Nakusabusa Nkulunkulu, indalo yonkhe beyinebunye futsi inekuthula

Yini Lesenta Sidzinge UMbuso WaNkulunkulu?

Kusukela ekucaleni kwemlandvo webantfu, uMdali wetfu Jehova, bekusolo kunguye yedvwa uMbusi. Bekabusa ngelutsandvo. Wentela bantfu likhaya lelihle, ingadze yase-Edeni kute bahlale kulo. Waphindze wabanika nekudla lokunyenti. Ngetulu kwaloko, wanika bantfu umsebenti lonenjongo lokwakufanele bawente. (Genesisi 1:28, 29; 2:8, 15) Ngephansi kwekubusa kwaNkulunkulu kwelutsandvo, bantfu bebatawujabulela kuthula.

Adamu uphetse sitjelo lasiniketwe ngu-Eva futsi lebekungakafaneli asidle. — Bantfu bekucala abazange bavume kubuswa nguNkulunkulu

LiBhayibheli liveta kutsi ingilosi, kamuva leyabitwa ngekutsi nguSathane Develi, yalwisana nelilungelo laNkulunkulu lekubusa. Beyifuna bantfu bakholelwe kutsi bangajabula ngaphandle kwekucondziswa nekubuswa nguNkulunkulu. Lokudzabukisako kutsi batali betfu bekucala, bo-Adamu na-Eva, bawakholwa lamanga aSathane nabo bavukela Nkulunkulu kanye nelilungelo lakhe lekubusa.—Genesisi 3:1-6; Sembulo 12:9.

Ngenca yekutsi bo-Adamu na-Eva abazange bafune kubuswa nguNkulunkulu, balahlekelwa likhaya labo lelilipharadisi nekuphila phakadze bete sono. (Genesisi 3:17-19) Lesincumo labasenta satsintsa nebantfwana lababa nabo. LiBhayibheli litsi ngenca yekona kwa-Adamu, “sono sangena . . . eveni, nekufa kwangena ngesono.” (KubaseRoma 5:12) Kuba nesono kwaletsa lomunye umphumela lobuhlungu lokutsi, “Umuntfu ubuse lomunye umuntfu wase uyamlimata.” (Umshumayeli 8:9) Ngalamafisha, bantfu nabatibusa bona, tinkinga tiyandza.

KWACALA NJANI KUBUSA KWEBANTFU?

Nimrodi ume ngendlela lekhombisa kutsi uyatikhukhumeta. Ngemuva kwakhe, kunebantfu labakha sakhiwo lesitsite. — Nimrodi wavukela Jehova

Umbusi wekucala longumuntfu lokukhulunywa ngaye eBhayibhelini, nguNimrodi. Wavukela ligunya laJehova lekubusa. Kusukela ngesikhatsi saNimrodi, bantfu labasemagunyeni bawasebentise kabi emandla abo ekubusa. Eminyakeni lengu-3 000 leyendlulile, iNkhosi Solomoni yatsi: “Ngabona tinyembeti talabacindzetelekile, futsi bekute lobadvudvutako. Labo lebebacindzetela labanye bebanemandla.”—Umshumayeli 4:1.

Sinetinkinga letifanako nalamuhla. Nga-2009, lenye incwadzi yaMhlabuhlangene yatsi kubusa kabi kutsatfwa “njengalenye yetintfo letibangela bubi emiphakatsini.”

SESIKHATSI SEKUTSATSA SINYATSELO!

Umhlaba udzinga babusi labancono nahulumende loncono. Nguloko kanye uMdali wetfu lasetsembise kona!

Sitfombe: Imiphumela yahulumende webantfu. 1. Wesifazane wase-Asia uhleti emgwacweni longcolile futsi uphetse umntfwanakhe lokhalako. 2. Indvodza leseyikhulile legulako ilele esibhedlela. 3. Emasotja ayadubula emphini. 4. Babhikishi labatfukutsele bayamemeta futsi baphetse emabhodi labhaliwe. 5. Wesifazane ume nendvodzakati yakhe ngaphandle kwelikhaya labo, futsi batfola sivalo sengilasi siphukile. 6. Lidolobha leligcwele intfutfu, boshimela kanye netintsambo tagesi. — Ngisho nabohulumende bebantfu lababusa kahle, behlulekile kucatulula tinkinga letimatima tebantfu

Nkulunkulu umise uMbuso, noma hulumende lotawutsatsa indzawo yabo bonkhe babusi lababantfu futsi “ngiwo wodvwa lotawuma kuze kube phakadze.” (Danyela 2:44) Lona nguloMbuso tigidzi lebetisolo tiwuthantazela. (Matewu 6:9, 10) Kodvwa akusuye Nkulunkulu lotawubusa lohulumende. Kunaloko, ukhetse umuntfu lowake waphila emhlabeni kutsi abe nguMbusi. Ngubani lomuntfu Nkulunkulu lamkhetsile kutsi abe ngumbusi?