“Tsandza . . . Ngetento Nangeliciniso”

1. Nguluphi luhlobo lwelutsandvo lolubaluleke kakhulu, futsi kungani? (Buka sitfombe lesisekucaleni kwalesihloko.)

LUTSANDVO lolusekelwe etimisweni letifanele (a·gaʹpe) lusipho lesivela kuJehova. Nguye umtfombo walo. (1 Joh. 4:7) Lolutsandvo lubaluleke kakhulu. Lufaka ekhatsi imivelo kanye nekukhatsalelana futsi libonakala ngekuba bete bugovu. Lenye incwadzi itsi i-a·gaʹpe “ibonakala ngetento.” Nangabe sikhombisa lutsandvo noma sikhonjiswa lutsandvo lolute bugovu, kuphila kwetfu kuyatfutfuka, kujabulise futsi kube nenjongo.

2, 3. Jehova ubakhombise njani bantfu lutsandvo lolute bugovu?

² Jehova wakhombisa kutsi uyabatsandza bantfu nangaphambi kwekutsi adale bo-Adamu na-Eva. Wadala umhlaba waba likhaya lebantfu, indzawo lapho bebangeke baphile nje kuphela kodvwa bakujabulele kakhulu kuhlala khona kuze kube phakadze. Jehova wenta loku kute kuzuze tsine, hhayi yena. Waphindze wakhombisa lutsandvo lolute bugovu ngekubusisa bantfwana bakhe ngelitsemba lekuphila phakadze emhlabeni loliPharadisi lebekabalungiselele lona.

³ Ngemva kwekuvukela kwabo-Adamu na-Eva, Jehova wenta sento lesibalulekile lesikhombisa lutsandvo lwakhe lolute bugovu. Walungiselela inhlawulo ngobe abeciniseka kutsi kulesitukulwane salabantfu lababili labavukela kukhona labebatawukhombisa kubonga ngalolutsandvo lwakhe. (Gen. 3:​15; 1 Joh. 4:​10) Ecinisweni, ngesikhatsi Jehova atsembisa kusinika uMhlengi, kuye loku bekungatsi sekuvele kwentekile. Ngemuva kweminyaka lengu-4 000, Jehova wanikela ngeNdvodzana yakhe lekuphela kwayo kute ahlenge bantfu. (Joh. 3:​16) Sibonga kakhulu ngelutsandvo lwaJehova lolute bugovu!

4. Yini lekhombisa kutsi bantfu labanesono bangakhona kukhombisa lutsandvo lolute bugovu?

⁴ Natsi siyakhona kukhombisa lutsandvo ngobe Nkulunkulu wasidala ngemfanekiso wakhe. Sono lesisitfole njengelifa senta kube matima kutsi sikhombise lutsandvo, kepha loko akusho kutsi ngeke sikhone kulukhombisa. Abela wakhombisa kutsi uyamtsandza Jehova ngekutsi anikele ngalokuhle lebekanako. (Gen. 4:3, 4) Nowa wakhombisa lutsandvo lolute bugovu kubantfu bakubo ngekutsi abatjele umlayeto waNkulunkulu ngisho noma bangamlaleli. (2 Phet. 2:5) Ngesikhatsi Abrahama ayalwa kutsi anikele nga-Isaka indvodzana yakhe, wakhombisa kutsi umtsandza kakhulu Jehova kwendlula indlela labetiva ngayo. (Jak. 2:21) Njengalamadvodza labetsembekile, natsi sifuna kukhombisa lutsandvo ngisho noma sibhekana netinkinga.

UMEHLUKO EMKHATSINI WELUTSANDVO MBAMBA NELUTSANDVO LWEKUTENTISA

5. Singalukhombisa njani lutsandvo lolute bugovu?

⁵ LiBhayibheli litsi akukafaneli sitsandze “ngelivi nobe ngemlomo kuphela, kodvwa kufanele sitsandze ngetento nangeliciniso.” (1 Joh. 3:18) Loku kusho kutsi angeke sikhone yini kukhombisa lutsandvo ngemavi? Cha, singakhona! (1 Thes. 4:18) Kunaloko, kusho kutsi lutsandvo lwetfu akukafanele sigcine ngekulukhombisa ngemavi kuphela, kodvwa nangetento nangabe kufanele. Nasi sibonelo, nangabe umKhristu lesikanye naye eswele tintfo letibalulekile ekuphileni, udzinga lokungetulu nje kwekumane simfisele lokuhle. (Jak. 2:15, 16) Ngalokufanako, kutsandza Jehova kanye nabomakhelwane betfu kutawusenta singagcini nje ngekucela Jehova kutsi ‘engete tisebenti tekuvuna’ kuphela kodvwa natsi sihlanganyele ngalokugcwele kulomsebenti wekushumayela.​—Mat. 9:38.

