“Ungaba Lihlahlandlela Lelihle!”
1. Wativa njani lomunye dzadze ngenkonzo yakhe yekuba lihlahlandlela?
1 “Bengingeke ngiwutfole lomunye umsebenti lobewungangenetisa kangaka nobe ungizuzise kakhulu ngekwakamoya.” Washo njalo Kathe B. Palm. Abesacitse emashumi eminyaka njengelihlahlandlela lelikhatsalela labanye ngekushumayela kuto tonkhe tincenye te-Chile, leseNingizimu Melika. Acabanga ngemphilo lezuzisako letfolwa ngulabo labasenkonzweni yasikhatsi sonkhe, mhlawube lomunye watsi kuwe: “Ungaba lihlahlandlela lelihle!”
2. Chaza kutsi kungani kwenetiseka sibili kutfolakala emisebentini yakamoya.
2 Indlela Yekuphila Leyenetisako: Jesu, Losibonelo Setfu, watfola kwenetiseka kweliciniso ngekwenta intsandvo yaBabe wakhe. (Joh. 4:34) Ngako-ke, Jesu abekhuluma ngebucotfo ngesikhatsi afundzisa balandzeli bakhe kutsi kwenetiseka sibili kutfolakala ekwenteni imisebenti lehambelana nekukhonta Jehova. Siyenetiseka nangabe sinaka kakhulu imisebenti lesenta semukelwe nguJehova. Ngetulu kwaloko, njengobe sinikela ngesikhatsi lesengetiwe, emandla kanye netintfo lesinato kute sisite labanye, injabulo yetfu iyandza.—Imis. 20:31, 35.
3. Nguyiphi injabulo lesingayitfola ngekucitsa sikhatsi lesengetiwe enkonzweni?
3 Nasicitsa sikhatsi lesengetiwe enkonzweni, siba nematfuba lamanyenti ekutibonela injabulo yekucalisa nekuchuba tifundvo teliBhayibheli. Ngisho nalapho banikati bemakhaya labanyenti bangasinaki, njengobe sitfola lokuhlangenwe nako nelikhono enkonzweni, singatfola kutsi insimi yetfu iyatsela kunaloko lebesikucabanga ekucaleni. Emahlahlandlela angasebentisa konkhe lakufundzile eSikolweni Semsebenti Semahlahlandlela laya kuso nasacedze umnyaka amahlahlandlela. (2 Thim. 2:15) Njengobe sichubeka ngekutimisela, sisuke sihlanyela inhlanyelo yeliciniso letawutsela titselo esikhatsini lesitako.—Shu. 11:6.
4. Yini lokufanele bantfu labasebasha lesebatawucedza esikolweni bayicabangele?
4 Nine Labasebasha: Njengobe sewutawucedza sikolwa, sewucabangisisile yini ngelikusasa lakho? Kute kube ngunyalo, sikhatsi sakho lesinyenti bewusicitsa emsebentini wakho wesikolwa. Nawucedza sikolwa, utawusisebentisa njani leso sikhatsi? Kunekutsi uphishanekele umsebenti wekutiphilisa, kungaba njani kutsi ngemthantazo ucabangele umgomo wekuba lihlahlandlela lelivamile? Emakhono lotawafundza—lokukufakaza kubantfu labasetimeni letehlukehlukene, kuncoba titsiyo lohlangabetana nato, kufundza kutekhuta, kanye nekutfutfukisa likhono lekufundzisa—atakuzuzisa ekuphileni kwakho konkhe.
5. Batali kanye nemalunga elibandla bangakukhutsata njani kuba lihlahlandlela?
5 Batali, niyayifeza yini indzima yenu yekukhutsata bantfwana benu kutsi bangenele inkonzo yasikhatsi sonkhe? Emavi enu nesibonelo senu lesihle singabasita kakhulu kute tindzaba letiphatselene neMbuso tite kucala kubo. (Mat. 6:33) Ray, lowaba lihlahlandlela nakacedza esikolweni, ukhumbula naku: “Make abehlale aciniseka kutsi kuba lihlahlandlela kuholela endleleni yekuphila leyenetisa kakhulu.” Bonkhe ebandleni bangayikhutsata inkonzo yebuhlahlandlela ngemavi abo kanye nangekuyisekela. Jose wase-Spain utsi: “Ebandleni lami, kuba lihlahlandlela kwakutsatfwa njengemsebenti lomuhle kakhulu webantfu labasha. Emavi abo, kuyijabulela kwabo lenkonzo yebuhlahlandlela kanye nelusito lwabo, kwenta kwaba melula ngami kutsi ngibe lihlahlandlela.”
