubani, kanye nekutsi uyini umsebenti wato? Kute encenye lapho singatfola khona timphendvulo talemibuto ngaphandle kwekutsi sifundze liBhayibheli lokuliVi laNkulunkulu leliphefumulelwe. (2 Thimothi 3:16) Yini liBhayibheli lelisitjela yona mayelana netingilosi?
Tingilosi tifanana naNkulunkulu, tinemtimba wemoya lote “inyama nematsambo.” Tingilosi letetsembekile tihlala ezulwini futsi tinelilungelo lekungena lakunaNkulunkulu khona.—Lukha 24:39; Matewu 18:10; Johane 4:24.
Ngaletinye tikhatsi tingelosi betivela tibantfu kute tente imisebenti lebetiyitfunywe nguNkulunkulu kutsi tiyente lapha emhlabeni, bese kutsi nasetiyicedzile tiphindze tibuyele emitimbeni yato yemoya.—Tikhulu 6:11-23; 13:15-20.
Nanobe eBhayibhelini tichazwa ngekutsi tingemadvodza futsi nalapho titfunywa emhlabeni, tivela tingemadvodza, kodvwa ezulwini kute lendvuna nobe lensikati emkhatsini wato. Atishadi futsi atitalani. Ngetulu kwaloko, tingilosi atizange ticale kuphila emhlabeni njengebantfu—mhlawumbe tibe tinswane, bantfwana, nobe bantfu labadzala. Tingilosi tadalwa nguJehova matfupha; kungako liBhayibheli litibita ngekutsi ‘ngemadvodzana aNkulunkulu.’—Jobe 1:6; Tihlabelelo 148:2, 5.
LiBhayibheli likhuluma “ngetilwimi tebantfu netingilosi,” lokusho kutsi nato tinelulwimi futsi tiyakhuluma. Nanobe Nkulunkulu bekatfumela tingilosi kutsi tikhulume nebantfu, kodvwa akasivumeli kutsi sitikhotsamele nobe sithantaze kuto.—1 Khorinte 13:1; Sembulo 22:8, 9.
Kunetingilosi letinyenti kakhulu mhlawumbe letitigidzi tetigidzi.a—Danyela 7:10; Sembulo 5:11.
Tingilosi ‘tingemachawe lanemandla’—emandla langetulu kwewemuntfu—futsi tihlakaniphe kakhulu. Tingilosi tihamba litubane lelendlula umbane, lokulitubane lelingetulu kwalelo lelingahanjwa sidalwa lesilamhlabeni.—Tihlabelelo 103:20; Danyela 9:20-23.
Nanobe tingilosi tinemandla lamakhulu kangaka, tinemkhawulo futsi kukhona letingakwati.—Matewu 24:36; 1 Phetro 1:12.
Tingilosi tadalwa taba nemiva lefana neyebantfu, buntfu basezulwini kanye nenkhululeko yekutikhetsela. Ngako ke, njengebantfu, nato tingakhetsa kwenta lokulungile nobe lokubi. Lokubuhlungu kutsi letinye tingelosi takhetsa kuvukela Nkulunkulu.—Juda 6.
a ImiBhalo yekucala yesiGriki kuSembulo 5:11 itsi “letingilosi tatitinyenti titigidzi ngetigidzi netinkhulungwane ngetinkhulungwane,” lokungenteka tingemakhulu latigidzi tetigidzi.