6, 7. (a) Luyini “lutsandvo lolute kutentisa”? (b) Ngutiphi letinye tibonelo telutsandvo lwekutentisa?

⁶ Umphostoli Johane wabhala kutsi kufanele sitsandze “ngetento nangeliciniso.” Ngako lutsandvo lwetfu kufanele lubebete “kutentisa.” (Rom. 12:9; 2 Khor. 6:6) Loku kusho kutsi angeke sikhone kukhombisa lutsandvo lolusuka enhlitiyweni nangabe sitentisa kube ngatsi sifake intfo yekufihla buso (mask). Singatibuta kutsi, ‘Lukhona yini vele lutsandvo lwekutentisa?’ Cha, nangabe sitentisa, sisuke site lutsandvo.

⁷ Asesicoce ngetibonelo tebantfu labebanelutsandvo lwekutentisa. Ensimini yase-Edeni, Sathane wenta ngatsi umfunela lokuncono kakhulu Eva, kodvwa tento takhe takhombisa kutsi unebugovu futsi uyatentisa. (Gen. 3:4, 5) Ngesikhatsi saDavide, Ahithofeli wakhombisa kutsi bekangasuye umngani weliciniso. Ahithofeli wajikela Davide kuze atizuzise yena. (2 Sam. 15:31) Ngalokufanako, tihlubuki kanye nalabehlukanisa libandla basebentisa ‘emavi lamnandzi newekuncoma’ kute bente ngatsi banelutsandvo kantsi banetisusa tebugovu.​—Rom. 16:17, 18.

8. Ngumuphi umbuto lokufanele sitibute wona?

⁸ Lutsandvo lwekutentisa lubi kakhulu ngobe luphambene nebuntfu baNkulunkulu lobulutsandvo lwekutidzela. Jehova uyakhona kubona lutsandvo lwekutentisa nome bantfu bangakhoni. Jesu watsi labo labatentisako ‘batawujeziswa kabuhlungu.’ (Mat. 24:​51) Tikhonti taJehova ngeke tifune kukhombisa lutsandvo lwekutentisa. Kepha senta kahle kutibuta kutsi, ‘Ngihlale ngikhombisa lutsandvo lolute kutentisa, bugovu noma kukhohlisa yini?’ Ase sicoce ngetindlela letingu-9 lesingakhombisa ngato lutsandvo “lolute kutentisa.”

UNGALUKHOMBISA NJANI ‘LUTSANDVO . . . NGETENTO NANGELICINISO’?

9. Lutsandvo lolusuka enhlitiyweni lusikhutsata kutsi senteni?

⁹ Kujabulele kwenta imisebenti lengabonwa ngulabanye. Kufanele sikujabulele kwenta tintfo letikhombisa kutsi siyabatsandza bazalwane betfu ngisho noma labanye bangasiboni. (Fundza Matewu 6:1-4.) Ananiyase naSafira behluleka kwenta loko. Benta shengatsi batonikela ngemali lenyenti kantsi bebangeke banikele ngayo futsi kutentisa kwabo kwaletsa imiphumela lebuhlungu. (Imis. 5:1-10) Ngalokwehlukile, lutsandvo lolusuka enhlitiyweni lusenta sisite bazalwane betfu ngaphandle kwekumemetela noma kubukisa. Nasi sibonelo, bazalwane labasita Sigungu Lesibusako ekulungiseleleni imfundvo levela kuNkulunkulu, abatenti banakwe kakhulu noma bakhulume ngemsebenti labawentile.

