Yini Letawufezwa NguMbuso WaNkulunkulu?

YINI LESEYENTIWE NGUMBUSO WANKULUNKULU?

Esihlokweni lesendlulile, sikhulume ngeluphawu Jesu laluveta. Loluphawu luveta bufakazi bekutsi uMbuso waNkulunkulu wamiswa ezulwini kanye nekutsi Jesu Khristu uyiNkhosi yawo.

LiBhayibheli litsi ngesikhatsi Jesu acala kubusa, wacosha Sathane nemadimoni akhe ezulwini. Ngako-ke, konkhe Sathane nemadimoni akhe labakwentako, bakwenta kuphela emhlabeni, lokungulesinye setizatfu letente tintfo taba timbi kusukela nga-1914.​—Sembulo 12:7, 9.

Ngisho noma timo tiba timbi kakhulu emhlabeni, Jesu, loyiNkhosi yeMbuso waNkulunkulu, wente lokunyenti kuze asite bantfu emhlabeni wonkhe. Siwujabulela kakhulu umsebenti lowentiwa emhlabeni wonkhe wekufundzisa ngeliBhayibheli Jesu labiketela ngawo, bantfu labanyenti sebafundza baphindze basebentise timiso teliBhayibheli ekuphileni kwabo kwamalanga onkhe. (Isaya 2:2-4) Tigidzi tebantfu setifundze kuba nembono lokahle ngemsebenti, tafundza nendlela yekutfutfukisa kuphila kwemindeni yato, futsi tiyakujabulela kuba nemcebo, kodvwa atisisebentisi sikhatsi nemandla ato tifuna lokunyenti. Tifundza indlela letingazuza ngayo nyalo futsi setiluhlobo lwebantfu Nkulunkulu lalufunako eMbusweni wakhe.

YINI LELANDZELAKO LETAWENTIWA NGUMBUSO WANKULUNKULU?

gisho noma Jesu sekabusa ezulwini, bohulumende bebantfu solo basabusa emhlabeni. Nobe kunjalo, Nkulunkulu uyale Jesu watsi: “Ngena emkhatsini wetitsa takho futsi utincobe.” (Tihlabelelo 110:2) Madvute, Jesu utawubhubhisa tonkhe titsa takhe bese uletsa inkhululeko kulabo labafuna kwenta intsandvo yaNkulunkulu.

Ngaleso sikhatsi, uMbuso waNkulunkulu utawutsatsa sinyatselo kuze

• Ubhubhise inkholo yemanga. Tinkholo letifundzise emanga ngaNkulunkulu, taphindze tenta nekuphila kwebantfu kwaba matima, titawubhujiswa. LiBhayibheli lifananisa inkholo yemanga nengwadla. Kubhujiswa kwayo kutawetfusa labanyenti.​—Sembulo 17:15, 16.

• Ucedze kubusa kwebantfu. UMbuso waNkulunkulu utawutsatsa sinyatselo kuze ucedze konkhe kubusa kwebantfu.​—Sembulo 19:15, 17, 18.

• Ususe bantfu lababi. Yini letawukwenteka kulabatimisele kwenta bubi futsi labangafuni kulalela Nkulunkulu? “Kodvwa lababi batawucedvwa emhlabeni.”​—Taga 2:22.

• Ususe Sathane nemadimoni. Sathane nemadimoni akhe ngeke basachubeka “nekudukisa tive.”​—Sembulo 20:3, 10.

Loku kutawube kusho kutsini kulabo labemukela uMbuso waNkulunkulu?

LOKO UMBUSO WANKULUNKULU LOTAWUKWENTELA BANTFU

Nasekabusa njengeNkhosi ezulwini, Jesu utawufeza tintfo letinyenti kwendlula nome ngabe ngumuphi umbusi longumuntfu. Utawube asitwa ngulabangu-144 000 labakhetfwe emhlabeni futsi labatawubusa naye. (Sembulo 5:9, 10; 14:1, 3) Utawucinisekisa kutsi intsandvo yaNkulunkulu iyenteka lapha emhlabeni. UMbuso waNkulunkulu utawubentelani bantfu labatawube baphila emhlabeni?

• Utawucedza kugula kanye nekufa. “Kute lohlala khona loyawutsi: ‘Ngiyagula,’” futsi “kufa ngeke kusaba khona.”​—Isaya 33:24; Sembulo 21:4.

• Utawucinisekisa kutsi kunekuthula nekulondzeka sibili. “Kuthula kwemadvodzana akho kuyawuba kukhulu,” futsi “nguloyo naloyo utawuhlala ngephansi kwesihlahla sakhe semagilebisi nangephansi kwesihlahla sakhe semakhiwa, futsi kute lotabesabisa.”​—Isaya 54:13; Mikha 4:4.

• Unikete bantfu umsebenti lonenjongo. “Umsebenti wetandla tebantfu bami lengibakhetsile uyawubajabulisa kakhulu. Angeke basebentele lite.”​—Isaya 65:22, 23.

• Utawulungisa tinkinga temvelo. “Lihlane nendzawo leyomile kutawujabula, indzawo lebekile lelugwadvule itawujabula kakhulu, ichakaze njengembali.”​—Isaya 35:1.

• Utawufundzisa bantfu lokufanele bakwente kuze baphile phakadze. “Kukwati wena lokuphela kwaNkulunkulu weliciniso nekwati loyo lowamtfuma, lokunguJesu Khristu, kuholela ekuphileni lokuphakadze.”​—John 17:3.

Nkulunkulu ufuna kutsi utijabulele letibusiso. (Isaya 48:18) Sihloko lesilandzelako sitawuchaza tintfo longatenta kuze nawe ube yincenye yalelikusasa lelihle.