Jehova Usidvudvuta Kuko Konkhe Kuhlupheka Kwetfu

1, 2. Jehova usidvudvuta njani nasibhekene nebumatima, futsi liVi lakhe lisicinisekisa njani ngaloko?

UMZALWANE losemusha lobekangakashadi, lesitambita ngekutsi ngu-Eduardo, watjela Stephen, lobekangulomdzala ebandleni futsi lobekashadile, kukhatsateka kwakhe. Eduardo bekasolo acabanga ngaloko lesikufundza ku-1 Khorinte 7:28 nawutsi: “Labo labashadako batawuba nelusizi enyameni.” Eduardo wambuta watsi: “Luyini ‘lolusizi,’ futsi ngitawubhekana njani nalo nasengishadile?” Stephen angakawuphendvuli lombuto wa-Eduardo, wamcela kutsi acabange ngaloko lokwabhalwa ngumphostoli Pawula nakatsi Jehova unguNkulunkulu “wayo yonkhe indvudvuto.”​—2 Khor. 1:3, 4.

² Jehova unguBabe lositsandzako, futsi uyasidvudvuta nangabe sibhekene nebumatima. Kungenteka tikhona timo lowabhekana nato lapho Nkulunkulu akusekela khona waphindze wakucondzisa ngeliVi lakhe, liBhayibheli. Siyaciniseka kutsi usifunela lokuncono kakhulu njengoba enta etincekwini takhe tasendvulo.​—Fundza Jeremiya 29:11, 12.

3. Ngumiphi imibuto lesitayiphendvula?

³ Nangabe sati kutsi iyini imbangela yetinkinga tetfu, kulula kutsi sibhekane nato. Kuyafana nangetinkinga bantfu labashadile noma imindeni lababhekana nato ekuphileni. Ngako-ke, ngutiphi tintfo letingaletsa ‘lusizi enyameni’ Pawula lakhuluma ngato? Ngutiphi tibonelo tasendvulo lokukhulunywa ngato eBhayibhelini kanye netalamuhla, letingasisita kute sitfole indvudvuto lesiyidzingako? Letibonelo titasisita kutsi sikhone kubhekana nebumatima.

KUHLUPHEKA​—‘LUSIZI ENYAMENI’

4, 5. Ngutiphi letinye tintfo letibanga ‘lusizi enyameni’?

⁴ Kukhona lesingakufundza kuloko Nkulunkulu lakusho nakucala umlandvo webantfu, watsi: “Indvodza iyawushiya uyise nenina inamatsele kumfati wayo, bese baba nyamanye.” (Gen. 2:24) Jehova washo lamavi nakasungula umshado wekucala. Noma kunjalo, ngenca yekutsi sinesono, kushada kanye nekucala umndeni lomusha kungabangela kucindzeteleka emalungwini emndeni. (Rom. 3:23) Ngalokuvamile, ligunya lebatali litsatselwa sikhundla ligunya lendvodza. Nkulunkulu unike indvodza lilungelo lekuba yinhloko yemfati wayo. (1 Khor. 11:3) Lamanye emadvodza kanye nebafati labasandza kushada bakutfola kumatima kulandzela lesimiso. Ngekusho kweliVi laNkulunkulu, umfati kufanele akwemukele kutsi sewutawucondziswa yindvodza yakhe hhayi batali bakhe. Nangabe buhlobo balabo labasandza kushada kanye nebasekhakhabo bungasibuhle, loku kungabangela labo labashadile kutsi bacindzeteleke.

⁵ Lokunye kucindzeteleka kuvamise kuvela ngalesikhatsi umfati atjela indvodza yakhe kutsi, sewukhulelwe. Ngalokuvamile, injabulo yabo ngalomntfwana lotawutalwa, iphatanyiswa kucabanga ngetindleko tekwelapha ngesikhatsi umfati asetetfwele nalapho sekabelekile. Kufanele baphindze bacabange ngetindleko letitawuba khona madvutane ngisho nasesikhatsini lesitako. Kudzingeka lushintjo lolunyenti nasekatelwe lomntfwana. Sikhatsi salomake lomusha lesinyenti sekufanele asisebentisele kunaka lomntfwana. Esikhatsini lesinyenti, indvodza itiva seyingasanakwa ngenca yekutsi umfati sewunake kakhulu imisebenti lephatselene nalomntfwana. Ngakulolunye luhlangotsi, lobabe lomusha sewunemitfwalo lemisha lekufanele ayinakekele. Tintfo lekufanele atente tiyandza ngobe sekunelilunga lemndeni lelisha lokufanele alondle.