10. Singakhombisa njani kutsi sihamba embili ekuhlonipheni labanye?

¹⁰ Hamba embili ekuhlonipheni labanye. (Fundza Roma 12:10.) Jesu wasibekela sibonelo lesihle sekuhlonipha labanye ngekutsi ente imisebenti lephasi kakhulu. (Joh. 13:3-5, 12-15) Kungadzingeka sisebente kamatima siphindze sitfobeke kuze sikhone kuhlonipha labanye. Ngisho nebaphostoli bakhe bebangakucondzi loko Jesu bekakwenta kwaze kwaba ngulapho bemukela umoya longcwele. (Joh. 13:7) Singakhombisa kubahlonipha labanye ngekutsi singatikhukhumeti ngenca yemfundvo, tintfo lesinato kanye nangemalungelo lesinawo enhlanganweni yaJehova. (Rom. 12:⁠3) Esikhundleni sekuba nemona nangabe labanye badvunyiswa, sijabula kanye nabo ngisho noma sibona ngatsi natsi luyasifanela ludvumo noma sibona ngatsi sibe nencenye kulabakufezile.

11. Kungani kufanele sibancome ngalokusuka enhlitiyweni bazalwane betfu?

¹¹ Bancome ngalokusuka enhlitiyweni bazalwane bakho. Kufanele sifune ematfuba ekuncoma bazalwane betfu ngobe loko ‘kungabakha.’ (Ef. 4:29) Noma kunjalo kufanele sikwente ngalokusuka enhlitiyweni, singabayengi noma singabaniki seluleko labasidzingako. (Taga 29:5) Kuncoma umuntfu bese umkhuluma kabi kulabanye kukutentisa. Umphostoli Pawula walubalekela lolugibe futsi wasibekela sibonelo lesihle sekukhombisa lutsandvo lolusuka enhlitiyweni endleleni labencoma ngayo labanye. Nasi sibonelo, wawancoma ngalokusuka enhlitiyweni emaKhristu aseKhorinte ngendlela lebekatiphatsa ngayo. (1 Khor. 11:2) Kepha ngesikhatsi sekatiphatsa kabi, abengawancomi futsi ngemusa bekawachazela kahle sizatfu saloko.​—1 Khor. 11:20-22.

12. Singalukhombisa njani lutsandvo lolusuka enhlitiyweni nasemukela tivakashi?

¹² Yemukela tivakashi. Jehova usiyala kutsi sibasite bazalwane betfu. (Fundza 1 Johane 3:17.) Loko kufanele sikwente ngetisusa letinhle, hhayi tebugovu. Singatibuta kutsi: ‘Umoya wekwemukela tivakashi ngiwukhombisa kubangani bami kuphela yini, kubantfu labatiwako noma kubantfu labangakhona kungentela lokutsite? Noma ngibuka tindlela tekupha bazalwane nabodzadze lengingabati noma labete labangangipha kona?’ (Luk. 14:12-14) Kungenteka umKhristu lesikanye naye eswele lokutsite ngenca yekwehluleka kuhlela kahle noma simsite bese akasabongi ngelusito lwetfu. Etimeni letinjalo kufanele silalele umyalo lotsi: “Nibonakekelana ngaphandle kwekukhonona.” (1 Phet. 4:9) Nasilalela lomyalo sitawutfola tibusiso nenjabulo letfolakala ngekupha unetisusa letinhle.​—Imis. 20:35.

13. (a) Kunini lapho kungaba matima khona kusita bantfu lababutsakatsaka? (b) Yini lesingayenta kute sisekele labo lababutsakatsaka?

¹³ Sekela labo lababutsakatsaka. Umyalo loseBhayibhelini lotsi kufanele “nisekele lababutsakatsaka, futsi nibeketelele bonkhe bantfu” ungaluvivinya lutsandvo lwetfu. (1 Thes. 5:14) Ngisho noma labanye labebabutsakatsaka sebacinile ekukholweni, labanye badzinga kutsi sibabeketelele futsi sichubeke sibasekela. Loku singakwenta ngekutsi sibacocele tintfo letakhako letiseBhayibhelini, sibacele kutsi basebente natsi ensimini, noma sitinike sikhatsi sekubalalela. Ngetulu kwaloko, kunekutsi sicabange kutsi umzalwane noma dzadze “ucinile” ekukholweni noma “ubutsakatsaka,” kufanele sikhumbule kutsi sonkhe sinabo butsakatsaka. Ngisho nemphostoli Pawula wawavuma emaphutsa akhe. (2 Khor. 12:9, 10) Kungako sonkhe singazuza ekusekelweni bazalwane betfu.

