Ngubani Lohola Bantfu BaNkulunkulu Lamuhla?

1, 2. Ngemuva kwekunyukela kwaJesu ezulwini, yini baphostoli bakhe lokungenteka batibuta yona?

BAPHOSTOLI baJesu bebeme eNtsabeni yeMincuma babukisise esibhakabhakeni. Bebasandza kubona inkhosi yabo nalengumngani wabo, lenguJesu, iphakanyiselwa etulu futsi isitfwa lifu. (Imis. 1:9, 10) Eminyakeni lemibili leyendlulile, Jesu bekabafundzisile, wabakhutsata futsi waphindze waba ngumholi wabo. Nyalo besekahambile. Bebatawukwenta njani?

² Jesu bekayale bafundzi bakhe watsi: “Nitawuba bofakazi bami eJerusalema, kuyo yonkhe iJudiya neSamariya, nakuto tonkhe tincenye temhlaba.” (Imis. 1:8) Yini lebeyitawubasita kute bawucedze lomsebenti? Kuliciniso kutsi Jesu bekabetsembise kutsi masinyane bebatawutfola umoya longcwele. (Imis. 1:5) Nanobe kunjalo, lomkhankhaso wekushumayela emhlabeni wonkhe bewudzinga kucondziswa kanye nekuhleleka. Etikhatsini tasendvulo Jehova bekasebentisa bameleli bakhe lababantfu kute acondzise futsi ahlele kahle bantfu bakhe. Ngako, kungenteka labaphostoli bebatibuta kutsi: ‘Jehova sewutawubeka umholi lomusha yini?’

3. (a) Ngemuva kwekwenyukela kwaJesu ezulwini, ngusiphi sincumo lesibalulekile baphostoli labatsembekile labasenta? (b) Sitawucoca ngani kulesihloko?

³ Ngemuva kwemaviki lamabili, baphostoli baJesu babuka imiBhalo, bathantazela sicondziso saJehova futsi base bakhetsa Matiyasi kutsi kube nguye lovala sikhala saJudasi Skariyothi sekuba ngumphostoli wesi-12. (Imis. 1:15-26) Bekubaluleke ngani lokukhetfwa kwalomphostoli lomusha kubo kanye nakuJehova? Matiyasi wadlala indzima lebalulekile kulelicembu.a Jesu akazange akhetse baphostoli bakhe kutsi bamphekeletele njengobe ashumayela, kunaloko wabaceceshela kwenta umsebenti lobewubaluleke kakhulu kubantfu baNkulunkulu. Ngumuphi lomsebenti, futsi Jehova wamsebentisa njani Jesu kutsi abasite bawente? Nguliphi lilungiselelo lelifanako lelikhona kubantfu baNkulunkulu lamuhla? Singabakhumbula njani “labo labaholako” emkhatsini wetfu, ikakhulukati labo labakha “sisebenti lesetsembekile nalesihlakaniphile”?​—Heb. 13:7; Mat. 24:45.

SIGUNGU SEBANTFU LESICONDZISWA NGUMHOLI LONGABONAKALI

4. Ekhulwini lekucala, ngumuphi umsebenti lowentiwa baphostoli kanye nalabanye labadzala eJerusalema?

⁴ NgeliPhentekhoste la-33 C.E., baphostoli bacala kuhola libandla lebuKhristu. Ngalelo langa, “Phetro wasukuma nebaphostoli labalishumi nakunye” futsi bafundzisa sicumbi sebantfu lebesakhiwa ngemaJuda kanye nebantfu baletinye tive emaciniso lebekasindzisa kuphila. (Imis. 2:14, 15) Linyenti labo laba ngemakholwa. Ngemuva kwaloko, lamaKhristu lamasha ‘achubeka atinikela etimfundzisweni tebaphostoli.’ (Imis. 2:42) Labaphostoli bebabuke indlela timali telibandla lebetisetjentiswa ngayo. (Imis. 4:34, 35) Bebaciniseka kutsi bantfu baNkulunkulu bahlala banebuhlobo lobucinile naye, baze batsi: “Tsine sitewutinikela ekuthantazeni nasekufundziseni ngelivi laNkulunkulu.” (Imis. 6:4) Baphindze batfuma emaKhristu lebekanesikhatsi lesidze akhonta Nkulunkulu kutsi ahambe embili ekushumayeleni emasimini lamasha. (Imis. 8:14, 15) Ngekuhamba kwesikhatsi, lamanye emadvodza lamadzala lagcotjiwe asebenta kanye nalabaphostoli ekunakekeleni tindzaba temabandla. Njengesigungu lesibusako, bebacondzisa onkhe emabandla.​—Imis. 15:2.