6-8. Kungabatfoli bantfwana kungakubangela njani kucindzeteleka?

⁶ Kunalolunye luhlobo lwelusizi bantfu labashadile lababhekana nalo. Kungenteka bafise kuba nebantfwana kodvwa bagcine bangakabatfoli. Nangabe umfati angakhulelwa, angativa acindzeteleke kakhulu. Kushada noma kutala bantfwana akusicinisekisi kutsi ngeke sikhatsateke, kodvwa kungatfoli bantfwana kona ngekwako nje ‘kulusizi enyameni.’ (Taga 13:12) Ngetikhatsi teliBhayibheli, kungabatfoli bantfwana bekulihlazo. Rakheli, umfati waJakobe wakhatsateka kakhulu nakabona dzadzewabo atfola bantfwana. (Gen. 30:1, 2) Titfunywa telivangeli letikhonta etindzaweni lapho khona kulisiko kutsi ube nemndeni lomkhulu, tihlale tibutwa kutsi kungani tite bantfwana. Noma tingetama kanganani kuchaza kahle, labo lababutako bayaye batsi: “Sitanibeka emthantazweni.”

⁷ Cabanga nangalomunye dzadze waseNgilandi lobekanesifiso lesikhulu sekuba nemntfwana, kodvwa leso sifiso asizange sifezeke. Ngemuva kwesikhatsi, wakwemukela kutsi abengeke aze abe nabo bantfwana labatalwa nguye. Wavuma kutsi loko bekumvisa buhlungu, futsi wagcina abonile kutsi sifiso sakhe besingeke sifezeke kulesimiso lesi. Yena nendvodza yakhe bancuma kuyofuna umntfwana labatamfaka esiswini. Nome kunjalo, lodzadze utsi: “Ngachubeka ngicindzetelekile. Bengati kutsi kuba nemntfwana longatalwa ngimi bekungeke kufane nekuba nemntfwana lengimtele.”

⁸ LiBhayibheli liyasho kutsi umfati longumKhristu utawuphepha “ngekutfola bantfwana.” (1 Thim. 2:15) Loku akusho kutsi kutala bantfwana noma kuba nebantfwana sekutawunika batali kuphila lokuphakadze. Kunaloko, kusho kutsi umfati lonebantfwana angaba nalokunyenti langakwenta nangabe anakekela bantfwana bakhe kanye naleminye imisebenti yasekhaya, lokungamenta angangeneli umkhuba wekuhleba labanye noma anake tindzaba talabanye. (1 Thim. 5:13) Nome kunjalo, tisekhona tinsizi langahle abhekane nato letiphatselene nemshado wakhe kanye nemphilo yemndeni.

9. Kufa kwaloyo loshade naye kulubangela njani lusizi lolumatima?

⁹ Nasikhuluma ngetinsizi letibakhona emshadweni, kunalolunye lusizi lesingakavami kucabanga ngalo. Kufa kwaloyo lesimtsandzako. Lusizi lolumatima labanyenti lababhekana nalo, kufa kwalabo labashade nabo. Kungenteka kutsi lolu lusizi lebekangakalulindzeli lona losasele yedvwana. EmaKhristu ayakholelwa esetsembisweni lesashiwo nguJesu lesimayelana neluvuko lolutako. (Joh. 5:28, 29) Loko kumsita njani loyo losasele? Kumdvudvuta kakhulu. Lena ngulenye indlela Babe wetfu lonelutsandvo lasidvudvuta ngayo, asebentisa liVi lakhe, liBhayibheli, kute asite labo lababhekene nebumatima. Asesicoce ngekutsi letinye tinceku taNkulunkulu tativa njani naticindzetelekile nekutsi Jehova watidvudvuta njani.

KUTFOLA INDVUDVUTO NASISETINKINGENI

10. Hana wadvudvuteka njani ekucindzetelekeni kwakhe? (Buka sitfombe lesisekucaleni kwalesihloko.)

¹⁰ Hana umfati lotsandzekako wa-Elkhana, wake wabhekana nelusizi. Bekangabatfoli bantfwana, kodvwa lomunye umfati wa-Elkhana, longuPhenina abebatfola. (Fundza 1 Samuweli 1:4-7.) Hana wetfukwa nguPhenina ‘umnyaka ngemnyaka.’ Bekumvisa buhlungu kakhulu Hana futsi kumcindzetela. Wafuna kukhululeka ngekutsi atjele Jehova lenkinga yakhe ngemthantazo. Ngako-ke ‘wachubeka athantaza’ kuJehova. Abelindzele kutsi Jehova amphendvule yini kulesicelo sakhe? Kungenteka bekanelitsemba lelinjalo. Ngemuva kwaloko, “buso bakhe abuzange buphindze bubonakale bujabhile.” (1 Samuweli 1:12, 17, 18) Beketsemba kutsi Jehova kungenteka aphendvule umthantazo wakhe ngekutsi asuse lokungabatfoli kwakhe bantfwana noma amphendvule ngalenye indlela.

