Ngenta Konkhe Lengingakwenta Yini Emsebentini Wekushumayela?
1. Ngutiphi tintfo letingakhatsata umKhristu lowetsembekile?
1 Wake watibuta yini lombuto? Mhlawumbe lizinga lohlanganyela ngalo emsebentini wekushumayela selehlile ngesizatfu sekukhula, tinkinga temphilo, nobe imitfwalo yasekhaya leminyenti lekucedza emandla. Lomunye dzadze lonebantfwana labatsatfu watsi ngaletinye tikhatsi utiva anelicala ngobe sikhatsi kanye nemandla lawasebentisa ekunakekeleni umndeni wakhe kumnciphisela loko langakwenta emsebentini wekushumayela. Yini lengasisita kutsi sitsatse tintfo ngendlela lefanele?
2. Yini Jehova layilindzele kitsi?
2 Loko Jehova Lakulindzele Kitsi: Asingabati kutsi sonkhe besingafisa kwenta lokwengetiwe emsebentini wekushumayela. Kodvwa kunemehluko lomkhulu emkhatsini waloko lesifisa kukwenta kanye naloko lesingakwenta mbamba. Liciniso lekutsi sifuna kwenta lokwengetiwe likhombisa kutsi asisibo bantfu labangenandzaba. Kufanele sikhumbule kutsi Jehova uyakwati loko lesingakhona kukwenta futsi akalindzeli kutsi sente lokungetulu kwaloko. (Hla. 103:13, 14) Yini layilindzele kitsi? Ufuna kutsi simkhonte ngenhlitiyo yonkhe, simnikete lokuncono kakhulu kwetfu.—Khol. 3:23.
3. Singakuhlola njani loko lesingakwenta emsebentini wekushumayela?
3 Yini lengasisita kutsi sibone loko lesingakwati kukwenta? Singacela Jehova kutsi asisite sibuke simo setfu ngembono lofanele. (Hla. 26:2) Angaba lusito umKhristu lesimetsembako, lokhulile ngekwakamoya, losati kahle, kanye nalongesabi kusitjela kutsi kufanele sitfutfuke. (Taga 27:9) Khumbula nekutsi njengobe timo tishintja, kungasizuzisa kuhlolisisa timo tetfu ngaso sonkhe sikhatsi.—Ef. 5:10.
4. Kufanele sititsatse njani tikhumbuto letisekelwe eBhayibhelini letimayelana nemsebenti wekushumayela?
4 Indlela Lesingatitsatsa Ngayo Tikhumbuto Letimayelana Nemsebenti Wetfu: Nakusachubeka umjako, tibukeli tiye tisho emavi ekukhutsata. Injongo yaloku akusiko kuticedza emandla tingijimi, kodvwa ikutisita kutsi tifike emgomeni wato. Ngendlela lefananako, sikhutsato kanye netikhumbuto letisekelwe eBhayibhelini ‘tekushumayela livi’ lesititfola emihlanganweni nasetincwadzini tizuzisa tsine. Tisuke tingasho kutsi imetamo yetfu ayikeneli. (2 Thim. 4:2) Singaciniseka kutsi nasisachubeka setama kwenta lokuncono kakhulu, Jehova utawuyikhumbula futsi ayemukele ‘imisebenti kanye nelutsandvo’ lwetfu.—Heb. 6:10.