5, 6. (a) Umoya longcwele wasisita njani sigungu lesibusako? (Buka sitfombe lesisekucaleni kwalesihloko.) (b) Tingilosi tasisita njani sigungu lesibusako? (c) LiVi laNkulunkulu lasicondzisa njani sigungu lesibusako?

⁵ EmaKhristu elikhulu lekucala bekati kutsi sigungu lesibusako besicondziswa nguJehova Nkulunkulu, ngeMholi wabo Jesu. Yini leyabenta baciniseka ngaloku? Kwekucala, umoya longcwele bewusisita sigungu lesibusako. (Joh. 16:13) Umoya longcwele watfululelwa kuwo onkhe emaKhristu lagcotjiwe kodvwa ngalokukhetsekile bewusita baphostoli kanye nalamanye emadvodza lamadzala eJerusalema kutsi anakekele umsebenti wawo njengebabonisi. Nasi sibonelo, ngemnyaka wa-49 C.E. umoya longcwele wacondzisa sigungu lesibusako kutsi sente sincumo lesikahle mayelana nendzaba yekusoka. Emabandla alandzela sicondziso sawo futsi “kukholwa kwemabandla kwakuchubeka kuciniswa, futsi bekandza malanga onkhe.” (Imis. 16:4, 5) Lencwadzi lebeyiphetse lesincumo beyiveta kutsi sigungu lesibusako sasikhombisa titselo temoya waNkulunkulu, letifaka ekhatsi lutsandvo nekukholwa.​—Imis. 15:11, 25-29; Gal. 5:22, 23.

⁶ Kwesibili, tingilosi betisisita sigungu lesibusako. Ngaphambi kwekutsi Khoneliyuse abhajatiswe njengemKhristu wekucala webeTive, ingilosi yamcondzisa kutsi aye kumphostoli Phetro. Ngemuva kwekutsi Phetro ashumayele Khoneliyuse netihlobo takhe, umoya longcwele watfululelwa kubo nanobe bebangemadvodza langakasoki. Loku kwenta baphostoli kanye nalabanye bazalwane kutsi bente loko lokufunwa nguNkulunkulu futsi bemukele bantfu labangakasoki baletinye Tive ebandleni lebuKhristu. (Imis. 11:13-18) Ngetulu kwaloko, tingilosi betiwusekela umsebenti wekushumayela lobewentiwa sigungu lesibusako futsi tawusheshisa. (Imis. 5:19, 20) Kwesitsatfu, sigungu lesibusako besicondziswa liVi laNkulunkulu. Lamadvodza lagcotjwe ngemoya abecondziswa yimiBhalo ngisho nalapho alungisa letinye timfundziso nome akhipha ticondziso tendlela tintfo lebekufanele tentiwe ngayo kulenhlangano.​—Imis. 1:20-22; 15:15-20.

7. Yini lesenta sitsi Jesu bekahola emaKhristu ekucala?

⁷ Nanobe sigungu lesibusako besineligunya ebandleni lebuKhristu, kodvwa besati kutsi umholi waso nguJesu. Umphostoli Pawula wabhala watsi: “[Khristu] wasipha labanye baba baphostoli. Asikhule ngelutsandvo kuto tonkhe tintfo kuKhristu, loyinhloko.” (Ef. 4:11, 15) Kunekutsi batibite ngelibito lemphostoli lodvumile, “bafundzi babitwa ngekutsi ngemaKhristu.” (Imis. 11:26) Kuliciniso kutsi Pawula wasibona sidzingo ‘sekubambelela etimfundzisweni,’ nobe etentweni letisekelwe emiBhalweni lebeyishiwo baphostoli kanye nalamanye emadvodza lebekahola. Nobe kunjalo, waphindze watsi: “Kodvwa ngifuna nati kutsi inhloko yawo onkhe emadvodza [lokufaka ekhatsi onkhe emalunga esigungu lesibusako] nguKhristu; inhloko yemfati yindvodza; nenhloko yaKhristu nguNkulunkulu.” (1 Khor. 11:2, 3) Jesu longabonakali nalonguKhristu lokhatinyulisiwe, bekahola libandla ngaphansi kweNhloko yakhe lenguJehova.

“LONA AKUSIWO UMSEBENTI WEMUNTFU”

8, 9. Ngasekupheleni kwelikhulu lesi-19 leminyaka, ngumuphi umsebenti lobalulekile lowentiwa nguMzalwane Russell?