11. Umthantazo ungasidvudvuta njani?

¹¹ Tinsizi kanye netinkinga titawuchubeka tikhona nangabe nje sisenesono futsi sisekulelive lelibuswa nguSathane. (1 Joh. 5:19) Kuyajabulisa kwati kutsi Jehova nguNkulunkulu “wayo yonkhe indvudvuto”! Lenye indlela lesingatfola ngayo lusito kute sibhekane netinkinga, kutsi sithantaze. Hana watfululela sifuba sakhe kuJehova. Ngendlela lefanako, nangabe sibhekene netinkinga, sifuna kwenta lokungetulu kwekumane sitjele Jehova indlela lesitiva ngayo. Kufanele simcele, futsi sivete indlela lesitiva ngayo ngekutsi sithantaze ngalokusuka enhlitiyweni.​—Fil. 4:6, 7.

12. Yini leyasita umfelokati longu-Ana kutsi atfole injabulo?

¹² Ngisho noma siva shengatsi sinesitunge, ngenca yekutsi asibatfoli bantfwana noma sifelwe ngumuntfu lesimtsandzako, kodvwa singayitfola indvudvuto. Ngesikhatsi saJesu, umprofethikazi Ana wafelwa yindvodza yakhe ngemuva nje kweminyaka lesikhombisa bashadile. LiBhayibheli alisho kutsi bebanebantfwana. Ana abesolo entani kuyo yonkhe leminyaka aze abe neminyaka lengu-84 budzala? Incwadzi yaLukha 2:37 itsi: “Abeba khona njalo ethempelini, akhonta khona busuku nemini, azila kudla, futsi ancusa kuNkulunkulu.” Ana watfola indvundvuto kanye nenjabulo ngekukhonta Jehova.

13. Niketa sibonelo sendlela bangani beliciniso labasidvudvuta ngayo ngisho nalapho tihlobo tengati tehluleka kusidvudvuta.

¹³ Nasitihlanganisa nebazalwane betfu kanye nabodzadzewetfu, sitfola bangani beliciniso nalabahlala basedvutane natsi. (Taga 18:24) Paula wakhumbula indlela leva buhlungu ngayo nakaneminyaka lesihlanu budzala ngesikhatsi make wakhe ayekela kuba nguFakazi. Bekungasiko lula kubhekana nalesimo. Kwamcinisa kakhulu loko lokwentiwa ngu-Ann, dzadze lobekalihlahlandlela ebandleni, lobekanesifiso lesikhulu sekusita Paula kutsi abe nebuhlobo lobuhle naNkulunkulu. Paula utsi: “Ngisho noma Ann abengasiso sihlobo sami, kodvwa ngeva kutsi uyangikhatsalela ngalesikhatsi angisita. Lolutsandvo lwakhe lwangisita kakhulu ngoba ngakhona kuchubeka ngikhonta Jehova.” Paula wachubeka akhonta Jehova ngekwetsembeka. Uphindze ajatjuliswe kukhonta Nkulunkulu akanye na-Ann losafanana namake wakhe ebandleni. Ann naye uyajabula ngekuba ngumake waPaula enkhosini.

14. Ngutiphi tibusiso letitfolwa ngulabo labadvudvuta labanye?

¹⁴ Lokujabulisako kutsi nangabe sikhombisa labanye kukhatsalela kwelutsandvo, loko kungenta kutsi sibe nemibono lemihle ngalabanye. Bodzadze labashadile nalabangakashadi, bayati kutsi injabulo lenkhulu itfolakala ngekushumayela tindzaba letimnandzi bakanye naNkulunkulu. Umgomo wabo kudvumisa Nkulunkulu ngekwenta intsandvo yakhe. Labanye batsatsa umsebenti wekushumayela njengelikhambi letinkinga tabo. Ecinisweni, sonkhe sifaka sandla ebunyeni belibandla nangabe sikhombisa kutsi siyabakhatsalela labanye, kungaba kutsi basensimini yetfu noma basebandleni. (Fil. 2:4) Umphostoli Pawula abesibonelo lesihle kuloku. Waba ‘njengemfati lonakekela bantfwabakhe’ kulabo lebebasebandleni laseThesalonika, futsi bekaphindze abe ngubabe eNkhosini.​—Fundza 1 Thesalonika 2:7, 11, 12.

