Lilula Yini Liso Lakho?
1. Kusho kutsini kuba ‘neliso lelilula’?
1 Loko emehlo etfu lakunakako kutsintsa tento tetfu. Kuwenta afaneleke kahle emavi aJesu latsi: ‘Ngako-ke, nangabe liso lakho lilula, nemtimba wakho wonkhe uyakubasekukhanyeni.’ (Mat. 6:22) Nangabe liso letfu ‘lilula’ ngekwendlela Jesu lachaza ngayo, kusho kutsi linake injongo leyodvwa—kwenta intsandvo yaNkulunkulu. Kusho kutsi sibeka uMbuso kucala futsi asiphatanyiswa ngumcebo nobe tintfo letingasivimba enkonzweni.
2. Yini lengashintja umbono wetfu, kodvwa yini letawusisita?
2 Kunesidzingo Sekutihlola: Umbono wetfu ngetintfo lesitidzingako ungashintjwa nguloko tekukhangisa letitsi siyakudzinga, nobe tintfo labanye labanato. Ngembikwekutsi sifune nobe sitsenge intfo letawudla sikhatsi setfu, imali, kanye nemandla etfu, kuhle kutsi sicale ‘sibale tindleko,’ ngekutibuta: ‘Lentfo itawuyitfutfukisa yini inkonzo yami lengiyentela Jehova, nobe itawuyiphatamisa?’ (Luk. 14:28; Fil. 1:9-11) Kukuhlakanipha nekutsi ngaso sonkhe sikhatsi sicabange ngetindlela lesingakwenta ngayo kuphila kwetfu kube melula, kute sitewukwati kwenta lokwengetiwe enkonzweni.—2 Khor. 13:5; Ef. 5:10.
3. Yini lesiyifundza kulomunye dzadze lowenta lushintjo ngekwenta kuphila kwakhe kube melula?
3 Ngesikhatsi lomunye dzadze angenela buhlahlandlela lobuvamile, wakhetsa kungawuyekeli umsebenti wekutiphilisa wasikhatsi sonkhe, nanobe umsebenti wesikhashana bewungatinakekela tidzingo takhe. Ngekuhamba kwesikhatsi watsi: “Kute umuntfu longakhonta emakhosi lamabili. Kuye kwadzingeka kutsi ngishiye tintfo lengitifunako kute ngikwati kunakekela tidzingo tami. Ngiye ngacaphela kutsi umcebo uphelelwa sikhatsi, futsi nangichubeka ngiwugijimisa, ngitawukhatsala.” Timo takhe tamvumela kutsi ente lushintjo ngekwenta kuphila kwakhe kube melula, futsi ashintje nemsebenti. Loku kwamenta wakwati kuchubeka nenkonzo yebuhlahlandlela.
4. Kungani kuphutfuma ngatsi kutsi sitigcine sineliso lelilula?
4 Kuphutfuma kwesikhatsi lesiphila kuso kwenta kubaluleke nakakhulu kutsi sitigcine sineliso lelilula. Lilanga ngalinye lelendlulako lisisondzeta edvute nekuphela kwalelive kanye naseveni lelisha laNkulunkulu. (1 Khor. 7:29, 31) Ngekunaka kakhulu umsebenti wekushumayela, singatisindzisa tsine kanye nalabo labasilalelako.—1 Thim. 4:16.