⁸ Ngasekupheleni kwelikhulu lesi-19 leminyaka, umzalwane Charles Taze Russell akanye nebangani bakhe batikhandla kute babuyisele kukhulekela kweliciniso kwebuKhristu. Kute kusakatwe liciniso leliseBhayibhelini ngetilwimi letinyenti, kwasungulwa i-Zion’s Watch Tower Tract Society ngalokusemtsetfweni nga-1884 futsi uMzalwane Russell waba ngumengameli wayo.b Bekangumfundzi weliBhayibheli lokhutsele futsi ngesibindzi wativeta ebaleni tonkhe timfundziso temanga letifaka ekhatsi imfundziso yaMtsatfu amunye kanye neyemphefumulo longafi. Bekati kutsi Khristu bekatawubuya ngekwemfanekiso nekutsi “sikhatsi lesibekiwe setive” besitawuphela nga-1914. (Luk. 21:24) Umzalwane Russell wanikela ngalokusuka enhlitiyweni ngesikhatsi sakhe, emandla akhe kanye nangemali yakhe kute atjele labanye lamaciniso laseBhayibhelini. Kuyacaca kutsi ngaleso sikhatsi lesimatima, uMzalwane Russell abesetjentiswa nguJehova akanye nenhloko yelibandla.

⁹ UMzalwane Russell akazange afune ludvumo kubantfu. Nga-1896, wabhala watsi: “Asifuni kuhlonishwa ngalokukhetsekile ngemsebenti lesiwentako noma ngetincwadzi lesitibhalile futsi asifuni kubitwa ngekutsi sibaFundisi noma Baholi. Asifuni futsi kube khona lobitwa ngeligama letfu.” Kamuva watsi: “Lona akusiwo umsebenti wemuntfu.”

10. (a) Jesu wasimisa nini “sisebenti lesetsembekile nalesihlakaniphile”? (b) Chaza umehluko emkhatsini weSigungu Lesibusako ne-Watch Tower Society.

¹⁰ Nga-1919, nasekuphele iminyaka lemitsatfu uMzalwane Russell afile, Jesu wamisa “sisebenti lesetsembekile nalesihlakaniphile.” Besiyini sizatfu saloko? Bekukuniketa bendlu yakhe “kudla ngesikhatsi lesifanele.” (Mat. 24:45) Ngisho nangaleyo minyaka, bekunelicembu lebazalwane labagcotjiwe lebelisebenta endlunkhulu e-Brooklyn, lese-New York lebelilungisa futsi linikete balandzeli baJesu imfundvo levela kuNkulunkulu. Ligama lelitsi “sigungu lesibusako” lacala kuvela etincwadzini tetfu eminyakeni yabo-1940, ngesikhatsi kucatjangwa kutsi lihlobene ne-Watch Tower Bible and Tract Society. Nobe kunjalo, nga-1971, kwacaciswa kutsi kunemehluko emkhatsini weSigungu Lesibusako ne-Watch Tower Society​—lokuyinhlangano lesetjentiswako nakukhulunywa tindzaba temtsetfo hhayi kutsi ligama lenhlangano leliseBhayibhelini. Ngako, Sigungu Lesibusako sabese sifaka nalabanye bazalwane labagcotjiwe kepha lebebangesibo bacondzisi bale-Watch Tower Society. Eminyakeni yakamuva, bazalwane ‘baletinye timvu’ baye basebenta njengebacondzisi bale-Watch Tower Society lesemtsetfweni kanye naletinye tinhlangano letisetjentiswa bantfu baNkulunkulu, lokwente kutsi Sigungu Lesibusako sikhone kunaka umsebenti wekufundzisa. (Joh. 10:16; Imis. 6:4) Sicongosekulindza saJuly 2013, sachaza kutsi “sisebenti lesetsembekile nalesihlakaniphile” silicembu lelincane lebazalwane labagcotjiwe labakha Sigungu Lesibusako.

11. Sisebenta njani Sigungu Lesibusako?

¹¹ Sigungu Lesibusako senta tincumo letibalulekile ndzawonye. Kanjani? Lamalunga ahlangana njalo ngeliviki, lokwenta kutsi akhone kukhulumisana futsi abe nebunye. (Taga 20:18) Njalo ngemnyaka kulemihlangano lababa nayo kubekwa sihlalo lomusha, kwatise kutsi kute lilunga leSigungu Lesibusako lelibhekwa njengalelimcoka kunalamanye. (1 Phet. 5:1) Ikomidi ngayinye kulamakomidi lasitfupha eSigungu Lesibusako, ikhetsa sihlalo lomusha ngendlela lefanako. Lilunga ngalinye lelikulesigungu alitiboni lingumholi walalabanye bazalwane, kunaloko litibona lingulomunye ‘webendlu,’ futsi lelondliwa ngiso lesisebenti lesetsembekile, liphindze lititfobe esicondzisweni saso.

