Usakhumbula Yini?

Ungakhona yini kuphendvula lemibuto letfolakala ku-Sicongosekulindza sa-2019?

Sisho kutsini setsembiso saNkulunkulu lesitsi: “Kute sikhali lesilolelwa kulwa nawe lesiyawuphumelela”? (Isa. 54:17)

Singetsemba kutsi Nkulunkulu utasivikela emimoyeni lemibi lefana ‘nekuphefumula kwalabanelunya.’ (Isa. 25:4, 5) Titsa tetfu angeke tikhone kusilimata sikhatsi lesidze.—w19.01, emakh. 6-7.

Indlela Nkulunkulu lawaphatsa ngayo emaKhenani kanye nema-Israyeli lebekangamlaleli yakhombisa njani kutsi ulungile?

Nkulunkulu wabehlulela labo lebebatiphatsa kabi futsi bahlukumeta bafati kanye nebatfwana. Wababusisa bantfu lebebamlalela futsi lebebabaphatsa kahle labanye.—w19.02, emakh. 22-23.

Kufanele sente njani nangabe umuntfu longakholwa athantaza?

Kufanele simhloniphe futsi sithule singasho nekutsi “ameni” nome sibambane tandla. Singatithantazela enhlitiyweni.—w19.03, likh. 31.

Yinkhulu kanganani indzaba yekuhlukumeta umtfwana?

Kuhlukumeta umntfwana kusono lesikhulu lesenteka kuye, ebandleni, emagunyeni, kanye nakuNkulunkulu. Nangabe umtsetfo welive ufuna kubikwe nakunetinsolo tekuhlukunyetwa kwalotsite, labadzala bayabambisana nawo.—w19.05, emakh. 9-10.

Ungayishintja futsi uyitfutfukise njani indlela locabanga ngayo?

Tintfo letibalulekile ngunati: Khuluma naJehova ngemthantazo. Zindla ube unemgomo wekutihlolisisa. Bakhetse ngekuhlakanipha bantfu lotihlanganisa nabo.—w19.06, likh. 11.

Yini lesingayenta nyalo kuze sikulungele kushushiswa?

Kudzingeka sicinise buhlobo betfu naJehova. Siciniseke kutsi uyasitsandza futsi ngeke asishiye. Lifundze onkhe malanga liBhayibheli, futsi uthantaze ngaso sonkhe sikhatsi. Ciniseka kutsi titawugcwaliseka tibusiso letitawuletfwa nguMbuso. Yibambe ngenhloko imiBhalo netingoma lotitsandzako.—w19.07, emakh. 2-4.

Yini lesingayenta kuze sisite tihlobo tetfu tisindziswe?

Kubalulekile kutsi sibavele labanye, nekutiphatsa kwetfu kufanele kube ngiko lokuniketa bufakazi, futsi sibeketele siphindze sihlakaniphe.—w19.08, emakh. 15-17.

Sikutfola njani kuphumula njengobe Jesu asetsembisa kuMatewu 11:28?

Sinebabonisi labangemaKhristu labanelutsandvo, sinebangani labakahle kakhulu futsi sinemsebenti loncono kakhulu.—w19.09, likh. 23.

Nkulunkulu usinika njani sifiso kanye nemandla ekwenta intsandvo yakhe? (Fil. 2:13)

Njengobe sifundza liVi laNkulunkulu futsi sizindla ngalo, Nkulunkulu utasiniketa emandla, asiphe nesifiso sekwenta intsandvo yakhe. Umoya wakhe utasisita sitfutfukise buntfu betfu.—w19.10, likh. 21.

Ngutiphi tintfo lokufanele sitente ngaphambi kwekutsi sitsatse sincumo lesibalulekile?

Tintfo letisihlanu longatenta ngunati: Cwaningisisa. Thantaza ucele kuhlakanipha. Hlolisisa tisusa takho. Kwati lokufunako. Bani nembono lokahle.—w19.11, emakh. 27-29.

Indzaba yemphefumulo longafi iyahambisana yini naloko lokwashiwo nguSathane ku-Eva?

Ayihambisani. Sathane watjela Eva kutsi ngeke afe, hhayi kutsi kutawubonakala shengatsi ufile. Yonkhe imibono lengemanga beyingeke isindze ngesikhatsi sazamcolo. Kungenteka kutsi kukholelwa emfundzisweni yemphefumulo longafi kwacala ngaphambi kwekutsi Nkulunkulu ahlakate bantfu lebebakha umbhoshongo waseBhabheli.—w19.12, likh. 15.