14. Kufanele sitimisele kanganani kulondvolota kuthula nebazalwane betfu?

¹⁴ Yakha kuthula. Senta konkhe lokusemandleni etfu kute silondvolote kuthula nebazalwane betfu ngisho noma siva ngatsi siphetfwe kabi. (Fundza Roma 12:17, 18.) Kucolisa ngalokusuka enhlitiyweni kungenta simo sibe ncono. Nasi sibonelo, esikhundleni sekutsi utsi, “Ngiyacolisa nangabe utiva kanjalo,” ungalivuma liphutsa lolentile ngekutsi utsi, “Ngiyacolisa ngekutsi ngikuvise buhlungu ngalengikukhulumile.” Kubalulekile kutsi emshadweni kube nekuthula. Indvodza nemfati akukafaneli bente ngatsi bayatsandzana embikwebantfu kepha bangakhulumisani nababodvwa, basebentise emavi lalimatako noma bashayane.

15. Singakhombisa njani kutsi sicolele ngalokusuka enhlitiyweni?

¹⁵ Tsetselela ngekukhululeka. Loku singakwenta ngekutsi sibacolele bantfu labasonile futsi singabatfukutseleli. Nangabe ‘sibeketelelana ngelutsandvo, futsi sikhutsalele kugcina bunye bemoya ngesibopho sekuthula’ sitawukhona kubatsetselela ngekukhululeka labo labasone bangakacondzi. (Ef. 4:2, 3) Kute sicolelane ngalokusuka enhlitiyweni, kufanele silawule indlela lesicabanga ngayo futsi singabambelani ‘emagcubu.’ (1 Khor. 13:4, 5) Kubamba emagcubu kanye nekufukamela inzondo akugcini nje ngekubeka buhlobo betfu nebazalwane engotini, kodvwa kuphindze kubeke nebuhlobo betfu naJehova engotini. (Mat. 6:14, 15) Singakhombisa kutsi sibacolele ngekukhululeka labo labasonile ngekutsi sibathantazele.​—Luk. 6:27, 28.

16. Kufanele siwatsatse njani emalungelo lesinawo enhlanganweni yaJehova?

¹⁶ Timisele kutidzela. Emalungelo lesinawo enhlanganweni yaJehova kufanele siwatsatse njengelitfuba lekukhombisa kutsi bazalwane sibatsandza ngalokusuka enhlitiyweni ngekutsi ‘singatifuneli lokusita tsine, kodvwa sichubeke sifuna lokusita lomunye umuntfu.’ (1 Khor. 10:24) Nasi sibonelo, emihlanganweni lemincane nalemikhulu balindzi bafika kucala kunatsi sonkhe. Esikhundleni sekutsi loko bakutsatse njengelitfuba lekutifunela bona nemindeni yabo titulo letikahle, labazalwane bahlala nje etitulweni letisedvute nalapho babelwe khona. Ngekutsi bangatifuneli lokusita bona, basuke bakhombisa kutsi banelutsandvo lolute bugovu. Ungasilingisa njani sibonelo sabo lesihle?

17. Lutsandvo lolusuka enhlitiyweni lungakhutsata umuntfu lowente sono lesikhulu kutsi enteni?

¹⁷ Tivume tono lotente ngasese futsi utishiye. Lamanye emaKhristu lente tono letinkhulu etama kutifihla ngoba angafuni kuhlazeka noma kudvumata labanye. (Taga 28:13) Kwenta njalo akukhombisi lutsandvo futsi akugcini nje ngekulimata lona lowonile kepha kulimata nalabanye. Kungawuvimba umoya longcwele waNkulunkulu futsi kungabeka kuthula kwelibandla engotini. (Ef. 4:30) Lutsandvo lolusuka enhlitiyweni lungenta emaKhristu lente tono letinkhulu kutsi atjele labadzala belibandla kute awanike lusito lawaludzingako.​—Jak. 5:14, 15.

18. Lubaluleke kanganani lutsandvo lolusuka enhlitiyweni?

¹⁸ Lutsandvo lubuntfu lobubaluleke kakhulu kunabo bonkhe. (1 Khor. 13:13) Ngilo lolusenta sibonakale kutsi sibalandzeli baJesu futsi silingisa Jehova longuMtfombo welutsandvo. (Ef. 5:1, 2) Pawula watsi: ‘Nangite lutsandvo, ngisuke ngingasilutfo.’ (1 Khor. 13:2) Shengatsi singachubeka sikhombisa lutsandvo, hhayi nje ngemavi kuphela kodvwa “ngetento nangeliciniso.”