“NGUBANI VELE LOSISEBENTI LESETSEMBEKILE NALESIHLAKANIPHILE?”

12. Njengoba Sigungu Lesibusako siwenta emaphutsa, ngumiphi imibuto lesingatibuta yona?

¹² Sigungu Lesibusako akusho kutsi siyembulelwa tintfo noma asiwenti emaphutsa. Ngako, singawenta emaphutsa kuletinye timfundziso nobe sente emaphutsa kuletinye ticondziso letisikhiphako. Bufakazi baloku, kutsi i-Watch Tower Publications Index inesihloko lesitsi “Beliefs Clarified,” lesikhombisa lushintjo lolwentiwe endleleni lesicondza ngayo imiBhalo kusukela nga-1870. Ecinisweni, Jesu akashongo kutsi lesisebenti sakhe lesetsembekile besitokhipha kudla lokute emaphutsa. Ngako, singawuphendvula njani lombuto waJesu lotsi: “Ngubani vele losisebenti lesetsembekile nalesihlakaniphile?” (Mat. 24:45) Ngubuphi bufakazi lobukhona lobukhombisa kutsi Sigungu Lesibusako singulesisebenti? Asesicoce ngetintfo letintsantfu lebeticondzisa sigungu lesibusako sangelikhulu lekucala.

13. Umoya longcwele usisite njani Sigungu Lesibusako?

¹³ Bufakazi bekusekelwa ngumoya longcwele. Umoya longcwele usite Sigungu Lesibusako kutsi sicondze emaciniso emBhalo lebekulikhuni kuwacondza ngaphambilini. Nasi sibonelo, cabanga nje ngaloluhla lwetingucuko letitfolakala kulesihlokwana lesitsi “Beliefs Clarified” lokukhulunywe ngalo kulesigaba lesingenhla. Kuliciniso kutsi kute umuntfu lokufanele aniketwe ludvumo ngenca yekutsi uyakhona kuchaza “tintfo letijulile taNkulunkulu”! (Fundza 1 Khorinte 2:10.) Sigungu Lesibusako sivumelana nemavi emphostoli Pawula lowabhala watsi: “Letintfo asitikhulumi ngemavi lafundziswa ngekuhlakanipha kwebantfu, kodvwa sitikhuluma ngemavi lafundziswa ngemoya.” (1 Khor. 2:13) Ngemuva kweminyaka leminyenti bantfu bahlubukile futsi basebumnyameni, kusebaleni kutsi ngumoya longcwele kuphela lobewungasita ekucondzeni liVi laNkulunkulu kusukela nga-1919.

14. Ngekusho kweSembulo 14:6, 7, tingilosi tibasita njani bantfu baNkulunkulu lamuhla?

¹⁴ Bufakazi bekusitwa tingilosi. Lamuhla, Sigungu Lesibusako sinemsebenti lomkhulu wekwengamela umsebenti wekushumayela lowentiwa emhlabeni wonkhe, lowentiwa nabamemeteli labangetulu kwetigidzi letisiphohlongo. Yini leyente lomsebenti longaka waba yimphumelelo? Lesinye sizatfu sikutsi siwenta netingilosi. (Fundza Sembulo 14:6, 7.) Etikhatsini letinyenti, bamemeteli baye bacondziswa kubantfu lebebathantazela lusito!c Kwandza lokukhona emsebentini wekushumayela newekwenta bafundzi ngisho nangetulu kwekuphikiswa lokunebudlova kuletinye tindzawo, kukhombisa kutsi sisekelwa ngemandla langetulu kwewemuntfu.