6. Yini lokufanele siyente nangabe site sifiso sekuba ngemahlahlandlela?
6 Kuncoba Titsiyo: Kodvwa kutsiwani nangabe utsi: ‘Ngite sifiso sekuba lihlahlandlela.’ Nangabe utiva ngaleyo ndlela, thantaza kuJehova umtjele indlela lotiva ngayo, utsi: ‘Angati kutsi ngingakwati yini kuba lihlahlandlela, kodvwa kona ngiyafuna kukujabulisa.’ (Hla. 62:8; Taga 23:26) Ngemuva kwaloko, funa sicondziso sakhe lesivela ngeliVi nangenhlangano yakhe. Emahlahlandlela lavamile lamanyenti acala ‘kunambitsa’ buhlahlandlela ngekutsi abe ngemahlahlandlela lasitako. Injabulo labeyitfola ngaleso sikhatsi yawenta afuna kungenela inkonzo yasikhatsi sonkhe.—Hla. 34:8.
7. Singakuncoba njani kungabata mayelana nekutsi sitawugcwalisa yini umgomo wema-awa langu-70 inyanga nenyanga?
7 Kutsiwani nangabe wesaba kutsi angeke uwugcwalise umgomo wema-awa langu-70 inyanga nenyanga? Kungani ungacoci nemahlahlandlela lanetimo letifanana netakho? (Taga 15:22) Ngemuva kwaloko, bhala phansi luhlelo longalulandzela. Utawutfola kutsi nawubambisisa ematfuba ngesizatfu senkonzo, uyekele tintfo letidla sikhatsi, kutawuba melula kunendlela lobewukucabanga ngayo ekucaleni.—Ef. 5:15, 16.
8. Kungani kukuhle kutsi njengobe sikhatsi sichubeka sihlolisise timo tetfu?
8 Phindze Uhlole Timo Takho: Esikhatsini lesinyenti timo temuntfu tiyashintja. Kuhle kutsi njengobe sikhatsi sichubeka uphindze uhlolisise timo takho. Nasi sibonelo: Sesisondzele yini sikhatsi sakho sekutsatsa umhlalaphansi emsebentini wekutiphilisa? Randy, lowasheshe watsatsa umhlalaphansi utsi: “Lesincumo singisitile kute ngikwati kuba lihlahlandlela lelivamile ngikanye nemkami, futsi loku kusinikete litfuba lekutfutsa siyewukhonta lapho kunesidzingo lesikhulu khona. Ngiye ngatfola tibusiso letinyenti ngesincumo lengisitsatsile, kodvwa lesikhulu kunato tonkhe kuba nanembeza lomuhle.”
9. Yini bantfu labashadile labenta kahle ngekuyihlolisisa?
9 Ngemuva kwekuhlolisisa timo tabo, labanye bantfu labashadile baye batfola kutsi kute sidzingo sekutsi basebente bobabili sikhatsi sonkhe. Loku kungasho kutsi umndeni kufanele unciphise kuletinye tintfo, kodvwa kuwufanele umetamo. John, lonemfati losandza kuyekela umsebenti kute atewukwandzisa inkonzo yakhe, uyalandzisa: “Kute injabulo lelingana nekwati kutsi umfati wami umatasatasa enkonzweni yaJehova lilanga lonkhe.”
10. Yini lekhutsata emaKhristu kutsi acabangele kuba ngemahlahlandlela?
10 Kuboniswa Kwelutsandvo Nekukholwa: Jehova wente kushumayela kwaba ngumsebenti lobaluleke kwendlula nobe ngangumuphi lesingawenta. Lelive lelidzala selitawubhujiswa madvutane, futsi ngulababita libito laJehova kuphela labatawusindziswa. (Rom. 10:13) Lutsandvo lolusuka enhlitiyweni kanye nekubonga ngaloko lasentele kona, kutawusenta sifune kulalela umyalo weNdvodzana yakhe wekushumayela ngekutimisela. (Mat. 28:19, 20; 1 Joh. 5:3) Ngetulu kwaloko, kukholwa mayelana nekutsi siphila emalangeni ekugcina, kutawusisita sente konkhe lesingakwenta enkonzweni nasisekhona sikhatsi, kunekutsi sisebentise lelive ngendlela legcwele.—1 Khor. 7:29-31.
11. Kufanele sitive njani nangabe lotsite atsi singaba lihlahlandlela lelihle?
11 Kuba lihlahlandlela lelivamile kusho lokungetulu kwekucitsa ema-awa lengetiwe ushumayela; kuyindlela lesikubonisa ngayo kutinikela kwetfu kuNkulunkulu. Ngako-ke, nangabe lotsite akutjela kutsi ungaba lihlahlandlela lelihle, kutsatse ngekutsi uyakuncoma. Phindze ucabangele ngemthantazo kuhlanganyela nalabo labentela Nkulunkulu inkonzo leyenetisako.
[Blurb on page 4]
Batali, niyayifeza yini indzima yenu yekukhutsata bantfwana benu kutsi bangenele inkonzo yasikhatsi sonkhe?
[Blurb on page 5]
Jehova wente kushumayela kwaba ngumsebenti lobaluleke kwendlula nobe ngangumuphi lesingawenta.