Usakhumbula Yini?

Ubafundze kahle yini bomagazini bakamuva beSicongosekulindza? Nangabe kunjalo, asewubone kutsi ungakwati yini kuphendvula lemibuto lelandzelako:

Nangabe inhlangano yaNkulunkulu iniketa ticondziso, yini lokufanele bazalwane bayente, kungaba babonisi betigodzi, kanye nemadvodza lamadzala elibandla?

Kufanele basheshe batilalele. Kufanele batibute kutsi:‘Ngiyasifaka yini sandla kute ngisite labanye batfutfukise buhlobo babo naJehova? Ngiyashesha yini kwemukela sicondziso futsi ngisekele bazalwane labaholako?’​—w16.11, likh. 11.

EmaKhristu eliciniso atfunjelwa nini eBhabhulona?

Loku kwenteka ngekushesha nje ngemuva kwekufa kwebaphostoli. Ngaleso sikhatsi, kwavela licembu lebafundisi. Baholi belisontfo kanye neTiphatsimandla teMbuso bakhutsata emaKhristu kutsi ahlubuke futsi betama kuthulisa emaKhristu lebekafana nakolo. Emakhulwini eminyaka ngaphambi kwa-1914, emaKhristu lagcotjiwe acala kukhululeka.​—w16.11, emakh. 23-25.

Kungani umsebenti waLefèvre d’Étaples bewubalulekile?

Ngabo-1520, Lefèvre wahumushela liBhayibheli elulwimi lesiFulentji kute likhone kufundvwa bantfu labavamile. Indlela lebekachaza ngayo tincenye teliBhayibheli yabatsintsa boMartin Luther, William Tyndale kanye naJohn Calvin.​—wp16.6, emakh. 10-12.

Uyini umehluko emkhatsini ‘wekunaka tintfo tenyama’ kanye ‘nekunaka tintfo temoya’? (Rom. 8:6)

Umuntfu lonaka tintfo tenyama uvamise kukhuluma ngetintfo tenyama, ente tintfo letihambisana nayo futsi ajatjuliswe tintfo letiphatselene nenyama. Umuntfu lonaka tintfo temoya unaka kakhulu tintfo letiphatselene naNkulunkulu kanye nemicabango yakhe. UmKhristu lonjalo ucondziswa ngumoya longcwele. Kunaka inyama kusho kufa, kantsi kunaka tintfo letiphatselene naNkulunkulu kusho kuphila nekuthula.​—w16.12, emakh. 15-17.

Yini lesingayenta kute sinciphise kucindzeteleka?

Naka tintfo letibalulekile, ungatibekeli imigomo longeke ukhone kuyifinyelela, tinike sikhatsi sekuba wedvwa malanga onkhe, tinike sikhatsi sekubuka indalo yaJehova, hlala ujabulile, tinike sikhatsi sekucecesha umtimba futsi ube nesikhatsi lesenele sekulala.​—w16.12, emakh. 22-23.

“Enoki watsatfwa kuze angakuboni kufa.” (Heb. 11:5) Kanjani?

Kubonakala shengatsi Jehova wakutsatsa kuphila kwa-Enoki wangeva nekutsi sewuyafa.—wp17.1, emakh. 12-13.

Kusebalulekile yini kutfobeka?

Kutfobeka kusho kungaticabangi sibakhulu kunaloko lesingiko kanye nekukwati loko lesingeke sikhone kukwenta. Kufanele sati kutsi indlela lesenta ngayo iyabatsintsa labanye futsi singatiboni sibaluleke kakhulu kunabo.​—w17.01, likh. 18.

Ngubuphi bufakazi lobukhombisa kutsi Nkulunkulu bekasicondzisa sigungu lesibusako sangelikhulu lekucala nekutsi uyabacondzisa labo labakha Sigungu Lesibusako lamuhla?

Ngekusitwa ngumoya longcwele, bakhona kutfola emaciniso laseBhayibhelini. Ngekusitwa tingilosi, bakhona kubona lapho bekufanele bayoshumayela khona futsi bebatsembela eVini laNkulunkulu kute libacondzise. Letintfo leti tisenteka nalamuhla.​—w17.02, emakh. 26-28.

Ngutiphi tintfo letisenta sibheke inhlawulo njengalebalulekile?

Nati letintfo, tine: Ngubani lokuphe lesipho, kungani akuphe lesipho, ngukuphi kutidzela lakwentile kute usitfole kanye nekutsi bewusidzinga mbamba yini lesipho. Kufanele sizindle ngaletintfo kutsi tihlobana kanjani nenhlawulo.​—wp17.2, emakh. 4-6.

UmKhristu angasishintja yini sincumo lebekasasentile?

Kufanele sikwente loko lesesikushito. Nanobe kunjalo, ngalesinye sikhatsi kufanele siphindze sicabangisise ngesincumo lesisentile. Nkulunkulu wasishintja sincumo lebesekasitsetse ngebantfu baseNineve ngemuva kwekuba baphendvuke. Ngalesinye sikhatsi, kushintja kwetimo nobe lwati lolusha lesesinalo kungase kudzinge kutsi sishintje sincumo lebesesisentile.​—w17.03, pp. 16-17.

Kungani inhlebo lembi iyingoti?

Ingenta inkinga ingasalawuleki futsi yente simo sibe sibi kakhulu. Kungakhatsaliseki kutsi loko lesikukhulumako kuliciniso nobe kungemanga, kukhuluma kabi ngalabanye akusilungisi simo.​—w17.04, likh. 21.