15. Ngumuphi umehluko lokhona emkhatsini weSigungu Lesibusako kanye nebaholi bemasontfo ebuKhristu? Niketa sibonelo.

¹⁵ Kwetsembela eVini laNkulunkulu. (Fundza Johane 17:17.) Cabanga ngaloko lokwenteka nga-1973. Sicongosekulindza lesitfolaka ngesiNgisi saJune 1, sabuta umbuto lotsi: “Bantfu labasachubeka nemkhuba wekubhema, bangabhatjatiswa yini?” Imphendvulo yatsi: “Bufakazi lobusemiBhalweni bukhombisa kutsi ngeke babhajatiswe.” Ngemuva kwekuhlola imibhalo leminyenti lehlobene nalendzaba, le-Sicongosekulindza sachaza kutsi kungani kufanele loyo muntfu longaphendvuki ayekeliswe kuba nguFakazi. (1 Khor. 5:7; 2 Khor. 7:1) LeSicongosekulindza saphindze satsi: “Loku akusho kutsi lesimiso sekuyekeliswa kuba nguFakazi kwalesoni lesingaphendvuki, kuyintfo lesitisungulele yona. LiBhayibheli liyakhombisa kutsi lona ngumyalo lovela kuNkulunkulu.” Kukhona yini lenye inkholo letimisele kutsembela eVini laNkulunkulu ngalokuphelele, ngisho noma kwenta kanjalo kungaletsela emalunga ayo inselele? Incwadzi lekhuluma ngetenkholo eMelika, itsi: “Baholi bemasontfo ebuKhristu sebabuyekete timfundziso tabo ngendlela yekutsi tihambisane netinkholelo kanye nemibono lekhona ngenjongo yekutsi emalunga abo kanye nalabanye bantfu babasekele. “Nangabe Sigungu Lesibusako sivumela liVi laNkulunkulu kunekuvumela imibono yebantfu kutsi icondzise tincumo taso, loko kusitjela kutsi ngubani vele locondzisa bantfu baNkulunkulu lamuhla?

“KHUMBULANI LABO LABANIHOLAKO”

16. Nguyiphi indlela lesingakhumbula ngayo Sigungu Lesibusako?

¹⁶ Fundza Hebheru 13:7. Leligama lelitsi “khumbulani” lingaphindze lihunyushwe ngekutsi “bafake.” Ngako, lenye indlela ‘lesingakhumbula ngayo labasiholako,’ kutsi sifake Sigungu Lesibusako emithantazweni yetfu. (Ef. 6:18) Cabanga ngemsebenti labanawo wekulungiselela imfundvo levela kuNkulunkulu, wekwengamela umsebenti wekushumayela emhlabeni wonkhe kanye newekunakelela umnikelo lovela emhlabeni wonkhe. Ngako, kuyintfo lekahle kakhulu kutsi sibathantazele!

17, 18. (a) Singakhombisa njani kutsi siyabambisana neSigungu Lesibusako? (b) Umsebenti wekushumayela usisekela njani sisebenti lesetsembekile kanye naJesu?

¹⁷ Kukhumbula Sigungu Lesibusako kusho lokungetulu nje kwekumane sikusho ngemlomo, kodvwa kusho nekulalela ticondziso lesisineketa tona. Sigungu Lesibusako sisiniketa sicondziso ngetincwadzi letisekelwe eBhayibhelini, ngemihlangano yelibandla, yesigodzi neyesifundza. Ngetulu kwaloko, sibeka babonisi betigodzi, nabo lababese babeka emadvodza lamadzala emabandla. Babonisi betigodzi nemadvodza lamadzala akhumbula Sigungu Lesibusako ngekutsi balandzele tonkhe ticondziso lesibaniketa tona. Sonkhe sihlonipha uMholi wetfu Jesu, ngekutsi sititfobe futsi silalele lamadvodza lawasebentisako kute asicondzise.​—Heb. 13:17.

¹⁸ Lenye indlela lesikhumbula ngayo Sigungu Lesibusako, kutsi sitinikele emsebentini wekushumayela. Ngetulu kwaloko, Pawula weluleka emaKhristu kutsi alingise kukholwa kwalabo labaholako emkhatsini wabo. Sisebenti lesetsembekile sikhombise kutsi sinekukholwa lokucinile ngekutsi sikhutsale emsebentini wekushumayela tindzaba letimnandzi teMbuso. Ungulomunye waletinye timvu yini, losekela labagcotjiwe kulomsebenti lobalulekile? Utawujabula ngesikhatsi uMholi wakho, Jesu atsi: “Loku lenikwente kulabomnaketfu labancane, nikwente kimi.”​—Mat. 25:34-40

19. Yini lekwenta kutsi utimisele kulandzela uMholi wetfu, Jesu?

¹⁹ Ngesikhatsi Jesu abuyela ezulwini, akazange abalahle balandzeli bakhe. (Mat. 28:20) Bekati kahle kutsi umoya longcwele, tingilosi kanye neliVi laNkulunkulu kwamsita kanganani kute abe ngumholi lokahle ngesikhatsi aselapha emhlabeni. Ngako, nalamuhla uniketa lesisebenti lesetsembekile lusito lolufanako. NjengemaKhristu lagcotjiwe, lamalunga alesisebenti achubeka alandzela “liWundlu nobe ngukuphi lapho liya khona.” (Semb. 14:4) Ngako, njengobe silandzela sicondziso sawo, silandzela uMholi wetfu, Jesu. Madvutane utasiholela ekuphileni lokuphakadze. (Semb. 7:14-17) Kute umholi longumuntfu longasetsembisa loku!