INDVUDVUTO LESIYITFOLA EMNDENINI

15. Bobani labanemtfwalo wekufundzisa bantfwana liciniso leliseBhayibhelini?

¹⁵ Lenye intfo ledzinga kunakwa kakhulu, yindvundvuto nelusito lesiluniketa leminye imindeni. Kulesinye simo, labo labasandza kuhlanganyela bangase bacele bamemeteli labavutsiwe kutsi babafundzise liciniso noma badadishe nebantfwana babo liBhayibheli. Ngekwaloko lokushiwo liBhayibheli, kungumtfwalo webatali kutsi bafundzise baphindze baceceshe bantfwana babo. (Taga 23:22; Ef. 6:1-4) Kuletinye timo lusito loluvela kulabanye luyadzingeka futsi luyajabulisa. Noma kunjalo, loku akusho kutsi batali sebemukwe umtfwalo wabo. Kukhulumisana ngaso sonkhe sikhatsi kubalulekile emndenini.

16. Nasisita bantfwana balabanye, yini lokufanele siyicaphele?

¹⁶ Nangabe umtali ancuma kutsi umntfwana wakhe afundziswe ngulomunye liciniso leliseBhayibhelini, loyo loniketwe lomtfwalo akukafanele etame kutsatsa sikhundla sebatali baloyomntfwana. Kunetimo letingenta kutsi Fakazi acelwe kutsi atadishe liBhayibheli nemntfwana wemtali longasuye Fakazi. Kufanele kuhlale kusengcondvweni yaloFakazi loceliwe kutsi kufundzisa lomntfwana liciniso leliseBhayibhelini akumenti kutsi abe ngumtali walomntfwana. Nakusafundvwa nalomntfwana, kungaba kuhle kutsi afundzelwe lakahlala khona akanye nebatali bakhe noma kube khona lomunye Fakazi lovutsiwe, noma sichutjelwe endzaweni lekahle yemphakatsi. Loko kuyokwenta kutsi kubebete losolako nakusachutjwa leso sifundvo seliBhayibheli. Kuyetsenjwa kutsi ngekuhamba kwesikhatsi, labatali bangase bakwente loko Nkulunkulu labebele kona njengebatali kutsi bafundzise bantfwana babo liciniso.

17. Bantfwana bangaba njani ngumtfombo wendvundvuto?

¹⁷ Labasha labatsandza Nkulunkulu weliciniso futsi balalele imitsetfo yakhe, bangaba ngumtfombo wendvundvuto emndenini. Loko bangakwenta ngekutsi bahloniphe batali babo futsi babasite ngetintfo labatidzingako ekuphileni. Bangaphindze babe nesandla ekutfutfukiseni indlela lomndeni lokhonta ngayo Nkulunkulu. Ngaphambi kwaZamcolo, umtukulu waSethi, longuLameka, wakhonta Jehova. Lendvodza lebeyinemndeni, yatsi ngendvodzana yayo lenguNowa: “Lona-ke nguye lotasidvudvuta emsebentini wetfu nasekukhatsatekeni kwetfu kuwo lomhlabatsi lowacalekiswa nguSimakadze.” Lesiphrofetho sagcwaliseka ngemuva kwazamcolo, ngesikhatsi Jehova asusa sicalekiso emhlabeni. (Gen. 5:29; 8:21) Ngelizinga lelingetulu kwelemuntfu, bantfwana labalwela kukhonta kweliciniso bangaba ngumtfombo wendvundvuto emindenini yakubo. Bangasita onkhe emalunga emndeni kutsi akhutsatelele tinkinga letikhona nyalo futsi awasite asindze kuloko lokungetulu kwaZamcolo.

18. Yini lengasisita kutsi sikhutsatele ngesibindzi noma ngabe ngukuphi kuhlupheka noma tinsizi lesibhekana nato?

¹⁸ Kuthantaza, kuzindla ngetibonelo letiseBhayibhelini, kanye nekutihlanganisa nebantfu baJehova kusita tigidzi tebantfu kutsi titfole indvundvuto natibhekene netinsizi. (Fundza Tihlabelelo 145:18, 19.) Kwati kutsi Jehova ungumtfombo wendvundvuto lengapheli, kutasisita kutsi sikhutsatele ngesibindzi kunoma ngabe nguluphi lusizi lesibhekene nalo nyalo kanye nalolo lolutako.